2024-08-29
Spreuke 24:32 NLV
Koning Salomo word as een van die wysste mense wat nog ooit gelewe het, beskou. Hy het drie boeke in die Bybel geskryf en word gereeld aangehaal. Hy was ‘n lewenslange leerder en soeker na die waarheid. ‘Ek het nagedink oor wat ek gesien het. Ek het iets daaruit geleer.’ Let op die woorde: ‘Ek het daaroor nagegedink… Ek het iets daaruit geleer’. Dit behoort jou vaste gesindheid in die lewe te wees.
God se plan vir jou is om aan te hou leer, verander, groei en volwasse word totdat jy jou laaste asem uitblaas. Dit beteken dat jy altyd oopkop moet wees. Kyk na die Fariseërs. Hulle was 100 persent toegewyd aan hulle geloofstelsel. Hulle was ook die bes opgevoede mense in die samelewing. Tog het hulle Jesus en die waarheid wat Hy gedeel het om elke hoek en draai weerstaan. Hoekom? As gevolg van drie baie algemene redes: 1) Trots. ‘As wat Jesus sê reg is, beteken dit ons is verkeerd.’ 2) Sekuriteit. ‘As ons sy leerstellings aanvaar, wat gaan dan van ons reputasie en inkomste word? 3) Tradisie. ‘Ons glo en dink al vir generasies op hierdie manier.’
Kan jy sien hoe dit dalk op jou lewe van toepassing mag wees? Geestelike groei verg twee dinge: ‘n honger na die waarheid en die nederigheid om te erken dat jy nog baie het om te leer. Dit is twee kwaliteite wat God altyd sal eer: ‘Hy lei die nederiges op die regte weg, en vir dié wat beskeie is, leer Hy sy pad’ (Psalm 25:9 NLV). Wees dus altyd oopkop.
Sielskos: 2 Kro 32-34; Luk 18:1-17; Ps 119:145-160; Spr 22:14-16
2024-08-28
1 Korintiërs 1:27 NLV
Antwoord: Omdat alle mense swak is! Moses se verhouding met God word in hierdie merkwaardige woorde beskryf: ‘Binne-in die tent het die Here met Moses gepraat soos vriende wat gesels en mekaar in die oë kyk…’ (Eksodus 33:11 NLV). Was Moses dan perfek? Nie naastenby nie. Hy het die eerste veertig jaar van sy lewe as ‘n prins in farao se paleis en die volgende veertig jaar as veewagter in die woestyn, deurgebring. Die Bybel vertel ons van die spanning in sy huwelik en sy tye van stres en wanhoop. Moses was ‘n skaam stamelaar wat nie twee woorde bymekaar kon sit sonder om verbaal te struikel nie. Die Bybel verwys na die Israeliete as ‘n ‘gemeente,’ wat Moses dan ‘n pastoor maak. Geen pastoor het al meer moeilikheid met ‘n gemeente gehad as Moses nie.
Jy vra: ‘Hoekom word daar op Moses se tekortkominge gefokus?’ Om jou te bemoedig! Om jou te laat weet dat jou swakpunte jou nie diskwalifiseer nie en jou terkortkomings nie dit wat God deur jou kan doen, beperk nie. Paulus skryf: ‘…dink maar net terug aan hoe julle eie situasie destyds was toe God julle geroep het. Gemeet aan menslike standaarde was daar maar min intellektueles onder julle, nie baie magtiges nie, nie baie uit vooraanstaande families nie. Nietemin het God doelbewus dit wat vir die wêreld na dommigheid gelyk het, uitgekies om die slim mense skaam te maak en dit wat vir die wêreld na totale swakheid gelyk het, het Hy uitgekies om die magtige skaam te laat kry… Gevolglik het niemand enige grond om sy bors voor God uit te stoot nie’ (1 Korintiërs 26-27, 29 NLV).
