2018-01-23
Jakobus 1:22 NLV
‘n Besigheidsman wat bekend was vir sy meedoënloosheid, arrogansie en godsdiensywer het vir Mark Twain gesê dat hy beplan om voor sy dood die Heilige Land te besoek, Sinaiberg uit te klim, en die Tien Gebooie hardop te lees. ‘Ek het ‘n beter idee,’ het Twain geantwoord. ‘Bly net hier in Boston en onderhou net die Gebooie!’ Ons sal eerder oor dit wat ons nie weet nie peins, as om dit te doen wat ons weet ons moet doen. ‘n Maatskappy weet byvoorbeeld dat hulle hul kwaliteitbeheer moet verbeter, dus bespreek die bestuur die probleem, luister na aanbiedinge, lees allerlei boeke, ondersoek nuwe sisteme – maar begin nooit doen wat gedoen moet word om dit te verbeter nie. Hulle probleem is nie onkunde nie; dis dat hulle te veel weet, maar te min doen. Nog ‘n alledaagse voorbeeld: Mense sal eerder die waarde van proteïne teenoor koolhidrate, Franse kookkuns teenoor veganisme, met gewigte oefen teenoor draf debatteer, as om eenvoudig dit wat hulle eet te verander. Dit is eenvoudig: verbrand meer kalorieë as wat jy inneem. So sal sommige Christene eerder oor die doktrine debatteer as om te doen wat Jesus sê. Soos die ou advertensie vir Nike sê – Just do it! Oefen om ‘n moeilike persoon lief te hê; probeer om iemand te vergewe; gee geld weg; stop en sê dankie; loof God; bemoedig ‘n vriend; seën ‘n vyand; sê jammer wanneer jy verkeerd is. Die waarheid is dat jy reeds meer weet as wat nodig is. Niks sit mense so af soos iemand met ‘n kop vol kennis wat welwillendheid en karakter kortkom nie. Jakobus se woorde is vandag nog van toepassing: ‘Julle moet mense word wat dóén wat die Woord sê. Moet dit nie net aanhoor nie…’
Sielskos: Dan 11-12; Matt 9:14-26; Ps 89:38-52; Spr 3:1-2
2018-01-22
Filippense 3:21 NLV
Die Bybel sê dat ons hemelse liggame presies soos Jesus s’n na sy opstanding sal wees. Hy het nog soos Homself gelyk, want die dissipels kon Hom herken. Hy het saam met hulle geëet en gedrink. Hy kon aangeraak word. Hy kon wonderbaarlik deur mure beweeg. Hy kon in verskeie plekke aan verskillende mense verskyn sonder dat hy gewone maniere van reis gebruik het. Sy getransformeerde liggaam het nie meer ouer geword nie en was ook nie aan siekte of die dood onderworpe nie. Jou nuwe liggaam sal soos syne wees. ‘…Christus was die eersteling; daarna, wanneer Christus terugkom, sal al sy mense opgewek word. Vervolgens sal die einde kom…’ (1 Korintiërs 15:23-24 NLV). Die Skotse Presbiteriaan, Robert Bailie, is in 1684 ter dood veroordeel vir sy beweerde betrokkenheid by ‘n komplot om koning Charles II te vermoor. Hy sou gehang word, waarna sy kop en hande aan ‘n plaaslike brug vasgespyker sou word. Hoe het hy gereageer? Deur die volgende Skrifgedeelte aan te haal: ‘Ons daarteenoor het ons burgerskap in die hemel. Van dáár verwag ons ook die Here Jesus Christus as Redder. Hy sal ons vernederde liggame verander in liggame met goddelike heerlikheid…’ (Filippense 3:20-21 NLV). Toe het hy verklaar: ‘Hulle mag dalk my liggaam opkap soos hulle wil, maar ek weet verseker dat niks verlore sal gaan nie, omdat my liggaam weer soos Christus se wonderbaarlike liggaam sal word.’ Of jy nou eendag in ‘n kis begrawe word en of jy veras word, maak geen verskil nie. God het jou vir ‘n wonderbaarlike liggaam voorberei, net soos Christus s’n.
