2019-06-09
Psalm 37:3 NLV
Die media bombardeer ons met stories van kwaadwilliges soos pedofiele wat op kinders jag maak of gewetenlose finansiers wat bejaardes misbruik. Net wanneer jy nie dink dat dit erger kan word nie, word dit! Wat staan jou dus te doen? 1) Bel die owerhede en strewe aardse geregtigheid ten volle na. 2) Bid vir hulle. Jesus het gesê: ‘Seën dié wat julle vervloek. Bid vir hulle wat julle seermaak’ (Lukas 6:28 NLV). 3) Besluit om nie soos hulle te wees nie. 4) Besef dat God eendag elke verkeerde daad sal regstel. 5) Behou jou vrede en bly op God gefokus. ‘Moenie jou energie mors om heeltyd oor slegte mense te praat nie… Moenie op hulle jaloers wees nie… Slegte mense sal die een of ander tyd verdwyn. Net mense wat in die Here glo, sal dan oorbly. Die land sal aan hulle behoort. Die Here weet wat in sy kinders se lewe aangaan. Hy help hulle. Hy sorg altyd vir hulle. Wat hulle geërf het, behou hulle vir altyd. Wanneer almal rondom hulle swaarkry, sal hulle genoeg hê om van te leef. As ander honger ly, sal hulle genoeg hê om hulle versadig te eet. Maar die Here se vyande sal in rook en vlamme vergaan. Mense wat sonder God leef, sal tot niet gaan. Mense wat sonder God leef, leen geld by ander, maar betaal dit nooit terug nie. Goeie mense kry ander mense jammer en help hulle. Mense met wie die Here tevrede is, sal eendag alles op die aarde besit… Die Here bepaal wat in die lewe van mense gebeur met wie se optrede Hy tevrede is… As hulle op die grond neerslaan, bly hulle nie lê nie. Die Here kom buk by hulle en tel hulle weer op.’ (Psalm 37:1-24 NLV).
Sielskos: Lev 23:15-22; Hand 2:1-18
2019-06-08
1 Johannes 1:9 DB
Ten spyte van ons beste voornemens en pogings, voldoen geeneen van ons aan God se vereistes nie (sien Romeine 3:23). Wat is dus die antwoord? ‘Ja-nee, moet my nie verkeerd verstaan nie: as ons wil voorgee dat ons nooit sonde doen nie, slaan ons die bal heeltemal mis. Wie dit sê, praat nie die waarheid nie. As ons egter voor God erken dat ons foute gemaak het en nooit weer dieselfde foute wil maak nie, sal God van sy kant af heeltemal van ons sondes vergeet. Hy sal ons ook geestelik skoon was van alles waarvan Hy nie hou nie. Glo dit maar, want God bly getrou aan sy beloftes en doen wat reg is’ (1 Johannes 1:8-9 DB). God se vergifnis werk as volg: Bewustheid van sonde lei tot oortuiging van sonde, oortuiging van sonde lei tot belydenis van sonde, belydenis van sonde lei tot die reiniging van sonde, en die reiniging van sonde lei tot vrymoedigheid voor God (sien 1 Johannes 3:21-22). Jy sê: ‘Ek voel nie waardig om God se vergifnis te ontvang nie.’ Jy sal dit nooit waardig wees nie! God se vergifnis word nie op jou waardigheid gebaseer nie, maar op Christus s’n! Verder is God nie soos jou ouers nie; Hy dring nie daarop aan dat jy vir ‘n paar dae ongemaklik en ongelukkig moet wees sodat jy jou les leer voor Hy jou vergewe nie. Dit sal beteken dat jy ‘n rol daarin het om sy vergifnis te verdien. Nee, sy vergifnis vind deur genade en slegs deur genade plaas (sien Efesiërs 2:8-9). ‘Genade’ beteken ‘onverdiende guns.’ Wanneer God jou dus vergewe, eer Hom deur jouself te vergewe en aan te beweeg.
