2024-11-03
Psalm 22:4 NLV
Die Nuwe Lewende Vertaling sê: ‘Tog is U die heilige wat woon waar Israel U prys.’ Die 2020 vertaling sê: ‘U is tog die Heilige, U heers waar die lofliedere van Israel opklink.’ Jy vra: ‘Watter vertaling is die regte een? Beide is reg. Die woord ‘woon’ beeld ‘n inwoner wat tuis voel uit. Die woord ‘heers’ beeld iemand in ‘n posisie van mag en gesag uit, iemand wat bevele kan gee en dinge kan laat gebeur. God is dus tuis in ons lofprysing; sy mag word deur ons lofprysing vrygestel.
Toe God die aarde geskep het, het Hy dit met woorde – klank – gedoen. Dus kan God se krag deur klank beweeg. Sekere klanke roer sy hart. Sekere klanke roep sy teenwoordigheid aan. Sekere klanke beweeg Hom tot aksie. Die sleutel tot verlossing word in ‘n ontmoeting met God gevind. Liedere van redding kan so ‘n ontmoeting met God moontlik maak.
Lees hierdie drie Skrifgedeeltes aandagtig deur: ‘…Oordink dit in die nag op jou bed en wees rustig’ (Psalm 4:5 NLV). ‘Wees stil in die Here, en wag geduldig op Hom…’ (Psalm 37:7 NLV). ‘Hy wat woon in die skuilplek van die Allerhoogste, sal rus in die skadu van die Almagtige’ (Psalm 91:1 NLV). Let die woorde ‘oordink,’ ‘wees rustig,’ ‘wees stil,’ ‘wag geduldig’ en ‘hy wat woon in die skuilplek,’ op. Stel jouself nou voor waar jy die teenwoordigheid van God in jou laat insypel. Jou emosies is stil, jou gees is ingestel op God se teenwoordigheid, jy kan hoor wat Hy te sê het en van Hom ontvang wat jy nodig het. Dit is wat gebeur wanneer jy jouself met ‘liedere van redding,’ omring.
Sielskos: Hand 9:1-19; 2 Kor 11:21-33; 2 Kor 12:7-10; Hand 16:16-40
2024-11-02
Handelinge 16:25 NLV
Selfs die wetenskap stem saam dat musiek genesende krag het. Ons het deesdae musiekterapeute wat mense in hospitale, skole vir kinders met spesiale behoeftes, ouetehuise en ander omgewings bystaan. Navorsers aan die Harvard-universiteit het, onder andere, berig dat musiek ‘n genesende balsem vir beroerte, Alzheimer se siekte en die fisiese stres van voortydige geboorte, is. Hulle het ook gevind dat musiek chirurgiese uitkomste kan verbeter, help om verlore spraak te herstel, newe-effekte van kankerterapie kan verminder, pyn kan verlig en depressie kan beveg.
Dr Gottfried Schlaug, ‘n neuroloog verbonde aan Harvard Universiteit, het vir die Los Angeles Times gesê: ‘Musiek kan ‘n alternatiewe toegangspunt tot die brein bied, omdat dit soveel verskillende deure in ‘n beseerde of siek brein kan ontsluit.’ Sy navorsing wys dat toonhoogte, harmonie, melodie, ritme en emosie, wat almal komponente van musiek is, verskillende dele van die brein betrek – dele van die brein wat ook belangrik vir spraak, beweging en sosiale interaksie is. ‘Met ‘n woord het Hy hulle genees, en hulle van die dood weggeruk’ (Psalm 107:20 NLV).
Dus, wanneer musiek die medium is wat gebruik word om God te prys en sy kreatiewe en lewensveranderende Woord uit te druk, begin jy die potensiaal van musiek om redding mee te bring, insien. Dit was vir seker die geval vir Paulus en Silas: ‘Teen middernag was Paulus en Silas besig om te bid en tot lof van God te sing. Die ander gevangenes het na hulle geluister. Skielik kom daar ‘n groot aardbewing sodat die fondamente van die tronk geskud het. Al die tronkdeure het oopgevlieg en al die gevangenes se kettings het losgekom!’ (Handelinge 16:25-26 NLV). Verander jou houding. Verander jou omgewing. Verander jou lewensuitkyk. Begin om jouself met liedere van redding te omring!
