2019-06-21
Filippense 2:5 NLV
‘n Vlieënier sal vir jou sê dat ‘n vliegtuig van tyd tot tyd herbalanseer moet word. Nadat die vliegtuig deur storms gevlieg het, moet dit weer in lyn ingestel word. Dieselfde gebeur op jou geestelike reis. Die storms in die lewe kan jou van koers af slaan en jou ongebalanseerd laat. Onverwagte ‘weerstoestande’ soos siekte, depressie, werkloosheid, egskeiding, teleurstelling en die dood kan jou forseer om rigting en strategie te verander. Dis hoekom jy gereeld jou gesindheid moet nagaan en aanpas. Waarmee worstel jy tans wat jou gesindheid beïnvloed? Paulus skryf: ‘Julle gesindheid moet soos Jesus Christus s’n wees.’ Is so ‘n lewenswyse moontlik? Ja, maar jy moet dit ‘n prioriteit maak en elke dag nastreef. Josua wou ‘n weermag van klakouse in ‘n weermag wat die Beloofde Land kon binneval, omskep het. Dus het God vir hom hierdie formule vir sukses gegee: ‘Hou hierdie wetboek altyd by jou. Dink dag en nag daaroor na sodat jy alles kan doen wat daarin geskryf is. Jy sal dan sukses behaal op jou pad. Jy sal voorspoedig wees’ (Josua 1:8 NLV). Probeer die ‘drie-by-vyf tegniek.’ Identifiseer elke week ‘n Skrifgedeelte wat betrekking het op ‘n area waarin jy wil groei, skryf dit op ‘n drie-by-vyf kaartjie neer en memoriseer dit. In een jaar sal jy dan twee-en-vyftig teksverse hê waarop jy kan staan. Dink net watter impak dit op jou lewe sal hê! Nie net sal die verkeerde gesindheid die regte gesindheid word nie, maar jou lewe sal in die regte rigting begin beweeg.
Sielskos: Jer 10-13; Mark 15:33-47; Ps 17; Spr 14:13-16
2019-06-20
1 Korintiërs 10:13 NLV
Satan het probeer om Jesus voor drie tipes versoekings te laat swig en hy sal dieselfde met jou doen: 1) Bevrediging sonder God. Satan het geweet dat Jesus honger was en het vir Hom gesê om die klippe in brood te verander. Jesus het egter nee gesê, omdat Hy geweet het dat dit God se plan was om Hom bonatuurlik te versterk en te voed. Hy het geweier om met minder tevrede te wees – en jy moet ook. 2) Sukses sonder God. Satan het toe vir Jesus na die bopunt van die tempel geneem en vir Hom gesê om daar af te spring, omdat God sy engele sou stuur om Hom te beskerm. God se plan vir Jesus was egter die kruis, die opstanding en die menigtes wat daardeur in Hom sou begin glo. Satan het probeer om Jesus sover te kry om met minder tevrede te wees en hy sal dieselfde met jou probeer. Moenie dat hy jou ompraat nie! 3) Belangrikheid sonder God. Satan het vir Jesus die koninkryke van hierdie wêreld aangebied, as Hy maar net voor hom sou kniel en hom aanbid. Wat ‘n aanbod! Belangrikheid sonder God! Die feit bly egter staan dat die koninkryke nie Satan s’n was om aan te bied nie. Hy het dus vir Jesus gelieg – en hy sal ook vir jou lieg. Die pad na blywende tevredenheid is die pad na die kruis toe, wat beteken dat jy jouself moet opoffer. Jesus het Satan bestraf deur hom aan die Skrifgedeelte te herinner wat sê dat God alleenlik waardig is om verheerlik te word. Verstaan mooi: Satan sal elke begeerte wat jy het neem en jou probeer oortuig om dit op sy manier te vervul. Jy kan hom egter teenstaan, deur naby aan God te bly en in sy Woord te lewe: ‘…Hy sal keer dat die versoeking te sterk vir julle word…’
Sielskos: Jer 7-9; Mark 15:21-32; Ps 8; Spr 14:9-12
