2019-06-15
Psalm 18:33 NLV
Die sangeres Dolly Parton sê in haar outobiografie: ‘My hoërskool was so klein dat elkeen van ons gedurende ons gradeplegtigheid kon opstaan en sê wat ons planne vir die toekoms is. ‘Ek gaan universiteit toe,’ sou een seun sê. ‘Ek gaan trou en stad toe trek,’ sou ‘n meisie hom opvolg. Toe dit my beurt is, het ek gesê: ‘Ek gaan Nashville toe om ‘n ster te word.’ Die hele plek het uitgebars van die lag. Ek was stomgeslaan. Tog het daardie gelag op die ou einde ‘n groter vasbeslotenheid om my droom te bewaarheid, in my laat posvat. As dit nie vir die skare se reaksie daardie dag was nie, sou ek dalk onder die gewig van die harde tye wat nog moes kom, ineengestort het. Dis snaaks hoe ons soms ons inspirasie vind.’ Elke held in die Skrif, sonder uitsondering, moes struikelblokke en teenstand oorkom. Dawid skryf: ‘Hulle het aangeval toe ek swak was, maar die Here hou my staande. Hy lei my na veiligheid en red my omdat Hy my liefhet… Met U loop ek ‘n leër storm; met my God spring ek oor ‘n muur. God se pad is volmaak. Die Here se woorde is betroubaar. Hy beskerm dié wat by Hom skuil… God rus my toe met krag; Hy maak my pad veilig. Hy maak my voete soos dié van ‘n wildsbok, op hoë plekke laat Hy my veilig staan… U het my met krag toegerus vir die stryd, en my teenstanders aan my onderwerp’ (verse 19-20, 30-31; 33-34, 40 NLV).
Sielskos: Hosea 6-10; Mark 14:43-52; Ps 139:7-12; Spr 13:24
2019-06-14
1 Petrus 5:5 NLV
Daar word twee tipes nederigheid in die Skrif genoem: 1) Valse nederigheid. Paulus skryf: ‘Laat niemand wat aandring op selfvernedering… oor julle skeidsregter speel en julle op sleeptou neem nie…’ (Kolossense 2:18 NLV). Of dit nou jou kleredrag, jou spraak of jou gedrag is – enigiets wat die aandag van Christus af wegneem en op jou vestig, is onaanvaarbaar vir God. 2) Ware nederigheid. Mense wat waarlik nederig is, neem nie maklik aanstoot of veg terug nie; hulle draai die ander wang. Tog is hulle nederigheid nie lafhartigheid nie, omdat ware nederigheid moed verg. Dit maak jou gewillig om ‘n laer posisie as wat jy verdien in te neem, om stil te bly oor jou meriete en om vernedering, belediging en valse aantygings ter wille van ‘n hoër doel te verduur. Ware nederigheid laat jou nie minder van jouself dink nie, dit laat jou net minder aan jouself dink. Petrus het hierdie onderwerp met die volgende woorde aangespreek: ‘…God is téén dié wat te veel van hulleself dink, maar dié wat besef hoe afhanklik hulle van Hom is, aan hulle gee Hy sy onverdiende goedheid. Word daarom klein onder die kragtige hand van God; op sý tyd sal Hy julle groot maak’ (1 Petrus 5:5-6 NLV). Daar is ‘n verhaal van ‘n man wat homself vir ‘n kompetisie ingeskryf het om te bepaal wie die nederigste is. Toe hy wen, het hy ‘n sertifikaat van verdienste ontvang – maar toe hy dit omhoog hou, is hy gediskwalifiseer! Op ‘n ernstige noot: Trots diskwalifiseer jou daarvan om die guns van God te geniet. Dis hoekom jy jouself gereeld moet herinner: ‘Alles wat ek is, het ek aan God te danke; alles wat ek het, kom van God af. Aan Hom kom al die eer toe.’
