2019-09-01
Miga 6:8 NLV
Die profeet Miga het gevra: ‘As ‘n mens kom om die Here te aanbid, wat moet jy saambring? Moet ons God aanbid deur jaaroud kalwers te offer? Sal dit vir die Here aanvaarbaar wees as ons duisende ramme offer of tienduisend strome olyfolie aanbied? Sal dit Hom bly maak as ons ons oudste kinders offer om te vergoed vir ons sonde?’ (verse 6-7 NLV). Voel jy of jy nooit goed genoeg sal wees om God te behaag nie? Lyk godsdiens vir jou soos ‘n stel onmoontlik eise wat jou skuldig laat voel en ontwerp is om ‘n ver verwyderde godheid te paai wat daarvan hou om ons te laat rondskarrel? Dankie tog vir Miga, wat hierdie idee vir ons uit die weg geruim het deur te sê: ‘Nee, Hy het reeds gesê wat reg is…’ (vers 8 NLV). Omdat jy verlos is en met God se Gees gevul is, kan jy: 1) Reg laat geskied, selfs wanneer niemand anders dit doen nie. Hoekom? Om jou vrymoedigheid voor God in stand te hou! (sien 1 Johannes 3:21-22). Niks in jou lewe is belangriker as dit nie. 2) Liefde en trou bewys. Jesus het deur die lewe gegaan en mense opgehef. Sy woord vir jou vandag is: ‘…Ja, gaan nou, en doen dieselfde’ (Lukas 10:37 NLV). 3) Nederig voor God lewe. Wanneer God jou bevorder, sal jou grootste uitdaging wees om seker te maak dat Hy al die glorie ontvang. Elke goeie ding wat jy vandag het, is ‘n gawe van Hom af; probeer om dit te onthou! Die woord vir jou vandag is dus: ‘…Die Here verwag van julle om reg te laat geskied, om liefde en trou te bewys, en om nederig voor God te lewe.’
Sielskos: Jona 1:10-2:10; Matt 12:38-42
2019-08-31
1 Korintiërs 15:58 NLV
Die volgende keer wat jy verby ‘n McDonalds ry, dink aan hierdie stelling deur die stigter Ray Kroc: ‘Hou aan! Niks in die wêreld kan die plek van deursettingsvermoë inneem nie. Talent kan nie: Niks is algemener as onsuksesvolle mense met talent nie. Slimheid kan nie: Genieë wat nie beloon word nie is amper ‘n cliché. Opvoeding kan nie: Die wêreld is vol opgevoede verlatenes. Deursettingsvermoë en determinasie alleen is alomteenwoordig.’ Soos jy lees oor die geloofshelde wat in Hebreërs hoofstuk 11 genoem word, ontdek jy dat hulle leeus se monde gesnoer het, geregtigheid uitgedeel het, beloftes nagekom het en selfs dooies weer opgewek het. Dis ‘n skouspelagtige lys van prestasies. In die middel van die lys kom jy egter ook hierdie woorde teë: ‘…Hulle het krag in hulle swakheid ontvang, was magtig in die oorlog en het vreemde leërs op die vlug laat slaan’ (Hebreërs 11:34 NLV). Let op, hulle was aan die begin swak, maar het sterk geword. Hoe? Deur deursettingsvermoë en determinasie! Die probleem is dat ons nie altyd gewillig is om te veg vir dit wat ons wil hê nie. Sonder konflik kan daar egter nie oorwinning wees nie. Paulus het nie in die agtergrond gebly nie, hy het uitgestaan! Op sy eerste sendingsreis is hy gestenig en vir dood agtergelaat. Op sy tweede reis is hy in die tronk gegooi. Hoe het hy dit hanteer? Op een geleentheid het hy tot God gebid en Hom geloof totdat die tronkdeure oopgegaan het. Die woord vir jou vandag is dus: ‘…staan baie vas, onbeweeglik. Gee altyd julle allerbeste vir God se werk, want julle weet voor die Here is alles wat julle doen die moeite werd.’ As jy op soek is na ‘n doelstelling om volgens te lewe, neem hierdie een aan.
