2023-06-21
Spreuke 17:22 NLV
Hier is nog twee dinge wat jy moet doen om geduld te ontwikkel:
1) Ontwikkel ‘n sin vir humor. Die Bybel sê: ‘Innerlike kalmte bevorder die gesondheid…’ (Spreuke 14:30 NLV). Wetenskaplike navorsing het bewys dat mense wat lag, langer lewe. Humor los stres op. Dit is ‘n teenmiddel vir vrees. Dit is ‘n kalmeermiddel sonder enige lastige newe-effekte. Dit is ‘n skokbreker vir die slaggate van die lewe. Iemand het een keer vir president Abraham Lincoln gevra hoe hy die spanning van die Burgeroorlog hanteer het. Hy het gesê: ‘As dit nie vir lag was nie, sou ek dit nie gemaak het nie.’ Wanneer jy daarvoor kan lag, kan jy daarmee lewe. Ook, as jy leer om vir jou probleme te lag, sal jy nooit uit dinge hardloop om voor te lag nie!
2) Verdiep jou liefde. Paulus skryf: ‘Die liefde is geduldig…’ (1 Korintiërs 13:4 NLV). Dit beteken dat wanneer jy ongeduldig is, is jy besig om liefdeloos te wees. Wanneer jy vir iemand lief is, is jy oor daardie persoon se wense, nood, behoeftes en oogpunt besorg – nie net oor jou eie nie. Wanneer jy met liefde gevul is, kan amper niks jou tot woede of ongeduld uitlok nie. Aan die ander kant, wanneer jy met woede gevul is, kan amper enigiets jou uitlok. Wanneer jy onder druk is, kom dit wat binne jou is na vore. Verdiep dus jou liefde. ‘Met totale beskeidenheid en sagmoedigheid, ja, met geduld moet julle mekaar in liefde verdra’ (Efesiërs 4:2 NLV). Wanneer jy leer om die mense wat jou irriteer lief te hê, neem jy ‘n wapen wat Satan kan gebruik, uit sy hande. Bid vandag: ‘Here, maak my meer geduldig.’
Sielskos: 2 Kon 21-23; Matt 20:17-28; Ps 139:13-24; Spr 13:25
2023-06-20
Spreuke 14:29 NLV
Geduld begin deur die manier hoe jy iets sien, te verander. Wanneer jy ongeduldig is, is jou perspektief smal. Al wat jy sien is jouself: jou behoeftes, doelwitte, skedule, begeertes en die manier wat mense jou lewe opmors. Die wortel van ongeduld is basies selfsug. Probeer om dinge uit die ander persoon se perspektief te sien. As jy sukses in jou huwelik wil behaal, leer om die lewe vanuit jou eggenoot se perspektief te sien. As jy as ouer sukses wil behaal, leer om dinge uit jou kind se perspektief te sien. As jy sukses in besigheid wil behaal, leer om dinge uit jou kliënt se perspektief te sien. As jy ‘n suksesvolle werkgewer wil wees, leer om dinge uit jou werknemer se perspektief te sien. Probeer uitvind hoekom die ander persoon voel soos hulle voel. As jy nooit irritasies en onderbrekings hanteer nie, sal jy nooit geduld ontwikkel nie.
Jy moet die waarheid dat God jou treë rig en dat vertroue nie verduidelikings verg nie, aanvaar. Die Bybel sê: ‘Die Here bepaal ‘n mens se lewe. Hoe kan ‘n mens verstaan wat met hom moet gebeur?’ (Spreuke 20:24 NLV). Geduld is ‘n teken van volwassenheid. Wanneer babas nie onmiddellik kry wat hulle wil hê nie, raak hulle ontsteld. Volwassenheid sluit die vermoë om te wag, om met vertraagde bevrediging te lewe, in. “‘n Geduldige mens het insig. Iemand wat kort van draad is, stal sy dwaasheid uit” (Spreuke 14:29 NLV). ‘n Persoon met insig en wysheid wat leer om die lewe uit ander mense (en God) se perspektief te sien, is in staat om geduldig te wees. Bid dus en vra God om jou ‘n nuwe perspektief op dinge te gee.
