2023-12-23
Lukas 1:31 NLV
Ons sing die woorde van hierdie Kerslied al van kindsbeen af. Die woorde van die lied kom egter nie uit die Skrif nie. ‘Stille Nag’ is ‘n gedig wat deur ‘n Oostenrykse priester in 1816 geskryf is. Die woorde roep ‘n rustige prentjie met die gelukkige paartjie wat hul pasgebore baba dophou, op.
Dit is egter onwaarskynlik dat daar stilte was. Na ‘n uitputtende reis op ‘n donkie, het Josef en die hoogswanger Maria nie by die grootste kamer van die Bethlehem Grand Hotel ingeboek nie. Hulle het gesmeek dat hulle die stal, kompleet met die gekletter en geure van staldiere kon gebruik – wat alles behalwe stil was! Vra enige ma uit oor geboorte. Selfs met die hulp van moderne pynstillers en gesteriliseerde omgewings bly die dapperste vrou selde stil terwyl sy geboorte skenk. Dit was kwalik ‘n stille nag vir Maria, Josef en Jesus!
Heilige nag: Van al die nagte in die geskiedenis, was hierdie die heiligste. God het sy ewige plan om aarde toe te kom as die Verlosser van verlore mense in werking gestel. ‘Die boodskap van versoening bestaan daarin dat God deur Christus die wêreld met Homself versoen het en nie die mense se oortredings teen hulle hou nie…’ (2 Korintiërs 5:19 NLV). Jesus het gekom om die sondes van die verdoemde mensdom op Homself te neem, sodat ons: ‘…op grond van ons eenheid met Christus, deur God vrygespreek kan word’ (vers 21 NLV).
Op hierdie heiligste nag is ons geestelike en morele donkerte vir ewig deur Jesus, die Lig van die wêreld, verdryf. Ons vrese as verlore sondaars is deur die vrede en vreugdevolle versekering dat ons sy ewige vergewe volk is, vervang.
Sielskos: 2 Tim 1-4; Joh 19:31-42; Ps 128; Spr 31:10-13
2023-12-22
Johannes 13:35 NLV
Het jy die plakkaat gesien wat drie mans, wat elkeen ‘n ander weergawe van Jesus voorstel uitbeeld? Die eerste lyk soos ‘n onbeskofte man, die tweede is bruingebrand en atleties, die derde is ‘n klein, sagmoedige karakter. Die byskrif daaronder sê: ‘Sal die ware Jesus asseblief opstaan?’
Die ware Jesus staan in Johannes 13 op. Hy vertel vir ons wat vir Hom die belangrikste is en wat vir ons die belangrikste moet wees – en dit is liefde! In die bovertrek het Jesus besef dat sy tyd min was. Die kruis het gedreig, Judas was op die punt om Hom te verraai en Hy moes sy dissipels voorberei om sonder Hom voort te gaan. Dis soos om ‘n pastoor te vra: ‘As jy net een laaste preek oorgehad het, wat sou jy sê?’ Of soos om vir ‘n onderwyser te vra: ‘Watter een groot waarheid sal jy die graagste vir jou studente wou leer?’ Of om vir ouers te vra: ‘As jy vir jou kinders net een ding kon sê, wat sou dit wees?’
Jesus spel dit uit: ‘Ek gee julle ‘n nuwe opdrag: Julle moet mekaar liefhê; soos Ek julle liefhet, net só moet julle mekaar ook liefhê. As julle liefde teenoor mekaar beoefen, sal almal daaraan sien dat julle my dissipels is’ (verse 34-35 NLV).
Soos ‘n laaste testament, is Jesus se finale boodskap belangrik, nie net vanweë die inhoud daarvan nie, maar vanweë die toon en tydsberekening daarvan. Dit som sy lewe en ons verantwoordelikheid teenoor God en ander mense op – om hulle lief te hê! Aangesien liefde nie is wat jy sê nie, maar wat jy doen – gaan vandag uit en vind praktiese maniere om God se liefde aan diegene wat jy ontmoet uit te druk. Hulle sal goed voel, en jy sal ook.
