2019-04-02
Josua 1:11 NLV
Wanneer God sê dat Hy iets vir jou ‘gegee’ het, beteken dit dat jou naam op die titelakte is. Wanneer Hy vir jou sê om dit ‘in besit te neem,’ beteken dit dat jy dalk daarvoor sal moet baklei. As jy dit nie doen nie, sal jy nie ontvang wat Hy jou belowe het nie. Op hierdie oomblik mag baie mense in jou ‘droom huis’ bly en in jou ‘droom beroep’ werk. Moet hulle nie kwalik neem nie, verbly jou! God kan dieselfde vir jou doen! As jy moeg is om oor die dinge te praat wat jy nie het nie, staan op en begin dit najaag. Wanneer jy dit egter kry, moet jy onthou dat dit nie gebeur het omdat jy so wys en wonderlik is nie, maar omdat God dit vir jou gegee het (sien Deuteronomium 8:18). Die Bybel sê dat Hy ‘…ons alles laat kry wat ons nodig het om naby aan Hom te lewe…’ (2 Petrus 1:3 NLV). Jy moet egter eers hierdie belofte innerlik aanneem, voordat jy dit uiterlik kan begin ervaar. Jou uitdaging kan byvoorbeeld wees om in jou gees te glo dat jy genees is, voordat jy dit fisies begin ervaar. Wanneer ons byvoorbeeld God vir ‘n eikeboom vra, gee Hy vir ons ‘n akker. Op daardie oomblik mag ons dink dat God nie ons gebed gehoor en beantwoord het nie. Nee, die eikeboom is in die akker; dis net ‘n kwessie van tyd voordat dit wat binne is na buite uitbars. Die sade van dit wat God aan jou beloof het, is reeds binne jou. Gee hulle water, versorg hulle en laat niemand toe om hulle deur ongeloof te ontwortel nie. Begin God met ander woorde dank vir wat Hy in jou lewe gaan doen.
Sielskos: Lev 11:1-13:37; Luk 20:41-47; Ps 32; Spr 9:10-16
2019-04-01
Romeine 8:28 NLV
Paulus begin hierdie vers deur te sê: ‘En ons weet…’ Daar is soveel dinge in die lewe wat ons nie weet nie. Ons weet nie wat die ekonomie gaan doen of hoe ons kinders gaan uitdraai nie. Ons weet nie eers ‘…wat en hoe ons moet bid nie…’ (vers 26 NLV). Ons kan egter die volgende vier dinge weet: 1) God werk. Selfs al kan jy Hom nie sien nie, is Hy agter die skerms besig. Hy werk onophoudelik en sonder om moeg te word. 2) God werk ten goede. Nie vir ons gemak, plesier of vermaak nie, maar sodat dinge vir ons ten goede sal uitwerk. Hy is immers wonderbaarlik goed, so hoekom sal jy minder van Hom verwag? 3) Hy werk ten goede vir die wat Hom liefhet. Wat ‘n voordeel deur ‘n liefdevolle God! Maak sy verhaal jou verhaal en jou verhaal sal ‘n gelukkige einde hê. 4) God werk met alles. God werk nie net met ‘n paar dinge, of die goeie dinge, of die beste dinge, of die maklike dinge nie. Hy werk met alles. Hy maak ook nie die plan op soos Hy vorder nie. Die Bybel sê: ‘…Ons was vooraf daartoe bestem! Dit was God se doel! Hy het alles laat uitwerk soos Hy dit beplan en wou gehad het’ (Efesiërs 1:11 NLV). Die beste deel is dat God se plan jou insluit! Hou dus op knies, stres en slaap verloor. Gee dit aan God oor en glo dat Hy alles ten goede vir jou en vir sy heerlikheid sal laat uitwerk.
