2018-03-12
Lukas 7:37 NLV
Die Bybel sê, “‘n Sekere vrou van losse sedes… het ‘n albaste fles met duur aromatiese olie gebring. Sy het agter Jesus gekniel, by sy voete, en gehuil. Haar trane het op sy voete geval… Toe het sy… aromatiese olie daaraan gesmeer” (verse 37-38 NLV). Hierdie olie was suiwer nardusolie, ‘n meerjarige krui wat in die Himalajas geoes word. ‘n Halwe liter daarvan! Die fles, wat van deurskynende edelstene gemaak was, was heel waarskynlik ‘n familie erfstuk. Dit mag dalk selfs haar bruidskat gewees het. Dit was eenvoudig haar kosbaarste besitting. Hoe ironies, maar tog toepaslik, dat die parfuum wat sy in haar beroep as prostituut gebruik het, die kenteken van haar belydenis van geloof sou word toe sy elke laaste druppel oor die voete van Jesus gegiet het. Die breek van daardie fles was haar breek met haar verlede. Sy sou nie meer die stank van sonde met die soet geur van parfuum probeer verdoesel nie. Geen geheime meer nie. Geen skande meer nie. Sy het uit die donker skaduwee van sonde in die lig van die wêreld uitgestap. Daar kom ‘n oomblik wat jy al jou kaarte op die tafel voor God moet sit. ‘n Oomblik waar jy al jou geheime, struikelblokke en sondes moet openbaar. ‘n Oomblik waar jy met jou volle gewig op die genade van God moet val. Hoekom tree ons op asof ons sonde ons diskwalifiseer om die genade van God te ontvang? Dit is die enigste rede wat ons daarvoor kwalifiseer! Enigiets anders is ‘n eiegeregtige poging om God se genade te probeer verdien. Jy kan nie God se genade net 99% vertrou nie. Dis alles of niks. Wanneer ons onsself probeer red, verbeur ons die redding wat alleenlik deur Jesus Christus kom, met genade deur geloof (sien Efesiërs 2:8-9)
Sielskos: 2 Kon 4:18-6:33; Matt 22:34-46; Ps 112; Spr 7:6-9
2018-03-11
Psalm 51:8 NLV
Die Bybel sê, ‘Hy [Jesus]… het nooit enigiemand bedrieg nie…’ (Jesaja 53:9 NLV). As ons God se wil doen, sal ons ook nooit enigiemand bedrieg nie. God wil nie ons bedrog net minimaliseer nie, Hy wil dit heeltemal elimineer. Hy draai nie doekies om as dit by oneerlikheid kom nie. ‘Bedrieërs sal nie in my huis woon nie…’ (Psalm 1.1:7 NLV). Paulus noem die tipes mense op wat nie die koninkryk van God sal erf nie – mense wat onsedelike lewens lei, afgodsdienaars, egbrekers, mense wat dronk word, ander mense besteel en mense wat oor ander lieg (sien 1 Korintiërs 6:9-10). Bedoel dit dat jou leuens en vleiery dieselfde hemelse woede as ontrouheid en aanranding ontlok? Dit kom so voor. God sien mense wat oor hul belastingopgawes jok in dieselfde lig as mense wat afgode dien. ‘Die Here verafsku mense wat hulle woord breek. Hy hou van mense wat by hulle woord staan’ (Spreuke 12:22 NLV). Hoekom is God so erg oor oneerlikheid? Omdat oneerlikheid absoluut die teenoorgestelde van God se karakter is (Hebreërs 6:18). Dis nie dat God nie wil jok nie, of kies om nie te jok nie, dis dat Hy nie kán jok nie. ‘n Hond kan nie vlieg nie, ‘n voël kan nie blaf nie en God kan nie jok nie. Wanneer Hy ‘n belofte maak, hou Hy dit. Wanneer Hy ‘n stelling maak, bedoel Hy dit. Wanneer Hy die waarheid proklameer, kan ons dit glo. ‘Maar as ons ontrou is – Hy bly getrou, want Hy kan nie aan Homself ontrou word nie’ (2 Timoteus 2:13 NLV). Dis nie ‘n grys area by God nie, dis swart en wit. As jy dus ernstig daaroor is om ‘n pad met Hom te stap en Hom te bevredig, moet jy altyd die waarheid praat.