Sielskos: 2 Kro 29-31; Luk 17:20-37; Ps 119:137-144; Spr 22:11-13
2024-08-27
Psalm 91:1 NLV
Tydens die Tweede Wêreldoorlog het Brittanje skuilings teen lugaanvalle gebou. Daar was dikwels verskeie sulke skuilings in een straat. ‘n Pastoor vertel hoe hy in so ‘n skuiling gestaan het terwyl die bomme om hulle geval het. Hy het na die man langs hom gedraai en gevra: ‘Hoekom is hierdie skuiling altyd so oorvol, terwyl die ander amper leeg is?’ Die man het geantwoord: ‘Pastoor, ons almal weet dat jy ‘n man van God is. As God enigiemand gaan red, gaan dit heel waarskynlik vir jou wees. Dis hoekom ons in hierdie skuiling is.’
Toe hy later daaroor nadink, het die pastoor gesê: ‘Baie van hierdie mense het nie kerk bygewoon nie en die naam van Jesus was in hul woordeskat ‘n vloekwoord. Hulle wou sy beskerming hê, maar nie sy heerskappy nie.’ Weier om so te lewe! Wy jou lewe aan God toe en geniet vier-en-twintig uur, sewe dae ‘n week, twee-en-vyftig weke ‘n jaar, vir jou hele lewe, sy beskerming.
‘Hy wat woon in die skuilplek van die Allerhoogste, sal rus in die skadu van die Almagtige. Ek sal vir die Here sê: ‘U is my toevlug en my vesting, my God op wie ek vertrou.’ Verseker sal Hy jou red… Hy sal jou oordek met sy vere, en onder sy vlerke sal jy skuil… Jy sal nie bang wees vir die skrik van die nag, of die gevare van die dag; vir die plaag wat in die donker bekruip, of die ramp wat teen die middag verwoes nie. Al sou duisend langs jou val, of tienduisend om jou sterf, naby jou sal dit nie kom nie’ (Psalm 91:1-7 NLV).
Sielskos: 2 Kro 25-28; Luk 17:11-19; Ps 119:129-136; Spr 22:8-10
2024-08-26
Lukas 10:40 NLV
Maria en Marta was dieselfde in die sin dat hulle altwee vir Jesus lief was. Die verskil tussen hulle het egter te voorskyn gekom toe Jesus hulle huis besoek het. ‘… ‘n vrou, Marta, [het] hulle in haar huis verwelkom… Haar suster, Maria, het aan die Here se voete gesit en luister na wat Hy hulle leer. Maar Marta was bekommerd oor die groot ete wat sy besig was om voor te berei. Sy kom toe na Jesus en sê: ‘Here, lyk dit darem nie vir U onregverdig dat my suster net hier sit terwyl ek al die werk doen nie? Sê sy moet my kom help.’ Maar die Here het geantwoord: ‘My liewe Marta, jy kwel jou tog oor so baie dinge! Daar is regtig net een ding wat die moeite werd is om oor besorg te wees. Maria het dit ontdek – en Ek gaan dit nie van haar af wegneem nie’ (verse 38-42 NLV).
Jesus het nie gesê dat dit wat Marta doen nie goed was nie, maar dat wat Maria doen, beter was. Wat het Maria gedoen? By sy voete gesit, na sy woorde geluister en Hom liefgehad en aanbid.
Daar is ‘n les hier te leer, veral vir diegene wat by die kerk en die bediening betrokke is. Moenie so betrokke by die werk van die Here raak, dat jy nie betrokke by die Here van die werk raak nie. As Jesus vir aandete gekom het, sou Hy dalk vir Marta geprys het en vir Maria gesê het om in die kombuis besig te raak. Sy prioriteit voordat Hy na die kruis gegaan het, was egter om tyd met diegene wat Hy liefgehad het deur te bring. Hier is ‘n gedagte wat jou gesindheid teenoor gebed sal verander: Jesus wil tyd saam met jou deurbring!