Sielskos: Lev 8-10; Luk 20:34-40; Ps 72:12-20; Spr 9:7-9
2019-03-31
Spreuke 23:24-25 NLV
Jou doelwit as ouer moenie wees om perfekte kinders groot te maak nie, maar om aan hulle die wysheid te gee wat nodig is om suksesvol te kan leef. Dit kan twee uitdagings veroorsaak: ouerlike verwaarlosing of ouerlike obsessie. Die tweede een kom voor by ouers wat obsessief oor hulle kinders is en geen tyd vir ontspanning, romanse of rus laat nie. Hierdie mense sal nie eers Moeder Teresa as ‘n kinderoppasser oorweeg nie! Die beweegredes van obsessiewe ouers mag dalk goed wees, maar hulle beheptheid kan tot drie ernstige probleme lei: 1) Hulle maak hulle kinders die spil waarom alles draai, wat nie in die kinders se beste belang is nie. As jy jou kinders die middelpunt van die heelal maak, wag ‘n groot skok op hulle wanneer hulle die regte wêreld betree. 2) Emosionele en fisiese moegheid lei tot ‘ouerlike uitbranding.’ Net soos ‘n battery nie aanhoudend gedreineer kan word nie, het jy tyd nodig om fisies, emosioneel en geestelik te herlaai. Wanneer jy dit nie doen nie, voel almal om jou die negatiewe effek daarvan. 3) ‘Superouerskap’ kan vernietigend in ‘n huwelik wees, veral wanneer die ma die een is wat daartoe neig. ‘n Pa kan sy kinders begin verwyt omdat hulle sy vrou van hom af wegneem, of die vrou mag dalk dink dat haar man selfsugtig is omdat hy nie so toegewyd soos sy aan hulle kinders is nie. In beide gevalle word ‘n wig tussen hulle ingedryf, wat die familie uiteindelik kan vernietig. Matigheid of balans, is die sleutel tot ‘n gesonde en gelukkige familielewe.
Sielskos: 1 Kor 9:24-27; Num 6:1-8; Spr 25:28
2019-03-30
Psalm 118:6 NLV
Jy sal altyd vrees in een of ander vorm moet hanteer. Jou vrese sal ook verskil in jou verskillende lewenseisoene. Sodra jy dit aanvaar, kan jy vooruitgang maak. Julius Ceasar het byvoorbeeld die wêreld oorwin, maar hy was bang vir donderweer. Petrus die Grote van Rusland, het soos ‘n kind gehuil wanneer hy brûe moes oorsteek. Die gevierde Britse skrywer, dr Samuel Johnson, moes met sy linkervoet ‘n kamer binnegaan. As hy per ongeluk sy regtervoet gebruik het, het hy uitgegaan en weer met sy linkervoet binne gekom. (Praat van jou beste voetjie voorsit!). As jy toelaat dat vrees jou beheer, sal vrees jou daarvan weerhou om jou lewe ten volle uit te leef. Vrees teel onaktiwiteit, onaktiwiteit teel gebrek aan ervaring, gebrek aan ervaring teel onkunde en onkunde teel vrees. As jy in hierdie siklus vasgevang is, is hier ‘n paar Skrifgedeeltes wat jou kan help: 1) ‘U bewaar elkeen wat op U vertrou in vrede, die mense wie se gedagtes op U gerig is’ (Jesaja 26:3 NLV). 2) ‘Ek laat vir julle my vrede na; my vrede deel Ek met julle. Ek gee nie soos die wêreld gee nie. Julle moet regtig nie ontsteld of beangs word nie’ (Johannes 14:27 NLV). 3) ‘As die Here gelukkig is met die manier waarop iemand lewe, sal Hy selfs sy vyande in vrede met hom laat lewe’ (Spreuke 16:7 NLV). 4) ‘…in God is my vertroue; ek sal nie vrees nie. Wat kan mense aan my doen?’ (Psalm 56:5 NLV). 5) ‘Want God het ons nie ‘n gees van skugterheid gegee nie, maar van krag, liefde en selfbeheersing’ (2 Timoteus 1:7 NLV). Verpersoonlik hierdie Skrifgedeeltes in gebed, steun op hulle en moenie ‘n sentimeter aan vrees toegee nie.
