2023-07-19
1 Korintiërs 10:12 NLV
Die tyd om versigtig te wees is nadat jy jou doelwitte bereik het en jy besig is om jou oorwinnings te vier. Daar is drie deurslaggewende punte in elke stryd en glo dit of nie, die maklikste een is soms die geveg self. Die moeilikste punt is die tydperk van besluiteloosheid reg voor die konflik – om te bly staan en te veg of weg te hardloop – die stryd tussen geloof en vrees. Die gevaarlikste tyd is egter by verre die nasleep. Wanneer jou hulpbronne op is en jy gerus begin raak, moet jy op die uitkyk vir dinge soos oormoed, dowwe reaksies en foutiewe oordeel wees.
Onthou jy koning Dawid se verhaal? ‘Die volgende lente, die tyd dat konings gaan veg, het Dawid… in Jerusalem agtergebly. Laat een namiddag… het Dawid… ‘n besonder mooi vrou wat besig was om te bad [gesien]… Dawid het haar laat haal…’ (2 Samuel 11:1-2, 4 NLV). Dawid het gekies om tuis te bly eerder as om te gaan veg. Wie weet hoekom hy so besluit het? Miskien het sy indrukwekkende oorwinnings hom sag gemaak, of hy het agtelosig geraak, of hy het arrogant geraak. Dit was slegs ‘n kortstondige verhouding, maar dit het alles verander. Sy vrede het verdwyn, sy karakter was verwoes en sy familielewe was vernietig.
Moenie die gevaar loop om as gevolg van jou vorige oorwinnings jou skanse te laat sak nie. Om op jou louere te rus is sinoniem daarmee om met rampspoed te flankeer. Moeilikheid wag op die man of vrou wat in die gemaklike land van vervulde drome woon. Die woord vir jou vandag is dus: ‘Daarom – as julle dink julle staan sterk, moet julle oppas dat julle nie ook tot ‘n val kom nie.’
Sielskos: Hand 6-7; Matt 26:57-75; Ps 133; Spr 16:2
2023-07-18
Galasiërs 1:15 NLV
Jy sal agterkom in die Skrif dat God gewoonlik besige mense roep. Moses die skaapwagter was besig om na sy trop om te sien. Gideon die boer was besig om sy landerye te oes. Petrus en Johannes die vissermanne was besig om hulle nette reg te maak. Daar was egter iets binne-in elkeen van hulle wat op God se roeping gereageer het.
Beskikbaarheid beteken vir God meer as vaardigheid. Wees dus getrou en koester die droom wat Hy in jou hart geplaas het en wanneer die tyd reg is, sal Hy alles in plek sit. Die Psalmdigter het gesê: ‘Wees bly in die Here, en Hy sal jou hartsbegeertes aan jou gee’ (Psalm 37:4 NLV). Moenie ongeduldig wees nie. As God die begeerte in jou hart geplaas het, sal Hy alles voorsien wat jy nodig het om dit te vervul.
Jesus het gesê: ‘Dit is die Gees wat lewend maak, die liggaam baat jou niks. Die woorde wat Ek aan julle gerig het, is Gees en lewe’ (Johannes 6:63 NLV). Gebruik dus God se Woord en bestee tyd in gebed saam met Hom om jou visie tot vervulling te bring. As enigiemand tussen jou en God se roeping vir jou probeer kom, sê vir hulle: ‘Jammer, ek moet gaan. My lotsbestemming is te belangrik om mis te loop.’
Moenie nog ‘n dag mors om met God se roeping vir jou lewe te worstel nie; gee jouself net aan Hom oor! Hy het jou nie weens jou groot prestasies, groot intellek of groot gawes geroep nie. Die Bybel sê: ‘…Maar hoe meer die sonde geword het, hoe oorvloediger het God se genade geword’ (Romeine 5:20 NLV). Jy is deur ‘sy onverdiende goedheid geroep.’
