2026-06-05
Josua 5:2 NLV
Voordat die Israeliete Jerigo verower het, het God vir Josua gesê om die Israeliete vir ‘n tweede keer te besny. Seshonderd jaar tevore het God die praktyk van manlike besnydenis ingestel. Hy het vir Abraham gesê dat dit ‘…’n teken dat julle my verbond nakom’ (Genesis 17:11 NLV), sou wees. Wat was God se bedoeling met die tweede besnydenis? Jy moet onthou aan wie jy behoort!
In ‘n sekere sin is alle gelowiges besny. Paulus het geskryf: ‘Omdat julle één is met Christus is julle ook besny, nie met ‘n besnydenis deur mense nie, maar met die besnydenis wat Christus bewerk. Hierdie besnydenis bestaan uit die wegneem van jou sondige geaardheid’ (Kolossense 2:11 NLV). Dit beteken dat jy nou God se kind (Johannes 1:12); Christus se vriend (Johannes 15:15); ‘n lid van Christus se liggaam (1 Korintiërs 12:27); verlos en vergewe van al jou sondes (Kolossense 1:14); een met Christus (Kolossense 2:10); vry van veroordeling (Romeine 8:1-2); God se medewerker (2 Korintiërs 6:1); saam met Christus in die hemel gesetel (Efesiërs 2:6); God se handewerk (Efesiërs 2:10); ‘n burger van die hemel (Filippense 3:20); aangeneem in God se familie (Efesiërs 1:5); en uit God gebore en bewaar van die bose (1 Johannes 5:18), is.
Weer eens skryf Paulus: ‘Julle moet dus ook verseker weet dat julle vir die sonde dood is, en nou vir God lewe deurdat julle één is met Christus’ (Romeine 6:11 NLV). Wanneer die duiwel dus naby jou kom, moenie sy beskuldigings verduur nie en moenie vir sy aanvalle terugdeins nie. Wanneer hy jou vorige foute ophaal, vertel hom wie jy in Christus is (sien 2 Korintiërs 5:17). Hy het geen verweer teen hierdie waarheid nie. Hy weet wie jy is. Hy hoop net dat jy dit nie weet nie, of dat jy dit sal vergeet.
Sielskos: Eseg 10-13; Matt 15:29-39; Ps 129; Spr 14:25-28
2026-06-04
Josua 4:7 NLV
Jerigo was die sterkste stad in die Beloofde Land en die eerste stad wat Josua se leër moes verower. Omdat Jerigo se mure ondeurdringbaar gelyk het, sou dit intimiderend vir enige voornemende indringer voorgekom het. Daarom het God vir sy mense gesê om te onthou en op te teken wat Hy in die verlede vir hulle gedoen het. Hy het gesê: ‘Kies twaalf mans uit die volk, een uit elke stam en sê vir hulle: ‘Kry twaalf klippe uit die middel van die Jordaan’… by Gilgal het Josua die twaalf klippe… opmekaargestapel’ (Josua 4:2-3, 20 NLV). Josua het dit ter herinnering toe God die water van die Jordaan geskei het, opgerig.
Een van jou beste wapens teen Satan se aanvalle is ‘n goeie geheue. Moenie een van God se seëninge vergeet nie! Die psalmdigter sê: ‘Dit is Hy wat my vergewe as ek verkeerde dinge doen. Hy maak my gesond. Hy red my uit die kloue van die dood… Die Here oorlaai my met al die goeie dinge in die lewe… Die Here help almal wat onderdruk word. Hy is goed’ (Psalm 103:3-6 DB).
Skep ‘n trofeekamer in jou hart. Elke keer as jy ‘n oorwinning ervaar, plaas daardie herinnering op ‘n rak. Voordat jy ‘n uitdaging in die gesig staar, neem ‘n vinnige toer van die prestasies wat God namens jou bereik het. Kyk na al die salarisstrokies wat Hy voorsien het, die seëninge wat Hy gegee het en die gebede wat Hy verhoor het. ‘Maar dít sal ek ter harte neem en om dié rede bly ek hoop: deur die liefde van die Here het ons nie vergaan nie; daar is geen einde aan sy ontferming nie, dit is elke môre nuut. U trou is groot’ (Klaagliedere 3:21-23 AFR83).
