2026-03-11
Deuteronomium 28:2 NLV
Jode sê elke dag ‘n minimum van eenhonderd seëngebede op wat met die Hebreeuse formule: Baruch Atah Adonai begin. Praktiserende Jode seën God wanneer hulle iets vir die eerste keer sien of ervaar. Hulle seën God vir reuke en smake. As iets aangenaam is, seën hulle God. As jy iets volgens die Talmoed geniet, sonder om ‘n seën te spreek, is dit asof jy dit gesteel het. ‘As jy die Here God gehoorsaam, sal jy al die seëninge beleef.’
Jy weet nooit hoe of wanneer God jou sal seën nie. Anders as sy goedheid en genade wat ons al die dae van ons lewe vergesel (sien Psalm 23:6), volg die seëninge van God jou soos ‘n hittesoekende missiel. Hulle is warm op jou spoor en eendag gaan hulle jou inhaal.
God seën ons nie sodat ons ‘n hoër lewenstandaard kan volg nie; Hy seën ons sodat ons in staat is om meer te gee. Die grootste seën is die vermoë om ander mense te seën. Is jy geseënd? Dan moet jy die seën omkeer en ander mense seën. Waar het God jou guns bewys? Dis waar jy die guns moet terugbetaal. Daar is geen groter vreugde as om aan die geekant van ‘n geskenk te wees nie. Is dit nie wat Jesus gesê het nie? ‘…Dit is meer geseënd om te gee as om te ontvang’ (Handelinge 20:35 NLV).
Daar is honderde seëninge in die Skrif, elk met jou naam op. As jy in Christus is, behoort hierdie seëninge aan jou. ‘want al die baie beloftes van God in Christus Jesus is ‘n volmondige ‘ja’…’ (2 Korintiërs 1:20 NLV). Tel dus jou seëninge.
Sielskos: 2 Kon 18:17-20:21; Luk 15:11-32; Ps 27; Spr 7:10-20
2026-03-10
Filippense 1:3 NLV
Paulus gebruik een hele hoofstuk in die boek Romeine om die mense wat hom gehelp het op te noem en sy waardering teenoor hulle uit te spreek. Deur te wys dat jy mense waardeer bo en behalwe wat hulle vir jou kan doen of beteken, wys dat jy werklik vir hulle omgee. Opregte lof kan hulle soos verwelkte blomme wat pas reën gekry het, laat floreer. ‘n Mens kan baie welwillendheid opbou deur jou waardering oor die klein dingetjies uit te spreek.
Indien jy vriendelikheid en inspanning as vanselfsprekend begin aanvaar, lees die volgende lys van take en verantwoordelikhede waarvoor jy waardering moet toon: Die huis skoonmaak. Maaltye voorberei. Die rekeninge betaal. Werk toe gaan. Geld op ‘n wyse manier spandeer. Kruideniersware koop. Die klere was en opvou. Die kinders bad. Die asblik leegmaak. Petrol in die motor gooi. Betyds wees. Die gras of plante natgooi. Verjaardaggeskenke vir familielede kies. Jou loopbaan ondersteun. Verantwoordelik wees. Luister. Die lys is eindeloos.
Stel vir jouself ‘n doelwit om ten minste een keer per dag jou waardering teenoor ‘n sekere persoon uit te spreek. Moenie dink dat jy swak sal voorkom wanneer jy die klein dingetjies begin raaksien nie. Dit verg ‘n ware man of vrou om verder as sy of haar behoeftes te kyk en die inspanning van iemand anders te erken. Wanneer jy seker van jou eie identiteit is, kan jy mense bemagtig deur hulle ingelig te hou, hulle te vertrou, vir hulle om te gee en hulle te waardeer.
Sielskos: 2 Kon 16:1-18:16; Luk 15:1-10; Ps 112; Spr 7:6-9
2026-03-09
Jakobus 5:11 NLV
Ons dink dikwels dat groot kunstenaars en musikante oomblikke van inspirasie het waarin hul meesterstukke geskep word. Meer dikwels is hul meesterstukke egter voorbeelde van noukeurige geduld en deursettingsvermoë. Hul grootste werke word dikwels oor langer tydperke en deur uiterste ontberinge voltooi.
