2018-02-28
Jakobus 1:14 ABA
Kom ons kyk vir die volgende paar dae hoe om selfbeheersing te ontwikkel. Hier is die eerste stap: Aanvaar verantwoordelikheid vir jou gebrek aan selfbeheersing. Erken jou probleem. ‘Elkeen wat verkeerde dinge doen, doen dit omdat hy self lus is om dit te doen…’ Die grootste rede hoekom jy dinge doen – is omdat jy daarvan hou! Wanneer jy weet dat iets vir jou sleg is en dit steeds doen, is dit omdat jy dit wil doen. Soms probeer ons die probleem van selfbeheersing ignoreer of ons ontken dit: ‘Watse probleem? Ek het nie ‘n probleem nie,’ of ‘Dis maar net hoe ek is,’ of ‘Almal anders doen dit.’ Soms blameer ons ander: ‘As ek maar net ander ouers gehad het,’ of ‘Die Duiwel het my dit laat doen.’ Solank as wat jy jou energie op verskonings mors, kan jy nie vooruitgang maak nie. Jakobus wys ons daarop dat ons daarvan hou om die pad van die minste weerstand te volg en dit is gewoonlik maar die maklikste om net tot die versoeking toe te gee. Die beginspunt om selfbeheersing te ontwikkel, is om dit wat God reeds in sy Woord gesê het, in die gesig te staar: ‘…elkeen wat aanhou sonde doen, is ‘n slaaf van die sonde’ (Johannes 8:34 NLV). Wil jy meer selfbeheersing hê? Erken dan dat jy ‘n probleem het en wees spesifiek daaroor: ‘Ek het hierdie probleem. Dis waar ek hulp nodig het.’ Jy mag dalk ‘n probleem met kos, drank, dwelms, werk, jou humeur, geld, oefening, seks, televisie, klere of tyd hê – al hierdie areas het selfbeheersing nodig. Gaan dus vandag op jou knieë en praat met God oor jou probleem, met die geloof dat jy dit met sy hulp kan oorkom.
Sielskos: 1 Kon 14-15; Matt 18:21-35; Ps 58; Spr 6:12-15
2018-02-27
Spreuke 15:1 NLV
Selfs in die beste van huwelike sal argumente van tyd tot tyd voorkom. Met twee mense met verskillende temperamente, smake en denkwyses, hoe dan anders? Hier is dus ‘n paar gevegsreëls: 1) Dink voor jy praat. Vra jouself af of dit vrees, stres of kommer kan wees wat jou maat se reaksie uitgelok het. Pla dit jou omdat jy onseker of ongewaardeerd voel? Neem tyd om te probeer identifiseer wat regtig aan die gang is. 2) Vra vir dit wat jy nodig het. Dis heeltemal in die haak om te erken dat jy sommige dae behoeftiger as ander dae is. Dr Gary Oliver sê: ‘Wanneer ‘n vrou elke keer paniekerig voel wanneer haar man laat by die huis kom omdat haar vorige man ‘n affair gehad het, is dit in die haak om te sê, ‘Ek weet dit is irrasioneel, maar vandag voel ek paniekerig.’ Hierdie tipe eerlikheid versterk ‘n verhouding. 3) Moet nooit dreig nie. Dreigemente maak jou maat net op die verdediging en onseker. Gevolglik kan hulle nie hoor wat jy sê nie en niks word opgelos nie. 4) Raak van die bagasie van vorige verhoudings ontslae. Die Bybel sê, ‘Om ander lief te hê beteken… om nie elke liewe dingetjie wat iemand verkeerd doen te onthou sodat jy hom kan terugkry nie’ (1 Korintiërs 13:4-5 DB). Dis verkeerd om van jou maat te verwag om hulself oor en oor te ‘bewys.’ Moenie aanneem dat ou verhoudingsprobleme hulself weer gaan herhaal nie. Dit sal nie gebeur as jy kommunikeer en groei nie. 5) Sê elke dag vir jou maat iets moois. Enige tyd wanneer jy aan iets goeds van jou eggenoot dink, stop en sê dit vir hulle. Onthou, skerp woorde kan wonde veroorsaak, maar “‘n Vriendelike antwoord kalmeer die gemoedere…”