Sielskos: 2 Kon 13-15; Mark 13:1-11; Ps 143; Spr 13:9-10
2019-06-07
Spreuke 24:16 NLV
Soos enige vaardigheid, kan verstandelike, emosionele en geestelike veerkragtigheid aangeleer word. Hier is hoe jy dit doen: 1) Herdefinieer terugslae as die deurgang na iets beters. 2) Onthou dat suksesvolle mense nie net voor teëspoed te staan kom nie, maar dat hulle dit waardeer. 3) Sny die kritiek uit en fokus daarop om jou beste te doen. 4) Word elke oggend wakker met die wete dat gebed en dankbaarheid ‘n vrugbare omgewing vir geloof kweek. 5) Hou aan jou geloof vas wanneer jy bang is. 6) Leer uit mislukkings en onthou hoeveel keer jy al sukses behaal het. 7) Visualiseer oorwinning voor jy die stryd betree. 8) Weier om aan die verlede of bekommernis oor die toekoms vas te klou; vandag is waar jy die grootste invloed het. 9) Identifiseer ‘n oplossing, eerder as om te kla. 10) Vervang twyfel met geloof. 11) Wanneer dinge hopeloos lyk, onthou ‘…Alles is by God moontlik!’ (Markus 10:27 NLV). 12) Wanneer jy eensaam voel, dink aan al die mense wat jou al gehelp het en wat vir jou lief is en jou ondersteun. 13) Bid vir leiding wanneer jy voel of jy besig is om te verdrink (sien Jakobus 1:5). 14) Rus wanneer jy moeg is, maar moenie tou opgooi nie. Maak klaar waarmee jy begin het. 15) Onthou dat jy ‘…onder alle omstandighede [kan] regkom deur Hom wat [jou] krag gee’ (Filippense 4:13 NLV). 16) Weet wat jy nie kan beheer nie, fokus op dit wat jy kan en gee die res aan God oor. 17) Oefen fisies om depressie te beveg. 18) Lag om stres te verminder, jou immuunstelsel te versterk en jou bloeddruk te verbeter. 19) Wees dankbaar. Navorsing wys dat mense wat ‘n brief of ‘n epos stuur om iemand te bedank wat hulle gehelp het, vir tot ‘n maand lank in ‘n beter bui is.
Sielskos: 2 Kon 10-12; Mark 12:28-44; Ps 132:11-18; Spr 13:7-8
2019-06-06
Matteus 18:3 NLV
Matteus skryf: “In daardie tyd het die dissipels na Jesus toe gekom met die vraag: ‘Wie van ons sal die belangrikste wees in God se koninkryk?’ Jesus roep toe ‘n klein kindjie nader en laat dié tussen hulle staan. Toe sê Hy: ‘As julle nie met ander oë na die lewe begin kyk en soos die kindertjies word nie, sal julle beslis nie in die koninkryk van God ingaan nie. Daarom is elkeen wat so nederig soos hierdie kindjie word die belangrikste in God se koninkryk'” (verse 1-4 NLV). Om groot dinge vir God te doen, moet jy Hom met ‘n kinderlike houding benader. Jy kan baie leer deur klein kindertjies dop te hou. Maak nie saak waar hulle is nie, hulle vind ‘n manier om dit waarmee hulle ook al besig is, te geniet. Hulle vergewe vinnig ‘n oortreding. Die een oomblik baklei hulle oor iets, die volgende oomblik speel hulle lekker saam. Hulle vertrou ook maklik. Jou kinders bekommer hulle nie oor banklenings, etes of begrotings nie, omdat hulle jou onvoorwaardelik vertrou om aan al hulle behoeftes te voldoen. Wat het Jesus ons hierdeur geleer? a) Om eenvoudige geloof te hê. b) Om eenvoudige gebede te bid. c) Om vinnig te bekeer. d) om gereeld na God se hulp uit te reik. e) Om te glo dat jou hemelse Vader goed is en dat Hy ‘…die goeie nie [sal] weerhou van hulle wat doen wat reg is nie’ (Psalm 84:12 NLV). Ook, wanneer jy kinders vergewe, hardloop hulle nie rond en voel skuldig en veroordeeld nie. Met hierdie tipe eenvoud in jou verhouding met God, sal jy vind dat jy geestelik groei en Hom nog meer as ooit tevore geniet. Dit behoort jou doelwit te wees.
