2024-09-04
Matteus 16:18 NLV
Hekke is verdedigingstoestelle en om hierdie hekke te bestorm, verg aanvallende maatreëls. Dink aan die kerk as ‘n stormram. In plaas daarvan om oor die kultuur te kla, moet ons beter opsies aanbied. Ons moet hoë kaliber rolprente produseer en buitengewone musiek komponeer, meer noemenswaardige boeke skryf en beter skole en besighede begin. Die ou spreuk dui aan dat ons moet ophou om die duisternis te vervloek en begin om ‘n paar kerse aan te steek.
Robert Briner skryf in Roaring Lambs: ‘Waarom kan ons nie glo dat die mees bekroonde regisseur in Hollywood eendag ‘n aktiewe Christelike lidmaat in sy kerk gaan wees nie? Hoekom nie hoop dat die Pulitzer-prys vir ondersoekende beriggewing aan ‘n Christelike joernalis by ‘n groot dagblad toegeken gaan word nie? Is dit regtig te vergesog om te dink dat ‘n groot uitstalling by die Museum van Moderne Kuns die werke van ‘n kunstenaar by een van ons goeie Christelike kolleges kan vertoon? Is ek mal om voor te stel dat jou seun of dogter die hoofdanser vir die Joffrey Ballet Company kan wees en ‘n weeklikse Bybelstudie vir ander dansers lei in wat eens as ‘n beroep wat moreel bankrot is, beskou is?’
Paulus het nie die filosowe in die Areopagusraad gekritiseer en vir hulle gesê dat hulle hel toe gaan nie. Hy het na hulle altaar aan ‘n onbekende god gewys en gesê: ‘Ek het gekom om vir julle te vertel wie hierdie onbekende God is en sy naam is Jesus.’ Wat was die resultaat? “…party het hom uitgelag, maar ander het gesê: ‘Ons wil graag later meer hieroor van jou hoor'” (Handelinge 17:32 NLV). Neem dus ‘n geloofsgebaseerde risiko en kyk wat gebeur.
Sielskos: Jos 8:30-10:43; Luk 19:28-40; Ps 103:13-22; Spr 23:1-3
2024-09-03
Hebreërs 11:6 NLV
Wanneer jy belangrike besluite neem, veral besluite wat die lewens van ander kan affekteer, sê die Bybel dat jy twee dinge moet doen: Eerstens moet jy die koste bereken (sien Lukas 14:28). Dit beteken dat jy die geleentheid moet evalueer en ondersoek en leiding en raad moet soek. ‘Vir ‘n dwaas is net sy eie pad die regte een. Iemand wat wys is, luister na ander se raad’ (Spreuke 12:15 NLV).
Hoe seker moet jy wees voordat jy vorentoe beweeg? In sy boek, The Next Generation Leader, skryf pastoor Andy Stanley: ‘Oor die algemeen sal jy heel waarskynlik nooit meer as 80 persent seker wees nie. Om vir groter sekerheid te wag, mag dalk veroorsaak dat jy ‘n geleentheid misloop.’ Waarvoor wag jy? ‘n Waarborg dat jy nie foute gaan maak nie? Dat jy nie gekritiseer sal word of verleentheid sal ervaar nie? As dit die geval is, sal jy nêrens kom nie. Wanneer jy alles gedoen het wat wysheid vereis, moet jy God vertrou en ‘n geloofsgebaseerde risiko neem.
In ‘n navorsingstudie wat deur twee sielkundiges verbonde aan Cornell Universiteit onderneem is, het hulle bevind dat tyd ‘n groot faktor in dit waaroor ons spyt is, is. Ons is tipies oor die korttermyn oor ons optrede spyt. Ons is egter geneig om oor die langtermyn oor ons gebrek aan optrede spyt te wees. Wanneer mense aan hulle hele lewens as ‘n geheel gedink het, het spyt oor die gebrek aan optrede spyt oor optrede ver oorskry – 84 persent teenoor 16 persent. Met ander woorde, jy sal nie soveel oor die foute wat jy gemaak het, as oor die God-verordende geleenthede wat jy misgeloop het, spyt wees nie. Gaan dus voort en neem ‘n geloofsgebaseerde risiko.