Sielskos: Hand 3:11-5:42; Matt 26:47-56; Ps 123; Spr 16:1
2023-07-17
Psalm 42:2 NLV
Vind jy dit moeilik om God se werke te verstaan? Ons almal sukkel daarmee. Selfs al kan ons terugkyk en sien hoe sy hand van seën en leiding in die verlede op ons was, voel ons by tye steeds bang en alleen. Jesus het self uitgeroep: ‘…My God, my God, waarom het U My verlaat?’ (Matteus 27:46 NLV). Daardie woorde kan as volg geïnterpreteer word: ‘Ek mag dalk nie verstaan wat op die oomblik gebeur nie, maar ek weet dat U steeds my God is.’ Wat ‘n gerusstelling!
Het jy al ooit gesien hoe ‘n kind ‘n ouer se hand vat en sê: ‘Ma/Pa stap te vinnig vir my!’ Die kind is bang om te verdwaal of agtergelaat te word. Is dit hoe jy vandag voel? Asof jy nie kan byhou nie? Dat die lewe heeltemal te vinnig beweeg? Die Bybel sê: ‘Soos ‘n wildsbok smag na water, so smag ek na U, o God’ (Psalm 42:2 NLV). Jy ‘smag’ nie na iets tensy jy dit waardeer en dit nodig het nie. Slegs rou behoefte sal veroorsaak dat jy van elke ander sigbare middel van ondersteuning wegdraai en God najaag, omdat jy weet dat jy dit nie sonder Hom sal maak nie.
Drie dinge gebeur wanneer jy God met jou hele hart najaag:
1) Jy betree die koninkryk waar alle dinge moontlik is (sien Markus 10:27 NVL).
2) Jy begin om meer soos Christus te wees, omdat jy soos die geselskap wat jy hou, word (sien 2 Korintiërs 3:18).
3) Jy leer dat jy slegs sekere vlakke van seën bereik wanneer jy God ywerig soek (sien Hebreërs 11:6).
Is jy moeg vir menslike antwoorde? Het jy meer as net goeie raad nodig? Sluit jouself vandag by God toe en laat Hom toe om met jou te praat.
Sielskos: Hand 1:1-3:10; Matt 26:36-46; Ps 118:19-29; Spr 15:33
2023-07-16
Genesis 13:12 NLV
Jesus het gesê: ‘Maar elkeen wat een van hierdie kleinstes wat in My glo, tot ‘n val bring – vir hom sal dit beter wees om met ‘n meulsteen om sy nek in die see te verdrink’ (Matteus 18:6 NLV). Ingesluit in hierdie woorde is ‘n sobere uitdaging aan elke ouer: Jou morele gesag hang nie van jou kennis nie, maar van jou leefstyl en jou integriteit af. Soos jou kinders groter word, is hulle minder geneig om te luister na wat jy sê en meer geneig om dit wat jy doen, te na-aap.
Waarheen lei jou voetspore dus? Onthou jy vir Abraham en Lot? Hulle het dieselfde familie, dieselfde geloof en dieselfde geleenthede in die lewe gedeel. Toe dit egter by kinders grootmaak kom, het Abraham rose en Lot onkruid gekweek. Wat het die verskil gemaak? Abraham het God gevolg terwyl Lot sy eie selfsugtige belange gevolg het. ‘…Lot [het] sy tente tussen die stede in die vallei opgeslaan tot by Sodom.’ Voor dat dit verby was, het Lot sy morele gesag teenoor sy familie verloor. As ouer, waar slaan jy jou tent op?
Koning Dawid het ook sy morele gesag teenoor sy familie verloor. Selfs al het God sy owerspel met Batseba vergewe en hom toegelaat om op die troon te bly, het sy sonde ‘n verskriklike tol geëis. Sy seun Amnon het sy suster Tamar verkrag. Sy ander seun, Absalom, het die troon gesteel en sy seun Salomo se vrouens het hom tot afgodery gelei. Die profeet Natan het vir hom gesê: ‘Omdat jy dit gedoen het, sal Ek, die Here, toesien dat jou eie huis ellendes oor jou bring…’ (2 Samuel 12:11 NLV).
Jy het net een kans om dit reg te doen, volg dus vir God en neem jou kinders saam met jou.
