2019-09-07
Eksodus 27:8 DB
Die altaar in die tabernakel was ‘n plek waar offers gebring kon word om God te eer. Hy het presiese idees gehad oor hoe dit gebou moes word: ‘Soos Ek vir jou op die berg gewys het, is die altaar ‘n houtkis wat binne hol is.’ ‘n Struktuur van klip of metaal sou te swaar gewees het om te vervoer, maar ‘n hol hout altaar kon saam met die Israeliete gereis het. Die beeld van ‘n beweegbare altaar is ‘n herinnering daaraan dat terwyl jy dalk deel van ‘n plaaslike kerk kan wees, jy nie daartoe beperk word om God op ‘n spesifieke plek te eer en prys nie. Jy kan dit enige plek doen deur ‘…’n voortdurende lofoffer aan God – ‘n offer wat opklink van die lippe van hulle wat Hom bely’ (Hebreërs 13:15 NLV), te bring. By die huis, by die werk, in die kruidenierswinkel, by die gym, in die klaskamer, kan jou alledaagse aktiwiteite ‘n geestelike offer aan God wees (sien 1 Petrus 2:5). Jy eer God deur ‘n woord van bemoediging te deel, jou hulpbronne te gebruik om iemand in nood te help, of om ‘n professionele besluit wat gebaseer is op integriteit, te maak. Jesus het gesê: ‘Julle moet so voorbeeldig lewe dat julle ‘n helder lig sal laat uitstraal. Dan sal die mense dit sien, en julle hemelse Vader daarvoor prys!’ (Matteus 5:16 NLV). ‘n Skrywer sê: ‘Die Here is my baas. Hy gee my terugvoer, kritiek, en bevorderings. Hy voorsien my pensioengeld en my mediese fonds. Hy kan my verplaas, my verantwoordelikhede verander en al my doelwitte ontwikkel. Ek rapporteer aan Hom alleenlik. Terwyl my opdragte verander, verander die kern van my werk nie. Ek is opdrag gegee om sy werk te doen en om sy hande en voete te wees in watter posisie Hy ook al aan my toewys.’
Sielskos: Eseg 40:10-42:20; Matt 24:15-25; Ps 78:17-31; Spr 20:15-19
2019-09-06
Spreuke 22:29 DB
Hy het begin deur hard as vakman by die spoorwegmaatskappy te werk. Toe hy die geleentheid gegee word om vir ‘n paar dae in die maatskappy se kantoor te werk, het hy dit met altwee hande aangegryp. Gedurende daardie tyd het sy bestuurder hom vir ‘n paar noodsaaklike feite en syfers gevra. ‘Kry dit gereed op my lessenaar wanneer ek oor drie dae terugkom,’ het hy gesê. Die jong man het niks van boekhouding geweet nie, maar hy het vir drie dae en nagte sonder enige slaap daaraan gewerk, en toe die bestuurder terugkeer, het hy die feite en syfers vir hom gereed gehad. Dit het hom die respek en bewondering van sy bestuurder verdien en toe ‘n permanente pos beskikbaar word, het sy bestuurder die jong man vir die pos aanbeveel. Oor die jare is die jong man verskeie kere bevorder en elke keer is hy vir sy deeglikheid en betroubaarheid geprys. Uiteindelik het hy as die vise-president van die Ralston Purina maatskappy in St. Louis, Missouri, een van die wêreld se grootste vervaardigers van troeteldierkos, opgeëindig. Die Bybel sê: ‘Sien jy iemand wat bedrewe is in sy beroep? Hy werk vir konings en nie vir gewone mense nie’ (Spreuke 22:29 NLV). Die Boodskap stel dit as volg: ‘Ken jy ‘n goeie vakman wat hard en getrou werk? Hy is by almal in aanvraag. Belangrike mense soek sy dienste. Hy sal dit nog ver bring in die lewe.’ Of jy dit nou besef of nie, jy word in jou werk dopgehou. Jou karakter, werksetiek en jou houding word geobserveer. Jy sal nie nie net as gevolg van die take wat jy voltooi beloon word nie, maar ook as gevolg van jou houding en die manier hoe jy hulle voltooi!