Sielskos: 1 Kon 12-13; Matt 18:10-20; Ps 53; Spr 6:9-11
2018-02-26
Filippense 4:6 NLV
‘n Bybelonderwyser skryf: “Die druk van ons lewens het baie van ons in ‘n web van die mees aanvaarbare, maar dreinerendste sonde in die Christelike familie vasgevang: kommer. Die kans is goed dat jy vanmôre opgestaan het en, voor jy nog iets anders gedoen het, jou rugsak van kommer aangetrek het. Jy het die dag nie met ‘n gebed begin nie, maar is deur bekommernis afgerem. Wat ‘n aaklige gewoonte! Jesus het sy volgelinge met die volgende vraag uitgedaag, ‘Kan al julle bekommernis julle lewe een sekonde langer rek?..’ (Matteus 6:27 NLV). Bekommernis los niks op nie. Dit skep onrus en ongemak en as dit nie hanteer word nie, kan dit ons angs in ‘n perfekte storm van emosies opsweep. As jy ‘n bietjie verbeelding en kreatiwiteit byvoeg, word ons grootste vrese lewendig in ons gedagtes. Die stres van kommer dreineer ons energie, neem ons gedagtes in beslag en stroop ons van ons vrede. Ons stres oor klein en groot dinge. Sommige van ons het ‘n lys van kwessies wat ons verslawing aan kommer voed. Dis ‘n baie onaantreklike verslawing, maar ons slaag tog daarin om ‘n grap daarvan te maak. Ek het al mense met ‘n glimlag hoor sê, ‘As ek nie iets het om myself oor te bekommer nie, raak ek bekommerd omdat ek nie iets het om my oor te bekommer nie.’ Angs het ‘n gunsteling tydsverdryf geword wat ons lief is om te haat. Die ergste is dat ons dit aan ons kinders oordra. Ons mentor hulle in die kuns van kommer wanneer hulle die kommer op ons gesigte sien en dit uit ons monde hoor.’ Wat is dus die antwoord? ‘Moet oor niks bekommerd wees nie, maar bid oor alles…’
Sielskos: 1 Kon 10-11; Matt 18:1-9; Ps 40:9-17; Spr 6:6-8
2018-02-25
Psalm 56:4 NLV
Geloof is soos ‘n spier; probleme mag dit dalk strek, maar dit groei op die ou einde sterker. Dawid het hierdie waarheid verstaan. Hy is aanhoudend deur sy vyande gejag. Saul het selfs nog op die troon gesit toe Dawid as koning van Israel ingeseën is. In plaas van om geloof in God se belofte te verloor, het Dawid verklaar, ‘…Die Here het die getroues vir Hom afgesonder. Die Here sal antwoord wanneer ek tot Hom roep’ (Psalm 4:4 NLV). Toe die Filistyne hom gevange geneem het, het hy gebid, ‘My aanvallers soek my lewe sonder ophou, en baie val my aan, o Allerhoogste. Die dag wanneer ek bang word, sal ek net op U vertrou’ (Psalm 56:3-4 NLV). Toe hy in ‘n grot opgeëindig het waar hy voor Saul se jaloerse toorn gevlug het, het hy gesê, ‘…In die skaduwee van u vlerke sal ek skuil totdat die onheil verby is’ (Psalm 57:1 NLV). Gedurende die derde eeu, toe St Felix van Nola vir sy vyande gevlug het, het hy skuiling in ‘n grot gesoek. Met die loop van tyd het ‘n spinnekop sy web oor die klein opening begin spin, wat dit laat lyk het of daar al maande lank niemand daar binne was nie. As gevolg daarvan het sy vyande verby die grot geloop. Toe hy weer in die sonskyn uitklim, het Felix verklaar, ‘Waar God is, is ‘n spinnekop se web ‘n muur. Waar God nie is nie, is ‘n muur ‘n spinnekop se web.’ Soms sal jy in ‘n grot opeindig oor iets wat jy gedoen het, of as gevolg van omstandighede waaroor jy geen beheer het nie. Met God aan jou sy, kan jy egter sê, ‘Die dag wanneer ek bang word, sal ek net op U vertrou.’