Sielskos: Miga 5-7; Joh 19:17-30; Ps 47; Spr 31:6-9
2023-12-21
Spreuke 11:25 DB
Een van die beste maniere om jou lewe in balans te hou en geestelik op die regte pad te bly, is om dit wat jy weet aan ander oor te dra. Die Bybel sê: ‘…Wie die nood van die gemeenskap raak sien, word deur almal geëer.’ Soos jy jou insigte oordra, sal jy meer insigte van God kry. Paulus het Timoteus uitgedaag: ‘…Leer hierdie groot waarhede aan betroubare mense wat bekwaam is om dit aan ander deur te gee’ (2 Timoteus 2:2 NLV).
As jy mense ken wat nog nie hulle Godgegewe doel in die lewe ontdek het nie, is dit jou werk om met hulle te deel wat met jou gedeel is. Moet byvoorbeeld nie net hierdie dagstukkie lees en dit vir jouself hou nie, deel dit met jou vriende. Hoe meer jy weet, hoe meer verwag God van jou om daardie kennis te gebruik om ander te help. Dis hoe dinge veronderstel is om in sy koninkryk te werk. Jakobus skryf: ‘Hou in gedagte: As ‘n mens weet wat reg is en dit nie doen nie, is dit sonde’ (Jakobus 4:17 NLV).
Om die doel van die lewe oor te dra is meer as net ‘n verpligting; dis een van ons grootste voorregte. Dink jou in hoe anders die wêreld sou wees as almal hulle roeping geken het. Dis hoekom Paulus skryf: ‘As jy dit aan die broers en susters voorhou, sal jy jou plig doen as ‘n waardige dienaar van Christus Jesus…’ (1 Timoteus 4:6 NLV). Nie net wil God hê dat ons sy doelwitte moet uitleef nie, Hy wil hê dat ons ander moet help om dieselfde te doen. Ongeag jou ouderdom, kan die res van jou lewe die beste van jou lewe wees as jy hierdie een ding doen – doelbewus begin lewe!
Sielskos: Miga 1-4; Joh 19:1-16; Ps 12; Spr 31:1-5
2023-12-20
Spreuke 4:3 NLV
Vir jou kind om later in die lewe fisies en emosioneel te floreer, moet jy hulle gedurende hulle vroeë en formatiewe jare koester. Gesondheidskundiges sê deesdae dat dit inderwaarheid noodsaaklik vir hulle oorlewing is. Een Christelike leier skryf: “‘n Studie wat aan die Harvard Universiteit gedoen is, toon onmiskenbaar dat die kwaliteit van die band tussen ‘n seun en sy ma verband hou met sy fisiese gesondheid en welstand veertig of vyftig jaar later. Merkwaardig genoeg het 91 persent van mans wat gesê het dat hulle nie ‘n noue verhouding met hul moeders gehad het nie, teen hul middeljare hartsiektes, hipertensie, maagsere of alkoholisme ontwikkel. Slegs 45 persent van die mans wat moederlike warmte en nabyheid onthou het, het soortgelyke siektes gehad.
Dieselfde was waar van mans en hul verhoudings met hulle pa’s. Oorweeg ook die volgende: 100 persent van die deelnemers aan hierdie studie wie se moeders en vaders koud en afgetrokke was, is in hul middeljare met talle siektes gediagnoseer. Kortom, die kwaliteit van vroeë verhoudings tussen seuns en hul ouers is ‘n kragtige voorspeller van lewenslange gesondheid. Jy kan seker wees dat dieselfde vir meisies en vroue geld. Dit kom hierop neer: Waar daar nie aan vroeë behoeftes voorsien word nie, is moeilikheid die voorland.”
Salomo, een van die wysste mans wat ooit gelewe het, het gesê: ‘Ek was self ook ‘n kind van my pa, die enigste oogappel van my ma.’ Dawid en Batseba was Salomo se ouers en die verhaal van hulle verkeerde optrede is vir ons almal om te lees neergeskryf. Toe dit egter by die grootmaak van hulle seun Salomo gekom het, het hulle dinge reg gedoen. Deur God se genade kan jy dieselfde doen.
