2018-01-17
Hebreërs 11:32 NLV
Simson en Samuel word in dieselfde Skrifgedeelte genoem, maar daar is groot verskille tussen hulle. Altwee se geboorte was wonderbaarlik, dus is hulle ‘n voorbeeld van elkeen van ons wat wedergebore is en geroep is om God te dien. Paulus skryf, ‘Al hierdie dinge het met hulle gebeur as ‘n voorbeeld vir ons, en is neergeskryf om ons te waarsku… Daarom – as julle dink julle staan sterk, moet julle oppas dat julle nie ook tot ‘n val kom nie’ (1 Korintiërs 10:11-12 NLV). Die eerste verskil: Finansies. Simson was gierig en manipulerend, terwyl Samuel integriteit uitgeoefen het. Eendag het Simson dertig Filistynse prinse gewed dat hulle nie sy raaisel kan oplos nie, ‘As julle dit nie kan oplos nie, gee julle vir my 30 hemde en 30 stelle klere…’ (Rigters 14:13 NLV). Simson se klem was op ‘gee vir my.’ Hy is ‘n voorbeeld van Christene in die besigheidswêreld wat die Christelike lewe deur onetiese praktyke ondermyn, en diegene in die bediening wat die Skrif verdraai en hulle tot emosionele manipulasie wend om geld in te samel. Die wêreld hou ons dop, dus moet ons ag slaan op die Skrifgedeelte wat sê, ‘Moenie net regsit om ander mense in eie munt terug te betaal as hulle iets verkeerds aan julle gedoen het nie. Doen liewer goeie dinge sodat ander mense kan sien dat julle God dien’ (Romeine 12:17 DB). Samuel was heeltemal anders. Na veertig jaar se voorbeeldige leierskap het mense hulde aan hom gebring: ‘…U het ons nooit op enige manier bedrieg of verdruk nie…’ (1 Samuel 12:4 NLV). Jesus het gesê, ‘Onthou, waar jou skat is, daar sal jou hart ook wees’ (Matteus 6:21 NLV). Die toestand van jou hart word in die manier wat jy jou finansies hanteer, geopenbaar.
Sielskos: Fil 1-4; Matt 8:1-9; Ps 79; Spr 2:9-10
2018-01-16
Eksodus 24:4 NLV
Een van die geheime van Moses se groot sukses in die lewe was dat Hy elke dag tyd saam met God spandeer het en neergeskryf het wat God vir hom gesê het. Jy moet dit ook doen, want om goed neer te skryf: a) verhelder jou gedagtes; b) gee jou ‘n permanente rekord om na terug te verwys; en c) laat jou toe om jou vordering te meet. Ons onthou net dit wat ons die tyd voor neem om aan te teken. Een van die bekendste Amerikaanse sendeling was Jim Elliot, wat in 1956 ‘n martelaar vir Christus in Ecuador geword het. Hy het ‘n geestelike dagboek gehou, wat interessante leesstof is: ‘My daaglikse Bybelstudiepatroon is gebreek. Ek het dit nog nie herstel nie. Dis moeilik om as enkellopende man te bid. Dis nou te moeilik om in die oggende uit die bed uit op te staan. Ek was al van voorneme om dit te verander, maar ek het dit nie deurgevoer nie.’ Sulke skryfwerk word ‘n spieël wat ons ware geestelike toestand reflekteer – ‘n toestand wat maklik is om te vergeet as dit jou nie elke dag in die gesig staar nie. Elliot, soos almal van ons, het met geestelike dissipline gesukkel. Anders as die meeste van ons, het hy egter ‘n geskrewe rekord van sy geestelike mislukkings sowel as sy geestelike oorwinnings gehou. Wanneer jy so ‘n dagboek hou, word jy forseer om oor jou hart se ware toestand na te dink, jou vordering op te skryf, jou verlore momentum terug te kry, jou slegte gewoontes te verwerp, jou goeie gewoontes te versterk en help dit jou om jou geestelike doelwitte te bereik. Weet jy van enige ander dissipline wat sulke voordele het? Nee? Begin dan vandag om dagboek van jou geestelike reis te hou.
