2018-02-22
Filippense 4:16 NLV
Charles Swindoll vertel die verhaal van die boom wat gee: ‘Toe die seun jonk was het hy aan die boom se takke geswaai, haar appels geëet en in haar skaduwee geslaap. Soos hy egter groter geword het het hy minder en minder tyd met die boom spandeer. ‘Kom, kom ons speel,’ het die boom gesê. Die jong man was egter net in geld geïnteresseerd. ‘Neem dan al my appels en verkoop hulle,’ het die boom gesê. Die man het dit gedoen en die boom was bly. Hy het vir lank nie teruggekeer nie, maar die boom het geglimlag toe hy weer een dag daar verby loop. ‘Kom, kom ons speel!’ Maar die man, ouer en moeg vir die wêreld, wou net van alles af wegkom. ‘Kap my af, maak ‘n boot daarvan en dan kan jy wegseil,’ het die boom gesê. Die man het dit gedoen en die boom was gelukkig. Baie seisoene het verby gegaan – en die boom het gewag. Uiteindelik het die man terug gekeer, te oud om te speel, rykdom na te jaag of die oseane te deurkruis. ‘Ek het ‘n heel goeie stomp oor. Sit hier en rus,’ het die boom gesê. Die man het dit gedoen en die boom was bly.’ Swindoll vertel verder: ‘Ek het in die vuur gestaar en teruggekyk op my lewe. Ek het met beide die boom en die seun geïdentifiseer – en dit het seergemaak. Hoeveel bome wat gee was daar in my lewe? Hoeveel mense het hulleself gegee sodat ek kan groei, my doelwitte kan bereik en vervulling en bevrediging kan kry? Dankie, Here, vir elkeen van hulle. Ek was dankbaar dat ek die tyd geneem het om oor my lewe te reflekteer.’ Paulus het diegene onthou wat hom gehelp het – en jy moet ook.
Sielskos: 1 Kon 3-5; Matt 16:13-28; Ps 33:13-22; Spr 5:15-20
2018-02-21
Efesiërs 3:20 NLV
Israel se reis van Egipte na die Beloofde Land illustreer drie verskillende plekke waar jy kan kies om te lewe: 1) Die plek van ‘nie genoeg nie.’ As slawe in Egipte, was hulle geforseer om op Farao vir alles staat te maak. Wanneer jy aanhou om op enigiemand behalwe God staat te maak, is jy nie waarlik vry nie. Totdat jy verstaan dat God jou versorger is, sal jy met ‘n ‘nie genoeg nie’ mentaliteit lewe. Elia het in die middel van ‘n hongersnood langs ‘n rivier gebly en kraaie het elke dag vir hom vleis gebring. God het egter hierdie tydelike bron laat opdroog om Elia terug na sy ware bron toe te dryf. Maak nie saak wat of wie Hy gebruik nie – God is jou bron. 2) Die plek van ‘net genoeg.’ Israel het in die woestyn net genoeg manna vir elke dag gehad. Dis nie pret om te sukkel om net te oorleef nie. Ons waardeer egter dit wat ons sukkel om te kry en ons leer om God meer te vertrou. Wanneer jy deur sulke seisoene lewe, bou dit in jou die volharding om aan te hou voortbeweeg tot beter dinge. 3) Die plek van ‘meer as genoeg.’ God se plan vir Israel was ‘…’n land met ‘n oorvloed van kos sonder enige gebrek…’ (Deuteronomium 8:9 NLV). Sy doel is om vir jou oorvloed in elke aspek van jou lewe te gee (sien 2 Korintiërs 9:8). Is dit sodat jy dit kan opgaar? Nee, dis sodat jy ander daarmee kan seën en jou roeping in die lewe kan vervul. Staan dus op hierdie Skrifgedeelte: ‘Hy moet geprys word – Hy wat mag het om deur die krag wat in ons werk, oneindig meer te doen as wat ons vra of dink om te vra.’
