2018-02-04
Efesiërs 5:33 NLV
Paulus skryf, ‘…die vrou moet haar man respekteer.’ Gee aandag aan die woord ‘moet.’ Dit is ‘n bevel van die Here, nie ‘n voorstel of ‘n onderwerp wat oop is vir debattering nie. Let egter op: Die Bybel sê nie dat ‘n vrou haar man moet liefhê nie, maar dit sê wel dat sy hom moet respekteer. Mans, voor julle egter op die troon gaan sit en bevele begin uitdeel, dit beteken dat jy moet bewys dat jy waardig is om gerespekteer te word! Om jou man te respekteer beteken dat jy hom moet eer en waardeer. Wat ‘n vrou van haar man benodig, is dat hy haar hart aanraak en wat ‘n man van sy vrou benodig, is dat sy sy kop aanraak. Dit word sy ego genoem. Mans begeer dat hulle ego’s gevoed word. Wanneer jy nie jou man se ego voed nie, mag hy dalk weerloos wees wanneer hy iemand anders teëkom wat dit wel sal doen! As ‘n vrou, is jy deur God geskep met die vermoë om jou man se ego op ‘n gesonde manier te voed, deur hom te respekteer en te eer. Daar is niks gevaarliker in ‘n huweliksverhouding as disrespek nie. Wanneer ‘n man nie gerespekteer voel nie, sal hy teen jou rebelleer, homself uit die situasie verwyder, of passief word. God het twee eenvoudige reëls gegee om ‘n suksesvolle huwelik te bou. Die eerste is vir mans om hulle vrouens lief te hê en die tweede is vir vrouens om hulle mans te respekteer. Wanneer jy volgens God se reëls optree, kry jy God se resultate. As jy dus God se seën oor jou huis wil hê, begin om dinge op sy manier te doen.
Sielskos: Eks 20:12; Jer 35:1-19; Spr 1:8; Joh 19:25-27
2018-02-03
1 Petrus 3:7 ABA
‘n Goeie huwelik word op wedersydse opoffering gebou. Adam moes iets naby en kosbaar opoffer om Eva te kry – sy rib. Jou vrou sal weet dat jy lief is vir haar wanneer jy gewillig is om die dinge wat vir jou belangrik is op te offer om aan haar behoeftes te voldoen en haar welstand te verbeter. Te veel mans wil getroud wees, maar steeds as ‘n enkellopende funksioneer. Hulle wil nie tyd, aandag of hulpbronne opoffer tot voordeel van hulle vroue nie. Hulle wil nie ‘n vrou hê nie; hulle wil ‘n bediende hê. Hulle wil met iemand trou sodat hulle bedien kan word. Nee – dit moet die teenoorgestelde wees! Die Bybel sê dat vroue ‘…saam met julle die ware lewe sal kry wat God vir julle sal gee…’ Dit beteken dat sy ‘n gelyke vennoot is. Dus maak haar opinies, gedagtes en perspektiewe saak. Ja, as die leier van jou huis mag jy dalk die finale besluit neem, maar jy moet ook jou vrou se insette en siening oorweeg. Jou vrou sal positief op jou reageer wanneer sy gekoester en gewaardeerd voel (sien Efesiërs 5:29). Jy sê, ‘Maar my vrou is so koud soos ys.’ Hoe het sy so geword? Ys bly net in ‘n koue omgewing ys. In plaas van om te kla, begin werk daarvan maak om jou omgewing te verander. Mans bepaal die klimaat waarvolgens vroue floreer of ineenkrimp. Daar is ‘n rede hoekom jou vrou ‘koud’ is. Daar is egter ‘n oplossing: Maak haar warm en kyk hoe smelt sy! Wanneer jy begin om haar lief te hê, haar te versorg, haar te koester en te beskerm soos Christus met die kerk gedoen het, sal jy ‘n nuwe vrou in jou arms hê. Probeer dit en kyk wat gebeur.