Sielskos: Eks 20:17; 2 Kon 5:1-27; Pred 5:10; Luk 12:13-34
2018-03-10
Handelinge 6:4 NLV
In Disciplines of a Godly man, sê die pastoor en skrywer R. Kent Hughes: ‘Jay Sidlow Baxter het een maal ‘n bladsy uit sy eie persoonlike dagboek met ‘n groep pastore gedeel wat hom oor die dissipline van gebed uitgevra het. Hy het begin vertel hoe hy die bediening betree het, vasbeslote om ‘n ware man van gebed te wees. Dit was egter nie lank voor sy toenemende verantwoordelikhede, administratiewe pligte en die subtiele voorwendsels van die pastorale lewe begin het om gebed eenkant toe te druk nie. Verder het hy begin gewoond raak daaraan en het verskonings vir homself gemaak. Een oggend het alles egter tot ‘n punt gekom toe hy voor sy lessenaar wat met werk bestrooi was gestaan het en op sy horlosie gekyk het. Die stem van die Gees het hom geroep om te bid. Terselftertyd het ‘n fluweelsagte stem hom aangesê om prakties te wees en sy korrespondensie te beantwoord, en dat hy moet besef dat hy nie die ‘geestelike tipe’ is nie. ‘Daardie laaste opmerking,’ sê Baxter, ‘was soos ‘n dolk in die hart. Ek kon my nie indink dat dit kan waar wees nie.’ Hy was met afgryse vervul oor sy vermoë om die grondslag van sy pastorale krag weg te rasionaliseer.’ Verstaan mooi: Minute wat jy in gebed belê, sal vir jou meer beteken as ure wat jy aan eindelose aktiwiteite spandeer. Die apostels in die Nuwe Testament het dit verstaan. Soos die kerk groter geword het en hulle besiger geword het, het hulle ‘n lewensveranderende besluit gemaak: ‘óns sal dan al ons tyd bestee aan gebed en die bediening van die woord.’ As gevolg daarvan het die kerk gegroei en vermenigvuldig. Maak dus gebed ‘n prioriteit!
Sielskos: 2 Kon 1:1-4:17; Matt 22:15-33; Ps 106:24-48; Spr 7:3-5
2018-03-09
2 Samuel 24:24 NLV
In plaas van om God vir oorwinning oor sy vyande te vertrou, het Dawid uit sy eie uit besluit om die aantal soldate in sy weermag te tel om te sien hoe sterk hulle is. God het dit as ‘n ‘klap in die gesig’ gesien en ‘n plaag het Israel getref wat sewentig duisend mense uitgewis het. Om die plaag te stop, moes Dawid die volgende doen: ‘…Gaan bou ‘n altaar vir die Here op die dorsvloer van Arauna die Jebusiet’ (vers 18 NLV). Toe Arauna agterkom wat aan die gang is, het hy sy dorsvloer en osse vir Dawid verniet aangebied. Dawid het egter gesê: ‘Nee, Arauna, ek dring aan om dit te koop teen die volle prys. Ek kan nie vir die Here my God brandoffers aanbied wat my niks kos nie…’ Dus het Dawid hom 50 sikkels silwer vir die osse en die dorsvloer betaal. Dawid het ‘n altaar vir die Here daar gebou en die brandoffers en maaltydoffers daar gebring. Die Here het sy gebed beantwoord, ‘…Daarna het die Here die gebede vir die land verhoor, en die plaag in Israel het opgehou’ (vers 25 NLV). Wanneer dit kom by die dien van die Here, as dit jou niks kos nie, tel dit nie! God weet dat ons nie almal dieselfde aantal of bedrag kan gee nie. Hy vra egter nie iets van jou wat gelyk is aan aantal of bedrag nie, maar wat gelyk is aan opoffering! Die Bybel sê, ‘Vereer die Here met alles wat jy besit. Gee vir Hom die beste van jou oes’ (Spreuke 3:9 NLV). Of dit nou by lofprysing, bediening of gawes kom, maak seker dat jy jou beste vir God gee.
