2023-07-31
Psalm 78:41 NLV
Die Bybel sê: ‘Hoe dikwels het hulle in die woestyn teen Hom in opstand gekom, en het hulle in die woesteny sy hart bedroef! Weer en weer het hulle God getart en die Heilige van Israel gepynig. Hulle het vergeet van sy mag, van die dag toe Hy hulle verlos het van die vyand’ (verse 40-42 NLV). Die Israeliete het aanhoudend in die woestyn God se toorn uitgedaag en sy hart gepynig. Hoe het hulle dit gedoen? Deur Hom te beperk! Hulle het dit wat Hy vir hulle en deur hulle kon doen, beperk.
Ons doen dieselfde wanneer ons nie die gawes en kreatiewe gedagtes wat Hy vir ons gee, herken en gebruik nie. God wil hê dat jy uit die ‘boks’ van jou eie geskiedenis, emosionele kwessies en persoonlike beperkings moet breek. Een van die maniere hoe jy dit kan doen, is om jouself aanhoudend aan nuwe idees, plekke en mense bloot te stel. God se Woord sê: ‘Maak jou woning groter. Span jou tent wyer, en moenie huiwer nie. Maak die tentlyne langer en slaan die penne dieper in. Want jy sal na links en regs uitbrei…’ (Jesaja 54:2-3 NLV).
Kreatiwiteit is net onderrigbaarheid. Is jy dus onderrigbaar? Die woorde op ‘n grafsteen het gelees: ‘Gesterf op veertig, eers op tagtig begrawe.’ Tensy jy aanhou leer, groei en jou denke uitbrei, kan dit ook jou lot wees. Jy sê: ‘Maar ek is nie van nature kreatief nie.’ Kreatiwiteit is nie noodwendig iets waarmee jy gebore word nie; dit kom vanuit die ontwikkeling van jou Godgegewe gawes en die aangryp van die geleenthede wat Hy oor jou pad stuur. Wil jy uit die boks breek? Dís hoe jy dit doen!
Sielskos: Hand 27-28; Mark 1:9-20; Ps 78:9-16; Spr 16:25
2023-07-30
Genesis 33:14 DB
Daar is deesdae ‘n tendens onder sommige ouers wat probeer om hulle kinders te gou te laat grootword. Hulle jaag hulle deur die mylpale van hul kindertyd en stoot hulle in die woelinge van adolessensie in. Dis die gevolgtrekking van die ontwikkelingsielkundige, dr David Elkind, wat hierdie kulturele fenomeen die ‘Haastige Kind sindroom’ noem.
Dit vind plaas wanneer ouers hul kinders aanmoedig om soos tieners op te tree, soos om grimering vir hulle voorskoolse dogters te koop en toe te laat dat hul kinders in hul vroeë tienerjare ernstige verhoudings aanknoop. Hulle behandel hulle kinders meer soos volwassenes, verwag van hulle om volwasse besluite te maak, trek vir hulle ontwerpersklere aan en onderwerp hulle veral aan die grafiese seksualiteit op televisie, in musiekvideos, rolprente en op die internet.
Jare gelede het ouers die noodsaaklikheid van ‘n veilige en ordelike vooruitgang deur die kinderjare verstaan. Daar was kulturele merkers wat die ouderdomme waarop spesifieke gedrag en aktiwiteite as toepaslik of onvanpas geag is, gedefinieer het. Vandag het hierdie merkers verdwyn, of hulle is afwaarts geskuif. Dit kan ‘n groot fout wees. Wanneer jy jou kinders behandel asof hulle reeds groot is, word dit baie uitdagend om in die nabye toekoms perke op hul adolessente gedrag te stel. Hoe kan jy byvoorbeeld ‘n aandklokreël vir ‘n dertienjarige, wat geleer is om hom- of haarself as ‘n volwassene te beskou, instel?