Sielskos: Num 16-18; Matt 12:15-21; Ps 107:33-43; Spr 3:27-28
2018-02-02
Efesiërs 5:25 NLV
Ons definieer die woord ‘liefde’ op verskeie maniere. Mense sê dinge soos, ‘Ek is lief vir sjokoladekoek,’ of ‘Ek is lief daarvoor om rugby te kyk.’ Wat hulle regtig bedoel is dat hulle van hierdie dinge hou of dit geniet. Die Bybelse definisie van liefde is baie dieper as dit wat ons geniet of opgewonde maak en dit wat ons emosioneel aan mekaar verbind. Om iemand lief te hê is om hulle welstand na te streef en dit ‘n prioriteit te maak. Liefde se eerste belang is altyd: ‘Hoe dra hierdie aksie van my tot my maat se welstand by?’ As dit nie ‘n bydrae maak nie – of as dit die teenoorgestelde doen – is dit nie liefde nie. Die Bybel sê, ‘Getroude mans, julle moet julle vroue liefhê net soos Christus liefde aan die kerk bewys het toe Hy sy lewe daarvoor gegee het… Op dieselfde manier moet mans hulle eie vroue liefhê. Hulle moet hulle liefhê asof hulle hulle eie liggame is. ‘n Man wat sy eie vrou liefhet, het dus eintlik homself lief. ‘n Mens haat mos nie jou liggaam nie, maar voed en versorg dit…’ (verse 25-29 NLV). As ‘n man, kan jy twee dinge uit hierdie Skrifgedeelte leer: 1) Ons is almal inherent selfsugtig. Een van jou grootste uitdagings sal altyd dus wees om jou vrou se belange voor jou eie te stel en om gewillig te wees om jou eie agenda daarvoor op te offer. 2) Ons moet oefen om sensitief te wees. Dink aan hoe sensitief jy vir jou eie liggaam se pyne en behoeftes is en pas dan dieselfde beginsel aan jou vrou se versorging toe. Dis ‘n groot verantwoordelikheid, maar God sal jou die genade voorsien om dit te doen. Put dus krag uit sy genade!
Sielskos: Num 14-15; Matt 12:1-14; Ps 107:23-32; Spr 3:25-26
2018-02-01
1 Korintiërs 7:10 NLV
Jy moet aan God se reëls voldoen om sy seën op jou huwelik te ontvang. Om sy beskerming, vrede en voorspoed te geniet, moet jy sy instruksies volg. Julle kan byvoorbeeld ure lank baklei en nie die kwessie oplos nie, maar as jy net God se reëls gevolg het, kon die argument binne minute verby gewees het – met beide partye tevrede met die uitkoms daarvan. Wanneer jou kar breek, neem jy dit terug na die handelaar toe. Hoekom? Omdat hulle dit aan jou verkoop het en weet hoe om dit reg te maak! God het die eerste huwelik ingestel. Wanneer jou verhouding dus in die moeilikheid kom, sal jy, as jy wys is, eerste met Hom daaroor praat voordat julle met mekaar daaroor praat. As jy met die houding trou dat, ‘As hierdie nie uitwerk nie, kan ek altyd skei,’ hardloop jy in die teenoorgestelde rigting van die waarheid van God se Woord. Paulus skryf: ‘Vir die getroudes het ek ‘n opdrag wat nie bloot van my kom nie, maar van die Here self. Dit is dat ‘n vrou nie van haar man mag skei nie. Maar as sy dit tog wel doen, moet sy ongetroud bly of haar met haar man versoen. Net so mag die man ook nie van sy vrou skei nie’ (verse 10-11 NLV). Ja, daar is aanvaarbare redes vir skei, maar hulle is die uitsondering en nie die reël nie! Onlangs het ‘n Hollywood bekende miljoene rande op haar troue spandeer, net om twee maande later van haar man op grond van ‘uiteenlopenheid van karakter’ te skei. Wanneer jy sê, ‘Tot die dood ons skei,’ sê jy dit voor God en is jy veronderstel om dit te bedoel.