Sielskos: Eks 20:15; Jos 7:1-26; Tit 2:6-10; Ef 4:28
2018-02-24
2 Kronieke 20:17 NLV
Wanneer jy God betwyfel, stel jy Hom teleur, want Hy verdien beter. Jy moet dus daarna strewe om jou geloof te versterk, want geloof eer God en God eer geloof. Hy sal geleenthede, wat as probleme vermom is, stuur wat ontwerp is om jou geloof te versterk. Toe Job sy gesondheid, sy rykdom en sy kinders verloor het, sê die Bybel het hy gesê ‘…Wat ek het, het die Here vir my gegee. Die Here het dit ook weer weggevat. Die Here moet geprys word!’ (Job 1:21 DB). Job het nie God as gevolg van sy omstandighede geprys nie, maar ten spyte daarvan. Let twee dinge op wat hy gedoen het: 1) Hy het opgekyk. Hy het God se soewereine reg om alle dinge te besluit, erken. Hy het God se liefdevolle karakter vertrou en het geglo dat Hy sal doen wat die beste vir hom is. Jy moet dit ook doen! 2) Hy het vir ‘n boodskap geluister. Hy het besef dat ‘n tyd van beproewing ook ‘n tyd van onderrig is, dus het hy verklaar: ‘Maar Hy weet waarheen ek gaan! Wanneer Hy my toets soos goud in ‘n vuur sal Hy my onskuldig verklaar’ (Job 23:10 NLV). Soos goud wat gesuiwer word, het Job vir God vertrou om die beste in hom na vore te bring. Was dit maklik? Nee. Ons wil aan die bekende vasklou en na die sekuriteit van gister toe terugkeer, selfs al weet ons dat dit nie is wat God vir ons wil hê nie. Die vrese, verrassings en teenspoed wat om die draai lê wil ons laat opgee en weghardloop. Wat moet jy eerder doen? Posisioneer jouself in geloof: ‘…Neem julle posisies in, en staan dan en kyk na die oorwinning van die Here. Hy is met julle…’ Wat jy ook al vandag deurmaak, onthou dat God met jou is.
Sielskos: 1 Kon 8-9; Matt 17:14-27; Ps 40:1-8; Spr 6:1-5
2018-02-23
Hebreërs 11:2 DB
Die Bybel sê: ‘…Geloof of vertroue in God beteken om nie een oomblik te twyfel dat Hy sy beloftes sal hou en om daarna uit te sien nie. Ons kan dit wel nie nou al sien nie, maar ons weet vir seker dat dit sal gebeur. Die Skrif praat met groot lof oor mense van die ou tyd wat so op God vertrou het’ (verse 1-2 DB). Die helde van geloof wat in Hebreërs hoofstuk 11 gelys word was ver van perfek af. Noag het God geglo, die ark gebou en sy familie gered. Hy het egter dronk geword toe hy uit die ark gekom het. Abraham was bekend as ‘God se vriend,’ en tog het hy gejok om homself te red en sy vrou se lewe in gevaar gestel. Toe God vir Sara sê dat sy op die ouderdom van negentig ‘n kind sou kry, het sy gelag. Josef was ‘n slaaf met ‘n kriminele rekord wat op die ou einde tweede in bevel van Egipte was. Dan is daar Ragab die prostituut – ons sou haar nie toegelaat het om in die kerkkoor te sing nie – en tog het God haar ‘n vrou met groot geloof genoem. Wat van Jakob, wat sy broer geflous het en sy skoonpa in besigheid bedrieg het om homself te verryk? Sou jy met hom besigheid doen? Koning Dawid se ontug het tot moord en nasionale skandaal gelei. Selfs Gideon en Samuel, twee geestelike reuse, het kinders grootgemaak wat geestelik die pad byster geraak het. Elkeen van hierdie mense het gestruikel, die bal laat val en deur tye van mislukking gegaan. Hulle enigste aanspraak op roem is dat hulle God geglo het en dat Hy hulle geloof geëer het – Hy sal dieselfde vir jou doen elke keer wat jy jou vertroue in Hom plaas.
Sielskos: 1 Kon 6-7; Matt 17:1-13; Ps 36; Spr 5:21-23
