2024-11-21
Spreuke 4:18 NLV
Wanneer dit by groei kom, kom jy nooit by jou ‘bestemming’ uit nie. Dis nie ‘n plek wat jy bereik nie; dis ‘n pad wat jy stap. ‘Die pad van die regverdiges is soos die lig met dagbreek. Dit word al helderder tot die volle dag aanbreek.’
‘n Pastoor skryf: ‘Baie mense leer net deur probleme. Moeilike ervarings leer hulle lesse op die harde manier en hulle verander – soms tot voordeel, soms tot nadeel. Die lesse is willekeurig en moeilik. Dis baie beter om jou groei doelbewus te beplan. Jy besluit waar jy wil of wat jy nodig het om te groei, jy besluit wat jy wil leer en jy volhard met dissipline teen die pas wat jy gestel het. Dink wat dit is wat jy wil doen. Wie jy wil wees? Maak ‘n lys van dinge wat jou sal help om jou doelwit te bereik en daardie persoon te word. Is daar iets op daardie lys wat jy nou kan doen? Vandag? Doen dit dan. Of jy nou aangespoor voel of nie, dit is nou die tyd om te begin groei.
As jy nie reeds doelbewus groei nie, moet jy vandag begin. As jy dit nie doen nie, kan jy dalk sekere doelwitte bereik wat jy kan vier, maar jy sal uiteindelik ‘n plato bereik. Wanneer jy egter doelbewus begin groei, kan jy aanhou groei en aanhou vra: ‘Wat is volgende?’ Wanneer jy aktief na jou doelwit begin werk, sal jy vind dat die deur na persoonlike groei ‘n skrefie begin oopgaan. Deur daardie skrefie sal jy orals nog geleenthede vir groei begin sien. Jou wêreld sal vir jou begin oopgaan. Jy sal meer bereik. Jy sal meer leer. Ander geleenthede sal hulself begin voordoen.’
Sielskos: Pred 9-12; Joh 12:1-11; Ps 76; Spr 30:15-17
2024-11-20
1 Timoteus 1:12 NLV
Een van die grootste sendelinge in die geskiedenis van die kerk was Mary Slessor, alhoewel sy as ‘n onwaarskynlike kandidaat begin het. As gevolg van haar pa se alkoholisme, het die elfjarige Mary twaalf uur skofte by die meule gewerk om haar familie te help om hulle rekeninge te betaal. Sy het ontdek dat sy boeke op haar weefstoel kon stut terwyl sy gewerk het. Terwyl sy oor die land Calabar (moderne Nigerië) gelees het, het Mary oortuig geraak dat sy daarheen as ‘n sendeling moet gaan.
In 1876 het sy aanboord die S.S Ethiopia, wat ironies genoeg met vaatjies whisky gelaai was, na Wes-Afrika vertrek. Met die herinnering aan hoeveel skade alkohol aan haar familie aangerig het, het sy gesê: ‘Soveel vate whisky en net een sendeling.’ Maar wat ‘n sendeling! Mary was ‘n kombinasie van prediker, kinderoppasser, verpleegster, dorpsonderwyseres en onderhandelaar wat stokalleen drie heidense streke deur die evangelie te verkondig, getransformeer het. Sy het stamoorloë voorkom en vroue en kinders by die honderde gered. Vir veertig jaar het sy vir God geswoeg.
God hou daarvan om mense te gebruik wat die wêreld miskyk of weggooi. Mary Slessor was een van hulle. So ook Paulus. ‘…[Jesus] het my aangestel om Hom te dien, selfs al het ek voorheen met die Naam van Christus gespot. Ek het sy mense vervolg en hulle op enige moontlike manier benadeel. Maar God het sy onverdiende goedheid aan my bewys omdat ek dit uit onkunde en ongeloof gedoen het. O hoe barmhartig en genadig was die Here nie! Hy het my volledig vervul met geloof en die liefde van Christus Jesus’ (verse 12-14 NLV). Die God wat die apostel en Mary Slessor gebruik het kan jou ook gebruik – mits jy jou lewe aan Hom oorgee.
