2018-02-16
Jeremia 15:16 NLV
Mense in die Bybel het ook met depressie geworstel. Elia het gesê, ‘…Ek het nou genoeg gehad, Here… Neem nou maar my lewe…’ (1 Konings 19:4 NLV). Job het gesê, ‘Ek haat my lewe!..’ (Job 10:1 NLV). Dawid het geskryf, ‘Hoekom is ek nou so mismoedig?..’ (Psalm 42:6 NLV). Wanneer jy klinies depressief is, moet jy professionele hulp kry. Die tipe depressie waarvan ons egter hier praat is wanneer jou motivering gedreineer is, jou begeerte om God na te volg weg is, wanneer jy blind vir jou seëninge is, wanneer jou entoesiasme geforseerd is en wanneer jy in ‘n dwaal oor jou toekoms is. Hier is ‘n paar moontlike oorsake: 1) Sonde. Sonde is soos ‘n klippie in jou skoen. Geen vakansie, verandering van werk, verandering in verhoudings of dokter sal dit genees nie. Die bloed van Jesus sal dit egter skoon maak (sien 1 Johannes 1:7). 2) Gierigheid. Koning Agab se obsessie om Nabot se wingerd te besit, het hom miserabel gemaak en sy hele familie geaffekteer (sien 1 Konings 21:4). 3) Vergelykings. Om jouself aanhoudend met ander te vergelyk, sal jou depressief maak (Sien 2 Korintiërs 10:12). 4) Negatiewe praatjies. ‘Die tong het mag oor dood en oor lewe. Hulle wat lief is om te praat, moet saamleef met die gevolge van hulle woorde’ (Spreuke 18:21 NLV). 5). Moegheid. Jesus het sy dissipels eenkant toe geroep om te rus, want wanneer moegheid instap, stap geloof dikwels uit (sien Markus 6:31). 6) Onvergewensgesindheid. Wanneer jy weier om iemand te vergewe, dra jy hulle soos ‘n albatros om jou nek rond. Wat is dus die oplossing vir depressie? Dikwels begin dit met gebed en Bybelstudie. Jeremia, wat met depressie gestoei het, het gesê, ‘Toe U gepraat het, het ek mooi geluister… U woorde het my bly gemaak…’
Sielskos: Heb 1-4; Matt 14:22-36; Ps 145:14-21; Spr 4:23-24
2018-02-15
Filippense 1:10 NLV
Om groter self-dissipline te bereik, moet jy: 1) Jou dag begin deur die moeilikste dinge eerste te doen. Byvoorbeeld, maak jou bed op, tel jou klere op en was die skottelgoed; moenie meer werk vir jouself maak nie. Moet ook nie ‘n klomp projekte gelyktydig begin nie; die gevoel wanneer jy iets klaar maak sal jou help om in self-respek en self-dissipline te groei. 2) ‘n Punt daarvan maak om stiptelik te wees. Dis moeilik om die gewoonte te breek as jy gedurig laat is. Om dit te oorkom moet jy gewillig wees om dit op die naam te noem – onbedagsame, selfsugtige gedrag. 3) Vooruit beplan. Alles neem langer as wat jy dink, moet dus nie tot die laaste minuut wag en dan soos ‘n afkophoender rondhardloop nie. Jy kan maagsere kry as jy gedurig so moet jaag, maar as jy jouself ekstra tyd gun is dit goed vir jou gesondheid en gedagtes. 4) Teregwysing van diegene wat vir jou omgee aanvaar, sonder om dikmond te wees of terug te slaan. Tensy jy gewillig is om teregwysing te aanvaar, sal jy nooit gekwalifiseerd wees om dit te gee nie. Die Bybel sê, ‘…Hulle wat na ander luister, het wysheid’ (Spreuke 13:10 NLV), so as jy wys is sal jy terugvoer verwelkom en goeie raad opsoek. Gandhi het eenmaal gesê, ‘Daar is altyd ‘n beperking op self-bevrediging, maar geen op self-beheer nie.’ Vra God om jou te help om jou oproerige gedagtes, gevoelens, begeertes en gedrag te beheer. Identifiseer die onbeheerbare areas in jou lewe, hou op verskonings maak, staar die waarheid in die gesig selfs al maak dit seer, weier om jammer vir jouself te voel en stel ‘n paar bereikbare doelwitte vir jouself. Met ander woorde, leer om te onderskei wat regtig saak maak.