Sielskos: Lev 26-27; Matt 7:15-29; Ps 74:12-23; Spr 2:7-8
2018-01-15
Spreuke 3:9 NLV
Salomo skryf: ‘Vereer die Here met alles wat jy besit. Gee vir Hom die beste van jou oes. Hy sal jou opgaarplekke vol maak. Jou parskuipe sal te klein wees vir al die wyn’ (verse 9-10 NLV). Die mense wat hierdie woorde aangehoor het, het van hulle land en vee gelewe. Wanneer hulle ‘n oes ingesamel het of vee gebore is, het hulle die eerste koringare of die eerste kalfie wat gebore is na die tempel toe geneem om dit aan God te offer. Deur dit te doen het hulle erken dat alles wat hulle het, van God af kom en aan God behoort. Alles wat hulle in die toekoms sou nodig kry, het van God se goedheid aan hulle afgehang. Daar is nie ‘n belangriker beginsel vir finansiële bestuur as dit nie: Gee vir God die beste van jou oes, nie die oorblyfsels nie! Die besigheidsman Arthur DeMoss was ‘n geestelike reus en weldoener wat miljoene vir God se werk geskenk het en ‘n fonds gestig het om na sy dood met sy nalatenskap voort te gaan. Mnr DeMoss het gesê om suksesvol te wees, moet jy vir God die eerste tien sent van elke Rand, die eerste uur van elke dag en die eerste dag van elke week gee. Dit is ‘n formule vir sukses in die lewe wat nie verbeter kan word nie. Jy vra, ‘Beteken dit dat God my nie sal liefhê as ek nie my tiende gee nie?’ Nee; jy kan nie iets doen om God se liefde te verdien nie, maar jy moet sekere dinge doen om elke dag in sy seën te wandel. Een daarvan is om vir Hom die eerste tiende van jou inkomste te gee. Wanneer jy dit doen, sal Hy ‘jou opgaarplekke vol maak.’
Sielskos: Lev 23:26-25:55; Matt 7:1-14; Ps 74:1-11; Spr 2:6
2018-01-14
Spreuke 10:4 NLV
‘n Vlytige werker is iemand wat skerp, beslissend en ywerig is. Hy of sy wil werk, maak ‘n verskil en dra by tot hulle families en die samelewing. Die lewe skuld jou niks behalwe ‘n geleentheid om sukses te behaal nie. Jy sal egter vir hierdie sukses moet werk. Een dag het twee tieners gesit en gesels toe die een sê, ‘Ek is regtig bekommerd. My pa sloof hom af by die werk sodat ek niks kort kom nie. Hy betaal al my rekeninge en stuur my universiteit toe. Ma sloof haarself elke dag af deur my klere te was en te stryk en agter my aan skoon te maak.’ Verward het sy vriend gevra, ‘So waaroor is jy dan bekommerd?’ Hy het geantwoord, ‘Ek is bang die slawe ontsnap dalk!’ Jy moet as ouer vir jou kind die deugsaamheid van vlyt leer. Moet dit nie net leer nie – lewe dit ook uit! Jy sal weet dat jy suksesvol is wanneer hulle nie meer geregtig op sakgeld voel of jou as ‘n menslike OTM masjien sien nie. Jou kinders sal meer as die helfte van hulle wakende ure in hulle volwasse lewens by die werk spandeer en dis nodig dat hulle besef dat dit God se idee was en nie ‘n vorm van straf nie. Sommige mense dink dat werk die gevolg van die vloek in Eden was, maar dit was nie. God het vir Adam aangestel om in die tuin te werk voor sonde op die toneel verskyn het (sien Genesis 2:15). Jesus was ‘n timmerman (sien Markus 6:3). Paulus, een van die grootste Christene in die geskiedenis, was ‘n tentmaker (sien Handelinge 18:1-3). Daar is niks eerloos aan werk wat die moeite werd is om gedoen te word en goed gedoen word nie.