Kortom, die ‘Haastige Kind sindroom’ ontneem ons kinders van hul kinderjare en plaas hulle op ‘n onnatuurlike pad wat nadelig vir hul geestelike en fisiese gesondheid is. As jy wys is, sal jy op die raad van Jakob aan sy broer Esau ag slaan: ‘…Ek kom dan rustig met… die kinders agterna…’
Sielskos: 1 Sam 5:1-6:16; Op 11:15-19
2023-07-29
Psalm 139:14 NLV
Onthou jy die ou televisiereeks, The Six Million Dollar Man? Hy is met kernaangedrewe bioniese ledemate en inplantings gebou en toegerus. Wel, hy kom nie naby jou nie! Jy is uniek, enig in jou soort, ‘n ware wonder van God se kreatiewe genie. Byvoorbeeld, jou tong; vierhonderd klein smaakknoppies wat elkeen die verskil tussen aspersies en suurlemoenmeringue-tert kan onderskei. Wat van jou dermstelsel? Twintig miljoen mondjies wat bykans enigiets kan verteer. Dan is daar jou verkoelingstelsel – driehonderd en vyftigduisend sweetkliere per vierkante duim. Wat van jou sensoriese stelsel? ‘n Netwerk van tien miljoen senuwees, waarvan die takke boodskappe stuur en interpreteer en ook ‘n antwoord vir elkeen formuleer.
Jy is een in sewe biljoen! Niemand anders het jou stempatroon, vingerafdrukke of DNA nie. Toe jy gebore is, het God nie gestop en gevra: ‘Wat gaan ons met hierdie ene doen?’ nie. Nee, jy is jou Vader se naam gegee (sien Jesaja 43:1). Jy is teen ‘n prys gekoop (sien 1 Korintiërs 6:20). Jy is as lid van sy verloste familie verwelkom (sien 1 Johannes 3:2). Jou treë word deur Hom gerig (sien Psalm 37:23). Hy het reeds jou sukses beplan (sien Jeremia 29:11). Hy was lief vir jou toe jy onbeminlik was en het jou gekies voordat jy reg of verkeerd kon doen.
Gee dit Hom nie die reg om te sê: ‘Ek wil jou lof en gehoorsaamheid hê, Ek wil hê jy moet tyd saam met My deurbring, Ek wil hê jy moet die briewe lees wat Ek vir jou geskryf het en Ek wil hê dat niks of niemand tussen ons moet kom’ nie? Die woord vir jou vandag is – jy behoort aan God!
Sielskos: Hand 24-26; Mark 1:1-8; Ps 78:1-8; Spr 16:23-24
2023-07-28
Jesaja 46:10 NLV
Hoe kan jy seker wees dat die Bybel goddelik geïnspireer is en dus jou vertroue waardig is? Deur vervulde profesieë! Geen ander godsdiens het spesifieke, herhaalde en onfeilbare vervulling van voorspellings wat baie jare vooruit gemaak is, van gebeure waaroor die voorspeller geen beheer gehad het nie. God het hierdie bewyse vir ons voorsien sodat ons kan weet dat die Skrif ‘n goddelike skrywer het: ‘…Ek is God… Ek maak die einde bekend vanaf die begin. Uit die verlede, dit wat nog moet gebeur…’ (verse 9-10 NLV).
Die Bybel se ses-en-sestig boeke, wat tussen 1400 vC en 90 nC geskryf is, bevat ongeveer 3,856 verse wat op profesieë betrekking het. Hier is egter die beste deel daarvan: Meer as 25 persent van die hele Bybel bevat spesifieke profesieë wat reeds letterlik vervul is! Sir Isaac Newton het gesê: ‘Ek vind meer sekere tekens van egtheid in die Bybel as in hoegenaamd enige ander goddelose geskiedenis.’
Jy vra: ‘Hoekom is daar dan mense wat nie in die Bybel glo nie?’ Omdat hulle nog nie hulle harte vir God oopgemaak het nie! Paulus skryf: ‘…niemand [kan] God se diepste geheime ken nie, behalwe die Gees van God. Ons het die Gees ontvang wat van God uitgaan – nie dié van die wêreld nie – sodat ons kan besef watter wonderlike geskenke God aan ons gegee het. As ons hierdie dinge aan julle vertel, gebruik ons nie woorde wat hulle oorsprong het in menslike slimmigheid nie… Ons gebruik woorde wat van die Gees kom om geestelike waarhede te verduidelik. Mense wat nog in materiële terme dink, kan nie hierdie waarhede toe-eien wat van die Gees van God kom nie. Dit klink vir hulle onsinnig. Hulle kan dit nie verstaan nie, want hierdie dinge moet vanuit ‘n geestelike perspektief verstaan word’ (1 Korintiërs 2:11-14 NLV).
