2019-08-26
Romeine 8:28 NLV
As jy wil hê dat dinge reg vir jou in die lewe moet uitwerk, moet jy jou Godgegewe doel ontdek en jouself ten volle daaraan toewy. Die Bybel sê: ‘En ons weet dat God alles ten goede laat saamwerk vir hulle wat Hom liefhet, hulle wat geroep is volgens sy doel vir hulle lewe.’ Die fokuspunt van jou lewe moet wees om God se wil te ontdek en dit te doen. Daar is ‘n groot verskil tussen talent en doel. Jy is volgens God se doel geroep, nie volgens jou talent nie. Wanneer jy talentvol maar nie geroepe is nie, kan jy enige plek gemaklik wees. Dis omdat talent blind is; dit sien alle geleenthede as dieselfde. Wanneer jy egter bewus is van jou Godgegewe doel en dit jou lewe regeer, is daar dinge wat jy eenvoudig nie sal doen nie, omdat dit God se doel vir jou sal afwater, ontspoor of verslaan. Om volgens sy doel vir jou lewe te leef, stel jou in staat om slegs op die ontwikkeling van jou talente te fokus wat in lyn met God se wil vir jou lewe is. In plaas van om net vir God te vra om dit waarmee jy besig is te seën, vra Hom om sy doel vir jou lewe aan jou te openbaar. Wanneer jy dit ontdek het, sal jy geseën word, omdat sy plan reeds geseënd is! Kom ons lees dit weer: ‘En ons weet dat God alles ten goede laat saamwerk vir hulle wat Hom liefhet, hulle wat geroep is volgens sy doel vir hulle lewe.’ Het jy al God se doel vir jou lewe ontdek? Indien nie, kom in sy teenwoordigheid en bly daar totdat Hy dit aan jou openbaar. Dis die enigste manier hoe jy ooit ten volle vervul sal wees.
Sielskos: Eseg 5-9; Matt 21:12-17; Ps 119:169-176; Spr 19:9-10
2019-08-25
1 Korintiërs 15:58 ABA
Dis maklik om te vergeet dat hierdie wêreld nie jou huis is nie, dat jy die ewigheid saam met Christus in ‘n huis wat spesiaal vir jou voorberei is, sal spandeer. Wanneer jy in die hemel kom, sal jy beloon word vir hoe goed jy jou Godgegewe taak hier op aarde vervul het. Die Bybel leer dit nie net vir ons nie, maar spel dit spesifiek vir ons uit. Hier is drie dinge wat jy in gedagte moet hou: 1) Jou grootste beloning sal in die hemel wees, nie op aarde nie. Ja, daar sal aardse belonings wees (sien Markus 10:30), maar God hou sy grootste belonings vir die dag wanneer ‘…die kwaliteit van elkeen se werk aan die lig sal kom…’ en wanneer ‘Die mense wie se bouwerk standhou, deur God beloon [sal] word’ (1 Korintiërs 3:13-14 NLV). Dis jou diens nou wat jou status dan sal bepaal, so gee altyd vir God jou beste. 2) Jou beloning sal op kwaliteit, nie kwantiteit nie, gebaseer word. Ons word deur grootte en status beïndruk, maar vir God is opregtheid die belangrikste. Wanneer Hy jou beloon, sal dit gebaseer wees op wat jy met dit wat jy gehad het gedoen het en die hart en siel wat jy daarin gesit het. Dit beteken dat ons almal gelyke geleenthede het wanneer dit by belonings kom. 3) Jou beloning mag dalk uitgestel word, maar dit sal nooit ontken word nie. Wanneer jy jou diens gedoen het, gegee het en opgeoffer het en dan gewillig eenkant toe gestaan het sodat God al die heerlikheid kan kry, onthou: ‘…As julle vir die Here werk, dan sal julle nooit jammer wees daaroor nie.’ In die woorde van Jesus: ‘…jou Vader wat alle geheime ken, sal jou beloon’ (Matteus 6:4 NLV).
