2024-06-19
Spreuke 13:20 NLV
Wat moet jy doen wanneer jy mense teëkom wat jou aanhoudend afkraak en ‘op jou plek’ probeer sit? Wees lief vir hulle, maar moet dit wat hulle sê jou nie te veel aantrek nie. As ‘n reël moet jy eerder gaan waar jy waardeer word as om te bly waar jy slegs verdra word!
Die Japanese bonsai-boom is piepklein en word omtrent net 45 sentimeter hoog. Om ‘n bonsai-boompie te maak, word ‘n jong boompie uit die grond getrek. Dan word die penwortel en van die voerlote afgebind. So word die groei van die bonsai-boom doelbewus belemmer. Daarenteen word die Kaliforniese sequoia-boom baie groot. Die General Sherman boom in Kalifornië se Sequoia Nasionale Park staan byvoorbeeld 83 meter hoog en meet 100 meter in die omtrek by sy stam. As dit afgekap word, sal dit genoeg hout om meer as 30 vyfvertrekhuise te bou, verskaf! Die sequoia begin lewe as ‘n klein saadjie, nie veel groter as die bonsai-saad nie.
Wat maak die verskil? Die sequoia boompie word toegelaat om in die ryk Kaliforniese grond en sonskyn gevoed te word. Die bonsai of die sequoia het nie ‘n keuse om te bepaal hoe groot dit sal word nie – maar jy het! Jy kan byvoorbeeld nie deur die lewe gaan deur ander mense – insluitend jou ouers – te blameer vir wat hulle in die verlede gedoen of nie gedoen het nie. Jou opsies is as volg: Bly waar jy is en kry swaar, of beweeg aan na ‘n ryk, vrugbare omgewing waar jy kan groei. Is dit altyd maklik om te doen? Nee. As jy egter glo wat Jesus gesê het: ‘…Ek het gekom sodat julle lewe kan hê, ja, om dit oorvloedig te hê’ (Johannes 10:10 NLV), sal jy gewillig wees om dit te doen.
Sielskos: Eseg 40:10-42:20; Luk 1:26-38; Ps 73:17-28; Spr 15:22-24
2024-06-18
1 Korintiërs 15:58 NLV
Mislukking beteken nie dat jy nooit sukses sal behaal nie; dit beteken net dat dit dalk bietjie langer mag neem. John Wayne het ‘n wonderlike sêding in die rolprent The Train Robbers, gehad. Hy het gesê: ‘Jy gaan jou lewe daaraan bestee deur een keer meer as wat jy platgeslaan word, op te staan, so raak maar daaraan gewoond.’ Dis wat sukses is – om een keer meer as wat jy platgeslaan word, op te staan. Jy het geen idee hoe naby jy aan dit wat jy wil bereik mag wees nie. As jy egter tou opgooi, sal jy nooit weet nie – en jy waarborg dat jy nooit daar sal uitkom nie.
Die tydskrif Time het ‘n opname onder mense wat hulle werk verloor het, gedoen. Almal het verwag dat hulle moedeloos en ontmoedig sou wees, maar die studie het bevind dat hierdie mense uiters veerkragtig was. Hoekom? Omdat mense wat hulle werk verloor en nuwe werk gekry het, beter voorbereid was om teëspoed te hanteer as diegene wat jare vir dieselfde maatskappy gewerk het sonder om ooit werkloosheid teë te kom.
Wanneer jy mislukking ervaar het, is jy inderwaarheid in ‘n beter posisie om sukses te behaal, as mense wat nie het nie. Wanneer jy misluk en weer misluk – en aanhou opstaan en uit jou foute leer – bou jy karakter, krag, volharding, ervaring en wysheid. Mense wat hierdie kwaliteite ontwikkel is in staat om hul suksesse te onderhou, anders as diegene vir wie goeie dinge te vroeg en te maklik gekom het. Solank as wat jy nie tou opgooi nie, is jy in ‘n goeie posisie. Die woord vir jou vandag is dus: ‘…staan baie vas, onbeweeglik…’
Sielskos: Eseg 37:1-40:9; Luk 1:11-25; Ps 73:1-16; Spr 15:18-21
2024-06-17
Handelinge 16:25 NLV
Moenie toelaat dat dit wat verkeerd is met jou, jou daarvan weerhou om dit wat reg is met God, te loof nie. Met hul voete in houtblokke vasgeklem, hulle rûe met swepe oopgekloof en die onregverdige minagting van die samelewing op hulle opgehoop, sê die Bybel: ‘Teen middernag was Paulus en Silas besig om te bid en tot lof van God te sing…’ Hulle het besluit om op te hou fokus op dit wat met hulle omstandighede verkeerd was en te begin fokus op dit wat reg met God was. Hulle kon gekla het, maar hulle het die keuse gemaak om God ten spyte van hulle eksterne omstandighede te loof.