Sielskos: Eseg 22-23; Matt 22:23-33; Ps 142; Spr 19:21-23
2019-08-30
Job 1:21 NLV
Vanderbilt, Carnegie en Rockefeller was drie van die grootste bouers van Amerika. Nadat hulle Vanderbilt se begrafnis bygewoon het, het Carnegie en Rockefeller die res van hulle lewens spandeer om te kyk hoe baie geld hulle kon weggee om sodoende goed te doen. Die dood het ‘n manier om vir ons die kortstondigheid van die lewe te wys en ons perspektief te verander. Carnegie is in sy tagtigs oorlede en Rockefeller eers in sy negentigs, maar hulle altwee het gesterf! Ons almal sal sterf. Die vraag is of jy slegs ‘n lewe gaan maak en of jy ‘n verskil gaan maak? ‘n Besigheidsman het vir sy vriend gesê: ‘Ek dink nie ek is vir altyd op hierdie trapmeul vasgevang nie, maar ek is vir seker tans daarby betrokke. Dis die ou vraag van hoeveel geld genoeg is? Dis nooit genoeg nie. Drie jaar terug het ek gedink: ‘Net nog ‘n bietjie.’ Ek maak nou twee keer soveel geld en dis nog steeds nie genoeg nie.’ Salomo het geskryf: ‘Hoe meer jy besit, hoe meer word die eters wat jou help om dit te spandeer. Al voordeel wat jou rykdom vir jou inhou, is om te sien hoe dit deur jou vingers glip’ (Prediker 5:10 NLV). Het jy al ooit vir jouself gesê dat wanneer jy ‘n sekere hoeveelheid geld besit, dan sal jy gelukkig en veilig wees? Miskien, miskien nie. Wanneer jy op enige iets anders as God vertrou, lewe jy in vrees omdat jy altyd weerloos sal wees teenoor omstandighede wat jy nie kan beheer nie. Jesus het dit so gestel: ‘Nee, maak die koningsheerskappy van God en dit wat voor Hom reg is, julle heel eerste prioriteit; dan sal God vir julle al hierdie ander dinge as ‘n bonus byvoeg’ (Matteus 6:33 NLV).
Sielskos: Eseg 20-21; Matt 22:15-22; Ps 111; Spr 19:18-20
2019-08-29
Josua 1:5 NLV
Die Bybel sê: ‘Nadat Moses… dood is, het die Here met Josua… gepraat. Hy het vir hom gesê: ‘Noudat my dienaar Moses dood is, moet jy gereedmaak om my volk deur die Jordaanrivier te lei na die land toe wat Ek vir hulle gee’ (verse 1-2 NLV). Josua en Israel het geweet dat Moses dood is. Hoekom het God hom dan daaraan herinner? Omdat Josua nie net ‘n leier nie, maar ‘n legende opgevolg het. Moses was vir veertig jaar lank Israel se sekuriteitskombers. Hy het ‘n hele generasie in ‘n enkele nag uit Egipte gelei. Hy het ‘n see met die swaai van sy kierie geskei. Hy het gebid en God het brood uit die hemel laat reën. Toe die nasie op die punt was om van die dors dood te gaan, het hy ‘n rots gekap en water aan hulle voorsien. Moses was volgens enige maatstaf ‘n sukses. Hoekom was hy egter so ‘n groot sukses? Was dit as gevolg van sy eie vindingrykheid? Sy eie kreatiwiteit? Sy eie slimheid? Nee, dit was as gevolg van God se teenwoordigheid in sy lewe. Moses was egter nou nie meer daar nie, wat slegte nuus vir Josua was. Die goeie nuus wat God is, het egter agtergebly. ‘Niemand sal teen jou bestand wees solank jy leef nie. Soos wat Ek by Moses was, so sal Ek ook saam met jou wees. Ek sal jou nooit in die steek laat nie. Ek sal jou nooit los nie.’ Jy sê: ‘Maar dis ‘n Ou Testamentiese belofte.’ Lees dan die volgende: ‘want al die beloftes van God in Christus Jesus is ‘n volmondige ‘ja.’ Daarom is dit ook deur Christus se toedoen dat ons, om God te verheerlik, daarop ‘Amen’ sê’ (2 Korintiërs 1:20 NLV). Vandag het God belowe om saam met jou te wees. Glo Hom!