Sielskos: Hosea 1-5; Mark 14:27-42; Ps 139:1-6; Spr 13:21-23
2019-06-13
Johannes 4:14 NLV
Eendag het die Fariseërs vir Jesus gevra: ‘…Hoe kry julle dit reg om saam met ‘n klomp skelms en sondaars te eet en te drink?..’ (Lukas 5:30 DB). Sulke minagting – en dit van mense wat veronderstel was om eerste in die ry te staan om liefde en medelye te bewys! Jesus was lief vir mense; kyk hoe het hy die vrou by die put behandel. Eerstens het Hy die reëls verbreek. Jode het nie met nie-Jode gemeng nie en hulle het vir seker nie met haar soort omgegaan nie. (Sy was al vyf keer geskei.) Hy het met haar gemeng, nie om voordeel uit haar te trek nie, maar om haar te bereik, te verlos en te herstel. Dis hoekom Hy ‘n vriend van sondaars (sien Matteus 11:19), genoem word. Kan mense dieselfde van jou sê? Tweedens het Hy die ys gebreek. Jesus het met haar oor iets waarin sy geïnteresseerd was gepraat – water. Jy moet waar mense is, begin, nie waar hulle veronderstel is om te wees nie. Jy moet ook oor jou vrees vir verwerping kom. Jy mag dalk skaam kry as hulle nee sê, maar dink net wat hulle sal verloor as hulle nooit die kans kry om vir die evangelie ja te sê nie. Derdens het Hy die nuus gebring. Hy het vir haar lewende water in plaas van dooie godsdiens aangebied. Hoe kan jy sê dat jy vir iemand lief is en nie met hulle die grootste geskenk wat jy al ooit ontvang het – verlossing – deel nie? Elke mens wat jy ontmoet is op die verlede gefokus, angstig oor die toekoms, of het die behoefte aan ‘n ware vriend. Sodra jy uitvind agter watter deur hulle staan, tree dit met liefde en sensitiwiteit binne. Hulle is dors na die lewende water. Deel dit met hulle.
Sielskos: 2 Kon 24-25; Mark 14:12-26; Ps 73:17-28; Spr 13:20
2019-06-12
Jakobus 3:17 NLV
Sommige mense lyk of hulle op konflik floreer. Hulle is altyd besig om te baklei, te stry, te verskil en probeer om ‘n rusie te begin. Hulle baklei net vir die genot daarvan, nie omdat hulle passievol in ‘n spesifieke saak glo nie. Hulle is vinnig om in te spring en ander mense se gevegte waarin hulle geen aandeel het nie, te veg. Hierdie mense lyk of hulle baie selfvertroue het, maar hulle maak slegte besluite, dus leer ander mense om hulle te ignoreer en hulle nie ernstig op te neem nie. Hulle moet altyd ‘wen’ om sodoende goed oor hulself te voel. Wanneer dit by jou verhoudings met ander mense kom, het jy ‘wysheid wat van Bo kom,’ nodig. Wanneer jy dit het, sal dit nie vir jou nodig wees om aan almal te wys hoe sterk en slim jy is nie. Ware selfvertroue, insluitend vertroue in jou vermoë om goeie besluite te neem, kom van binne af. ‘Maar die wysheid wat van Bo kom, is in die eerste plek suiwer. Verder is dit vredeliewend, inskiklik, bedagsaam. Dit is bereid om deernis te bewys, en het goeie gevolge. Dit diskrimineer nooit en is altyd opreg. Die vredemakers saai saad van vrede; hulle oes omdat hulle reg lewe voor God’ (verse 17-18 NLV). Wanneer jy volgens hierdie Skriftuurlike beginsels optree, sal jy weet of ‘n geveg jou aandag werd is. As jy jou oë op die prys wat God vir jou gestel het hou, sal jy besef dat sekere dinge eenvoudig nie jou tyd en aandag werd is nie. Gevolglik sal jy beter besluite oor jou lewe sowel as jou verhoudings neem.
