2018-03-06
Galasiërs 5:16 NLV
Maak op Christus se krag staat om jou te help. ‘… Laat julle leefstyl eerder deur die Gees bepaal word. Dan sal julle glad nie aan die begeertes van julle sondige geaardheid toegee nie.’ Let op dat dit nie sê dat jy glad nie daardie begeertes sal hê nie. Geesgevulde mense ervaar steeds die begeertes van die menslike vlees, dis net dat hulle nie daaraan toegee nie. Ons het dit gewoonlik andersom. Ons sê, ‘Ek is nie goed genoeg om God se Gees in my lewe te hê nie. Sodra ek my lewe in orde kry, dan gaan ek toelaat dat die Heilige Gees my lewe beheer.’ God sê nie, ‘Kry jouself onder beheer en dan sal Ek jou help’ nie. Hy sê, ‘Laat my Heilige Gees jou beheer terwyl jy steeds met die probleem sukkel. Ek sal jou help verander.’ Dit maak ‘n groot verskil. Jy sal nie sê, ‘Ek gaan eers beter word en dan gaan ek die dokter sien nie.’ Dis absurd! Jy het Christus nou in jou lewe nodig! Hy het die mag om jou te help verander. Jy sê, ‘Maar ek geniet wat ek doen.’ Dit is omdat daar ‘…kortstondige genieting van die sonde’ (Hebreërs 11:25 NLV), is. Niemand van ons sal sondig as dit ons onmiddellik ongelukkig maak nie. Moenie van God verwag om die versoeking van sonde tot niet te maak nie; vra Hom vir die krag om die versoeking te oorkom. ‘Dis mos God wat julle gewillig maak om te doen waarvan Hy hou, en Hy gee julle ook die vermoë om dit te kán doen!’ (Filippense 2:13 NLV). Jy sal die begeerte en krag ontvang om dit te doen wat reg is.
Sielskos: Op 5-9; Matt 21:1-17; Ps 77; Spr 6:29
2018-03-05
Efesiërs 4:26-27 NLV
Vermy die dinge wat jou in die versoeking bring. Bly weg van situasies af wat jou selfbeheersing laat verswak. As jy nie gesteek wil word nie, bly weg van bye af. Beplan vooruit om situasies te vermy wat jy weet gaan veroorsaak dat versoeking jou lewe binnekom. Moenie lekkergoed in die spens hou as jy probeer dieet nie. Moenie kredietkaarte kry as jy impulsief dinge koop nie. Raak ontslae van jou toegang tot pornografie as jy daarmee sukkel. As jy ‘n tiener is, is die tyd om aan selfbeheersing te begin dink nie wanneer jy op die agtersitplek van ‘n kar saam met iemand is nie. Vraag: Wat moet jy vermy? Of van ontslae raak? Tydskrifte? Boeke? DVD’s? ‘n Verhouding? Die Bybel sê, ‘…slegte geselskap bederf goeie gewoontes’ (1 Korintiërs 15:33 NLV). Vermy mense en situasies wat jou versoek. Dit mag dalk nodig wees dat jy van werk verander omdat daar ‘n verhouding is wat verkeerd en nadelig is vir jou. Dis ‘n drastiese stap, maar dis dalk nodig dat jy iets drasties doen om dit wat jou op hierdie spesifieke tyd versoek, te vermy. As jy deur jare van herhalende mislukking geleef het, is dit tyd om eerlik en nederig te wees. Dis tyd om te bid: ‘Here, ek is nie sterk genoeg om hierdie versoeking alleen te weerstaan nie. Help my!’ Hy sal jou help. ‘Ek het met hunkering op die Here gewag. Hy het afgebuig en my geroep gehoor, en my opgetel uit die modder en die slym. Hy het my voete op ‘n rots laat staan en my op vaste grond laat loop. Hy het my ‘n nuwe lied gegee, ‘n lofsang om ons God te prys. Baie sal met eerbied toekyk. Hulle sal op die Here vertrou’ (Psalm 40:2-4 NLV).