Sielskos: Eseg 16:53-19:14; Matt 22:1-14; Ps 103:13-22; Spr 19:17
2019-08-28
Galasiërs 4:19 NLV
Wanneer jy ‘n Christen word, sal jy ontdek dat ‘n deel van jou in ‘n ‘totaal nuwe lewe’ (Romeine 6:4 NLV) wil wandel, terwyl ‘n ander deel van jou in jou ‘sondige natuur’ (Romeine 8:5 NLV) wil wandel. Jy sou ook ‘n slaaf van jou sondige natuur gewees het, as dit nie was vir die Heilige Gees wat in jou woon en jou met God se Woord uitdaag wanneer jy sekere dinge doen nie (sien Johannes 16:7-14). Die waarheid is dat jou nuwe hart steeds in jou ou liggaam leef. ‘n Skrywer sê: ‘Toe ek aan die begin Christus as my Verlosser aangeneem het, het ek gedink dat ander mense ‘n vlak van heiligheid bemeester het wat my altyd ontwyk het. Dus het ek my vleeslikheid met ‘n passie aangeval! Ek het nie besef dat alles wat gebore word, tyd nodig het om te groei nie. Ek het ‘n onmiddellike, allesomvattende metamorfose verwag wat my die tipe persoon sou maak wat God regtig kon liefhê. Ek verstaan nou dat sy liefde nie op ‘n merietestelsel uitgedeel word nie.’ Die Bybel sê: ‘Ek is oortuig dat God die goeie werk wat Hy in julle begin het, sal voortsit totdat Hy dit voltooi op die dag wanneer Jesus Christus terugkom’ (Filippense 1:6 NLV). Paulus skryf: ‘Ag my kinders, totdat Christus julle hele lewe oorneem, het ek elke keer weer geboortepyne oor julle.’ God alleen weet die proses wat dit sal neem vir die Christus wat jou gered het om in jou gevorm te word! Ons almal beweeg op ons eie paaie teen ons eie pas, maar ons doelwit is dieselfde: om meer soos ons hemelse Vader te word. Om ons daar te kry is God se werk – laat Hom dus toe om dit te doen. Jou werk is om elke dag saam met Hom te stap, terwyl Hy dit doen.
Sielskos: Eseg 14:1-16:52; Matt 21:33-46; Ps 103:1-12; Spr 19:12-16
2019-08-27
Genesis 32:24 AFR53
Sommige van jou grootste gevegte in die lewe sal met God wees. Dis omdat daar ‘n ‘Jakob natuur’ in elkeen van ons is wat die wil van God teenstaan, en wat ons moet hanteer. Dieselfde God wat vir Jakob gevra het: ‘Wat is jou naam?’ sal ook vir jou vra om jouself te identifiseer. Totdat jy nie gewillig is om ‘n eerlike evaluasie te doen en eerlik te antwoord nie, kan jou lewe nie ten goede verander nie. God moes Jakob breek deur sy heup uit sy potjie te slaan. Jakob het sy seën dieselfde tyd as wat hy sy gebrek gekry het, ontvang. Vra jouself af: ‘Wil ek regtig God se seën in my lewe hê?’ Voor jy antwoord, stop eers en vra jouself die volgende vrae: 1) Is ek gewillig om dit wat ek wil hê, maar nie in God se wil vir my is nie, te laat gaan? 2) Begeer ek wat ander mense het, eerder as om vir God se voorsiening vir my te wag? 3) Hou ek aan om oor my regte te praat omdat ek nie myself heeltemal aan God oorgegee het nie? 4) Het ek ander mense waarlik lief en plaas ek hulle eerste? 5) Beoefen ek die daaglikse dissipline van gebed en Bybelstudie? 6) Laat ek God toe om my te bemark, eerder as om myself te probeer bevorder? 7) Is ek vreugdevol te midde van teenspoed en vertrou ek God om Jesus se karakter in my te herproduseer? 8) Neem ek risiko’s in gehoorsaamheid aan God in plaas van om aan vrees toe te gee en dit veilig te speel? Nie net sal jou antwoorde op hierdie vrae jou dissipelskap, jou rigting en jou lotsbestemming bepaal nie – dit sal ook jou vlak van seën bepaal.
Sielskos: Eseg 10-13; Matt 21:18-32; Ps 84; Spr 19:11