Sielskos: 2 Kro 22-24; Luk 17:1-10; Ps 119:121-128; Spr 22:4-7
2024-08-25
Job 22:27 NLV
Wanneer God ‘n belofte aan ons maak, het ons alle reg om te verwag dat Hy sy belofte sal hou. Wanneer ons ‘n belofte aan God maak, het Hy ook alle reg om van ons te verwag om ons beloftes na te kom. ‘Jy sal tot Hom bid, en Hy sal jou hoor. Jy sal doen wat jy Hom belowe het. Wat jy besluit om te doen, sal gebeur. Dit sal lig wees op die pad voor jou’ (verse 27-28 NLV). Hierdie Skrifgedeelte kan jou deurgang tot seën en die sleutel tot die deurbraak waarvoor jy gebid het, wees.
Gaan terug en kyk weer na die beloftes wat jy aan God gemaak het. Hy wil hê dat jy selfvertroue voor Hom moet hê. ‘Geliefdes, as ons gewete ons nie veroordeel nie, het ons vrymoedigheid om na God toe te gaan. Wat ons ook al bid, kry ons van Hom omdat ons sy opdragte gehoorsaam en dié dinge in sy teenwoordigheid doen wat Hom bly maak’ (1 Johannes 3:21-22 NLV). Geen verskonings meer nie. Aanvaar verantwoordelikheid vir wie jy is en wat jy kan word.
Waag dit om die volgende te bid: ‘Verontrus my Here, wanneer my drome waar word, omdat ek te klein gedroom het. Verontrus my as ek veilig met my boot arriveer, omdat ek te na aan die kus gevaar het. Verontrus my wanneer die dinge wat ek gekry het, veroorsaak dat ek my dors na U verloor. Verontrus my wanneer ek sukses behaal, net om my begeerte na uitnemendheid te verloor. Verontrus my wanneer ek te gou tou opgooi en te ver te kort kom aan die doelwitte wat U vir my lewe gestel het’ (Skrywer Onbekend).
Om vorentoe te beweeg, sal jy dalk moet teruggaan om dinge tussen jou en die Here reg te maak. As dit die geval is, doen dit!
Sielskos: Joh 10:1-18; Op 7:13-17; Ps 23; Luk 15:1-7
2024-08-24
Jesaja 43:19 NLV
Moenie toelaat dat die pyn van jou verlede jou visie vertroebel en die seën wat God vir jou in die toekoms het, steel nie. God sê: ‘Vergeet al die dinge wat in die verlede gebeur het. Dis niks in vergelyking met wat Ek nog gaan doen nie. Ek gaan iets nuuts doen…’ (verse 18-19 NLV). As jy al ooit deur ou verhoudings seergemaak is, het God nuwes wat vir jou wag. ‘Die Here het weer met Samuel gepraat: ‘Jy het nou lank genoeg oor Saul getreur vandat Ek besluit het dat hy nie langer koning van Israel moet wees nie. Maak ‘n horing vol olie en gaan na Betlehem toe. Daar moet jy ‘n man met die naam Isai soek. Ek het besluit dat een van sy seuns die nuwe koning sal wees’ (1 Samuel 16:1 NLV).
Dis gesond om oor jou verliese te rou. Wanneer jy egter in die verlede vasgevang is, is dit altyd ten koste van die toekoms. Daar kom ‘n tyd wat jy moet ophou praat oor dit wat nie verander kan word nie. God se oplossing vir pyn is doelgerigtheid. God se oplossing vir ou wonde is ‘n verbintenis om in liefde te wandel.
C.M. Parkes het gesê: ‘Om te rou is die prys wat ons vir liefde betaal.’Diegene vir wie ons die liefste is, kan ons die seerste maak. ‘Daarop kom vra Petrus Hom: ‘Here, hoeveel maal moet ek ‘n medegelowige vergewe wat iets verkeerds teen my gedoen het? Selfs tot sewe maal toe?’ ‘Nee,’ verseker Jesus hom, ‘…tot sewentig maal sewe toe!’ (Matteus 18:21-22 NLV). Om jou vrede en vreugde terug te kry, moet jy vergewe en aanhou vergewe totdat die verlede sy houvas op jou verloor. Wanneer dit gebeur, is dit ‘n nuwe dag vir jou!
Sielskos: 2 Kro 19-21; Luk 16:19-31; Ps 119:113-120; Spr 22:1-3