Sielskos: 2 Kon 21-23; Mark 14:1-11; Ps 73:1-16; Spr 13:17-19
2019-06-11
Johannes 10:28 NLV
Op ‘n warm middag in Florida, het ‘n seuntjie wat in ‘n dam agter sy huis geswem het, nie die krokodil wat hom volg gesien nie. Sy pa, wat besig was om in die tuin te werk, het dit gesien en vir sy seuntjie geskree om om te draai, maar dit was te laat! Net toe die seuntjie by sy pa kom, het die krokodil op die seuntjie afgestorm. Die pa het sy arms gegryp en die krokodil het sy bene beetgekry. Die krokodil was vasberade, maar die pa was te passievol om te laat gaan. ‘n Boer wat verby gery het, het die gille gehoor, uit sy bakkie gespring en die krokodil doodgeskiet. Die seuntjie het wonderbaarlik oorleef en na weke in die hospitaal het die plaaslike koerant met hom ‘n onderhoud gevoer. Hy het vir die joernalis die vreeslike littekens aan sy bene gewys en met duidelike trots bygevoeg: ‘Ek het ook groot merke aan my arms, want my pa het my vasgehou en wou my nie laat gaan het nie!’ Jesus het gesê: ‘Ek sal ook die ewige lewe aan hulle gee, en hulle sal so nimmer as te nooit verlore gaan. Niemand sal hulle uit my hand steel nie.’ Dit beteken nie dat die Vyand nie sal probeer nie. Hy sal jou laat dink dat jy so ver van God af is dat daar geen pad huis toe is nie. Hy sal ander stuur om jou met moedeloosheid en skuldgevoelens aan te val. Jy mag dalk selfs slegte besluite neem wat geestelike en emosionele littekens kan laat, maar wanneer jy aan God behoort kan niemand anders jou wegvat nie! Geen omstandighede kan jou van sy liefde skei nie (sien Romeine 8:38). Jou Vader hou jou vas! Laat hierdie kragtige woorde van versekering jou vandag vrede gee.
Sielskos: 2 Kon 18:17-20:21; Mark 13:24-37; Ps 80:12-19; Spr 13:13-16
2019-06-10
Handelinge 27:20 NLV
Daar is tye wat dit voel of God ontoeganklik is. Wanneer jy in jou huidige omstandighede bid, voel jy verlate. Nie net verlate nie, maar vreesbevange en selfs hopeloos. Paulus het daardie gevoel verstaan. Hy het gesmag na ‘n geleentheid om in Rome te gaan preek en was onderweg daarheen toe ‘n orkaan sy skip vernietig het. Paulus het voorsien dat nie net die skip en die vrag verlore sou gaan nie, maar dat hulle ook hulle lewens sou verloor (sien vers 10). Hy het die bemanning van die dreigende tragedie probeer waarsku, maar sy woorde is deur die mense in beheer verontagsaam. In kort, is Paulus en 276 ander mense in ‘n lewensgevaarlike posisie geplaas en daar was niks wat hy daaraan kon doen nie. Hy en sy gelowige metgeselle het wanhopig gevoel en verklaar, ‘Uiteindelik is alle hoop laat vaar dat ons gered sou word.’ Na veertien dae wat hulle op see verlore was – toe die orkaan op sy ergste gewoed het – het God ‘n engel gestuur. ‘…Hou op bang wees, Paulus… om jou ontwil spaar God almal wat hier saam met jou op die skip is’ (vers 24 NLV). Hulle was koud, nat en honger toe hulle skip uiteindelik op ‘n eiland suid van Italië strand. Elke omstandigheid het op tragedie en die verlies van Paulus se droom om in Rome te gaan preek, gedui. Toe die son egter die volgende oggend oor die eiland van Malta opkom, het dit duidelik geword dat God hulle getrou deur die storm na die presiese bestemming wat Hy vir hulle in gedagte gehad het, gestuur het. Paulus sou na Rome gaan en God se Woord voor Caesar verkondig! Hou dus moed – jy sal deur die storm kom!
Sielskos: 2 Kon 16:1-18:16; Mark 13:12-23; Ps 80:1-11; Spr 13:11-12
