2026-08-16
Lukas 17:21 NLV
God se koningsheerskappy is toekomstig, ewig en hemels. Wanneer Christus terugkeer om sy koninkryk op aarde te vestig, sal die volgende profesie vervul word: ‘…Die koninklike heerskappy oor die wêreld behoort nou aan ons Here en sy Christus, en Hy sal as koning heers vir altyd’ (Openbaring 11:15 NLV). Wat ‘n glorieryke dag sal dit nie vir al God se verloste kinders wees nie. Tot dit egter plaasvind, sê Jesus: ‘…die koningsheerskappy van God is hier by julle.’ Dit beteken dat jy as ‘n wedergebore gelowige wat in hierdie wêreld leef, geroep is om te demonstreer wat dit beteken om onder die heerskappy van die Koning van konings en die Here van heersers te leef.
Winston Churchill het geskerts: ‘Democracy is the worst form of government, except for all those other forms that have been tried.’ Alle menslike regerings is gebrekkig en uiteindelik bestem om te misluk, omdat dit uit gebrekkige mense bestaan. Dus, as burgers van die koninkryk van God, word ons geroep om die ‘lig’ te wees wat die duisternis verlig en onkunde verdryf, en die ‘sout’ te wees wat die lewens van diegene met wie ons in aanraking kom, geurig maak, reinig, genees en verryk (sien Matteus 5:13-14).
Ons word geroep om die beginsels van God se koninkryk op die markplein van die lewe uit te oefen. Of jy nou in die onderwys, vervoer, medisyne, politiek, landbou, verkope, of vervaardiging werk, jy word geroep om die voordele van ‘n lewe onder die heerskappy van Christus en deur die leiding van sy inwonende Heilige Gees, te demonstreer. ‘…Die koninklike heerskappy oor die wêreld behoort nou aan ons Here en sy Christus…’ Wanneer Christus terugkeer, sal hierdie belofte ten volle vervul word. Tot dan, het Jesus gesê: ‘…Gaan doen besigheid daarmee totdat ek terugkom’ (Lukas 19:13 NLV).
Sielskos: Eks 15:26; Ps 103:1-5; 1 Pet 2:24
2026-08-15
1 Kronieke 29:14 NLV
Baie van die helde in die Bybel was welgestelde individue. ‘Abram was baie ryk aan lewende hawe, silwer en goud’ (Genesis 13:2 NLV). Koning Dawid ‘…is op ‘n ryp ouderdom dood nadat hy ‘n lang lewe, rykdom en eer geniet het…’ (1 Kronieke 29:28 NLV). Barnabas, ‘n welgestelde grondeienaar, het die uitbreiding van die vroeë kerk moontlik gemaak toe hy ‘n stuk grond verkoop en die geld aan die apostels gegee het (sien Handelinge 4:36-37). Daar is niks met rykdom op sigself verkeerd nie. Die dinge wat egter saak maak, is:
1) Hoe jy dit kry. ‘Kom nou, julle ryk mense, huil en treur oor al die swaar wat vir julle voorlê… Die betaling wat julle teruggehou het van die mense wat oes, is baie duidelike getuienis teen julle…’ (Jakobus 5:1, 4 NLV). Die God wat aanteken en beloon, let ook op hoe jy sake doen.
2) Hoe jy dit gee. Dawid het gesê: ‘…Alles wat ons het, kom van U af, en ons gee vir U net dit wat U reeds vir ons gegee het!’ Wanneer God dus vir jou sê om te gee, probeer om hierdie twee dinge te onthou: a) Hy vra vir ‘n gedeelte van dit wat reeds aan Hom behoort. Jy besit dit nie; jy bestuur dit net vir Hom. b) Jy oes altyd wat jy saai. ‘…Wat mense saai sal hulle ook maai!’ (Galasiërs 6:7 NLV). In God se ekonomie maai jy meer as wat jy saai. Wanneer jy ‘n enkele mieliepit plant, oes jy ‘n mielierank met honderde mieliepitte. Gee dus en God sal aan jou teruggee.
