2018-01-29
Openbaring 4:11 NLV
‘n Christelike boer het sy perd geleer om te stop en te loop. Wanneer hy wou hê dat die perd moes begin loop, het hy, ‘Prys die Here,’ gesê. Wanneer hy die perd wou laat stop, sou hy, ‘Halleluja,’ skree. Alles het goed gegaan tot een dag toe ‘n donderslag die perd laat skrik het en hy teen volle spoed weggetrek het. Toe die boer besef dat hy beheer oor die perd verloor het, het hy paniekerig geraak en die bevele vergeet wat hy die perd geleer het. Voor hulle het ‘n krans skielik opgedoem. Desperaat het die boer elke godsdienstige woord wat hy nog ooit gehoor het, geskree. ‘Amen! Jesus red! Waardig! Heilig!’ Niks het gewerk nie. Net toe die perd amper op die afgrond is, het die boer ‘Halleluja!’ geskree. Die perd het daar op die kant van die afgrond tot stilstand gekom. Verlig het die boer die sweet van sy voorkop afgevee en gesê, ‘Sjoe, prys die Here!’ Op ‘n ernstiger noot, dis nie net Sondae in die kerk wat ons God moet loof nie. ‘Van waar die son opkom tot waar dit ondergaan, moet die naam van die Here geprys word’ (Psalm 113:3 NLV). Dit beteken dat jou eerste woorde in die oggend en jou laaste woorde in die aand, lofprysing tot God moet wees. ‘Hoekom moet ek God elke dag loof?’ vra jy. Omdat Hy waardig is om jou lof te ontvang. ‘U is waardig, Here ons God, om die hemelse heerlikheid en die eer en die mag te ontvang…’ Woorde van liefde en waardering wat hardop gespreek word bring mense nader aan mekaar en skep intimiteit. Wil jy nader aan God beweeg? Begin om Hom meer te loof.
Sielskos: Num 4:34-6:27; Matt 10:32-42; Ps 104:24-35; Spr 3:11-12
2018-01-28
Sagaria 4:10 NLV
Stel jou voor waar die tempel in ‘n puinhoop lê en van die grond af herbou moet word. Dis hoe dit was toe Sagaria sy visie met die mense van Israel gedeel het. Sommige van hulle het gedink dat dit nie gedoen kan word nie en ander het gedink dat hulle spesifieke bydraes nie ‘n verskil sou maak nie. Dus het Sagaria hulle met die volgende woorde uitgedaag: ‘Die werk wat nou aan die gang is, lyk miskien klein en nie waffers nie. Maar moenie die waarde daarvan onderskat nie. Die mense sal rede hê om bly te wees as hulle sien dat Serubbabel met die bouwerk aangaan.’ In 1963 het die metereoloog, Edward Lorenz, die hipotese voorgestel wat as die skoenlappereffek bekend sou word. Hy het bespiegel dat ‘n klein gebeurtenis, soos die klap van ‘n skoenlapper se vlerke in Brasilië, moontlik die windstrome so kon affekteer dat dit ‘n tornado in Texas kon veroorsaak. Lorenz het tot die eenvoudige dog diepsinnige gevolgtrekking gekom: ‘Miniskule veranderinge in insette kan makroskopiese veranderinge in uitsette veroorsaak.’ Hierdie eenvoudige ontdekking het die mag om jou lewe te verander. Dit kan jou geestelike, emosionele, verhoudings of finansiële vooruitskatting radikaal verander. Dit kan die atmosfeer van jou organisasie of jou huwelik verander. Een besluit. Een verandering. Een risiko. Een idee. Dis al wat dit verg. Jy hoef nie eenhonderd veranderinge te maak nie. Jy moet eenvoudig net 100 persent aan een verandering verbind wees. Dit sal al jou inspanning verg. Dit sal moontlik die moeilikste ding wees wat jy ooit sal doen. Daardie een verandering het egter die potensiaal om ‘n 100 persent verandering in jou lewe te maak.