Sielskos: Jos 5:1-8:29; Luk 19:11-27; Ps 103:1-12; Spr 22:27-29
2024-09-02
Matteus 11:12 NLV
Petrus word onregverdig gekritiseer. Hy is die dissipel wat Jesus drie maal verloën het, maar hy is die enigste een wat naby genoeg aan Jesus was om uitgevang te word. Hy is die dissipel wat impulsief Malgus se oor afgekap het toe die mense gekom het om Jesus te arresteer, maar hy is die enigste een wat tot Jesus se verdediging gekom het. Hy is die dissipel wat in die See van Galilea gesink het, maar hy is die enigste dissipel wat op water geloop het.
Dis so maklik om mense vanuit die gemaklike grense van die boot te kritiseer. Daar is basies twee soorte mense: skeppers en kritiseerders – diegene wat uit die boot klim en op die water loop en diegene wat in die boot sit en die waterlopers kritiseer. Wanneer alles gesê en gedoen is, sal ons grootste spyt die God-verordende risiko’s wat ons nie geneem het nie, wees.
Die Duitse skrywer Johann Wolfgang von Goethe het gesê: ‘Hel begin die dag wanneer God vir jou die visie gee om alles te sien wat jy kon gedoen het, wat jy moes gedoen het, wat jy sou gedoen het, maar nie gedoen het nie.’ Wat glo jy is God besig om jou te lei om te doen? Wat dring die aanhoudende aansporing van die Heilige Gees jou om te doen? Doen dit.
Om nie ‘n geloofsgebaseerde risiko te neem nie, is soos om ‘n stukkie uit die legkaart van jou lewe permanent te misplaas. Dit laat ‘n teleurstellende gat agter. Wanneer ons die einde van ons lewens bereik, sal ons grootste spyt daardie vermiste legkaartstukkies wees. Gaan dus vandag voort en neem ‘n geloofsgebaseerde risiko.
Sielskos: Jos 1-4; Luk 19:1-10; Ps 84; Spr 22:24-26
2024-09-01
Markus 4:39 NLV
‘n Pastoor beskryf ‘n paar storms in die lewe: ‘Jy kom by die huis, loop in die kombuis in en vind ‘n nota wat sê: ‘Ek wil nie meer in hierdie huwelik wees nie.’ ‘n Donderslag! Jy gaan na die dokter toe vir ‘n roetine ondersoek en die bloedtoetse wys jy het kanker. Die wind huil! Jy gaan in vrede bed toe, net om drieuur die oggend ‘n oproep te kry wat sê dat jou pa aan ‘n hartaanval dood is. Jou skip slaan amper om! Die enigste voorspelbare ding van die lewe se storms is hoe onvoorspelbaar hulle is. Hulle waai in wanneer jy dit die minste verwag.’
Jesus het vir sy dissipels gesê: ‘…Kom ons vaar oorkant toe…’ (vers 35 NLV). Hulle moes besef het dat die oomblik toe Hy in die boot geklim het, dit onsinkbaar geword het. Inherent aan sy woorde was ‘n belofte van ‘n veilige aankoms. Daar is ‘n verskil tussen om ‘n belofte aan te hoor en dit te glo. Te dikwels versuim ons om te glo dat Jesus sal bereik wat Hy ons belowe het.
Die pastoor moedig ons aan: ‘In daardie oomblikke moet ons onsself daaraan herinner dat die son dalk mag ophou skyn, die wind mag begin waai en die golwe mag begin dein, maar Jesus kom altyd sy beloftes na. Jesus wil hê dat jy moet onthou dat daar geen rede is om te vrees wanneer Hy naby is nie. Hy wil die Kaptein van jou lewe se skip wees. Jy mag dalk nie altyd van Jesus bewus wees nie, maar Hy is daar. Vir daardie dissipels was die veiligste plek in die wêreld presies in daardie boot. Veiligheid is nie die afwesigheid van probleme nie. Veiligheid is die teenwoordigheid van Jesus.’