Sielskos: Tit 1-3; Matt 14:13-21; Ps 145:1-13; Spr 4:20-22
2018-02-14
Romeine 12:6 NLV
Paulus skryf: ‘Ons besit een liggaam wat uit baie ledemate bestaan en wat elkeen sy eie funksie het. Net so is dit ook met Christus se liggaam. Al is ons baie, vorm ons saam een liggaam… Ons het gawes wat van mekaar verskil volgens die genade wat God aan elkeen van ons gegee het…’ (verse 4-6 NLV). Dr John Maxwell stel voor dat jy êrens werk waar jy 80 persent van die tyd die sterkste is, waar jy 15 persent van die tyd leer en waar jy 5 persent van die tyd die swakste is. So, wat is jou sterkpunte? Om die antwoord op hierdie vraag te ontdek, moet jy: 1) Selfversekerd wees. As jy toelaat dat jou onsekerhede jou regeer, sal jy onbuigbaar wees en teen verandering vasskop. As jy nie verander nie, sal jy nie groei nie. 2) Jouself leer ken. Spandeer tyd om jou gawes te verken, vra vir terugvoer en wees eerlik oor jou blinde kolle. 3) Jou leier vertrou. As jy nie die persoon wat jy volg kan vertrou nie, moet jy iemand soek wat jy kan vertrou, of ‘n ander span kry. 4) Die groter prentjie sien. Jou plek in enige span maak net in die konteks van die groter prentjie sin. As jou enigste rede om jou niche te vind persoonlike wins is, sal jou verkeerde motiewe die einste vreugde, vervulling en sukses wat jy begeer, steel. 5) Op jou ervarings staatmaak. Die enigste manier om te weet of jy jou niche ontdek het is om dinge te probeer, risiko’s te neem, uit jou suksesse en mislukkings te leer en te ontdek watter gawes God vir jou gegee het.
Sielskos: Num 6:1-21; Matt 4:1-17; Mark 2:18-22; Luk 9:23-26
2018-02-13
Spreuke 21:26 NLV
Die vlak van finansiële seën waarmee God jou sal vertrou hang van drie vrae af: 1) Is jy volwasse genoeg om dit te hanteer? 2) Hoop jy om te oes maar is jy onwillig om te saai? 3) Is jy ‘n opgaarder of ‘n gewer? God weet ons kan nie almal dieselfde bedrag gee nie. Jesus het ‘n weduwee wat haar laaste twee sente gegee het, hoog geag en gesê, ‘Al die ander het gegee omdat hulle so baie het… sy het alles vir Hom gegee’ (Markus 12:44 DB). Aan die ander kant, het Barnabas ‘…sy grond verkoop en die geld vir die apostels gebring om vir dié te gee wat tekort het’ (Handelinge 4:37 NLV). Hoe meer God jou seën, hoe meer verantwoordelik hou Hy jou. Jesus het gesê, ‘…Baie word verwag van hulle aan wie baie gegee is…’ (Lukas 12:48 NLV). Toe dit tyd vir kollekte was, het ‘n pastoor vir sy gemeente gesê om die beursie of handsak van die persoon wat voor hulle sit, te vat. ‘Nou,’ het hy gesê, ‘Maak die beursie oop en gee soveel soos jy altyd wou gee, maar gevoel het jy kan nie bekostig nie!’ Die waarheid is dat ons nie almal geroep is om dieselfde hoeveelheid te gee nie, maar dat ons almal geroepe is om dieselfde op te offer. Dit maak die speelveld gelyk. Die kern van vrygewigheid lê in selfopoffering. God vertrou finansiële seën toe aan mense wat nie deur liefde vir geld beheer word nie. Hoe weet jy wanneer jy deur die liefde vir geld beheer word? Wanneer jy, wanneer God jou sê om te gee, dit eerder terughou. Verstaan mooi: Wanneer God jou op die hart druk om ‘n saadjie te saai, is daar ‘n oes op pad.