Sielskos: 2 Kon 18:17-20:21; Matt 20:1-16; Ps 139:7-12; Spr 13:24
2023-06-19
Spreuke 16:32 NLV
Die Bybel sê dat wanneer jy bid, God dadelik kan antwoord. Nêrens in die Bybel word egter beloof dat jy ‘onmiddellike geduld’ sal ontvang nie. Geduld is ‘n karaktereienskap en karakter word gebou terwyl jy ‘n leeftyd lank saam met God deur goeie en slegte tye wandel. Een Bybelonderwyser sê: ‘Geduld is net geloof wat sy tyd neem.’ Hier is hoe God geduld in ons ontwikkel:
1) Onderbrekings. Jy gaan sit om aandete te eet en jou foon begin lui. Jy is in die bad en iemand lui die voordeur se klokkie. Jy werk vinnig om ‘n spertyd te haal en besoekers daag op. Daar word gesê dat terwyl Brahms sy beroemde wiegielied gekomponeer het, het hy so baie onderbrekings teëgekom dat dit hom sewe jaar geneem het om die stuk te komponeer. Iemand het geskerts: ‘Wanneer jy ‘n wiegielied skryf, het jy al daardie onderbrekings nodig om te verhoed dat jy voor die klavier aan die slaap raak!’
2) Vertragings. Ons haat dit om te wag. Ons het ‘n mikrogolf-ingesteldheid. Ons wil dit wat ons wil hê binne sekondes kry. Ons het kitskos en kitskoffie. Ons is soos die man wat gebid het: ‘Here, gee my geduld en gee dit nou dadelik vir my!’
3) Irritasies. Lang rye, verlore sleutels, telefoonoproepe, koue kos, pap bande, badkamers wat beset is, verkeersknope… die lys is eindeloos. Het jy geweet dat 90 persent van mense wat hartaanvalle kry, die ‘gejaagde’ Tipe A persoonlikheid het? Die Bybel sê: ‘…Oorhaastigheid stuur jou in die verkeerde koers’ (Spreuke 19:2 NLV). Ons praat van Job se geduld, wat gesê het: ‘…deur my worsteling sal ek gretig wag op die vrylating’ (Job 14:14 NLV).
Bid daaroor, oefen geduld uit en wees vol vertroue in God!
Sielskos: 2 Kon 16:1-18:16; Matt 19:15-30; Ps 139:1-6; Spr 13:21-23
2023-06-18
Jesaja 28:9 AFR83
‘n Besorgde pa het hierdie brief aan die sportafrigter by sy seun se skool geskryf: ‘Beste Afrigter, ek het pas jou brief aan ons seun waarin jy jou verwagtinge vir jou atlete beskryf, gelees. Jannie se ma en ek stem volkome saam. Ons het lankal die waarde van sport in kinders se lewens besef. Wanneer mens na jou rekord kyk, kan mens sien dat jy die spel goed afrig. Daar is egter nog ‘n fase van afrigting wat selfs belangriker is.
Laat my toe om te verduidelik. Ons gee vir jou ons kosbaarste besitting. Gedurende die volgende vier jaar sal ons seun jou die onderwerp van baie van die gesprekke in ons huis maak. Hy sal ons vertel hoe jy die Green Bay Packers se span kon behaal het as jy nie jou knie in 1985 beseer het nie. Hy sal ons van jou emosionele toespraak toe julle agter was teen halftyd vertel en hoe julle uiteindelik die wedstryd daardie dag gewen het. Ons sal hoor hoe jy nog steeds die bal kan aangee en kan skop. Ons sal dit alles hoor terwyl ons seun se oë blink.
Jy sien, hy sal jou verafgod. Ons het deesdae nie meer helde nie. Baie professionele atlete sal hulle siel vir ‘n paar rand verkoop. Baie atlete was hierdie jaar om negatiewe redes in die nuus. Ons weet dat alle atlete nie steel en dwelms gebruik nie, maar dis waarvan ons in die media lees. Jy is dus ons seun se held en ons maak op jou staat. Sy spiere mag dalk amper ontwikkel wees, maar sy gedagtes is nog broos en beïnvloedbaar. Jou verantwoordelikhede is groot. Beïndruk hom asseblief!’
Die wêreld is vol bendes, dwelms en geweld omdat ‘n kind die verkeerde held gekies het. Jy kan dit alles help verander – al is dit net vir een kind. Dink daaroor.