Sielskos: Fil 2:5-11; Op 19:11-16; Hand 3:1-16; Matt 1:18-21
2024-08-31
Markus 4:35 NLV
Om in geloof te groei en Jesus intiem te leer ken, verg dat jy saam met Hom deur storms moet gaan. Die dissipels het dit ontdek toe Jesus vir hulle gesê het: ‘…Kom ons vaar oorkant toe.’ Ons lees verder: ‘Daar het ‘n hewige stormwind opgekom. Groot golwe het teen die boot gebreek, met die gevolg dat dit alreeds vol water begin word het’ (vers 37 NLV). Hulle verhaal het ‘n gelukkige einde gehad. Jesus het die storm laat bedaar en hulle het in verwondering gesê: ‘…Wie is Hy werklik? Selfs die wind en die see luister na Hom!’ (vers 41 NLV).
Daar is lewensveranderende waarhede wat Jesus jou leer en aspekte van sy karakter wat jy nooit sal verstaan nie, totdat jy ‘n storm saam met Hom meegemaak het. Soms wanneer die storms kom, aanvaar ons dat dit die resultaat is van iets wat ons verkeerd gedoen het, of dat ons nie in die wil van God is nie. Die dissipels was as gevolg van gehoorsaamheid, nie as gevolg van ongehoorsaamheid nie, in die storm.
Verstaan die volgende: Selfs al het jy Jesus met jou hele hart lief, sal jy steeds storms moet trotseer. Soos die dissipels ontdek het, kan die storm kom wanneer jy die naaste aan Jesus is. Hy het nie belowe dat die storm nie die boot sou tref nie, maar dat die storm dit nie sou sink nie. Jy sal die probleme van die lewe óf met vrees óf in geloof trotseer. Vrees konsentreer op die storm; geloof konsentreer op die Verlosser.
Dit klink dalk verbasend, maar ons het storms nodig. Jesus laat ons toe om hulle te trotseer sodat ons (1) sy beloftes sal glo, (2) kalm in sy teenwoordigheid sal bly, en (3) vertroue in sy krag sal hê.
Sielskos: 3 Joh; Judas; Luk 18:31-43; Ps 119:169-176
2024-08-30
Handelinge 17:11 NLV
Hier is ‘n verhaal van twee stede: 1) Tessalonika het die waarheid verwerp. ‘Soos dit Paulus se gewoonte was, het hy na die sinagogediens gegaan en op drie Sabbatdae na mekaar uit die Skrifte met die Jode geredeneer… ‘Hierdie Jesus wat ek aan julle verkondig,’ het hy gesê, ‘Hý is die Messias.’… Die Jode was egter jaloers hieroor. Hulle het toe met die hulp van ‘n paar nikswerd leeglêers ‘n betoging begin en die stad in oproer gebring…’ (verse 2-3, 5 NLV).
2) Berea het die waarheid ontvang. ‘…Daar aangekom, het hulle [Paulus en Silas] na die Jode se sinagoge gegaan. Die mense daar was ontvankliker as dié in Tessalonika, en hulle het met groot belangstelling na Paulus se boodskap geluister. Hulle het elke dag die Skrifte ondersoek om te sien of dit is soos Paulus en Silas sê. Baie van hulle het gevolglik gelowig geword en ook heelparty van die Grieke, sowel vooraanstaande vroue as mans’ (verse 10-12 NLV).
Dis nie net ‘n verhaal van twee stede nie, maar van twee ingesteldhede. ‘n Toe ingesteldheid sê: ‘Ek glo dat ek alles wat daar oor hierdie onderwerp te wete is, weet.’ ‘n Oop ingesteldheid sê: ‘Ek is dankbaar vir wat ek weet, maar ek glo dat daar meer te wete is.’ ‘n Woord van waarskuwing egter! Net omdat ‘n spreker iets sê, beteken nie jy moet dit sonder twyfel aanvaar nie. ‘n Leier wat daarna streef om God te eer sal nie aanstoot neem as jy dit wat hulle sê, bevraagteken nie. Die mense in Berea het Paulus se woorde, die skrywer van die helfte van die Nuwe Testament, ondersoek! Die woord vir jou vandag is dus – wees altyd oopkop.
Sielskos: 2 Kro 35-36; 2 Joh; Luk 18:18-30; Ps 119:161-168
