2026-08-10
Matteus 13:31 NLV
Jesus het gesê: ‘…God se koningsheerskappy is soos ‘n mosterdsaad wat iemand in sy tuin geplant het. Dit is die kleinste van alle saadsoorte, maar as dit groei, word dit groter as al die ander plante in die tuin. Dit word so ‘n groot boom dat die voëls in sy takke kan kom nesmaak’ (verse 31-32 NLV). ‘n Mosterdsaad is slegs twee millimeter in deursnee en kom in drie primêre kleure voor: geel, swart en wit. Binne daardie merkwaardige saad is vitamien A, B6, B12, C, E en K. Dit is ook ‘n bron van kalsium, yster, magnesium, fosfor, kalium, natrium en sink. Dit het anti-inflammatoriese en anti-kanker eienskappe. Jesus het daarop gewys dat wanneer dit geplant word, dit groei om een van die grootste bome in die tuin te word, wat die voëls van die hemel seën deur hulle van ‘n tuiste te voorsien.
Paulus het geskryf: ‘God wat saad voorsien aan die saaier en dan brood om te eet, sal ook aan julle saad gee en dit laat toeneem en die vrugte van julle goedhartigheid lieflik laat groei’ (2 Korintiërs 9:10 NLV). Aan wie gee God ‘saad’? Aan saaiers, nie aan opgaarders nie! Wat doen God met jou saad wanneer jy dit saai? Hy vermeerder dit! Die saad wat jy saai kan in die vorm van tyd, diens, wysheid, geld, deernis, ens. wees.
God belowe dat wanneer jy saai, jy sy seën sal oes. ‘En God is in staat om aan julle elke gawe in oorvloed te gee sodat julle in elke opsig genoeg kan hê én ook nog oorvloedig kan wees in elke goeie werk’ (2 Korintiërs 9:8 NLV). God het vir jou saad gegee – saai dit!
Sielskos: 2 Kro 1-4; Mark 5:1-10; Ps 119:33-40; Spr 20:28-30
2026-08-09
Spreuke 12:22 NLV
Rosalie Elliot het die vierde rondte van ‘n nasionale spelkompetisie in Washington DC, gehaal. Die elfjarige van Suid-Carolina is gevra om die woord ‘avowal’ te spel. In haar sagte suidelike aksent het sy die woord gespel, maar die beoordelaars kon nie besluit of sy ‘n a of ‘n e as die voorlaaste letter gebruik het nie. Hulle het vir ‘n paar minute onder mekaar gedebatteer terwyl hulle na die opname geluister het, maar die aksent was te vaag om te ontsyfer. Uiteindelik het die hoofbeoordelaar die vraag aan die enigste persoon wat die antwoord geken het, gestel. ‘Was die letter ‘n a, of was dit ‘n e?’ het hy vir Rosalie gevra.
Teen hierdie tyd, omring deur die ander jong deelnemers wat onder mekaar gefluister het, het Rosalie die korrekte spelling van die woord geken. Tog het sy sonder aarseling geantwoord dat sy die woord verkeerd gespel het en van die verhoog af geloop. Die hele gehoor, insluitend sowat vyftig koerantverslaggewers, het opgestaan en haar toegejuig. Dit was ‘n trotse oomblik vir haar ouers. Selfs in die nederlaag was sy ‘n oorwinnaar. Daar is inderdaad meer oor Rosalie Elliot as oor die kind wat die kompetisie op die ou einde gewen het, geskryf!
As ‘n verloste kind van God, vereis jou hemelse Vader eerlikheid in woord en daad. ‘Die waarheid hou vir altyd; die leuen kom gou aan die lig’ (Spreuke 12:19 NLV). ‘Moenie vir mekaar lieg nie. Julle het mos die vorige mens en sy leefstyl soos klere uitgetrek’ (Kolossense 3:9 NLV). ‘Gevolglik moet julle ophou leuens vertel en die waarheid teenoor mekaar praat. Ons is tog lede van dieselfde liggaam’ (Efesiërs 4:25 NLV).