Sielskos: Eseg 5-9; Matt 15:15-28; Ps 124; Spr 14:21-24
2026-06-03
Romeine 8:17 NLV
Ons deel dieselfde erfenis as Christus! Wat Hy het, het ons ook! ‘…In hierdie wêreld is ons situasie immers presies dieselfde as Jesus s’n…’ (1 Johannes 4:17 DB). As ons dus mede-erfgename saam met Christus is, waarom sukkel ons deur die lewe? Om twee redes:
1) Ons weet nie van ons erfenis nie. Niemand het ons ooit vertel dat ons vanuit ‘n posisie van oorwinning veg, in plaas daarvan om vir oorwinning te veg nie. Wanneer jy jou hart vir Christus gee, het Hy ‘…al die geestelike skatte wat daar in die hemel is, verniet vir ons gegee’ (Efesiërs 1:3 NLV). Jy besit reeds alles wat jy nodig het om alles te wees wat God begeer. Jy het toegang tot al die geestelike skatte. Dit beteken ook dat God jou ‘…sal toerus met alles wat nodig is om sy wil uit te voer…’ (Hebreërs 13:21 NLV).
2) Ons glo nie in ons erfenis nie. Stel jou voor wat sou gebeur as ‘n generasie Christene vanuit hul erfenis leef. Hulle sou pornografie op die internet afskakel. Die eensames sou vertroosting in God en nie in die arms van vreemdelinge vind nie. Sukkelende paartjies sou meer tyd in gebed en minder tyd in woede deurbring. Kinders sou dit as ‘n seën beskou om na hul bejaarde ouers om te sien.
‘Mag julle insien hoe enorm groot die krag is wat God gebruik in ons wat glo. Dieselfde magtige sterkte was ook aan die werk toe God Christus uit die dood opgewek het…’ (Efesiërs 1:19-20 NLV). Dieselfde inwonende Gees wat Christus uit die dood opgewek het, sal elke ‘Ek kan nie’ van jou in ‘n ‘Ek kan’ verander. ‘Ek kan onder alle omstandighede regkom deur Hom wat my krag gee’ (Filippense 4:13 NLV).
Sielskos: Eseg 1-4; Matt 15:1-14; Ps 4; Spr 14:17-20
2026-06-02
Deuteronomium 30:9 NLV
‘n Jong kunstenaar het eendag haar tante gebel om haar te laat weet dat sy op pad na ‘n luukse oord is om te probeer om haar houtsneewerk van seevoëls aan die eienaar van die geskenkwinkel te verkoop. Sy het haar tante gevra om te bid dat haar onderneming suksesvol sou wees. Haar tante het haar verseker dat sy sou bid vir die grootste bestelling wat sy nog ooit ontvang het!
Daardie aand het die jong kunstenaar haar tante teruggebel. Nie net het die geskenkwinkel-eienaar al haar houtsneewerk gekoop nie, maar ook soveel houtsneewerk bestel as wat sy kon maak! Sy was vol verwondering oor hoe oorvloedig God die gebed verhoor het. ‘Nou moet Tannie asseblief weer bid,’ het sy vir haar tante gesê, ‘dat ek hierdie groot bestelling sal kan nakom!’ Haar tante het geantwoord: ‘Die Here maak nie ‘n deur oop tensy Hy verwag dat ons suksesvol daardeur gaan loop nie. Wanneer ons vir reën bid, moet ons nie verbaas wees as ons ‘n wolkbreuk kry nie!’
Bid jy dat God ‘n behoefte in jou lewe sal vervul? Watter antwoord verwag jy? Wees eerlik. Die absolute minimum? Karig maar bevredigend? Of verwag jy oorvloedige, meer-as-genoeg voorraad? Staan op God se Woord: ‘Die Here jou God sal jou dan voorspoedig maak in alles wat jy doen…’ Jesus het gesê: ‘Ek het gekom sodat hulle lewe kan hê, ja, om dit oorvloedig te hê’ (Johannes 10:10 NLV).
Paulus het geskryf: ‘En God is in staat om aan julle elke gawe in oorvloed te gee sodat julle in elke opsig altyd van alles genoeg kan hê én ook nog oorvloedig kan wees in elke goeie werk’ (2 Korintiërs 9:8 NLV). Glo dus in God vir oorvloed.