Sielskos: 2 Kon 4:42-44; Mark 6:30-44
2019-08-24
Galasiërs 2:20 NLV
‘n Man wat ‘n antieke staanhorlosie met ‘n brons pendulum geërf het, het gestaan en kyk hoe die groot gewig heen en weer gestoot word. ‘Wat ‘n las is dit nie vir ‘n horlosie wat al honderd jaar oud is nie,’ het hy gedink. Een dag het hy toe die deurtjie oopgemaak en die pendulum van die haak afgehaal. ‘Hoekom het jy my gewig verwyder?’ het die horlosie gevra. Die man het geantwoord: ‘Dit was swaar en ek wou jou las ligter maak.’ Die horlosie het uitgeroep: ‘Maar wat jy nie verstaan nie, is dat dit die gewig is wat my laat aanhou werk!’ Paulus het gesê: ‘…Ek is saam met Christus gekruisig. Ek leef nie meer nie, maar Christus lewe in my. Die lewe wat ek nou op aarde leef, leef ek deur geloof in die Seun van God. Hy wat sy liefde vir my bewys het deur in my plek te sterf’ (verse 19-20 NLV). God laat ons toe om frustrasies en laste te dra sodat ons geduld en nederigheid kan ontwikkel en om ons meer afhanklik van Hom te maak. Hy weet dat dit die ‘gewig’ is wat ons laat aanhou. Dis hoekom Hy sê: ‘As die Here iemand liefhet, wys Hy hom wat Hy van hom verwag, al maak dit soms seer. Alle kinders word soms gestraf… Hy moet ons reghelp vir ons eie beswil, sodat ons uiteindelik net soos Hy heilig kan wees… (Hebreërs 12:6-11 DB). Watter ‘gewig’ gebruik God om Christus se natuur in jou te produseer? Paulus gaan voort deur te sê: ‘Daarom moet julle die… wêreldse dinge afsterf wat deel van julle lewens is…’ (Kolossense 3:5 NLV). In plaas daarvan dat jou aardse natuur jou regeer, moet jy die Heilige Gees vra om nuwe lewe in jou voort te bring.
Sielskos: Eseg 1-4; Matt 21:1-11; Ps 119:161-168; Spr 19:3-8
2019-08-23
Hebreërs 11:34 NLV
Probeer om altyd vir konstruktiewe kritiek oop te wees, maar moenie verwerping persoonlik opvat nie. Moenie toelaat dat jou opinie van jouself deur diegene wat nie jou beste kwaliteite en potensiaal kan raaksien, verkleur word nie. Suksesvolle mense het almal een ding in gemeen: hulle moes verwerping oorkom. In 1902 het ‘n jong skrywer ‘n brief van die digkuns redakteur van The Atlantic Monthly ontvang. Saam met die gedigte wat die agt-en-twintigjarige digter ingestuur het, was ‘n kort nota ingesluit: ‘Ons tydskrif het nie plek vir jou verse nie.’ Tog het hierdie jong man een van die geliefste en populêrste Amerikaanse digters van alle tye geword. Wie was hy? Robert Frost. In 1907 het die Universiteit van Bern die tesis van ‘n jong fisika student verwerp. Tog het daardie student voortgegaan om die wetenskaplike wêreld vir altyd te verander. Wie was hy? Albert Einstein. Toe ‘n sestienjarige student sy skoolrapport onvang het, was daar ‘n nota by wat gelees het: “‘n Opvallende gebrek aan sukses.” Hy het egter geweier om dit te aanvaar. Wie was hy? Winston Churchill. Na die lys van geloofshelde in Hebreërs 11:34, lees ons: ‘…Hulle het krag in hulle swakheid ontvang, was magtig in die oorlog en het vreemde leërs op die vlug laat slaan.’ Dit kan ook jou verhaal wees. Dawid, wat skouspelagtige mislukkings in die lewe ervaar het, het geskryf: ‘Die Here is my krag, my beskermer wat ek met my hele hart vertrou. Hy help my en my hart is vol vreugde…’ (Psalm 28:7 NLV). Die enigste mens wat jou in die steek kan laat, is die mens op wie jy leun. Leun dus minder op mense en meer op God.