Sielskos: Eks 20:4-6; Deut 7:17-8:2; Jes 40:18-31; Kol 3:5-10
2018-01-13
Spreuke 10:22 NLV
Toe die bekende uitgewer William Randolph Hearst ‘n artikel oor ‘n sekere skildery gelees het, wou hy baie graag die skildery by sy versameling voeg. Hy het mense regoor die wêreld gestuur om daarna te soek, maar hulle kon dit nêrens kry nie. ‘n Jaar later, uit die bloute, het een van sy werknemers vir hom kom sê dat hulle die skildery opgespoor het. Opgewonde oor die ontdekking, het Hearst gevra waar die skildery al die tyd was. Sy werknemer het geantwoord, ‘In jou kelder. Dit was al die tyd in jou besit.’ Die probleem was dat Hearst nooit die register waarin al sy besittings opgeskryf was, gelees het nie. Jou Bybel is ‘n register gevul met seëninge wat God wil hê jy moet ervaar. Geen van hierdie seëning is groter as die seën van verlossing nie, maar dis nie die enigste seën nie. ‘Dit is die Here se seën wat rykdom bring. Hy gee nie hartseer daarmee saam nie.’ John D Rockefeller het een keer gesê dat hy sy hele fortuin sal verruil vir die geleentheid om terug te gaan en as klerk in sy ou kantoor in Cleveland, Ohio te werk. Hoekom? Omdat dit ‘n tyd was voordat hy aan maagsere, slaaploosheid en depressie gely het. Die seën van God bring sukses sonder stres mee! God vertel jou daarvan in sy Woord. Hy wil hê dat jy ‘ryk’ in jou verhoudings, jou gesondheid, jou vreedsame gemoedstoestand, jou beroep en alles wat op jou betrekking het, moet wees. Begin dus uitvind wat God aan jou belowe het en bid en glo Hom dan daarvoor.
Sielskos: Lev 21:1-23:25; Matt 6:19-34; Ps 71:17-24; Spr 2:3-5
2018-01-12
2 Korintiërs 5:16 NLV
As jy geneig is om net met ‘jou eie soort’ om te gaan, dink hieroor na: ‘Van nou af beoordeel ons niemand meer volgens ‘n menslike maatstaf nie…’ Jesus het kilometers uit sy pad gegaan om ‘n Samaritaanse vrou by ‘n put te ontmoet. Vanuit ‘n kulturele en godsdienstige siening, was dit ‘n slegte idee. Eerstens, was sy al vyf keer geskei en het ‘n slegte reputasie gehad. Tweedens, was sy ‘n nie-Jood. In daardie dae kon Jode nie water drink of kos eet wat van ‘n nie-Jood af kom nie. Joodse geneeshere kon nie na nie-Joodse pasiënte omsien nie. Jode het inderwaarheid na nie-Jode as ‘onrein’ verwys en geglo dat hulle ook onrein sou word as hulle met hulle sou meng. Jesus het egter niemand uitgesluit nie: ‘En die Woord het mens geword en by ons kom woon…’ (Johannes 1:14 NLV). Jesus het melaatses aangeraak, vreemdelinge liefgehad en so baie tyd met partytjiegangers spandeer dat godsdienstige leiers hom ‘…’n vraat en ‘n dronklap, ‘n vriend van die liederlikste sondaars…’ (Matteus 11:19 NLV), genoem het. Jesus het nie mense tipeer nie; Hy het hulle liefgehad. Wanneer jy Hom volg, wys Hy jou vooroordele uit en sorg dat jy hulle hanteer. Dis omdat Hy die manier wat jy na ander mense kyk, wil verander, dat jy hulle nie as Jode of nie-Jode, binnestaanders of buitestaanders, liberales of konserwatiewes, ens sal sien nie. ‘Van nou af beoordeel ons niemand meer volgens ‘n menslike maatstaf nie…’ Vandag mag jy mense teëkom wat soos die vrou by die put deur die samelewing weggegooi is. Hulle is dalk uit die kerk gegooi of deur die kerk ontnugter. Jy sal die kans hê om hulle óf te tipeer, óf lief te hê. Eer God – en wees lief vir hulle!
Sielskos: Lev 18-20; Matt 6:9-18; Ps 71:1-16; Spr 2:1-2