Sielskos: Hand 22-23; Matt 28:11-20; Ps 46; Spr 16:20-22
2023-07-27
Spreuke 17:14 NLV
Het jy al ooit die plakker gesien wat lees: ‘Mense wat dink hulle weet alles is veral irriterend vir diegene van ons wat wel alles weet’? Jy sal sulke mense wat dink hulle weet alles, orals vind. Ouer mense wat bang is vir nutteloosheid, strewe daarna om te bewys dat hulle nog baie kennis het. Godsdienstige mense gebruik hul oortuigings soos ‘n knuppel om ander oor die kop te slaan. Die Bybel sê: ‘…hou [aan] stry vir die geloofsbelydenis…’ (Judas vers 3 NLV).
Daar is egter ‘n verskil tussen om te stry en om twissoekerig te wees. Paulus skryf: ‘Ek sê weer, moenie betrokke raak in dwase, onsinnige argumente wat net twis veroorsaak nie. Die Here se diensknegte moenie twis nie, maar moet goedgesind teenoor almal wees. Hulle moet bekwaam wees om mense doeltreffend te onderrig en geduldig wees met moeilike mense’ (2 Timoteus 2:23-24 NLV). Let hierdie vier frases op:
1) ‘Moenie twis nie.’ Moenie argumenteer nie, plant net die saad van God se Woord en vertrou die Heilige Gees om in mense se harte te werk.
2) ‘Goedgesind teenoor almal.’ Daar is geen rede om vyandig, vernederend of onaangenaam teenoor iemand wat nie jou mening deel, te wees nie.
3) ‘Doeltreffend te onderrig.’ In plaas daarvan om jou opinie op iemand af te dwing, sê eenvoudig net: ‘Ek het die volgende in God se Woord ontdek en dit het hierdie verskil in my lewe gemaak.’
4). ‘Geduldig wees.’ Eers wanneer jou eie seer genees is, kan God jou gebruik om ander se seer te genees.
Bid dus: ‘Vader, maak my ‘n instrument van vrede sodat mense ontvanklik sal wees vir die waarhede wat U deur my aan hulle openbaar. In Jesus se Naam bid ek dit. Amen.’
Sielskos: Hand 20-21; Matt 28:1-10; Ps 42:6-11; Spr 16:17-19
2023-07-26
Romeine 12:10 NLV
Een van die eerste gevaartekens in ‘n huwelik is wanneer julle mekaar as vanselfsprekend begin aanvaar.
Dr James Dobson skryf: ‘Een van die beste maniere om ‘n huwelik gesond te hou, is om ‘n sisteem van wedersydse aanspreeklikheid binne die konteks van liefde te onderhou. Laat ek dit as volg illustreer: Veronderstel ek werk twee ure langer as gewoonlik in my kantoor, met die wete dat my vrou, Shirley, besig is om tuis ‘n spesiale kersligete voor te berei. As ek haar nie bel om te laat weet dat ek gaan laat wees nie, kan jy geld daarop wed dat ek dit gaan hoor wanneer ek by die huis kom. Shirley sal my gedrag as beledigend sien – en sy sal reg wees. Wat sy dus in effek sal sê is: ‘Jim, wat jy gedoen het was selfsugtig en ek kan dit nie sommer daar laat nie.’ Met daardie paar woorde en heel waarskynlik nog ‘n paar ander, sal sy in liefde sê wat op haar hart is en my vir my disrespek aanspreeklik hou. Dan sal ons saam van die voorval aanbeweeg. Sommige dinge in ‘n gesonde huwelik moet beskerm word en wedersydse respek is bo aan die lysie. Dit beteken nie jy moet kerm, beledig, jou maat in die publiek verneder of onbeduidende indiskresies wat oorgesien moet word, uitwys nie. ‘n Werkbare stelsel om mekaar in lyn te hou, kan jou huwelik op koers hou wanneer kwessies van respek op die spel is. Hierdie tipe wedersydse aanspreeklikheid is die beste manier wat ek ken om n onverwagte ontploffing, wanneer opgehoopte wrokke en woede ‘n kritieke stadium bereik, te vermy.’
Dus: ‘…julle [moet] mekaar in liefde koester en voor in die ry staan om mekaar met respek te hanteer.’
Sielskos: Hand 18-19; Matt 27:57-66; Ps 42:1-5; Spr 16:16