Sielskos: Rut 1:3-18; Hand 8:26-40
2023-07-14
Johannes 10:10 NLV
Jou longe het suurstof nodig om te floreer, jou liggaam het kos nodig om te floreer en jou siel het vreugde nodig om te floreer. Hoe weet jy wanneer iemand van vreugde ontneem is? Deur hoe hulle lyk en deur wat hulle sê.
Een Bybelonderwyser sê: ‘Toe ek begin om Johannes 10:10 te verstaan, het ek besef dat die vyand my mislei het om te dink dat dit nie belangrik is om dinge te geniet nie. Ek het begin glo – verkeerdelik, natuurlik – dat wanneer ek besig was om pret te hê, was iets verkeerd en het ek vir seker nie hard genoeg gewerk nie! Ek het nooit gesien dat my pa die lewe geniet nie, dus het ek grootgeword met die idee dat daar iets daarmee verkeerd moet wees. Ek kan onthou dat daar vir my gesê is om stil te bly wanneer ek hardop gelag het. Die sewentiende-eeuse skrywer, Madame Guyon, het gesê dat die hoogste roeping van elke kind van God is om God te geniet. Ek onthou hoe ‘n swaar las van my skouers gelig is die eerste keer wat ek dit gelees het. Ek het so hard gewerk om God te probeer behaag dat die gedagte om Hom eenvoudig te geniet glad nie by my opgekom het nie. Ek het van so iets nog nooit gehoor nie!’
Kan jy jouself hiermee vereenselwig? Indien dit die geval is, is dit tyd om ‘n paar veranderinge in jou lewe te maak. Neem tyd vir jouself sonder om skuldig te voel; jy sal baie meer produktief wees wanneer jy uitgerus en verfris is. Ontspanning is noodsaaklik om in balans te bly. Ons lewe in ‘n gedrewe samelewing vol stres, maar jy kan verander; jy kan vreugdevol wees as jy kies om te wees.
Sielskos: Jer 51-52; Matt 26:14-25; Ps 118:1-9; Spr 15:27-30
2023-07-13
2 Timoteus 4:16 NLV
Wat is die regte manier om eensaamheid te hanteer?
1) Leer om alleen te wees sonder om eensaam te voel. Jesus het dikwels die skare agtergelaat om tyd alleen saam met sy Vader in gebed te bestee. Hoekom? Omdat Hy geweet het dat afsondering noodsaaklik vir geestelike groei is. Na daardie tye van afsondering was Hy verryk en beter toegerus om die uitdagings van die lewe te hanteer. Die Bybel sê: ‘[Jakob] het alleen agtergebly. Dáár kom hy ‘n man teë wat tot dagbreek met hom worstel’ (Genesis 32:24 NLV). Hy het as ‘n man met ‘n nuwe naam, ‘n nuwe aard, ‘n nuwe manier van stap en ‘n nuwe toekoms uit daardie tyd wat hy alleen met God bestee het, gestap. Wanneer mense besef dat jy jou gunsteling ete, fliek of ander aktiwiteit alleen kan geniet, word hulle deur jou krag, onafhanklikheid en selfvertroue aangetrek.
2) Verwerp die idee dat jy nie sonder ‘n sekere persoon kan leef nie. God is die enigste persoon wat jy moet hê en Hy het beloof om altyd by jou te wees (sien Hebreërs 13:5). Ons verval dikwels in depressie na die dood van ‘n geliefde, omdat ons nie ‘n lewe buite die verhouding ontwikkel het nie. Dis egter nooit te laat om te begin nie. God sal jou daarmee help. Paulus het geskryf: ‘Toe ek die eerste keer voor die regter gebring is, was daar niemand by my nie. Almal het my verlaat. Ek hoop nie dit sal teen hulle tel nie! Maar die Here het my bygestaan en my krag gegee om die Goeie Nuus in al sy volheid te verkondig sodat al die heidene dit kan hoor…’ (2 Timoteus 4:16-17 NLV). God sal jou help om oor jou verlies te rou en dan aan te beweeg vir dit wat Hy volgende vir jou in gedagte het.
Sielskos: Jer 49-50; Matt 26:1-13; Ps 109:16-31; Spr 15:23-26