Sielskos: Gen 22:14; Ps 37:25; Joh 3:16-17
2026-08-08
Spreuke 19:11 NLV
Woede maak baie van ons bang, omdat ons al daardeur skade gely het. Woede kan egter ‘n bewys wees dat ‘n persoon vir iemand of iets omgee. Wanneer julle woede afskakel, elimineer dit julle passie, intimiteit en liefde. Hier is twee maniere om woede vir jou te laat werk:
1) Rig jou woede op die regte teiken. Jou eggenoot is nie die vyand nie; Satan is. Hy kom ‘…om te steel, dood te maak en te vernietig’ (Johannes 10:10 NLV). Hy is die een wat probeer om ‘n wig tussen julle in te dryf. Verskuif bewustelik jou fokus van jou eggenoot na die probleem toe. Word byvoorbeeld kwaad vir jou gebrek aan finansies, nie vir jou eggenoot se besteding nie. Word kwaad vir eise wat julle in verskillende rigtings trek, nie vir jou eggenoot wat laat by die werk bly nie. Word kwaad vir die beperkings op intimiteit, nie vir jou eggenoot wat nee vir seks sê nie. Plaas die probleem apart van jou en jou eggenoot. Sien julleself as ‘n span wat die probleem saam beveg. Val die probleem aan, nie mekaar nie.
2) Identifiseer die oorsprong. Vind die pyn wat die woede veroorsaak. Soek daarna in jou en jou eggenoot se harte. Watter behoefte word nie vervul nie? Watter wond is blootgelê? Watter skaamte of vrees word opgewek? Wanneer jy die pyn identifiseer, sal jy myle nader aan die oplossing wees. Wees egter versigtig! Deur kwesbaar te wees, kan julle mekaar soms seermaak; erken dit en vergewe mekaar vinnig wanneer dit gebeur. Om by mekaar betrokke te bly wanneer julle kwesbaar is, sal die vlak van julle intimiteit soos niks anders kan nie, verhoog.
Omarm dus woede as God se geskenk en leer hoe om dit vir jou te laat werk.
Sielskos: 1 Kro 26:20-29:30; Mark 4:26-41; Ps 119:25-32; Spr 20:25-27
2026-08-07
Jakobus 1:19 NLV
Jy kan woede gebruik om die band en intimiteit tussen jou en jou eggenoot te verdiep. ‘n Mens doen dit as volg:
1) Erken die woede. ‘n Persoon wat deur woede beheer word, is nie veilig, gesond of wys nie. ‘Iemand wat homself nie in bedwang kan hou nie, is soos ‘n stad sonder ‘n muur wat beskerming bied’ (Spreuke 25:28 NLV). As jy en jou eggenoot kan leer om woede te beheer, in plaas daarvan om deur dit beheer te word, kan dit van onskatbare waarde wees. Vind ‘n manier om julle gevoelens te erken. As jy sukkel om jou woede te beheer, neem eers ‘n tree terug en word kalm. Kom dan terug en hanteer die probleem.
2) Moenie weghardloop nie. As jy werklik in gevaar is, moet jy na veiligheid vlug. As jy egter nie in gevaar is nie, sal jy julle beide se gevoelens bevestig deur te bly en die probleem met jou eggenoot te bespreek. Dis die enigste manier om ‘n oplossing te kry. Besluit om julle kwessies te hanteer wanneer julle kwaad raak.
Julle moet dalk ‘n tyd afspreek om dit te doen as julle nie dadelik kan nie, maar moenie te lank wag nie. Probeer ten minste om die probleem aan te spreek voor julle daardie aand gaan slaap. Julle mag dalk nie ‘n oplossing vir die hele probleem vind nie, maar kom ooreen om die situasie te ontlont voor die dag verby is. ‘…Moenie tot die aand toe kwaad bly, en die duiwel so ‘n houvas gee nie’ (Efesiërs 4:26-27 NLV). Indien nodig, maak ‘n tyd vas om die probleem aan te spreek. Julle verdien dit albei, en julle huwelik is dit werd.