Sielskos: Num 11-13; Matt 11:20-30; Ps 107:17-22; Spr 3:21-24
2018-01-31
Matteus 13:46 NLV
In een van die mees unieke korporatiewe oornames ooit, het Stanley Tam wetlik 51 persent van sy maatskappy se aandele aan God oorgedra. Hy het die United States Plastic Corporation met sewe-en-dertig dollars begin. Teen die tyd wat hy sy besigheid aan God terugeggee het, was die maatskappy se jaarlikse inkomste minder as tweehonderd duisend dollars. Stanley het egter geglo dat God sy besigheid sou seën en hy wou God uit die staanspoor eer. Op daardie punt sou die meeste van ons onsself op die skouer geklop het. Nie Stanley nie. Hy het skuldig gevoel omdat hy 49 persent van die maatskappy vir homself gehou het. Nadat hy die gelykenis van die pêrelhandelaar wat alles verkoop het om die kosbare pêrel aan te skaf, gelees het, het hy die besluit gemaak om van al sy aandele ontslae te raak. Hy het gesê, “‘n Man kan net een maaltyd op ‘n slag eet, net een pak klere op ‘n slag dra en net een kar op ‘n slag ry. Dit alles het ek. Is dit nie genoeg nie?” Dus, op 15 Januarie 1955, het hy alle aandele aan God oorgedra en het Stanley ‘n gewone salaristrekker van die maatskappy wat hy gestig het, geword. Voor hy klaar was, het Stanley meer as 120 miljoen dollars vir Christus se saak weggegee. As jy die diepte van jou liefde vir Christus wil meet, kyk na jou kalender en jou kredietkaart se staat. Hulle lieg nie. Hoe jy jou tyd en jou geld spandeer, is die twee beste maatstawwe van jou ware prioriteite. Is Christus jou kosbare pêrel? Hy wil dit wees. Hy verdien om dit te wees.
Sielskos: Num 8-10; Matt 11:10-19; Ps 107:10-16; Spr 3:19-20
2018-01-30
Kolossense 4:2 NLV
In 1964 het kommunistiese Simba rebelle die dorp Bunia in Zaïre ingeneem. Hulle het baie inwoners gearresteer en tereggestel. ‘n Pastoor met die naam van Zebedayo Idu was een van hulle slagoffers. Hulle het hom ter dood veroordeel en hom vir die nag in die tronk gegooi. Die volgende oggend is hy en ‘n groot aantal gevangenes na ‘n publieke plek vir hulle teregstelling geneem. Sonder enige verduideliking, het een van die rebelle die gevangenes beveel om in ‘n lyn te staan en begin tel – ‘een, twee, een, twee, een, twee.’ Al die gevangenes wat ‘een’ genommer is is voor die vuurpeleton staangemaak terwyl diegene wat ‘twee’ genommer is na die tronk toe teruggevat is. Pastoor Idu was een van die wat gespaar is. Terug in die tronkselle, kon die gevangenes die klank van geweerskote hoor. Die pastoor het hierdie dramatiese oomblik gebruik om die verhaal van Jesus met die ander gevangenes te deel. Agt van die gevangenes het daardie dag hulle lewens vir Christus gegee. Net toe pastoor Idu klaar was om die Goeie Nuus met hulle te deel, het ‘n opgewonde boodskapper met ‘n vrylatingsbevel vir hom daar aangekom. Die pastoor is per ongeluk gearresteer en was vry om te gaan. Hy het vir die ander gevangenes totsiens gesê en hom na sy huis langs die kapel gehaas. Daar het hy ‘n groep gelowiges aangetref wat besig was om vir sy vrylating te bid. Toe hulle die antwoord op hul gebede deur die deur sien stap, het hulle gebedsdiens in ‘n lofprysingsdiens verander. Dieselfde God wat die gebede van die kerk in Jerusalem in die Nuwe Testament aangehoor het en Petrus van teregstelling gered het, het die gebede uit Zaïre gehoor en hulle pastoor gered (sien Handelinge 12:5). God luister steeds, hou dus aan bid!
Sielskos: Num 7; Matt 11:1-9; Ps 107:1-9; Spr 3:13-18