Sielskos: Dan 8-10; Matt 9:1-13; Ps 89:15-37; Spr 2:21-22
2018-01-21
Jeremia 15:1 DB
Die vyfde verskil: Gebed. Die Bybel noem net twee geleenthede waar Simson gebid het: eerstens, toe hy gedink het hy is besig om van dors dood te gaan (Rigters 15:18); tweedens, in die laaste oomblikke van sy lewe nadat hy alles verloor het en in die tronk opgeëindig het (sien Rigters 16:28). Hy was soos die klein seuntjie aan wie gevra is, ‘Sê jy elke aand jou gebedjie op?’ Hy het geantwoord, ‘Nee, partykeer het ek niks nodig nie.’ Aan die ander kant sê die Bybel, ‘Toe roep Samuel die Here aan en die Here het donderweer en reën gestuur. Almal was verskrik voor die Here en vir Samuel’ (1 Samuel 12:18 NLV). Een van die grootste eerbewyse wat aan enigiemand in die Skrif bewys is, is toe God rakende Samuel se gebedslewe gesê het: ‘Die Here het vir my gesê: ‘Selfs al het Moses en Samuel voor My gestaan om hierdie mense se saak te stel, sou Ek hulle nie jammer gekry het nie’…’ Dis hoeveel ‘invloed’ Samuel by God gehad het! Die Bybel praat ook baie oor Jesus se gebedslewe. Soms het Hy regdeur die nag gebid, ander kere was Hy voor sonsopkoms al besig om te bid. Dit was sy geheim tot sy effektiewe bediening. Hy het gereelde beleggings in gebed gemaak sodat Hy gereelde onttrekkings van krag kon maak wanneer Hy dit nodig gehad het. Jy sal ook opmerk dat Hy selde vir enigiemand gebid het wat Hy genees het. Hoekom? Omdat Hy reeds tyd in gebed daaroor spandeer het. Dit is die geheim tot ‘n oorwinnende Christelike lewe.
Sielskos: Eks 20:7; Jes 29:22-24; Matt 6:9; Fil 2:5-11
2018-01-20
1 Samuel 7:12 NLV
Die vierde verskil: Toerekenbaarheid. Simson het ‘n onafhanklike houding gehad en het geweier om deur enigiemand toerekenbaar gehou te word. Sy wisselvallige pogings om Israel te bevry het daartoe gelei dat die Filistyne God se mense meer belas het. Samuel, aan die ander kant, het in konsensus met ander mense gewerk. Toe hy gebid het en God vir Israel ‘n wonderlike oorwinning oor hul vyande gegee het, het hy geweier om krediet daarvoor te aanvaar. “Samuel neem toe ‘n groot klip en sit dit regop tussen Mispa en Sen. Hy noem die plek Eben-haeser… want hy het gesê: ‘Tot hiertoe het die Here ons gehelp.'” Simson was op homself gefokus, terwyl Samuel op ander mense gefokus was. Die Psalmdigter het gesê, ‘Hoe goed, hoe mooi is dit as broers eensgesind saamwoon!.. Want daar gee die Here sy seën…’ (Psalm 133:1, 3 NLV). Die geheim daarvan om in God se seën te wandel is om nie alleen op te tree nie, maar om saam met ander mense te werk. Dis hoe die kerk in die Nuwe Testament dit gedoen het. ‘Die Raad het hulle nog verder gedreig. Uiteindelike het hulle hulle egter laat gaan… Toe hulle losgelaat is, het Petrus en Johannes dadelik die ander gelowiges opgesoek…’ (Handelinge 4:21, 23 NLV). Die apostels het verhoudings in plek gehad met mense wat geweet het hoe om hulle raad te gee en te lei, te versterk en te bemoedig, te bid en God se Woord met hulle te deel. Jy het ook sulke verhoudings nodig! Jy kan dit ook nie bekostig om te wag tot jy in die moeilikheid kom voor jy hierdie verhoudings vestig nie. Doen dit nou, in die goeie tye, en hulle sal in die slegte tye daar wees vir jou.