Sielskos: Op 1-4; Matt 20:17-34; Ps 70; Spr 6:26-28
2018-03-04
Galasiërs 6:2 NLV
Maak jouself toerekenbaar teenoor iemand. Alkoholiste Anoniem het ‘n ‘maat sisteem’ waarvolgens jy aangemoedig word om iemand te skakel wanneer jy die druk begin voel om in ‘n ou, destruktiewe patroon terug te val. Dis ‘n Skriftuurlike beginsel: ‘Sien raak wanneer ander gelowiges swaarkry en help hulle. Tel hulle probleme op julle skouers en dra dit vir hulle’ (vers 2 DB). Kry iemand wat by jou sal hoor hoe dit gaan en jou in areas wat jy meer selfbeheersing wil hê, sal bemoedig. ‘En as iemand die een aanval, sal die twee weerstand bied…’ (Prediker 4:12 NLV). Elke kerk het sulke verhoudings nodig waar mense aan mekaar toerekenbaar gehou word; verhoudings waarin mense mekaar in die Here aanmoedig. Om aan iemand toerekenbaar te wees is moeilik, maar dit werk. Waarvoor moet jy in ‘n maat vir so ‘n verhouding uitkyk? Eerstens, moet hulle dieselfde geslag as jy wees. Jy het nie nodig om nog ‘n versoeking in jou pad te sit deur persoonlike probleme met iemand van die teenoorgestelde geslag te deel nie. Tweedens moet jy vir iemand uitkyk op wie jy kan staatmaak om deur te druk met hulle verpligtinge – iemand wat getrou is. Derdens, kyk uit vir iemand wat jou probleem konfidensieel sal hou. Moenie iemand kies wat bekend daarvoor is dat hulle te veel praat nie. Vierdens, sê vir jou maat dat jy hom/haar toestemming gee om van tyd tot tyd by jou in te loer en te vra, ‘Hoe gaan dit met jou probleem?’ Die wete dat iemand jou oor jou probleem gaan uitvra, is ekstra aansporing om nie aan die versoeking toe te gee nie. Dit mag dalk die ekstra aansporing wees om jou op die pad na oorwinning en selfbeheersing aan die beweeg te kry.
Sielskos: Eks 20:16; Spr 24:28; Matt 5:33-37; Hand 5:1-11
2018-03-03
Filippense 4:13 NLV
Begin glo dat jy kan verander. Jou oortuigings beheer jou gedrag. Die manier waarop jy dink bepaal hoe jy voel. Wanneer jou gevoelens sterk genoeg word, kan dit die manier wat jy optree, bepaal. Die persoon wat sê, ‘Ek kan dit nie doen nie,’ en die persoon wat sê, ‘Ek kan dit doen,’ is altwee reg. Dikwels stel jy jouself oop vir mislukking deur dit wat jy sê. Jou woorde versterk óf jou regte óf jou verkeerde geloofsisteem. Drie keer in 1 Petrus, herinner God ons daaraan om helder van verstand te wees en selfbeheersing te hê. Hoekom? Omdat ‘n helder verstand noodsaaklik vir selfbeheersing is. God het ons die mag om ons gewoontes te verander gegee toe Hy vir ons die mag gegee het om ons gedagtes te kies. Sê Romeine twaalf vers twee vir ons om deur harde werk of pure wilskrag getransformeer te word? Nee. Waardeur word ons getransformeer? Deur ons denkpatrone te vernuwe. Wanneer jou selfbeheersing getoets word, moet jy jou gedagtes met God se beloftes vul. Hier is een: ‘…Hy sal keer dat die versoeking te sterk vir julle word. Midde-in die versoeking sal Hy vir ‘n uitweg sorg sodat julle kan volhou’ (1 Korintiërs 10:13 NLV). Jy moet God glo wanneer Hy sê dat daar vir jou ‘n uitweg is. Paulus skryf, ‘Ek kan onder alle omstandighede regkom deur Hom wat my krag gee.’ Dit beteken dat jy kan verander, dat jy anders kan wees. Hou op om jouself vir mislukking oop te stel deur jouself aanhoudend te kritiseer. ‘Ek is nie goed genoeg nie. Ek het eenvoudig geen beheer oor my lewe nie.’ Om aanhoudend te kla werk nie. Sê eerder, ‘…As ‘n mens glo, is álles moontlik!’ (Markus 9:23 NLV). ‘Ek glo!’