Sielskos: Jona 1-4; Matt 14:1-12; Ps 141; Spr 4:18-19
2018-02-12
Genesis 41:35-36 NLV
Josef het vir Farao goeie finansiële raad gegee wat ons almal kan volg: ‘Laat hulle al die kos en graan van hierdie goeie jare in koninklike skure stoor… Op hierdie manier sal daar genoeg wees om te eet wanneer die sewe jaar van hongersnood aanbreek. Indien dit nie gedoen word nie, sal ‘n ramp die land tref en al die mense sal omkom’ (verse 35-36 NLV). Hoe het Farao gereageer? ‘Die farao en sy raadgewers was in hulle skik met Josef se voorstelle’ (vers 37 NLV). Jou finansiële sekuriteit in die toekoms word gewaarborg as jy hierdie drie Skriftuurlike beginsels uitoefen: 1) Gee jou tiende. ‘…Bring al die tiendes na die stoorkamers toe… Toets My hierin of Ek nie vir julle die vensters van die hemel sal oopmaak nie. Ek sal voorspoed op julle laat reën wat meer as genoeg vir julle sal wees!’ (Maleagi 3:10 NLV). 2) Spaar. Dissiplineer jouself om ‘n sekere persentasie van jou inkomste te spaar. Moenie bekommerd wees as dit net ‘n klein bedrag is nie, maak dit net ‘n prioriteit! As jy dit nie doen nie, sal jy dit op ander dinge spandeer en nooit jou langtermyn doelwitte van universiteit, aftrede of werk vir die Here bereik nie. 3) Betaal jou skuld af. Na jy jou tiende vir God gegee het en gespaar het, strewe daarna om al jou finansiële verpligtinge af te betaal. Hou op om net die minimum op jou kredietkaart af te betaal. Deur hom nie ten volle elke maand af te betaal nie, betaal jy op die ou einde meer as wat jy moet. Betaal soveel skuld as moontlik af, selfs al moet jy sonder ‘n paar goed vir ‘n rukkie klaarkom. Op die ou einde sal jy voorspoedig wees.
Sielskos: Num 34-36; Matt 13:47-58; Ps 138; Spr 4:14-17
2018-02-11
Spreuke 21:20 NLV
Dis dwaas om dinge te koop wat jy nie nodig het of kan bekostig nie, veral as jy rekeninge het om te betaal en jy nog niks vir die toekoms eenkant gesit het nie. Jou finansiële sekuriteit word bepaal deur dit wat jy skuld, nie deur dit wat jy verdien nie! Om jare te moet werk om jou skuld af te betaal, beperk jou opsies geweldig. Bepaal dus jou leefstyl volgens jou ware inkomste, nie deur wat jy wens dit was of wat jy hoop dit sal wees nie. Wanneer jy ‘n verhoging kry, moet ook nie outomaties meer spandeer nie. Die Bybel sê, ‘In ‘n wyse mense se huis is altyd kosbare besittings en uitgesoekte olie. ‘n Dwase mens gebruik alles op wat hy in sy huis het.’ Een van die slimste dinge wat jy vandag kan doen is om vir die toekoms te begin spaar en om ten minste een tiende van jou inkomste vir God se koninkryk te saai, sodat jy ‘n oes sal hê wanneer jy dit nodig kry (sien 2 Korintiërs 9:6). Is jou filosofie in die lewe, ‘Hoekom wag en spaar wanneer ‘n kredietkaart dadelik dit wat ek wil hê kan voorsien?’ As jy dinge koop wat jy nie nodig het nie, met geld wat jy nie het nie, hou dadelik op daarmee! Voordat jy enigiets anders koop, vra jouself af of jy dit regtig nodig het. Selfs al voel jy dat jy dit nodig het, vra jouself af of jy ‘n rukkie daarsonder kan lewe; andersins sal jy ‘n slaaf van jou kredietkaartskuld word. Hier is goeie finansiële raad: Bid vir God se leiding voor jy enige nie-noodsaaklike aankope maak.
Sielskos: Eks 20:13; Gen 4:8-16; Spr 18:21; Matt 5:21-22