Sielskos: Lev 5-7; Luk 20:27-33; Ps 72:1-11; Spr 9:1-6
2019-03-29
Filippense 4:6 NLV
Dit gebeur so maklik, veral in die geselskap van verkeerde mense. Voor jy jou oë uitvee is jy besig om te kritiseer en te kla en word die atmosfeer negatief. Jy sê: ‘Maar ek sê net hierdie dinge omdat ek so bekommerd is.’ Lees dan die volgende: ‘Moet oor niks bekommerd wees nie, maar bid oor alles. Vra alles wat julle nodig het van God, terwyl julle Hom ook dank vir alles wat Hy doen. As julle so bid, sal julle God se vrede beleef. Hierdie vrede is wonderliker as wat ‘n mens ooit kan dink…’ (verse 6-7 NLV). Jy styg bo bekommernis uit deur dank te betuig, nie deur te kla nie. Moet nooit toelaat dat jou vlak van danksegging deur jou situasie bepaal word nie, want God is groter as enige situasie waar voor jy te staan kan kom. Hoe kan jy jou neiging om negatief te wees dan oorkom en eerder ‘n positiewe, geloofsvervulde lewensuitkyk ontwikkel? 1) Besluit om dit te doen. Abraham Lincoln het die waarheid gepraat toe hy gesê het: ‘Die meeste mense is so gelukkig soos hulle besluit om te wees.’ Weier om nog ‘n oomblik lank te kritiseer en te kla. 2) Begin nou. Verandering gebeur nie maklik nie, maar as jy nie begin nie, sal dit glad nie gebeur nie. Probeer om meer bewus te wees van wat jy sê. Wanneer jou eerste paar sinne negatief is, korrigeer jouself en stuur die gesprek na dit wat positief is. 3) Verwag die goeie dinge. ‘…Dink aan dit wat vir God saak maak, dinge wat ordentlik en reg is, dinge waaraan God sal dink en waarvan Hy sal hou, dinge wat God sal sê goed is…’ (Filippense 4:8). Maak die volgende jou gebed: ‘Here gee vir my ‘n positiewe, geloofsvervulde lewensuitkyk.’
Sielskos: Lev 1-4; Luk 20:20-26; Ps 31; Spr 8:34-36
2019-03-28
Matteus 5:46 DB
John Walker skryf: ‘Stuur foto en ek sal antwoord. Dis ‘n algemene boodskap in persoonlike advertensies. Wanneer dit egter daarby kom om ander mense lief te hê, sê jy ook: Stuur eers foto? Ons almal sê dit op verskillende maniere. ‘Ek moet eers sien of jy goed genoeg is… Ek is nie seker jy is my liefde werd nie… Jy moet eers volgens my verwagtinge optree voordat ek vir jou sal lief wees.’ Dis tyd dat ons ophou om mense ‘…volgens ‘n menslike maatstaf…’ (2 Korintiërs 5:16 NLV), te beoordeel. Jesus het in die Bergrede gesê: ‘…[God] doen goeie dinge vir almal. Hy laat die son skyn oor goeie mense en oor slegte mense… As julle net daardie mense liefhet met wie julle goed oor die weg kom, moet julle nie verwag om daarvoor ‘n medalje vir goeie diens by God te kry nie. Almal doen dit tog, ook slegte mense wat nie in God glo nie. As julle net julle familie en vriende groet, het julle nog niks spesiaals gedoen nie. Selfs die grootste sondaars groet ook hulle vriende. Julle moet soos julle hemelse Vader wees…’ (Matteus 5:45-48 DB). God se liefde vir ons is perfek, omdat dit onvoorwaardelik en nie veroordelend is nie. Die Bybel sê dat toe ons sy vyande was, het God sy liefde laat blyk ‘…daarin dat Christus vir ons kom sterf het ten spyte daarvan dat ons nog sondaars was’ (Romeine 5:8 NLV). Is daar iemand in jou lewe wat jou seergemaak het en nou sukkel jy om vir hom/haar lief te wees? Bid dan: ‘Vader, ek sukkel om [naam] lief te hê. Help my om die oordeel en blaam te laat gaan; en om hom of haar lief te hê soos U my liefhet.’
Sielskos: 2 Tess 1-3; Luk 20:9-19; Ps 18:30-50; Spr 8:32-33