Sielskos: 1 Kro 23:21-26:19; Mark 4:13-25; Ps 119:17-24; Spr 20:22-24
2026-08-06
Psalm 119:25 AFR53
Die Bybel is bedoel om oor gebid, gemediteer en uitgeleef te word. Die sleutel daartoe is die lewendmaking van die Heilige Gees. ‘Julle weet baie goed dat God Jesus uit die dood laat opstaan het. Daarom is dit vanselfsprekend dat Hy wat nou deur sy Gees in julle bly, eendag ook elkeen van julle se sterflike liggaam met die hulp van sy Gees lewend sal maak’ (Romeine 8:11 DB).
In hierdie geval verwys ‘lewendmaking’ na ons liggaamlike opstanding uit die dood. Die Heilige Gees maak ons egter op meer as een manier lewend. Soms is dit ‘n Godgegewe idee wat deur ons sinapse vuur. Soms is dit ‘n aansporing om in geloof op te tree, in te tree of uit te tree. Soms is dit ‘n woord van wysheid in ‘n moeilike situasie. Die woord ‘lewendmaking’ kan na verskillende dinge verwys. Kom ons kyk na drie daarvan:
1) Om lewend te maak, beteken om te kataliseer. Dink aan ‘n chemiese reaksie. Hebreërs 4:12 sê dat die Woord vol lewenskrag en energie is. Dieselfde Gees wat die skrywers van die Skrif geïnspireer het, inspireer jou ook terwyl jy dit lees. Wanneer die Lewende Woord deur geloof gekataliseer word, vind ‘n bonatuurlike reaksie plaas wat sonde vergewe, vrees verlig, siekte genees, idees inspireer en drome laat waar word.
2) Om lewend te maak beteken om eienaarskap oor te dra. Deur geloof neem ons eienaarskap van die Woord en die Woord neem eienaarskap van ons. Wanneer die Woord lewend gemaak word, beklink dit die ooreenkoms.
3) Om lewend te maak beteken ook om swanger te raak. Wanneer die Woord verwek word, bevrug dit jou met moontlikhede, verander dit jou begeertes, roei dit jou vrese uit en vorm dit Christus se denke in jou.
Sielskos: 1 Kro 19:1-23:20; Mark 4:1-12; Ps 119:9-16; Spr 20:19-21
2026-08-05
Josua 5:14 NLV
Die Bybel sê: ‘Josua was in die omgewing van Jerigo toe hy skielik ‘n man voor hom sien staan met ‘n swaard in sy hand. Josua het na hom toe gegaan en vir hom gevra: ‘Is jy ons vriend of ons vyand?’ ‘Nie een nie,’ sê die man, ‘ek is die aanvoerder van die hemelse leër. Ek is nou hier vir julle.’ Josua het op die grond neergeval in aanbidding. Hy vra vir die man: ‘Wat wil Meneer vir sy dienaar sê?’ Die leëraanvoerder van die Here se mag sê toe vir Josua: ‘Trek uit jou skoene. Jy staan op ‘n heilige plek.’ Josua het so gemaak’ (verse 13-15 NLV).
Die boodskap hier is onmiskenbaar: Jerigo mag dalk sy mure hê, maar jy, Josua, het meer. Jy het God. Hy is by jou. Is dit nie presies wat jy nodig het nie – om te weet dat God naby is, dat jy nooit alleen is nie en dat die Here jou in jou donkerste uur, in jou diepste vrae, nooit sal verlaat nie?
Dawid het gesê: ‘Here, U alleen is my erfenis, my beker van seën. U waarborg my lotsbestemming… Ek prys die Here wat my insig gee… Die Here is altyd by my. Ja, Hy is aan my regterhand, daarom sal ek nie struikel nie. Hieroor is my hart vol vreugde. Ek besing sy lof en rus in veiligheid’ (Psalm 16:5-9 NLV).
Staan jy voor ‘n uitdaging van Jerigo-proporsies? Doen dan wat Josua gedoen het: ‘En toe Josua by Jerigo was, slaan hy sy oë op en kyk… daar staan ‘n man teenoor hom met sy ontblote swaard in sy hand…’ (Josua 5:13 KAB23). Jy het lank genoeg na die probleem gekyk. Slaan nou jou oë op na die probleemoplosser – Jesus!
Sielskos: 1 Kro 16-18; Mark 3:20-35; Ps 119:1-8; Spr 20:15-18