Daar word gesê dat Beethoven elke maat van sy musiek ten minste ‘n dosyn keer herskryf het. Joseph Haydn het meer as 800 musikale komposisies geskep voordat hy The Creation geskryf het, die oratorium waaraan hy geken word. Michelangelo se The Last Judgement word as een van die twaalf meesterskilderye van die eeue beskou. Dit het hom agt jaar geneem om te voltooi en het meer as 2 000 sketse en weergawes in die proses opgelewer. Leonardo da Vinci het tien jaar lank aan The Last Supper gewerk, dikwels so ywerig dat hy vergeet het om te eet.
Toe die bekende pianis Paderewski redelik bejaard was, het ‘n bewonderaar hom gevra: ‘Is dit waar dat jy nog elke dag oefen?’ Hy het geantwoord: ‘Ja, ten minste ses uur per dag.’ Die bewonderaar het vol ontsag gesê: ‘Jy moet die wêreld se geduld hê.’ Paderewski het geantwoord: ‘Ek het nie meer geduld as die volgende persoon nie. Ek maak net gebruik van myne.’
Daar word gesê dat die perd wat die Kentucky Derby wen basies na die eerste myl uit suurstof hardloop en die res van die pad op hartstog steun. Die basketballegende Michael Jordan sê: ‘Hartstog is wat die goeies van die grotes skei.’
Jakobus het geskryf: ‘Ons gee met reg eer aan dié wat in swaarkry uithou. Job is ‘n voorbeeld van iemand wat geduldig volhard het. Uit wat uiteindelik met hom gebeur het, sien ons dat God se einddoel goed is…’ Diegene wat met sukses geseën word, is diegene wat aanhou, volhard en weier om op te gee.
Sielskos: 2 Kon 13-15; Luk 14:25-35; Ps 106:24-48; Spr 7:3-5
2026-03-08
Hooglied 8:6 KAB23
As jou maat onseker is, moet jy alles in jou vermoë doen om verantwoordbaar te wees. Dit is belangrik om vrywillig voldoende besonderhede te verskaf. Hy of sy soek immers gerusstelling. Leer om op ‘n informele maar deeglike manier te verduidelik waar en saam met wie jy is. Kort antwoorde sal meer onsekerheid veroorsaak en die persoon verskeie negatiewe scenario’s laat verbeel. ‘n Jaloerse persoon is onseker en twyfel dus oor wat nodig is om die verhouding te handhaaf.
Moenie die fout maak om te dink of te sê: ‘Ag, kom nou net oor jou onsekerheid en jaloesie!’ nie. As dit so maklik was, sou jou maat dit teen hierdie tyd al gedoen het. Hou aan om vir hul genesing van hierdie aftakelende ingesteldheid te bid, maar doen ook jou deel om nie die probleem met vae kommunikasie te vererger nie.
Moedig jou maat bowenal aan om oor sy of haar vrese te praat. Luister sonder om krities of veroordelend te wees. Probeer eers om te verstaan. Maak dit duidelik dat jy jou maat liefhet en suiwer bedoelings rakende jul verhouding het.
Hier is egter iets belangriks om in gedagte te hou: Jy moet jou interaksie gebalanseerd hou. Jy moet dit ook duidelik maak dat jy nie in ‘n emosionele tronk gedwing sal word deur vir elke oomblik van die dag rekenskap te moet gee nie. Dit kan die jaloesie vererger en onrealistiese verwagtinge skep.
Vertroue is ‘n tweerigtingstraat. Een manier om vertroue te bou, is deur saam te bid. In gebed word ons eerlik en deursigtig en besef ons dat God reeds elke detail van ons weet. Wanneer jou maat hoor dat jy jou hart in gebed deel, verlig dit ongegronde vrese en skep dit sekuriteit binne-in hulle.