Sielskos: Amos 5:18-9:15; Matt 14:22-36; Ps 121; Spr 14:13-16
2026-06-01
Handelinge 6:4 NLV
In haar boek, 30 Days to a Stronger, More Confident You, gebruik die skrywer Deborah Smith Pegues die woord ‘PRAY’ as ‘n akroniem: “‘Pause’. Ek stop alle aktiwiteite en fokus heeltemal op God. Aanbidding verg totale fokus. Die grootste eer en respek wat ons aan enigiemand kan gee, is ons onverdeelde aandag.
‘Reverence’. Ek spreek my bewondering vir al God eienskappe uit. Op hierdie punt begin afleidings soos kakiebosse opduik. Ek sal skielik ‘n taak wat ek op my doenlysie moet sit, onthou. Ek het geleer om gou die taak in my Bybelstudiejoernaal neer te skryf en die ander kwessies te ignoreer vir dit wat hulle is – blote afleidings wat later hanteer kan word. Ek het ook geleer dat om hoorbaar te bid, my help om dwalende gedagtes hok te slaan.
‘Ask.’ Ek vra om vergifnis vir my sondes en probeer om spesifiek daaroor te wees. Ek bid vir die krag om ‘n Christelike lewe te lei en vra God om vir my ‘n passie vir sy Woord en vir gebed te gee. Ek vra dat sy wil in elke aspek van my lewe geskied: geestelik, fisies, finansieel, verhoudingsgewys, beroepsgewys en emosioneel.
‘Yield.’ Ek moet my versoeke aan God se soewereine wil onderwerp, met die vertroue dat Hy weet wat die beste vir my is. Daarom is ek versigtig om my gebed af te sluit deur te sê: ‘Laat nogtans nie my wil nie, Here, maar u wil geld’ (sien Lukas 22:42). Die ou gesegde dat dit nie is wat jy ken nie, maar wie jy ken wat jou die voordeel in ‘n situasie gee, is waar – veral vanuit ‘n geestelike perspektief. Wanneer ons ‘n verhouding met God het, verstaan ons dat Hy voldoende is om enige eise wat aan ons gestel word, te hanteer.”
Sielskos: Amos 1:1-5:17; Matt 14:13-21; Ps 117; Spr 14:9-12
2026-05-31
Matteus 28:20 NLV
Om ‘n persoonlike verhouding met iemand te hê, moet daar tweerigtingkommunikasie wees. Selfs die mees in homself gekeerde man moet elke nou en dan instemmend grom, anders is dit nie ‘n huwelik nie – dis ‘n monoloog. Kommunikasie tussen die Here wat by jou is, en jy wat by die Here is, vind hoofsaaklik in jou gedagtes plaas.
Twee mense mag dalk dieselfde kamer deel, maar as een van hulle slaap of in die televisie verdiep is, is hulle nie regtig bymekaar nie. Daar moet interaktiewe bewustheid wees. Ons het as mense nie direkte toegang tot mekaar se gedagtes nie. Ons kan woorde, menslike aanraking of handgebare gebruik om ‘n ander persoon se gedagtes te rig.
God is egter almagtig, dus is Hy in staat om ons gedagtes direk te rig. Hy kan met ons deur die Skrif of deur die woorde van ‘n ander persoon praat. Hy kan egter ook sy gedagtes direk in ons gedagtes plant. ‘…ons is ingestel om soos Christus te dink’ (1 Korintiërs 2:16 NLV). Dit kan enige tyd en enige plek gebeur. Jou gedagtes is dus jou ontmoetingsplek met God!
Daar is baie omtrent God wat met jou kommunikeer wat ‘n raaisel is. Daar is geen formule nie. Jy kan nie God se kommunikasie met jou beheer nie. Jy kan Hom nie dwing om te praat deur meer vroom of opreg te wees of deur hard te werk nie.
Jesus het vir Nikodemus gesê: ‘Die wind waai waar hy wil. Jy hoor sy suising, maar jy weet nie waarvandaan hy kom en waarheen hy op pad is nie. Só is dit met elkeen wat uit die Gees gebore is’ (Johannes 3:8 NLV). Hiervan kan jy vandag seker wees: God is met jou en Hy sal met jou praat as jy die tyd neem om te luister.
Sielskos: Matt 5:3; 2 Sam 7:18-29; Ps 40:17