Sielskos: Eks 20:8-11; Jes 58:13-14; Luk 4:16; Heb 10:19-25
2018-01-27
Efesiërs 1:3 NLV
Boer Smith het gedurende die Groot Depressie gelewe en het gesukkel om die verband op sy plaas te betaal. Uiteindelik het die bank hom dertig dae gegee om die uitstaande paaiemente te betaal, of die bank sou die plaas terugvat. Toe het iets wonderliks gebeur. ‘n Man van ‘n oliemaatskappy het voor sy deur opgedaag en gevra of hulle vir olie op sy plaas kan boor. Aangesien hy in elk geval op die punt was om die plaas te verloor, het Boer Smith ingestem. Die maatskappy het gekom en ‘n groot olieaar raakgeboor. Onmiddellik was Boer Smith ‘n multimiljoenêr. Nou is die vraag – Wanneer het hy ‘n miljoenêr geword? Was dit toe die olie op die plaas ontdek is, of toe hy die plaas in die eerste plek gekoop het? Hy was ‘n miljoenêr die oomblik toe hy die plaas gekoop het, maar hy het in armoede gelewe omdat hy nie geweet het wat onder sy grond en binne sy bereik gelê het nie. Die Bybel sê, ‘…[God] het al die geestelike skatte wat daar in die hemel is, verniet vir ons gegee.’ Sommige mense dink dat die enigste ding wat God vir jou sal doen is om jou met verlossing te seën, en dan laat Hy jou vir die res van jou lewe sukkel tot jy in die hemel kom. Solank as wat jy dit glo, lewe jy in jou eie geestelike weergawe van die Groot Depressie. Jy is geestelik arm en geestelik swak omdat jy nie weet wat in Christus vir jou beskikbaar is of hoe om toegang daartoe te kry en in jou lewe te gebruik nie. Weier om so te lewe. Lees eerder jou Bybel en begin om op God se beloftes in elke area van jou lewe aanspraak te maak.
Sielskos: Num 3:1-4:33; Matt 10:21-31; Ps 104:1-23; Spr 3:9-10
2018-01-26
Jeremia 1:5 NLV
Kom ‘n baba in die wêreld met ‘n komplekse persoonlikheid, of is daardie kind ‘n skoon boek waarin ervaring sal skryf? In die verlede, het gedragswetenskaplikes geglo dat nuwe babas geen persoonlike of emosionele karaktereienskappe by geboorte het nie. Hulle klein persoonlikhede is glo heeltemal deur die opeenvolgende jare gevorm. Die meeste ouers het egter van beter geweet. Elke ma van twee of meer kinders was van die eerste keer wat sy hulle vasgehou het oortuig daarvan dat elkeen van haar babas verskillende persoonlikhede het. Nou, na jare se navorsing, het verskeie kenners in kinderontwikkeling erken dat daardie ma’s reg was. Een belangrike studie het nege karaktereienskappe wat by babas wissel, geïdentifiseer – soos buierigheid, vlak van aktiwiteit en hoe hulle reageer. Hulle het ook bevind dat hierdie selfde eienskappe steeds in latere jare by die kinders voorkom. Babas verskil inderwaarheid op onmeetbare maniere wat ons persoonlikheid en ons individualiteit definieer. As elke sneeuvlokkie wat val sy eie ontwerp het en elke korreltjie sand uniek is, maak dit geen sin om te dink dat kinders almal dieselfde sal wees nie. Ja, die omgewing en menslike ervarings speel ‘n baie belangrike rol om ons te vorm in wie ons is en hoe ons dink. Daar kan egter geen twyfel wees dat elke persoon op aarde ‘n unieke skepping van die eerste oomblikke van hulle lewens is nie. Soos God vir Jeremia gesê het: ‘Ek ken jou nog voordat jy gevorm is in die skoot van jou moeder. Voor jou geboorte al het Ek jou gekies…’ Jou kinders is almal uniek.