Sielskos: 2 Kon 7-9; Mark 12:13-27; Ps 132:1-10; Spr 13:4-6
2019-06-05
Eksodus 28:3 DB
God het vir Moses gesê: ‘Laat maak vir Aäron waardige en mooi klere wat hom van die ander kan onderskei. Jy moet mense gebruik aan wie Ek uitsonderlike talente gegee het om die klere vir Aäron en sy seuns te maak (verse 2-3 DB). God het vir ons kunstige talente gegee. Wanneer ons hierdie talente gebruik, verheerlik ons Hom. ‘Waardige en mooi klere’ het kreatiwiteit nodig. Hou op om die geestelike van die sekulêre te skei! ‘Verder, doen alles – of dit nou met woorde of dade is – asof julle dit namens die Here Jesus doen…’ (Kolossense 3:17 NLV). Hoe word jy kreatief? 1) Deur te erken dat God jou gemaak het om kreatief te wees. 2) Deur Hom te vra om jou areas van talent en kreatiwiteit aan jou te openbaar. 3) Deur kreatiewe idees te waardeer. Maak nie saak wat jy tans doen, of hoe goed jy dit doen nie, ‘n kreatiewe idee sal jou in staat stel om dit nog beter te doen. Kreatiwiteit beteken dat jy sien wat almal anders gesien het, dink wat niemand anders gedink het nie, sodat jy kan doen wat niemand anders al gedoen het nie. Soms lê kreatiewe denke in lyn met innovasie, waar jy nuwe grond breek. Ander kere beweeg dit langs innovasie, wat jou help om ou dinge op ‘n nuwe manier te doen. In elke geval, is dit om die wêreld deur nuwe oë te sien sodat nuwe oplossings gevind word. ‘Op die sewende dag was alles klaar. Al God se werk was afgehandel….’ (Genesis 2:2 DB). Let wel, kreatiweit het werk nodig, dis hoekom baie mense geneig is om dit te vermy. As jy egter gewillig is om daaraan te werk om kreatief te wees, sal God jou gebruik om groot dinge te doen.
Sielskos: 2 Kon 4:18-6:33; Mark 12:1-12; Ps 48; Spr 13:2-3
2019-06-04
Genesis 1:28 NLV
Jou hemelse Vader het die aarde geskep – en jy is na sy beeld geskape. Dit beteken dat jy gemaak is om kreatief te dink. God het sy kreatiewe werk in ses dae voltooi, toe het ons werk begin. God het inderwaarheid gesê: ‘Ek het jou van al die hulpbronne en talente voorsien wat jy nodig het om ‘n oorvloedige lewe te hê. Doen nou iets goeds daarmee.’ Ons gebruik die skape wat Hy gemaak het se wol om pragtige materiaal in verskillende kleure te maak. God het nie kaas gemaak nie; Hy het koeie gemaak wat melk verskaf sodat ons kaas daarvan kan maak. Die Bybel beskryf die begin van al hierdie dinge met hierdie woorde: “God het hulle geseën deur te sê: ‘Wees vrugbaar en vermeerder en vul die aarde…'” Die woord ‘vermeerder’ beteken dat God wil hê dat jy met meer moet opeindig as waarmee jy begin het. Om dit te doen moet jy egter kreatief begin dink! In plaas daarvan om dit wat jy het net eenvoudig te aanvaar, moet jy dit neem en iets daaruit maak. Wanneer jy dit doen, volg jy in jou hemelse Vader se voetstappe. Soms gooi kerke koue water op enige idee of aktiwiteit wat nie godsdienstig is nie, deur te sê dat dit ‘wêrelds’ is en dat God dus nie daarmee tevrede is nie. Dis soos om te sê dat God slegs binne die vier mure van ‘n kerk werk. Nee: ‘Die aarde behoort aan die Here, met alles wat daarop is, die wêreld en alles wat daarop lewe’ (Psalm 24:1 NLV). Waar jy ook al is, wie jy ook al is, wat jy ook al in die lewe doen, God wil jou kreatiwiteit aan die werk sit sodat jy Hom kan verheerlik en ander mense kan seën.
Sielskos: 2 Kon 1:1-4:17; Mark 11:27-33; Ps 1; Spr 13:1