Sielskos: 2 Kro 19-21; Mark 6:14-29; Ps 119:73-80; Spr 21:14-16
2026-08-14
Jesaja 6:8 NLV
Een van die geskiedenis se grootste rampe het in 1271 plaasgevind. Daardie jaar het Niccolo en Matteo Polo, die vader en oom van Marco Polo, Kublai Khan besoek wat op daardie stadium as die wêreldheerser beskou is – met gesag oor die hele China, Indië en die hele Ooste. Kublai Khan was aangetrokke tot die verhaal van Christus soos Niccolo en Matteo dit aan hom oorvertel het. Hy het vir hulle gesê: ‘Julle moet na julle hoëpriester gaan en hom namens my sê om vir my honderd manne te stuur wat vaardig in julle godsdiens is, en ek sal gedoop word. Wanneer ek gedoop is, sal al my baronne en groot manne gedoop word en hulle onderdane sal ook gedoop word. So sal daar meer Christene hier wees as in julle deel van die wêreld.’
Verbasend genoeg is daar egter niks gedoen in reaksie op Kublai Khan se versoek nie. Eers na dertig jaar is ‘n handjievol sendelinge gestuur. Dit was te min, te laat! Christelike leiers in die Weste het blykbaar nie die visie gehad om te sien hoe die Ooste vir Christus gewen kon word nie. Dis verstommend om te dink aan die maniere waarop die wêreld vandag anders sou kon wees as die dertiende-eeuse China, Indië en die ander gebiede van Asië, Christelik geword het. Nou is dit egter ons verantwoordelikheid!
Jy vra: ‘Wat kan ek doen? Ek is net een persoon.’ Jy kan drie dinge doen: 1) ‘Hierdie oes is die Here s’n. Vra Hom dan om werkers vir sy oesland te voorsien’ (Matteus 9:38 NLV). 2) Gee, sodat die ongereddes met die evangelie bereik kan word (sien 2 Korintiërs 9:7). 3) As God jou roep, gaan! “…Ek het geantwoord: ‘Here, ek sal gaan! Stuur my!'”
Sielskos: 2 Kro 16-18; Mark 6:1-13; Ps 119:65-72; Spr 21:10-13
2026-08-13
Psalm 62:6 AFR53
Ons almal het verwagtinge van ander mense. Baie keer is ons dalk nie heeltemal bewus van ons verwagtinge nie, of ons druk dit nie duidelik uit nie, of ons erken nie dat dit onrealisties is nie. Daarom kan dit ons baie frustreer. Mislukte verwagtinge sal altyd stres veroorsaak. Ongelukkig is sommige van die skadelikste verwagtinge dié wat ons van onsself het. ‘Ek behoort drie kinders groot te maak, elke aand aandete op die tafel te hê, tien uur per dag te werk en perfek te lyk wanneer my man deur die deur stap.’
Maak ‘n lys van jou belangrikste verwagtinge. Begin met die belangrikste mense in jou lewe en maak dan ‘n lys van jou belangrikste verwagtinge van elke persoon. Probeer objektief wees of dit realisties is of nie. Maak seker dat jy die oorsprong of kernrede vir ‘n verwagting verstaan. Het jy hierdie verwagtinge duidelik gemaak? Indien nie, hoekom nie? Vrees jy verwerping? Wat is die ergste wat kan gebeur? Is jy bereid om oor sommige van jou verwagtinge te onderhandel? Daar kan gevalle wees waar jy sekere verwagtinge moet uitskakel om jou eie vrede te bewaar.
Die Psalmdigter het geskryf: ‘Wees net maar stil tot God, my siel, want van Hom is my verwagting!’ Dit beteken dat jy dalk minder van mense en meer van God sal moet verwag. Moenie jouself blootstel om in frustrasie te lewe nie. Bring jou verwagtinge voor God en laat Hy hulle beoordeel. Laat Hy die onrealistiese uitskakel en jou die moed gee om dié wat gekommunikeer moet word, uit te druk. Vertrou God om die harte van diegene wat betrokke is, te beïnvloed sodat jou verwagtinge nie ‘n bron van frustrasie vir jou of hulle word nie.