Sielskos: Joh 1:1-5; Matt 5:14-16; 1 Joh 1:1-10
2026-03-07
1 Korintiërs 10:11 NLV
Egipte verteenwoordig ons dae as die slawe van sonde. Toe het Jesus ons bevry en vir ons ‘n nuwe lewe gegee. Ons Beloofde Land is nie ‘n fisiese gebied nie; dit is ‘n geestelike werklikheid. Dit is nie vaste eiendom nie, maar ‘n werklike toestand van hart en gees. Dit is ‘n lewe waarin ‘ons ten spyte van al hierdie dinge besig [is] om ‘n superoorwinning te behaal – oorwinnaars deur Christus wat sy liefde so duidelik aan ons bewys het’ (Romeine 8:37 NLV); ‘n lewe waarin ‘ons nie moed op[gee] nie’ (2 Korintiërs 4:16 NLV). ‘n Lewe waarin ons ‘vol moed en oorstelp van blydskap [is] ten spyte van ons swaarkry’ (2 Korintiërs 7:4 NLV); ons is ‘…oor niks bekommerd… nie’ (Filippense 4:6 NLV); waar ons ‘alles deur gebed en smeking [doen]’ (Efesiërs 6:18 NLV); en ‘n lewe waarin ons alles doen asof ons ‘dit namens die Here Jesus doen. Só is julle heeltyd besig om deur Hom dank aan God die Vader te bring’ (Kolossense 3:17 NLV).
Max Lucado het geskryf: ‘In Kanaän wen ons meer dikwels as wat ons verloor en gee net so oorvloedig as wat ons ontvang. Ons mag struikel, maar ons stort nie in duie nie. Ons mag sukkel, maar ons raak nie wanhopig nie. Ons roem slegs in Christus, vertrou slegs op God en steun geheel en al op sy krag. Ons geniet oorvloedige vrug en toenemende geloof.’ Kanaän simboliseer die oorwinning wat ons vandag kan ontvang. Daar is net een voorwaarde; ons moet ons rug op die woestynlewe draai.
Paulus het geskryf: ‘…God het julle as sy volk gekies… Dít het God bewerk sodat julle vir almal kan wys hoe goed Hy is. Dit is immers Hý wat julle uit die duisternis in sy wonderlike lig ingeroep het’ (1 Petrus 2:9 NLV).
Sielskos: 2 Kon 10-12; Luk 14:15-24; Ps 106:1-23; Spr 7:1-2
2026-03-06
Jakobus 2:10 NLV
Paulus skryf: ‘Dit is mos dié onverdiende goedheid wat julle gered het toe julle tot geloof gekom het. En julle geloof kom nie uit julleself nie, maar is ‘n gawe van God’ (Efesiërs 2:8 NLV). Hoekom sê Paulus ons is slegs deur genade gered? Omdat jy gaan misluk as jy verlossing probeer verkry deur die wet te onderhou. ‘Julle weet mos: iemand wat al die gebooie onderhou behalwe één, is net so skuldig as iemand wat ál die gebooie oortree.’
Jy sê: ‘Dis ‘n onmoontlike standaard om aan te voldoen!’ Jy is reg! Die wet is soos ‘n X-strale-masjien; dit kan dit wat onder die oppervlak is openbaar en die probleem identifiseer, maar dit kan dit nie regmaak nie. Die wet is ook soos ‘n spieël. Dit kan vir jou wys of jy grimering nodig het, of moet skeer, of jou hare moet kam, maar dit kan dit nie vir jou doen nie. Met ander woorde, die wet kan vir jou wys wat jou probleem is, maar dit kan dit nie oplos nie.
Wat die wet egter nie kon doen nie, het Christus aan die kruis gedoen (sien Romeine 8:3). Toe Jesus gesê het: ‘…Dit is nou afgehandel!…’ (Johannes 19:30 NLV), is al jou sondes – van die wieg af tot die graf – versoen. Wanneer jy jou vertroue in Hom plaas, word jy vir tyd en ewigheid gered. Sommige mense erken dat jy deur genade vrygespreek word deur jou vertroue in Christus te plaas. Hulle glo egter dat jy jou verlossing behou deur die werke van die wet te onderhou.
Die probleem is dat jy selfs op jou beste dag nie aan al die eise van ‘n perfekte God kan voldoen nie. Soos een gesang lui: ‘Trusting as the moments fly, trusting as the days go by; trusting Him whate’er befall, trusting Jesus, that is all!’
Sielskos: 2 Kon 7-9; Luk 14:1-14; Ps 136:13-26; Spr 6:32-35