Sielskos: Amos 5:18-9:15; Matt 20:29-34; Ps 119:145-160; Spr 19:1-2
2019-08-22
Deuteronomium 29:9 NLV
Twee mans was besig om te gesels toe een sê: ‘Weet jy wat die geheim tot sukses is?’ Die ander een het geantwoord: ‘Nee, wat is dit?’ Die eerste man het gesê: ‘Ek mag nie vir jou sê nie.’ ‘Hoekom nie?’ ‘Want dis ‘n geheim!’ Sukses, soos God dit definieer, is nie ‘n geheim nie. Hy sê herhaaldelik in sy Woord dat Hy wil hê dat ons suksesvol in die lewe moet wees. Net soos ons voorkoms egter verskil, so verskil God se plan vir sukses vir elkeen van ons. Sukses beteken eenvoudig dat jy God se wil vir jou lewe ontdek en dit doen. Dink aan hoë-definisie televisies (HDTV). Hierdie tegnologie maak ‘n bykomende honderd lyne resolusie op ‘n skerm moontlik, sodat die beeld feitlik lewensgetrou lyk. Die industrie noem dit ‘super helderheid.’ Of jy nou drie meter of ‘n halwe meter wegstaan, die beeld lyk heeltemal duidelik – geen lyne of skaduwees nie. Hoe sal ‘n suksesvolle lewe in hoë definisie lyk? Om daardie vlak van helderheid te kry, moet ons God se Woord bestudeer en uitvind hoe Hy oor sukses dink. ‘Daarom, wees gehoorsaam aan die voorwaardes van hierdie verbond sodat julle voorspoedig kan wees in alles wat julle doen.’ Toe God die mens geskep het, was een van die eerste dinge wat Hy vir hom gesê het om te doen, om vrugbaar te wees en te vermeerder (sien Genesis 1:28). In die boek Job lees ons die volgende woorde: ‘En al het jy met min begin, sal jy met baie eindig’ (Job 8:7 NLV). Godgegewe sukses kom egter met ‘n voorwaarde wat ononderhandelbaar is: God sal jou seën – sodat jy ‘n seën vir ander mense kan wees.
Sielskos: Amos 1:1-5:17; Matt 20:17-28; Ps 119:137-144; Spr 18:22-24
2019-08-21
Efesiërs 3:10-11 NLV
Sewende, moet jy probeer om die probleem uit verskillende hoeke te sien. Paulus praat van die ‘allesomvattende wysheid van God.’ Om die woord ‘allesomvattend’ te verstaan, dink aan ‘n diamant. Elke keer wat jy dit beweeg, stel die lig verskillende fasette van sy skoonheid bloot. God se wysheid wat in die Bybel weergegee word, is so; dit stel verskillende aspekte en benaderings tot die probleem bloot. Daar is ‘n verhaal van ‘n vrou wat in die hof vir die moord op haar derde man moes verskyn. Die staatsaanklaer het vir haar gevra: ‘Wat het met jou eerste man gebeur?’ Sy het geantwoord: ‘Hy is dood aan sampioenvergiftiging.’ ‘En jou tweede man?’ ‘Hy is ook dood aan sampioenvergiftiging.’ Uiteindelik het die staatsaanklaer oor haar derde man begin uitvra. Sy het geantwoord: ‘Hy is dood aan ‘n kopbesering.’ ‘Hoe het dit gebeur?’ het die staatsaanklaer gevra. ‘Wel,’ het sy geantwoord, ‘hy wou nie die sampioene eet nie!’ Op ‘n ernstiger noot het die meeste probleme verskeie oplossings. Vuur dus jou Godgegewe kreatiwiteit aan, dink oor die probleem en maak jou hulpbronne bymekaar. Deel van hierdie hulpbronne is mense. Wie het al hierdie probleem opgelos? Hoe het hulle dit gedoen? Dikwels is die probleme rondom jou nie so noodsaaklik soos die mense rondom jou nie. Toe Josef met ‘n plan vorendag gekom het om Egipte van ‘n hongersnood te red, het die farao gesê: ‘…Aangesien God die betekenis van die drome aan jou bekendgemaak het, is daar niemand met meer wysheid in die land nie! Hiermee stel ek jou aan oor die projek en die paleis. Jy sal oor al my onderdane gesag hê…’ (Genesis 41:39-40 NLV). Met God se hulp kan jy oor die algemeen meer as een manier uitdink om die probleem op te los.
Sielskos: Klaag 3:40-5:22; Matt 20:1-16; Ps 119:129-136; Spr 18:21