Sielskos: 2 Kro 12-15; Mark 5:31-43; Ps 119:57-64; Spr 21:7-9
2026-08-12
2 Petrus 3:18 NLV
Hoe kan jy geestelik groei? Deur die volgende vyf dinge te doen:
1) Herontdek die Bybel. Jy sal nooit geestelik groei sonder om jou gedagtes in die Skrif te verdiep nie. Toe Jesus vir die duiwel gesê het: ‘…’n Mens het meer as brood nodig om van te lewe. Wat jy eintlik nodig het, is om te leef van elke woord uit God se mond’ (Matteus 4:4 NLV), het Hy ‘n vers uit Deuteronomium aangehaal wat Hy gememoriseer het. As Jesus die Skrif nodig gehad het, het jy dit ook nodig.
2) Hervat jou gebedslewe. Charles Spurgeon het gesê: ‘Net soos jy nie kan verwag dat ‘n plant sonder lug en water moet groei nie, so kan jy nie verwag dat jou hart sonder gebed en geloof moet groei nie.’ Wanneer jy begin bid dat God bonatuurlik in jou lewe moet optree, sal jy wonderwerke begin sien gebeur.
3) Skakel weer met God se mense. ‘Laat ons voortdurend aandag gee aan mekaar – oor hoe ons mekaar kan aanspoor tot ‘n meer kragdadige beoefening van liefde en goeie dade… Kom ons moedig mekaar aan…’ (Hebreërs 10:24-25 NLV).
4) Weerstaan jou sondige gewoontes. ‘Onthou, die versoekings wat oor julle pad kom, is nie uniek nie; ander ondervind dit ook. God is getrou. Hy sal keer dat die versoeking te sterk vir julle word. Midde-in die versoeking sal Hy vir ‘n uitweg sorg sodat julle kan volhou’ (1 Korintiërs 10:13 NLV). Kies altyd God se ‘uitweg.’
5) Belê in ander. God het ‘n plek vir jou gereed gemaak om te dien en in mense te belê. Maak ‘n kwaliteitsbesluit dat jy nie net in die kerk gaan sit en die een preek na die ander gaan luister nie; maar dat jy gaan begin optree volgens wat jy geleer het.
Sielskos: 2 Kro 8-11; Mark 5:21-30; Ps 119:49-56; Spr 21:4-6
2026-08-11
Romeine 12:21 NLV
Tydens die Koreaanse Oorlog is ‘n Suid-Koreaanse burger deur die kommuniste in hegtenis geneem. Toe die jong kommunistiese leier uitvind dat hy die hoof van ‘n weeshuis is, het hy egter besluit om sy lewe te spaar. In plaas daarvan het hy beveel dat die man se seun tereggestel moet word. Die negentienjarige seun is in die teenwoordigheid van sy vader geskiet. Na die oorlog is die jong kommunistiese leier deur die Verenigde Nasies gevange geneem en ter dood veroordeel.
Voordat die vonnis egter voltrek kon word, het die Christen wie se seun doodgemaak is, vir die lewe van die moordenaar gepleit. ‘Gee hom vir my,’ het die man gevra, ‘en ek sal hom oplei.’ Hoe ongewoon dit ook al was, het die Verenigde Nasies sy versoek toegestaan en die vader het sy seun se moordenaar in sy eie huis ingeneem en vir hom gesorg. Deur aan die liefde van God blootgestel te word, het daardie jong kommunistiese leier ‘n Christen en uiteindelik die pastoor van ‘n kerk geword.
Is jy al seergemaak, verraai of onregverdig behandel? In plaas daarvan om in woede terug te veg, hanteer dit Skriftuurlik: ‘Moenie vir enigiemand kwaad met kwaad terugbetaal nie… julle moet julleself nie wreek nie. Laat die straf aan God oor. Daar staan mos in die Skrif: ‘Dit is mý reg om te straf; Ek sal vergeld, sê die Here’… Moenie toelaat dat die slegte julle onderkry nie, maar deur goed te doen moet julle die slegte hokslaan’ (Romeine 12:17, 19, 21 NLV).
Sielskos: 2 Kro 5-7; Mark 5:11-20; Ps 119:41-48; Spr 21:1-3