Sielskos: Fil 4:4-13; Gen 11:1-9
2023-06-17
Psalm 42:2 NLV
Vind jy dit moeilik om God se werke te verstaan? Ons almal sukkel daarmee. Selfs al kan ons terugkyk en sien hoe sy hand van seën en leiding in die verlede op ons was, voel ons by tye steeds bang en alleen. Jesus het self uitgeroep: ‘…My God, my God, waarom het U My verlaat?’ (Matteus 27:46 NLV). Daardie woorde kan as volg geïnterpreteer word: ‘Ek mag dalk nie verstaan wat op die oomblik gebeur nie, maar ek weet dat U steeds my God is.’ Wat ‘n gerusstelling!
Het jy al ooit gesien hoe ‘n kind ‘n ouer se hand vat en sê: ‘Ma/Pa stap te vinnig vir my!’ Die kind is bang om te verdwaal of agtergelaat te word. Is dit hoe jy vandag voel? Asof jy nie kan byhou nie? Dat die lewe heeltemal te vinnig beweeg? Die Bybel sê: ‘Soos ‘n wildsbok smag na water, so smag ek na U, o God’ (Psalm 42:2 NLV). Jy ‘smag’ nie na iets tensy jy dit waardeer en dit nodig het nie. Slegs rou behoefte sal veroorsaak dat jy van elke ander sigbare middel van ondersteuning wegdraai en God najaag, omdat jy weet dat jy dit nie sonder Hom sal maak nie.
Drie dinge gebeur wanneer jy God met jou hele hart najaag:
1) Jy betree die koninkryk waar alle dinge moontlik is (sien Markus 10:27 NVL).
2) Jy begin om meer soos Christus te wees, omdat jy soos die geselskap wat jy hou, word (sien 2 Korintiërs 3:18).
3) Jy leer dat jy slegs sekere vlakke van seën bereik wanneer jy God ywerig soek (sien Hebreërs 11:6).
Is jy moeg vir menslike antwoorde? Het jy meer as net goeie raad nodig? Sluit jouself vandag by God toe en laat Hom toe om met jou te praat.
Sielskos: Hand 1:1-3:10; Matt 26:36-46; Ps 118:19-29; Spr 15:33
Galasiërs 5:13 NLV
Liefde is meestal iets wat jy doen in plaas van iets wat jy voel. Paulus skryf: ‘Liewe broers en susters, julle is geroep om in vryheid te leef. Moet net nie die vryheid misbruik om sondige begeertes te bevredig nie, maar gebruik dit om mekaar met liefde te dien’ (vers 13 NLV). Hoe is jy dus veronderstel om jou liefde uit te druk?
Volgens een skrywer, as volg: “‘n Seun ry vyf ure om by sy ma op haar verjaarsdag te wees. ‘n Vriend noem ‘n boek waarin hy geïnteresseerd is; sy vriend onthou dit en koop vir hom die boek sonder enige sigbare rede. ‘n Middeljarige paartjie sien ‘n jong man en vrou met min geld in ‘n restaurant en betaal hulle rekening in die geheim. ‘n Pa weet hoe baie sy dogter daarvan hou om ‘n skoon kar te hê, dus was hy haar kar as ‘n verrassing. Mense in ‘n klein groep epos mekaar gedurende die week as ‘n manier om hulle omgee te bewys. Die mense wat ons lewens verryk is die mense wat ons raaksien. Hulle weet wat ons liefhet en wat ons vrees. Wanneer ons daaraan werk om waarlik aan iemand aandag te gee, groei ons liefde vir hulle. Wanneer ons daaraan werk om waarlik ‘n ander persoon raak te sien, vergeet ons van onsself en ons siele floreer.”
Moeder Teresa het gesê: ‘As jy nie groot dinge kan doen nie, doen klein dinge met groot liefde. As jy dit nie met groot liefde kan doen nie, doen dit met ‘n klein bietjie liefde. En as jy dit nie met ‘n klein bietjie liefde kan doen nie, doen dit in elk geval.’ Liefde groei wanneer jy mense dien.
Sielskos: 2 Kon 13-15; Matt 19:1-14; Ps 73:17-28; Spr 13:20