Sielskos: 1 Kon 1-2; Matt 16:1-12; Ps 33:1-12; Spr 5:7-14
2018-02-20
Spreuke 3:25 ABA
Jy kan nie asem kry nie, jou handpalms sweet, jou bors is styf en jy voel swak. As jy al ooit ‘n paniekaanval gekry het, sal jy hierdie simptome herken. Dokters skat dat omtrent ‘n derde van ons ten minste een paniekaanval per jaar kry. As jy een van hierdie mense is, is hier ‘n paar goed wat jy kan doen om jouself te help: 1) Haal diep asem. Paniek laat jou kort en oppervlakkig asemhaal, terwyl diep asemteue jou kalmeer en jou laat ontspan. Wanneer jy dus oorweldig voel, stop en asem die naam van Jesus in. Probeer dit; dit werk! 2) Praat met jouself. Sê, ‘Deur God se genade kan ek hierdie hanteer’ (sien 2 Korintiërs 12:9). As jy met nog paniek reageer, sal jy net verder in die moeilikheid beland. Om jouself toe te laat om paniekerig te wees sonder om daaraan toe te gee, klink dalk moeilik aan die begin, maar dit help jou om die siklus te breek en beheer van jou denke te neem. 3) Doen iets kalmerends. Dit mag dalk die laaste ding wees wat jy lus is om te doen, omdat paniekaanvalle jou instinktief gedagtes laat dink wat jou vrees voed. Neem dus ‘n minuut en fluister ‘n gebed, haal ‘n teksvers aan, luister na inspirerende musiek of praat met ‘n vriend. As jou paniekaanval aanhou, is daar geen rede om skaam te wees om professionele hulp te kry nie. Dit is immers God wat aan dokters die vaardighede gee om jou te kan help. Hier is ‘n Skrifgedeelte wat jy moet neerskryf en byderhand moet hou: ‘Jy sal kan gaan slaap sonder om bang te wees. Jy sal rustig kan bly slaap. Jy hoef nie bang te wees dat teëspoed jou skielik sal tref nie… Die Here is jou beskermer…’ (Spreuke 3:24-26 NLV).
Sielskos: Heb 11:17-13:25; Matt 15:29-39; Ps 28; Spr 5:3-6
2018-02-19
Johannes 10:11 NLV
Jy kry nooit ‘n tweede kans om ‘n goeie eerste indruk te maak nie. Jou boodskap mag dalk wonderlik en van toepassing op jou gehoor wees, maar die uitdrukking op jou gesig kan mense verkeerd beïnvloed nog voor jy jou mond oopgemaak het. Het jy al ooit opgelet hoeveel mense het slegte herinneringe van hulle grootwordjare in die kerk? Hulle onthou streng, vurige, vreemde mense wat oordeel oor die grootste deel van die wêreld uitgespreek het. Wat ‘n ondiens aan God! Jesus het gesê, ‘Ek is die Goeie Herder…’ Die woord ‘goed’ kom van die Griekse woord kelos af, wat ‘bekoorlik’ [aantreklik, aangenaam, innemend] beteken. Jesus se houding het mense elke keer vir Hom gewen! Wat ons sê tel net 7 persent van wat mense glo. Hoe ons dit sê tel 38 persent. Wat hulle sien tel 55 persent. Wonderbaarlik het meer as 90 persent van ons nie-verbale leidrade niks te doen met wat ons besig is om te sê nie! As jy dus dink dat kommunikasie net oor woorde gaan, sit jy die pot mis en is die kans goed dat jy dit moeilik vind om met ander mense te skakel. ‘n Personeellid het een keer vir Abraham Lincoln gevra om vir een van sy vriende ‘n werk te gee. Nadat hy ‘n onderhoud met die man gevoer het, het Lincoln nie vir hom die werk aangebied nie. Toe hy gevra word hoekom nie, het Lincoln geantwoord, ‘Omdat ek nie van die uitdrukking op sy gesig gehou het nie.’ Toe die personeellid protesteer en sê, ‘Dis nie regverdig nie! Mens kan nie help hoe mens se gesig lyk nie!’ het Lincoln geantwoord, ‘Dis waar jy verkeerd is. Elkeen oor veertig is verantwoordelik vir die uitdrukking op sy gesig.’ So, wat sê jou gesigsuitdrukking vir ander mense?