2019-06-19
1 Timoteus 6:6 NLV
Wanneer jy oor tevredenheid praat, dink sommige mense dat jy teen vooruitgang is. Nee. Paulus sê dat tevredenheid nooit uit eksterne bronne kom nie! Elke twaalf minute probeer adverteerders op die radio en televisie ons daarvan oortuig dat tevredenheid nie sonder hulle spesifieke produk moontlik is nie. Moenie dit glo nie! Die begeerte na meer kan onversadigbaar wees. So lank as wat jy glo dat meer beter is, sal jy nooit tevrede wees nie. Hoekom nie? Omdat jy nooit lank genoeg sal leef om dit alles te kry nie! Dink daaroor; wanneer jy iets kry of iets bereik, neem jy die tyd om dit te geniet of galop jy verder na die volgende ervaring toe sonder om te stop? Om te keer dat jy te vroeg oud en te laat wys word, lees die volgende Skrifgedeeltes: 1) ‘Alles in aanmerking geneem, het ons tog niks saamgebring toe ons in die wêreld gekom het nie, en ons sal ook nie enigiets saamneem wanneer ons sterf nie (vers 7 NLV). Wanneer jy sterf en mense vra: ‘Hoeveel het hy agtergelaat?’ sal die antwoord ‘Alles’ wees (insluitend ‘n nalatenskap van die goeie en die slegte). 2) ‘…En sommige mense wat geld begeer, het weggedwaal van die geloof en hulleself met baie ellende deurboor’ (vers 10 NLV). As jou najaging van materiële dinge geen tyd vir God laat nie, moet jy jou prioriteite ondersoek en hulle begin verander, terwyl jy nog kan. Hou op om te dink: ‘As ek net ‘n groter huis, ‘n eggenoot met meer begip, ‘n spesifieke werk, ‘n radikale mooimaaksessie, ‘n hoër IK of die aanvaarding van ‘n spesifieke persoon gehad het, sou ek gelukkig wees.’ Dit werk nie so nie. Die Bybel sê: ‘Dit is die dag wat die Here gemaak het. Laat ons daaroor juig en bly wees’ (Psalm 118:24 NLV).
Sielskos: Jer 4-6; Mark 15:1-20; Ps 144:9-15; Spr 14:5-8
2019-06-18
1 Samuel 17:47 NLV
Hoe jy die lewe hanteer hang af van hoe groot jy glo God is. As Hy te klein is: 1) Sal jy in konstante vrees lewe deur te dink dat alles van jou afhang. 2) Jou uitkyk sal deur jou omstandighede – of erger, kritici – bepaal word. 3) Sonder die aanvaarding van ‘n liefdevolle God sal jy ‘n slaaf van ander mense se opinies wees. 4) Jy sal die heeltyd na erkenning smag omdat jy nie verstaan dat ‘…jou Vader wat alle geheime ken, [jou sal] beloon’ (Matteus 6:4 NLV) nie. Toe Goliat die Israeliete gedreig het, ‘…was hulle mismoedig en baie bang’ (1 Samuel 17:11 NLV). Hulle het nie gedink dat hulle God groot genoeg vir die werk was nie. Nie Dawid nie! ‘Ons moenie oor hierdie man moedeloos word nie… Ek sal teen hierdie Filistyn gaan veg!.. Die Here wat my uit die kloue van die leeu en die beer gered het sal my ook red van hierdie Filistyn!..’ (1 Samuel 17:32, 37 NLV). Jy kan enigiets in die gesig staar wanneer jy, soos Dawid, weet dat die geveg die Here s’n is. Hy het nog nooit een verloor nie! Jy hoef dus nie op jou eie vermoëns staat te maak nie. Dawid mag dalk klein gevoel het, maar hy het geweet dat sy God groot genoeg vir die werk was. Weet jy dit ook? Die Anglikaanse predikant, John Newton, het in die agtiende eeu gesê: ‘As die Here by ons is, het ons geen rede om te vrees nie. Sy oog is op ons, sy arm is om ons, sy oor is oop vir ons gebed, sy genade is genoeg en sy beloftes is onveranderlik.’ Dit alles hang af van hoe groot jou God is!