Sielskos: Dan 5-7; Matt 8:28-34; Ps 89:1-14; Spr 2:20
2018-01-19
1 Samuel 12:12 NLV
Die derde verskil: Beweegredes. Simson het herhaaldelik die Here met sy dade en leefstyl oneer aangedoen. Dit is omdat hy geen agting vir God se eer gehad het nie. Wat ‘n kontras was Samuel nie! Toe Israel ‘n koning wou hê om soos die omliggende nasies te wees, het dit sy hart gebreek. Hy het vir die mense gesê, ‘… alhoewel die Here julle God reeds julle koning was.’ Om God te eer was sy hoogste prioriteit. Daar is ‘n les hieruit te leer, veral vir diegene van ons wat in die bediening staan. Elke keer wat iemand agter die preekstoel inskuif, moet hulle hulle ego’s en beweegredes ondersoek: ‘Is my doel om God te laat goed lyk, of myself te laat goed lyk?’ Die Bybel sê, ‘…Die Here is ‘n God wat weet van al jou dade; Hy sal jou oordeel volgens wat jy gedoen het’ (1 Samuel 2:3 NLV). Die waarheid is dat niemand van ons die werk sonder die krag van God se inwonende Gees, kan doen nie. Ons moet dit nooit vergeet nie. Die tragedie van Simson se einde word in die volgende twee Skrifgedeeltes beskryf: ‘…Hy het uit die slaap wakker geword en by homself gedink: ‘Ek sal weer uit die ding uitkom soos al die vorige kere.’ Maar hy het nie geweet dat die Here hom verlaat het nie’ (Rigters 16:20 NLV). ‘Toe die Filistyne begin dronk word, het hulle vir mekaar gesê: ‘Bring Simson vir ons dat hy ons kan laat lag.’ Hulle het Simson uit die tronk gaan haal om hulle te kom vermaak…’ (vers 25 NLV). Sonder God se genade en krag kan ons ook soos Simson opeindig. Bly dus nederig en strewe daarna om slegs vir God te eer.
Sielskos: Dan 3-4; Matt 8:18-27; Ps 84; Spr 2:16-19v
2018-01-18
Rigters 14:3 NLV
Die tweede verskil: Verhoudings. “Sy ouers vra toe vir hom: ‘Is daar nie iemand tussen die mense van jou stam of onder jou volksgenote met wie jy kan trou nie? Moet jy nou onder die heidense Filistyne ‘n vrou vat?’ Simson het vir sy pa gesê: ‘Kry haar vir my. Ek wil haar hê.'” Wanneer dit by verhoudings gekom het, is Simson deur sy laer beginsels eerder as die beginsels van God se Woord gelei. Hy het duur daarvoor betaal. Drie keer lees ons in die Skrif: ‘Simson het afgegaan…’ (vers 1 NLV). Hy het afgegaan na Timna toe en met die verkeerde vrou getrou. Hy het afgegaan na Gasa toe en die nag met ‘n prostituut deurgebring. Hy het afgegaan na die Sorekvallei toe, in Delila se skoot opgeëindig en sy krag, sy vryheid, sy reputasie, sy seën en sy lewe verloor. Samuel, aan die ander kant, is grootgemaak om die bediening te suiwer. Eli, die Hoëpriester, het twee seuns gehad, Hofni en Pineas, wat hy vir die priesterskap bestem het. Hulle het egter omkoopgeld aanvaar om sondes te bedek en openlik met prostitute omgegaan. Daar is ‘n les vir elke verloste kind van God hieruit te leer: ‘Moenie saamspan met ongelowiges nie…’ (2 Korintiërs 6:14 NLV). Is God bevooroordeeld wanneer Hy dit sê? Nee, Hy is beskermend! Wanneer jy in ‘n verhouding met iemand ‘saamgespan’ is wat nie jou geloof, jou waardes, jou doelwitte en jou prioriteite deel nie, eindig jy op waar julle mekaar in verskillende rigtings probeer trek. Wanneer probleme te voorskyn kom, soos hulle verseker sal, het jy iemand langs jou sy nodig wat na dieselfde bron draai om die oplossing te kry: na God toe.
Sielskos: Dan 1-2; Matt 8:10-17; Ps 81; Spr 2:11-15