Sielskos: Jes 34-37; Joh 7:25-44; Ps 104:24-35; Spr 28:9-12
2024-11-01
Psalm 32:7 NLV
Die Psalmdigter het geskryf: ‘U is vir my ‘n skuilplek. U beskerm my van teëspoed. U omring my met liedere van redding.’ Wanneer moeilikheid opdaag, kan jy na God toe draai en by Hom wegkruip. Hoe? Deur jouself met liedere van redding te omring. Ruth Ward Heflin gee ons ‘n padkaart na God se teenwoordigheid toe: ‘Jy lofprys totdat die gees van aanbidding kom, jy aanbid totdat die heerlikheid kom en dan staan jy in die heerlikheid.’ Dit is daar waar alle dinge moontlik is. God het vir Jeremia gesê: ‘…Ek staan gereed om te doen wat Ek gesê het gaan gebeur’ (Jeremia 1:12 NLV). Die harp wat Dawid gebruik het om God op die heuwels te loof terwyl hy na sy skape omgesien het, is dieselfde harp wat God gebruik het om koning Saul van die geeste wat hom in die greep van depressie gehad het, te bevry.
Dit was ook nie die enigste keer wat God musiek gebruik het om ‘n wonderwerk mee te verrig nie. Toe die mense van Juda uitwissing as gevolg van droogte in die gesig gestaar het, het die profeet Elisa gesê: “Laat iemand wat die lier kan speel, hiernatoe kom. Terwyl iemand op die lier gespeel het, kom die krag van die Here oor Elisa. Hy sê: ‘Dit is wat die Here sê: Hierdie droë vallei sal met poele water gevul word'” (2 Konings 3:15-16 NLV). God het daardie vallei vol water gemaak en hulle ‘n skouspelagtige oorwinning oor hul vyande gegee.
Die sanger Julie True sê: ‘Op ‘n geestelike vlak omseil musiek ons verstand en gaan reguit na ons hart, siel en gees toe. Dit raak plekke aan wat deur niks anders bereik kan word nie. Aanbidding maak die hemele oop en roer God se hart.’
Sielskos: Jes 30-33; Joh 7:14-24; Ps 104:1-23; Spr 28:5-8
2024-10-31
Markus 12:30 NLV
Wat beteken dit om God met al jou krag lief te hê? ‘n Pastoor definieer dit as volg: ‘Dit beteken om geweldige hoeveelhede energie aan koninkryksake te bestee. Dit beteken bloed, sweet en trane. Dit beteken diensbaarheid en opoffering. Dit beteken goeie outydse harde werk. Hoe ons ons energie gebruik, openbaar ons ware prioriteite.’ Dit openbaar hoe baie ons iemand liefhet; in hierdie geval, God.
Die pastoor gaan voort: ‘Christenskap was nooit bedoel om ‘n selfstandige naamwoord te wees nie. Christenskap was altyd bedoel om ‘n werkwoord te wees. Ons moet gehoorsaam aan die vermanings van die Heilige Gees wees. Ons moet geleenthede aangryp om te dien. Aan die einde van die dag gaan God nie sê: ‘Goed gesê, goeie en getroue dienaar,’ nie, maar ‘Welgedaan, goeie en getroue dienaar.’ Niks is meer vervullend as om kalorieë vir ‘n koninkryksaak te verbrand nie. Enigiets minder as om al ons krag vir God se doeleindes te benut, is op sy beste vervelig en skynheilig op sy ergste.
So baie Christene is so verveeld en so gefrustreerd deur die gaping tussen hulle teologie en die werklikheid. Die manier om daardie gaping toe te maak en om weer daardie heilige stormloop van adrenalien te ervaar, is om ander te dien. Dit kan so eenvoudig wees soos om ‘n enkelma wat ‘n aand uit nodig het se kinders op te pas, of om in ‘n bediening in jou plaaslike kerk te dien, of om vrywilligerswerk by ‘n plaaslike ouetehuis te doen. Dit maak nie saak hoe groot of hoe klein nie, elke kalorie wat vir ‘n koninkryksaak verbrand word, verdien saamgestelde rente in die ewigheid. Dit sal die leegheid in jou siel met pure vreugde vul.’