Sielskos: 1 Kon 21-22; Matt 20:1-16; Ps 66:13-20; Spr 6:23-25
2018-03-02
Titus 2:12 DB
Praat terug met jou gevoelens. Ons sit heeltemal te veel klem op ons gevoelens. Ons dink dat alles moet goed voel, so nie is dit nie die moeite werd nie. Ons sê dinge soos, ‘Ek voel nie lus om te werk nie… Ek voel nie lus om my Bybel te lees nie.’ Of, ‘Ek voel of ek nog ‘n drankie wil drink… Ek is lus om tot laatoggend te slaap.’ Moenie jou gevoelens so baie outoriteit gee nie. Gevoelens is hoogs onbetroubaar; as jy hulle toelaat, sal hulle jou beheer en manipuleer. God wil nie hê dat jy deur jou gevoelens beheer moet word nie. Hy wil hê dat jy jou buie moet bemeester. Met Christus as die Heerser van jou lewe, kan jy jou gevoelens beheer. Praat terug met hulle. God sê dat Hy wil hê dat jy moet leer om jou emosies uit te daag. ‘Nou wys Hy vir ons hoe om ‘n Godlose leefstyl te systap en hoe om vernietigende begeertes te laat staan. Hy laat ons met wysheid en opregtheid leef…’ God se genade gee jou die krag om te doen wat reg is. Dit gee jou die vermoë om nee te sê vir daardie gevoel, daardie begeerte, daardie impuls. Sukkel jy met jou gewig? Voor jy die yskas oopmaak, het jy reeds met jouself oor kos begin praat. As jy ernstig is, sal jy sommige van hierdie onderbewustelike houdings teenoor kos moet begin uitdaag. Wanneer jy jou gevoelens hoor sê, ‘Ek moet net ietsie eet of ek gaan doodgaan,’ moet jy antwoord, ‘Nee, ek gaan nie doodgaan nie. Ek gaan inderwaarheid gesonder wees as ek nie nou iets eet nie.’ Die feit is: God se bonatuurlike krag kan jou help om jou buie, gedagtes en begeertes te bemeester.
Sielskos: 1 Kon 18:16-20:43; Matt 19:15-30; Ps 66:1-12; Spr 6:20-22
2018-03-01
Romeine 14:4 NLV
Sit die verlede agter jou. ‘…een ding is seker: ek vergeet dit wat agter my lê, en strek my uit na dit wat voorlê’ (Filippense 3:13 NLV). Hierdie Skrifgedeelte ontbloot ‘n algemene wanopvatting wat jou daarvan weerhou om selfbeheersing te kry: Een keer ‘n mislukking, altyd ‘n mislukking! Jy mag dalk sê, ‘Ag, ek het probeer om my slegte gewoonte te breek. Ek gaan seker maar nooit beheer daaroor kry nie.’ Dit is ‘n wanopvatting. Paulus sê, ‘…Ek word onderstebo geloop, maar ek staan elke keer weer op’ (2 Korintiërs 4:9 DB). Het jy al ooit ‘n baba wat leer loop dopgehou? Hulle val baie, maar hulle hou aan probeer en is uiteindelik suksesvol. Hoe ver dink jy sou hulle kom as hulle net opgegee het en gesê het, ‘Sommige mense is net nie bedoel om te kan loop nie’? Mislukking in die verlede beteken nie dat jy nooit sal kan verander nie. Om egter op mislukkings in die verlede te fokus, waarborg dat jy hulle sal herhaal. Dis soos om ‘n kar te bestuur terwyl jy in die truspieëltjie kyk. Jy gaan bots met wat ook al voor jou is. Jy moet jou verlede agter jou sit. Niemand het meer mislukkings as Thomas Edison ervaar nie. Die meeste van ons sou tou opgegooi het, maar nie hy nie. Hy het een keer gesê, ‘Moet dit nie ‘n mislukking noem nie, noem dit ‘n leerskool! Nou weet ek wat nie werk nie!’ Wanneer jy besef dat sonde nie werk nie, is dit ‘n beslissende oomblik en ‘n springplank na oorwinning. ‘n Wenner is eenvoudig iemand wat een keer meer opstaan as wat hulle val. Die woord vir jou vandag is dus: ‘…[Jy] sal ook die toets slaag – daarvoor sal ons Here in sy almag sorg.’
Sielskos: 1 Kon 16:1-18:15; Matt 19:1-14; Ps 61; Spr 6:16-19