Dit is dikwels die uitdagendste en noodsaaklikste keuse wat ons kan maak. Dit is soortgelyk daaraan om die verfris-knoppie op jou rekenaar te druk. Deur dit te doen herstel jy die vreugde van jou verlossing, jy herkalibreer jou gees en vernuwe jou gedagtes. Dit bemagtig jou om iets goeds waaroor jy God kan loof, te ontdek, selfs wanneer dit lyk of alles verkeerd gaan.
Is dit maklik? Definitief nie. Een van die suiwerste vorms van aanbidding is egter om God te loof wanneer jy dit nie wil doen nie. ‘Kom ons bring dan… ‘n voortdurende lofoffer aan God – ‘n offer wat opklink van die lippe van hulle wat Hom bely’ (Hebreërs 13:15 NLV). Dis ‘n opoffering wat God roer en resultate meebring: ‘Skielik kom daar ‘n groot aardbewing sodat die fondamente van die tronk geskud het. Al die tronkdeure het oopgevlieg en al die gevangenes se kettings het losgekom!’ (Handelinge 16:26 NLV). Wanneer jy jouself in ‘n situasie met geen uitweg bevind nie, maak lofprysing deure oop. Wanneer jy deur tekort en beperking geboei word, breek lofprysing kettings. Loof dus jou pad daardeur.
Sielskos: Eseg 34-36; Luk 1:1-10; Ps 80:12-19; Spr 15:15-17
2024-06-16
Hebreërs 11:20 NLV
Pa, hier is twee Bybelse bestanddele om jou kinders en kleinkinders mee te seën:
1) Die krag van gebed. Isak, ‘n boer, het vir sy seun gesê: ‘Mag God vir jou die dou van die hemel en die vrugbaarheid van die aarde gee sodat jy goeie oeste van graan en wyn sal hê’ (Genesis 27:28 NLV). Het jou kinders jou al ooit met God oor hulle hoor praat? Dalk het hulle jou al harde woorde soos: ‘Hoe kon jy so dom wees? Dink jy nooit vir jouself nie? Jy sal nooit iets in die lewe bereik nie!’ gehoor sê. Indien dit die geval is, vra vandag verskoning en vra hulle om jou te vergewe. Laat hulle hoor hoe jy God se rykste seën oor elkeen van hul lewens aanroep. ‘n Vader se gebed van seën oor sy gesin is ‘n kragtige ding – dit is lewensveranderend!
2) Die visie van ‘n wonderlike toekoms. Die Bybel sê: ‘Wanneer ‘n volk nie duidelikheid het oor die wil van God nie, word hulle koersloos…’ (Spreuke 29:18 NLV). Skoolberaders sê vir ons dat baie van hul studente visie kortkom. Hoekom? Omdat hulle niks behalwe slegte ekonomiese toestande, werkloosheid en moeilike tye in hul vooruitsigte sien nie. Hulle het iemand nodig om in hulle en hulle toekoms te glo, om te glo dat hulle sukses kan behaal en gelukkige lewens kan lei, dat die beste nog vir hulle voorlê. Isak het nie vir sy seuns gewag om hulle eie visies vir die toekoms te kry nie. Hy het openlik vir hulle toekomstige suksesse en vir respek en guns by familie en die samelewing, gebid. Jou kinders het nie nodig dat jy hulle manipuleer nie; hulle het nodig dat jy hulle motiveer. Jy doen dit deur hulle te seën!