Sielskos: Pred 5-8; Joh 11:38-57; Ps 81; Spr 30:11-14
2024-11-19
2 Timoteus 4:3 NLV
Mense wat hulle graag met diamante wil optooi, gebruik gereeld die tydlose namaaksels van kubieke sirkonia. Deesdae kan wetenskaplikes egter regte diamante in ‘n laboratorium skep. Hierdie diamante is so goed dat edelsteenkundiges sukkel om tussen diamante wat in ‘n laboratorium geskep is en diamante wat gemyn is, te onderskei. Om hulle van mekaar te onderskei, word ‘n kontrolelys gebruik: gewig, kleur, helderheid en briljantheid word ondersoek. Daarsonder kan ‘n bedrieër voorgee dat ‘n diamant wat net twee dae oud is, een is wat duisende jare geneem het om te ontwikkel.
Dieselfde is waar van geestelike waarheid. As Christene nie hulle Bybel ken nie, kan geestelike bedrieërs allerhande leuens as die waarheid voorhou. Dis nie genoeg vir iemand om wonderwerke in Jesus se Naam te doen nie. ‘Baie sal vir My op die oordeelsdag sê: ‘Here, Here, ons het dan in u Naam… baie wonders verrig!’ Dan sal Ek hulle antwoord: ‘Julle was nog nooit werklik mý mense nie. Gaan weg van My af!..’ (Matteus 7:22-23 NLV).
Die Bybel sê dat selfs Satan hom as ‘n engel van die lig kan vermom. Paulus waarsku ons: ‘Want daar kom ‘n tyd wanneer mense nie meer na die regte onderrig sal luister nie. Hulle sal hulle eie begeertes volg en leermeesters soek wat net verkondig wat hulle wil hoor. Hulle sal die waarheid verwerp en vreemde mites navolg’ (2 Timoteus 4:3-4 NLV).
Die Bybel gebruik die woord ‘leerstelling’ ongeveer vyf-en-vyftig keer. Dis hoe belangrik dit is. Ons moet die begeerte van ‘n diamantkenner hê – ‘n begeerte om nie mislei te word nie. As noukeurige ondersoek, studie en sorg geneem word om die kwaliteit van ‘n edelsteen te bepaal, hoeveel te meer moet dieselfde inspanning nie tot die kosbare Woord van God aangewend word nie?
Sielskos: Pred 1-4; Joh 11:28-37; Ps 50; Spr 30:7-10
2024-11-18
Johannes 12:46 NLV
John Ortberg skryf: ‘In 1780 was daar ‘n Jesus-volgeling in Groot Brittanje, genaamd Robert Raikes, wat nie kon verdra dat die siklus van armoede en onkunde ‘n hele generasie van kinders vernietig het nie. Hy het gesê: ‘Die wêreld marsjeer vorentoe op die voete van kinders.’ Dus het hy kinders wat ses dae ‘n week in armoede moes werk, begin leer. Sondae was hul vrye dag. Hy het gesê: ‘Ek gaan ‘n skool wat hulle gratis leer lees, skryf en oor God leer, begin.’ Hy het dit gedoen en dit Sondagskool genoem. Binne vyftig jaar was daar 1,5 miljoen kinders wat deur 160,000 vrywillige onderwysers, wat ‘n visie vir die opvoeding van ‘n generasie gehad het, onderrig is. Sondagskool was nie ‘n geprivatiseerde, opsionele program vir kerkkinders nie. Dit was een van die groot opvoedkundige oorwinnings in die wêreld.
Die alfabet van die Slawiese mense word Cirillies genoem. Dit is genoem na Sint Cyril, ‘n sendeling wat ontdek het dat die Slawiese mense geen geskrewe alfabet het nie. Dus het hy een vir hulle geskep sodat hulle oor Jesus in hul eie taal kon lees.
‘n Metodistiese sendeling, Frank Laubach, het sowat ‘n eeu gelede ‘n buitengewone ontmoeting met God gehad, wat hom op ‘n missie gestuur het om die wêreld uit onkunde op te hef. Hy het ‘n wêreldwye geletterdheidsbeweging begin. Die leuse: ‘Each one teach one,’ het uit die buitengewone lewe van hierdie man gevloei. Hy het na meer as honderd lande gereis, wat die ontwikkeling van leesboeke in 313 tale tot gevolg gehad het. Hy het as ‘die apostel van die ongeletterdes,’ bekend geword.’