Sielskos: Num 1-2; Matt 10:11-20; Ps 100; Spr 3:7-8
2018-01-25
Kolossense 2:9 ABA
In sy boek Outlive your life, sê die skrywer Max Lucado dat die Griekse woord vir ‘geseënd’, makarios, die naam van ‘n eiland naby Griekeland was. Dit het as die ‘geseënde eiland’ bekend gestaan omdat dit so selfvoorsienend was. Die inwoners het nie nodig gehad om die eiland te verlaat om aan enige van hulle behoeftes te voldoen nie. Die natuurlike hulpbronne van hierdie eiland was so ryk dat alles wat jy nodig gehad het om die lewe te geniet, reeds daar was. Daar is les vir jou hieruit te leer. Die oomblik wat jy Christus as jou Verlosser aanneem, word Hy jou Koning en begin jy in sy koninkryk leef. Jy het nie nodig om dit te verlaat en iewers anders dit wat jy nodig het, te kry nie, omdat dit alles rondom jou in die eiland van seën is. Dis soos ‘n radio, jy moet net jouself instel en God se seën ontvang. Selfs al hou jou radio op werk, is daar egter steeds seine in die lug. Al wat jou radio doen is om die sein te ontvang en dit aan jou te lewer. Moet egter nie die radio meer krediet gee as wat dit verdien nie. Dis slegs ‘n punt van kontak vir die radioseine. Een van die redes hoekom ons nie God se seën in ons lewens herken nie, is omdat ons die afleweringsmetode met die bron daarvan verwar. As iets wonderbaarliks nie in ons skoot val nie, dink ons dat dit nie van God af kom nie. Nee, God sal jou op verskillende tye, deur verskillende mense, op verskillende maniere seën. Jy moet egter altyd onthou dat hulle net die draers van die seëning is, terwyl Hy die bron daarvan is (sien Psalm 31:19).
Sielskos: Jak 3-5; Matt 10:1-10; Ps 96; Spr 3:5-6
2018-01-24
Johannes 14:26 NLV
Jesus het sy bergrede met ‘n treffende verhaal, wat die gaping tussen weet en doen aanspreek, afgesluit: ‘Elkeen wat na my woorde luister en daarvolgens handel, is soos ‘n verstandige persoon wie se huis op soliede rots gebou is’ (Matteus 7:24 NLV). Die probleem is dat ons dit makliker vind om slim, eerder as goed, te wees. Jy het nie nodig om meer van die Bybel te weet tot jy dit wat jy reeds weet, begin uitoefen nie. John Ortberg sê dat toe hy tennis afgerig het, sou onervare nuwelinge worstel met die besluit oor die tipe raket wat hulle moet koop – moet dit nylon snare wees, hoe styf moet dit gesnaar wees, ens. Die probleem was dat hulle nog nie eers ‘n bal kon slaan nie. In plaas daarvan om oor die kleinighede te debatteer, moes hulle net begin oefen. ‘n Woord van waarskuwing egter: Jy kan nie die Woord begin doen deur op jou eie krag en wilskrag staat te maak nie. Die Heilige Gees wat binne in jou woon word in die Skrif die ‘Voorspraak’ genoem. Wanneer jy besluit om dit wat reg is te doen, sal die Heilige Gees binne in jou jou bemagtig. Wanneer ‘n situasie hom voordoen, sal Hy jou voorsê wat om te doen. Jesus het belowe, ‘…wanneer die Raadgewer, die Heilige Gees, kom wat die Vader in my Naam sal stuur, sal Hy julle in alle opsigte onderrig en julle ook herinner aan alles wat Ek vir julle gesê het.’ Jy vra, ‘Maar wat as ek dit nie regkry nie?’ Hy sal met jou werk en jou geleenthede gee totdat jy dit regkry.
Sielskos: Jak 1-2; Matt 9:27-38; Ps 91; Spr 3:3-4