Sielskos: Deut 18:9-14; Dan 2; Jes 47:5-15; Hand 16:16-34
2024-10-30
Job 12:8 NLV
Die patriarg Job het geskryf: ‘Praat met die aarde. Dit sal julle onderrig…’ George Washington Carver word as een van die geskiedenis se grootste wetenskaplike denkers geag. Om en by die draai van die twintigste eeu het landbou in die suidelike state van Amerika swaar gekry. Die bolkalander was besig om katoengewasse te vernietig. Omdat die boere jaar na jaar katoen geplant het, was daar ook min voedingstowwe in die grond oor.
Dit was George Washington Carver wat die idee van wisselbou begin het. Hy het die boere aangemoedig om grondbone te plant, wat hulle toe gedoen het. Die plan het die grond weer laat herstel, maar die boere was ontsteld omdat daar nie ‘n mark vir grondbone was nie. Toe hulle by Carver daaroor kla, het hy gedoen wat hy altyd gedoen het – hy het gebid; hy het gereeld vieruur in die oggend opgestaan, deur die woud gaan stap en God gevra om die geheimenisse van die natuur aan hom te openbaar. Een van sy gunsteling Skrifgedeeltes was: ‘Praat met die aarde. Dit sal julle onderrig…’ Carver het letterlik vir God gevra om die natuur se geheime aan hom bekend te maak en God het dit gedoen.
Gevolglik het Carver meer as driehonderd gebruike vir grondbone ontdek. Of dalk meer akkuraat, die Here het meer as driehonderd gebruike daarvoor geopenbaar. Dit het alles van skeerroom tot gom tot skoonheidsmiddels tot seep tot souse tot insekdoder tot linoleum tot houtvernis tot kunsmis, behels. Carver het gesê: ‘Ek hou daarvan om aan die natuur as ‘n draadlose telegraafstasies waardeur God elke dag, elke uur en elke oomblik van ons lewe met ons praat, te dink.’ Vandag sal God op baie verskillende maniere met jou praat; jy moet net sensitief daarvoor wees en luister.
Sielskos: Jes 26-29; Joh 7:1-13; Ps 114; Spr 28:1-4
2024-10-29
Jesaja 43:4 NLV
Raai wie het gesê: ‘Jy is vir My kosbaar en belangrik’? God. Moet dus nie toelaat dat iemand jou anders vertel nie. Hoekom is dit so belangrik? Want om te verstaan wie jy as ‘n persoon is en opreg te glo dat jy liefde en aandag van ‘n ander persoon verdien, noodsaaklik is vir jou eiewaarde. Die vermoë om dit suksesvol en op ‘n bedagsame wyse oor te dra, is noodsaaklik vir enige gesonde, wedersyds bevredigende verhouding.
‘n Gevoel van eiewaarde is nie arrogansie nie. Dit help jou om grense te stel en waarborg dat dit nie saakmaak wie jy ontmoet nie, daardie grense nooit oorgesteek sal word nie. Dikwels wanneer ons in verhoudings gebruik voel, is dit omdat ons toegelaat het dat daardie grense oorskry word. Of erger nog, ons het nog nooit gedink oor waar die grense moet wees nie. Die manier om hierdie situasie te voorkom, is om duidelik te wees oor wie jy is en wat jy bereid is om in ‘n verhouding te doen. Om die waarheid oor ‘n ander persoon of jouself te ontken, sal met verloop van tyd op ‘n ramp afstuur.
Met ‘n stewige grondslag om te weet wie jy is en wat jy verteenwoordig, sal jy die dapperheid besit om die regte vrae te vra en die antwoorde te kan ondersoek. Jy sal inligting en bewyse bekom wat jou help om te besef wie ‘n persoon werklik is en of hulle by jou lewe inpas. Jy sal eerlik met jouself en ander oor wie jy is, jou behoeftes en die manier waarop jy jou lewe wil leef, wees. Buiten jou verhouding met God is daar geen ander belangriker verhouding as die een wat jy met jouself het nie. God sê: ‘Omdat jy vir My kosbaar en belangrik is…’ Glo dit en lewe daarvolgens.
Sielskos: Jes 22-25; Joh 6:52-71; Ps 127; Spr 27:25-27