Sielskos: Op 19-22; Matt 22:1-14; Ps 106:1-23; Spr 7:1-2
2018-03-08
1 Korintiërs 6:20 NLV
Tensy jy jou liggaam versorg, mag jy dalk gouer hemel toe gaan as wat jy beplan. Die Bybel sê dat ons God met ons liggame moet verheerlik. Hoe doen ons dit? 1) Verander jou dieet. Baie van ons eet vir die verkeerde redes – soos stres, verveeldheid, moegheid, woede, depressie en lae selfbeeld. Probeer om by die wortel van jou probleem uit te kom. Onvoldoende groente, vrugte en vesel en te veel kitskos kan jou gesondheid verwoes. Oefen selfbeheersing uit. ‘Christene is mense wat die hartstogte en die begeertes van hulle sondige geaardheid gekruisig het’ (Galasiërs 5:24 NLV). 2) Begin oefen. Die geheim is om stadig te begin. Neem die trappe in plaas van die hysbak, parkeer jou kar en stap, speel met jou kinders bal. God het jou liggaam ontwerp om te beweeg en dit beteken nie om elke oggend van jou kar na jou lessenaar toe te wandel nie. Om drie keer ‘n week vir dertig minute te oefen sal jou bloeddruk en stres verminder. 3) Gaan vroeër bed toe. Pastoor Tony Jenkins het sy dokter oor sy vrou se snorkery geraadpleeg. ‘Pla dit jou regtig so baie?’ het die dokter gevra. ‘Dit pla nie net my nie,’ het Jenkins geantwoord. ‘Dit pla die hele gemeente!’ Op ‘n ernstiger noot, jy het agt ure slaap nodig. Jy kan heel waarskynlik op minder slaap funksioneer, maar wil jy regtig moeg deur die lewe gaan? Die Psalmdigter het gesê, ‘Tevergeefs werk jy so hard van vroegoggend tot laatnag, soos jy swoeg om te bestaan, maar vir hulle wat Hy liefhet, gee Hy dit in hulle slaap’ (Psalm 127:2 NLV). Skakel dus die televisie en die rekenaar af en gaan klim op ‘n redelike tyd in die bed. Sorg beter vir jou liggaam!
Sielskos: Op 15-18; Matt 21:33-46; Ps 136:13-26; Spr 6:32-35
2018-03-07
Spreuke 18:8 NLV
Die houtluis lewe aan die onderkant van ‘n keëlvormige gat wat hy in die grond grawe. Wanneer die mier verbykom en aan die kant van hierdie keël wat die houtluis versigtig gemaak het, loop, voel die houtluis die korreltjies sand afgly wat vir hom die teken is dat daar ‘kos’ daar bo is. Op daardie punt begin hy grond op sy slagoffer gooi. Hy probeer inderwaarheid die mier na sy vlak toe aftrek. Dis wat ons doen wanneer ons skinder. Ons gooi grond op ander mense, in die hoop dat ons hulle na ons vlak toe kan aftrek. Dis hoekom Salomo gewaarsku het: ‘Skinderstories is so soet soos lekkers. Jy sluk dit maklik, en dit sink tot diep in jou gemoed.’ Die oor smag na skinderstories soos ‘n honger maag na kos smag. Salomo gee verder hierdie waarskuwing: ‘Iemand wat loop en skinder, lap geheime uit. Bly weg van iemand wat alte maklik praat’ (Spreuke 20:19 NLV). As jy dus lippe wat skinder of gierige ore het, sê God vir jou, ‘Moet dit nie doen nie!’ Hier is iets wat jy dalk nog nie oorweeg het nie: Terwyl jy nooit geken en geoordeel kan word aan wat ander mense van jou sê nie, kan jy geken en geoordeel word aan wat jy van hulle sê. In die meeste gevalle is dit onwettig om te steel of gesteelde goedere te ontvang. Dis hoekom die apostel Paulus ons vermaan, “‘n Beskuldiging teen ‘n ouderling moet jy nie aanneem nie, tensy dit deur twee of drie getuies bevestig word” (1 Timoteus 5:19 AFR83). Nog ‘n laaste gedagte: ‘n Skinderbek moet altyd ‘n medepligtige hê om die misdaad te pleeg. Die woord vir jou vandag is dus: Moenie skinderstories aanneem of herhaal nie.
Sielskos: Op 10-14; Matt 21:18-32; Ps 136:1-12; Spr 6:30-31