Sielskos: Matt 5:4; Jes 51:1-16; Ps 30; Job 5:8-11
2024-06-15
Psalm 32:5 NLV
In die Skrif word die woord ‘belydenis’ uit twee Griekse woorde saamgestel: homo, wat ‘dieselfde’ beteken en logeo, wat ‘om te praat,’ beteken. Daarom, om jou sonde voor God te bely, beteken om dieselfde as wat Hy daaroor sê, te sê. Nêrens verwys die Bybel na ons sondes as foute, slegte oordeel of glipsies nie. Dit sê egter duidelik dat God ons sonde vergewe: ‘Ek… is die Een wat julle sondes uitwis. Ek doen dit ter wille van Myself en dink nie weer daaraan nie’ (Jesaja 43:25 NLV). Kom ons wees dus duidelik:
1) Belydenis gaan nie daaroor om verskoning te vra nie. Om jammer te sê is van tyd tot tyd toepaslik en noodsaaklik. Jy kan egter nooit jammer genoeg wees om God se vergifnis te verdien nie. Belydenis gaan daaroor om met God oor die aard, omvang en aanstootlikheid van jou oortredings, saam te stem.
2) Belydenis gaan nie oor gevoelens nie. Sommige van ons verval in berou, skuld en depressie oor ons sondes. Wanneer sulke gevoelens tot belydenis lei, is dit goed. Wanneer ons egter nie hierdie emosies voel nie, moet ons belydenis net so opreg en effektief wees.
3) Belydenis beteken nie jy kla nie. Om ‘n lys van jou sondes te maak en vir God te vertel hoe verskriklik sleg jy is, stem meer ooreen met ‘n gekla as met ‘n belydenis. God wil hê dat jy eerlik met Hom moet wees en met sy evaluasie van jou sonde moet saamstem. Dan kan jy soos Dawid sê: ‘Maar ek het my oortredings bely, my sonde nie weggesteek nie… En my sonde en oortredings het U vergewe.’
Bely dus jou sondes aan God – en begin dan optree soos iemand wat vergewe is!
Sielskos: Eseg 31-33; Mark 16:1-20; Ps 80:1-11; Spr 15:11-14
2024-06-14
2 Konings 6:6 NLV
2 Konings 6 vertel die verhaal van ‘n profeet wat besig was om naby ‘n rivier ‘n boom af te kap toe sy byl in die rivier val. Hy het toe vir Elisa gesê: ‘…Ag Meneer!… Dit is ‘n geleende byl!’ (vers 5 NLV). Hy het gedink die byl was vir ewig verlore. Hy het geen verwagting gehad om ooit die byl terug te kry nie. Hy het vir Elisa gewys waar dit ingeval het. Toe het Elisa ‘n stok afgekap en dit in die water gegooi en iets het gebeur wat nog nooit vantevore of sedertdien gebeur het nie: ‘…Die byl het boontoe gekom en gedryf.’ Dit was nie ‘n lewe-of-dood situasie nie. Ja, die byl was geleen. Ja, dit het verdwyn. As dit egter die ergste ding is wat jy al ooit moes deurmaak, het jy ‘n redelike beskermde lewe gelei.
Jy kan dit in dieselfde kategorie as Jesus wat die water in wyn by die bruilof verander het, plaas. Hoekom jou eerste wonderwerk mors om ‘n bruid en bruidegom te help wat nie genoeg wyn vir hulle onthaal gehad het nie? Dit openbaar iets van God. Hy bemoei Hom met die klein dingetjies, soos bruilofsonthale en geleende byle. Niks is te groot vir ons God nie en niks is ook vir Hom te klein nie. ‘Gee al julle bekommernisse aan God oor, want Hy gee vir julle om’ (1 Petrus 5:7 NLV). As dit vir jou saakmaak, maak dit vir jou liefdevolle hemelse Vader saak. ‘Vra na die wil van God in alles wat jy doen. Hy sal die regte pad vir jou wys’ (Spreuke 3:6 NLV). Let die woorde: ‘in alles wat jy doen,’ op. God wil hê dat jy vandag elke detail van jou lewe met Hom moet deel.
Sielskos: Eseg 27:25-30:26; Mark 15:33-47; Ps 143; Spr 15:8-10