Sielskos: Neh 11-13; Joh 18:25-40;Ps 4; Spr 30:29-33
2023-12-19
Jakobus 1:12 NLV
Omdat hy aantreklik was, het Josef ongewensde aandag by sy baas se vrou gekry. Dag na dag het sy hom probeer verlei. As Josef daardie tipe verleiding, toe hy net ‘n huisslaaf was, teëgekom het, kan jy dink aan die vlak van verleiding waaraan hy blootgestel is toe hy Egipte se eerste minister geword het?
Wanneer jy met integriteit in die klein dinge optree, rus dit jou toe om met integriteit in die groot dinge op te tree. Jy sal in die uur van verleiding gedwing word om tussen twee paaie te kies: karakter of kompromie. Elke keer wat jy karakter kies, word jy sterker, selfs wanneer jy ‘n prys vir jou keuse betaal. Let die volgende op:
1) Karakter is meer as net woorde. Onthou jy die ou wys-en-vertel-metode van onderrig op skool? As jy alles vertel en niks wys nie, verloor jy geloofwaardigheid.
2) Talent is ‘n gawe, maar karakter is ‘n keuse. Oor die algemeen is talent iets waarmee jy gebore word; jy het nie veel sê in die saak nie. Karakter is egter ‘n keuse wat jy elke dag maak en dis gewoonlik net jy en God wat daarvan weet.
3) Karakter bring blywende sukses mee. Daar word gesê dat vroeë Stradivarius-viole uit hout van bome wat die swaarste storms beleef het, gemaak is. Hoekom? Want weergeteisterde hout produseer die soetste musiek. Kry jy die idee?
4) Jy mag dalk tydelik bo die beperkings van jou karakter uitstyg, maar dis nie volhoubaar nie. Uiteindelik sal jy vir dit wat jy waarlik is, gesien word.
Die woord vir jou vandag is dus – moenie net werk om jou loopbaan te bou nie, werk daaraan om jou karakter te bou.
Sielskos: Neh 8-10; Joh 18:12-24; Ps 57; Spr 30:24-28
2023-12-18
Spreuke 11:4 NLV
Abraham Lincoln het gesê: ‘Amper alle mense kan teëspoed hanteer, maar as jy regtig iemand se karakter wil toets, gee vir hom mag.’ Dis makliker om op ons talente te fokus, want oor die algemeen produseer dit resultate wat beloon en deur ander gevier word. Daar is met ander woorde ‘n element van ego wat aan ons gawes gekoppel is.
Karakter word in privaatheid gebou. Jou reputasie is wat mense dink jy is, maar karakter is wat God (en jy) weet jy is. Jy moet dus meer op jou karakter as jou talente fokus. Die Bybel sê: ‘Iemand wat reg optree, is soos ‘n vrugbare boom. ‘n Mens wat wys is, red ander se lewens’ (Spreuke 11:30 NLV). As jy vir groter resultate bid, moet jou karakter jou dade vooruitgaan. Om groter doelwitte te bereik, moet jy effektiewer as leier word. Om mense meer aan te trek, moet jy ‘n persoon van goeie karakter word.
Wanneer jy deurlopend karakter, bekwaamheid en doelwitte ten toon stel, maak jy ‘n kragtige stelling teenoor die mense rondom jou en trek hulle na jou toe aan. Groot dinge word selde alleen bereik, so as jy dus goeie mense wil aantrek, moet jy self ‘n beter persoon word.
Dis veral waar as jy ‘n persoon met groot talente is. Jou talente mag jou dalk voor ander mense ophef, maar jou tekort aan karakter sal jou afbring. Die Bybel sê: ‘Baie geld help maar min wanneer probleme jou oorval. Wie die Here ken, word van die dood gered’ (Spreuke 11:4 DB). ‘n Wyse leier is gewillig om die volgende te erken: ‘Ek is nie perfek nie, maar ek weet wie is. Ek doen my bes om meer en meer soos Hy in my professionele en persoonlike lewe te word.’
Sielskos: Neh 5-7; Joh 18:1-11; Ps 105:37-45; Spr 30:20-23