Sielskos: Rom 15-16; Joh 11:17-27; Ps 8; Spr 30:5-6
2024-11-17
Matteus 4:16 NLV
Eerstens en die belangrikste, het Jesus die lig van verlossing vir die hele mensdom gebring. Een van die blywende voordele van sy koninkryk is egter sy impak op leer en opvoeding. Die woord universiteit het begin by diegene wat geglo het dat God die heelal geskep het; daarom moet sy weë bestudeer en geken word. Martin Luther het uit die Nuwe Testament die priesterskap van alle gelowiges uitgelig. In die proses het hy onderwys verander omdat hy gesê het dat elke persoon in staat moet wees om te lees en te skryf sodat hulle die Skrif self kan bestudeer. Dit het ‘n doelwit van wêreldwye geletterdheid vir almal in ‘n samelewing ingelui.
In Amerika is die eerste wet wat vir universele onderwys gevra het, in 1647 in Massachusetts aangekondig. Dit is genoem, glo dit of nie, ‘The Old Deluder Satan Act.’ Die bewoording daarvan lui: ‘It being one chief product of that Old Deluder Satan, to keep men from the knowledge of the Scriptures… and to the end that learning may not be buried in the graves of our forefathers.’ Dis ‘n lieflike idee wat deur almal nagestreef moet word: dat onkunde die duiwel se gereedskap is en dat God die God van waarheid is.
In nasie na nasie het Christensendelinge tale ontdek wat nie neergeskryf is nie. In dade van buitengewone opoffering het hulle hul lewens aan die taak gewy om hierdie tale neer te skryf. Hulle het die eerste woordeboeke saamgestel. Hulle het die eerste sinskonstruksie neergepen. Hulle het die eerste alfabette gevorm. Die eerste betekenisvolle eienaam wat in talle tale geskryf is, was die naam Jesus.
Sielskos: Dan 1:3-21; Dan 5:11-12; Dan 6:10-28; Dan 9:1-19
2024-11-16
Matteus 10:32 NLV
Om jou geloof op ‘n effektiewe wyse met ander mense te deel, moet jy die volgende drie struikelblokke oorkom:
1) Jy moet seker van jou eie verlossing wees. Johannes skryf: ‘Almal wat glo in die Seun van God, dra dié getuienis in hulle eie hart… En dit is die inhoud van sy getuienis: God het aan ons die ewige lewe gegee, en dié lewe bestaan in ‘n hegte verhouding met sy Seun… Ek skryf hierdie dinge aan julle sodat julle met die wete kan leef dat julle nou reeds deel het aan die ewige lewe, julle wat aanhou glo in die persoon van die Seun van God’ (1 Johannes 5:10-11, 13 NLV).
2) Jy moet oor jou vrees vir verwerping kom. Dit beteken dat jy by die wortel van jou vrees, jou ego, moet uitkom. Eers wanneer jou selfbehoud en eiebelang gekruisig is, kan jy Christus sonder vrees bekend maak. Jesus het gesê: ‘Ek verseker julle, wie iemand ontvang wie Ek stuur, ontvang My…’ (Johannes 13:20 NLV). As iemand jou verwerp, mag jy dalk aansien verloor. As hulle egter vir Jesus verwerp, sal hulle hul siel verloor.
3) Jy moet wysheid gebruik om die evangelie te deel. ‘Die vrug van die regverdige is ‘n boom van die lewe, en hy wat siele win, is wys’ (Spreuke 11:30 AFR53). God kan die hart van jou luisteraar voorberei sodat hulle oop is vir dit wat jy te sê het en Hy kan vir jou die regte woorde en die regte benadering gee om met hulle te praat. Jesus het gesê: ‘en wanneer die Raadgewer, die Heilige Gees, kom wat die Vader in my Naam sal stuur, sal Hy julle in alle opsigte onderrig en julle ook herinner aan alles wat Ek vir julle gesê het’ (Johannes 14:26 NLV).
Sielskos: Rom 12-14; Joh 11:1-16; Ps 105:1-15; Spr 30:1-4