Sielskos: Heb 9:1-11:16; Matt 15:15-28; Ps 5; Spr 5:1-2
2018-02-18
Jakobus 3:13 DB
In die eerste sewe sekondes besluit mense gereeld of hulle wil luister na wat jy te sê het, of nie. Dit mag dalk nie regverdig wees nie, maar dis ‘n feit. In How to Talk So People Listen, sê die kommunikasiekundige, Sonya Hamlin, dat wanneer dit kom by hoor en sien, sien die belangrikste en kragtigste sintuig van die twee is. Sy skryf: ‘Ons onthou 85 tot 90 persent van wat ons sien, maar minder as 15 persent van dit wat ons hoor. Ontelbare mense het verkoopsgeleenthede verloor, werksonderhoude geruïneer of is afsprake geweier omdat hulle voorkoms nie aan iemand anders se verwagtinge voldoen het nie. As jy wys is, sal jy jou vriende en familie vra of jy geneig is om nie-verbale leidrade uit te beeld wat hulle aandag trek en die fokus van dit wat jy probeer kommunikeer, aflei. ‘n Pastoor sê: ‘Ek het nooit besef hoeveel nie-verbale foute ek maak tot ek myself op video gesien het nie. Nou is dit ‘n gereelde gewoonte van my om terug te gaan en na myself te kyk om nie net wat ek gesê het te bepaal nie, maar ook hoe ek dit gesê het. Die beeldmateriaal lieg nie.’ Goeie akteurs kan ‘n storie vertel sonder om ‘n woord te sê, deur net hulle gesigsuitdrukkings te gebruik. Of jy nou daarvan bewus is of nie, jy straal ook ‘n boodskap met die uitdrukking op jou gesig uit. Selfs mense wat trots daarop is dat hulle nie veel emosie of gedagtes in hulle gesigte wys nie, straal tog ‘n ongesproke boodskap van afsydigheid uit. Dit maak betekenisvolle kommunikasie met ander mense amper onmoontlik. As jou gesig namens jou gaan praat – en dit gaan – maak seker dat dit die regte boodskap kommunikeer.
Sielskos: Eks 20:14; Spr 6:23-35; Matt 5:27-30; 1 Kor 6:9-20
2018-02-17
Matteus 5:16 NLV
Jesus het gesê, ‘Julle moet so voorbeeldig lewe dat julle ‘n helder lig sal laat uitstraal. Dan sal die mense dit sien, en julle hemelse Vader daarvoor prys!’ Wanneer jy in die donker is, sien jy die lig voor jy die ligdraer sien. Die ou gesegde wat sê, ‘Eerste indrukke is blywende indrukke,’ is waar. ‘n Kommunikasiekundige sê, ‘Jy het net sewe sekondes om die regte eerste indruk te maak. Sodra jy jou binnekoms maak, is daar verbale en nie-verbale tekens wat bepaal hoe ander mense jou sien. In besigheid kan daardie noodsaaklike sewe sekondes bepaal of jy die kliënt gaan oortuig en of jy ‘n gespanne onderhandeling gaan wen. Is jy vol selfvertroue? Gemaklik? Opreg? Bly om daar te wees? In daardie eerste sewe sekondes gee jy jou gehoor verskeie leidrade. Of mense dit nou besef of nie, hulle reageer onmiddellik teenoor jou gesigsuitdrukkings, gebare, houding en energie. Hulle reageer op jou stem – die toon en toonhoogte daarvan. Gehore, of hulle nou uit een of eenhonderd mense bestaan, som instinktief jou motiewe en houding op.’ Of jy nou praat, verkoop, onderhoude voer of op sosiale afsprake gaan, jou voorkoms, houding en benadering maak al die verskil in die wêreld. Mense kan baie in sewe sekondes van jou te wete kom. Hulle mag dalk besluit dat hulle nie belangstel in wat jy te sê het nie, of hulle kan verbaas wees oor hoe aangetrokke hulle tot jou voel. Henry Ward Beecher het gesê, ‘Daar is mense so stralend, so geniaal, so gaaf, so plesierig, dat jy instinktief in hulle teenwoordigheid voel dat hulle goed is vir jou, wie se aankoms in ‘n kamer is soos om ‘n brandende lamp binne te bring.’
Sielskos: Heb 5-8; Matt 15:1-14; Ps 149; Spr 4:25-27