Sielskos: Jer 1-3; Mark 14:66-72; Ps 144:1-8; Spr 14:1-4
2019-06-17
Efesiërs 2:6 NLV
Om ‘n ‘opgewekte’ persoon te word, moet jy hierdie drie dinge doen: 1) Brei jou idee van God uit. Hoe doen mens dit? Deur sy Woord te lees en Hom beter te leer ken. Wees soos die seuntjie wie se juffrou by die Sondagskool hom gevra het wat hy besig was om te teken. Hy het geantwoord: ‘Vir God!’ Die juffrou het gesê: ‘Maar niemand weet hoe God lyk nie.’ Vol selfvertroue het hy geantwoord: ‘Hulle sal wanneer my tekening klaar is!’ Hoe is jou God? Liefdevol of veroordelend? Ver of beskikbaar? Beperk of magtig? Jou idee van God sal jou vertroue in Hom bepaal, neem dus tyd om Hom te leer ken. 2) Herken Satan se beperkings. Die Duiwel is die wêreld se oudste verloorder, ‘n voormalige werknemer van die hemel wat as gevolg van arrogansie afgedank is en wat op pad na vernietiging is. Die enigste krag wat hy oor jou het, is die krag wat jy aan hom gee deur nie kennis van sy planne te neem nie (sien 2 Korintiërs 2:11). Die Bybel sê: ‘Wys dus dat julle van God afhanklik is deur na Hom te luister. Weerstaan die duiwel en hy sal van julle af wegvlug’ (Jakobus 4:7 NLV). Jy het mag oor Satan – gebruik dit. 3) Sien jouself soos God jou sien. Hy sien jou nie soos hoe jy is nie, maar soos hoe jy gaan wees. As jy deur ervarings in die verlede gekondisioneer is om jouself as waardeloos te sien, kan jy dadelik begin om jou selfbeeld te verander deur te glo wat God oor jou in sy Woord sê (lees Jeremia 29:11; Jesaja 43:1-4, Efesiërs 2:6). As jy aan hierdie drie dinge werk, sal jy ‘n ‘opgewekte’ persoon in ‘n ‘neerslagtige’ wêreld word.
Sielskos: Hosea 11-14; Mark 14:53-65; Ps 139:13-24; Spr 13:25
2019-06-16
Rigters 13:8 NLV
Die volgende gebed is deur generaal Douglas MacArthur, ‘n held van die Tweede Wêreldoorlog, vir sy seun wat hy baie liefgehad het geskryf. As jy ‘n ouer is, mag jy dit dalk handig te pas vind en dit gereeld bid: “Gee my ‘n seun, o Here, wat sterk genoeg sal wees om te weet wanneer hy swak is en moedig genoeg sal wees om homself in die gesig te staar wanneer hy bang is. Een wat trots en ombuigsaam in eerlike nederlaag en nederig en sag in oorwinning sal wees. Gee my ‘n seun wie se wensbeen nie in die plek van sy ruggraat sal wees nie; ‘n seun wat U sal ken. Lei hom, bid ek, nie in die pad van gemak en verligting nie, maar onder die stres en aanmoediging van moeilikhede en uitdaging. Laat hom hier in die storm opstaan; laat hom hier medelye vir diegene wat faal aanleer. Gee my ‘n seun wie se hart skoon is, wie se doelwit hoog is; ‘n seun wat homself eers sal bemeester voor hy ander mense probeer bemeester. Een wat sal leer hoe om te lag, maar tog nooit sal vergeet hoe om te huil nie; een wat na die toekoms sal uitreik, maar nie die lesse van die verlede sal vergeet nie. Wanneer al hierdie dinge syne is, bid ek dat U ook vir hom ‘n sin vir humor sal gee, dat hy altyd ernstig sal wees, maar homself nooit te ernstig sal opneem nie. Gee hom nederigheid, sodat hy altyd die eenvoudigheid van grootheid sal onthou, die openlike denke vir ware wysheid en die sagmoedigheid van ware krag. Dan sal ek, sy vader, dit waag om te fluister: ‘Ek het nie tevergeefs geleef nie.'”
Sielskos: Matt 28:16-20; 2 Kor 13:14; Joh 1:18; Joh 15:18-26