Sielskos: Eseg 37:1-40:9; Matt 24:1-14; Ps 78:9-16; Spr 20:11-14
2019-09-05
Johannes 18:37 NLV
Toe Jesus voor Pilates gestaan het, het Hy gesê: ‘…Hiervoor is Ek gebore en hiervoor het Ek na die wêreld gekom, met die doel om vir die waarheid getuienis af te lê…’ Jesus het geweet waarvoor Hy gebore is en wat Hy geroep is om te doen en Hy het soos ‘n laser daarop gefokus. Jy is geroep om in sy voetspore te volg (sien 1 Petrus 2:21). Daar is drie tipes mense: 1) Diegene met geen lewensdoel nie. Die swerwers, wat doelloos deur die lewe gaan. Hulle gaan skool toe, kry ‘n werk, kry ‘n ander werk, vind ‘n eggenoot, kry ‘n nuwe eggenoot, trek van huis tot huis en plek tot plek, tree af en sterf uiteindelik. Hulle lewe nie regtig nie; hulle bestaan net. 2) Diegene wat die verkeerde lewensdoel het. Hulle mag dalk oorpresteerders wees, mense wat die lere van finansiële, politieke en sosiale sukses uitgeklim het, net om uit te vind dat hulle leer teen die verkeerde muur gestaan het. Hulle het dit of te laat agtergekom, of hulle het nooit besef dat hulle ‘n lewe wat ander mense positief kon beïnvloed het, misgeloop het nie. 3) Diegene wat die regte lewensdoel het. Hulle weet hoekom hulle geskep is. Hulle weet hoekom God hulle hier op aarde geplaas het en hulle lewe draai daarom om hierdie doel te vervul. Dit is die lewe wat ‘n glimlag op God se gesig plaas. Dit is sukses wat volhoubaar is. Dit het niks met populariteit, mag of besittings te doen nie. Dit het alles met jou lewensdoel te make, omdat dit die enigste ding is wat ‘n Godgegewe versekering van sukses meebring. Weet jy wat jou lewensdoel is? Indien nie, vra God en Hy sal dit aan jou openbaar.
Sielskos: Eseg 34-36; Matt 23:23-39; Ps 78:1-8; Spr 20:7-10
2019-09-04
1 Johannes 4:19 NLV
Ons weet hoe frustrerend dit is wanneer jy vir iemand ‘n geskenk probeer gee en hulle hou aan om dit te weier. Onsekerheid en gevoelens van onwaardigheid weerhou baie van ons daarvan om goeie ‘ontvangers’ te wees. Ons dink dat ons alles moet verdien. Ons gaan selfs so ver as om nie die gewer te vertrou nie en te dink: ‘Hoekom wil jy dit vir my doen? Wat is jou regte rede?’ As ons so voel, dink net hoe God voel wanneer Hy sy liefde na ons toe uitreik en ons dit weier omdat ons voel dat ons dit nie verdien nie. Of erger, wanneer ons sy beweegredes betwyfel. Die waarheid is dat niemand van ons God se liefde verdien nie. Wanneer Hy egter in liefde na jou toe uitreik, probeer Hy ‘n siklus wat jou sowel as ander sal seën, vestig. Sy plan is eenvoudig. Hy wil hê dat jy: 1) Sy liefde moet ontvang. 2) Moet leer om jouself op ‘n gebalanseerde en gesonde manier lief te hê. 3) Hom terug moet liefhê. 4) Sy liefde na die mense wat Hy in jou lewe stuur moet uitstrek. Dit vat tyd om te leer om hierdie dinge te doen – gewoonlik baie tyd! Verandering gebeur geleidelik soos jy aanhou om te bid, sy Woord te lees en daarvolgens op te tree (sien 2 Korintiërs 3:18). Hy is ‘…die Een op wie ons geloof vanaf die wegspring tot by die eindstreep steun…’ (Hebreërs 12:2 NLV). Die Bybel sê dat God sy ‘goeie werk’ in jou lewe begin het en dat Hy dit sal voltooi (sien Filippense 1:6). Vra dus vandag vir Hom om jou te help om dit te ontvang en gryp sy onvoorwaardelike liefde vir jou met ope arms aan.
Sielskos: Eseg 31-33; Matt 23:13-22; Ps 27; Spr 20:5-6
2019-09-03
Spreuke 22:6 NLV
‘n Ma wat rook dra die nikotien deur haar borsmelk aan haar baba oor. Sy besoedel onbewustelik haar kind met haar eie slegte gewoontes. Dis dieselfde wanneer ons dinge soos bitterheid, skuld en onsekerheid aan ons kinders oordra. Dis hoekom ons God se hulp nodig het; net Hy kan die wortel van die probleem genees en die siklus verbreek. Niemand anders kan soos jy jou kinders van geloof leer nie. Die fondasie moet deur jou gelê word en deur hulle opgebou word. Moet hulle ook nie net die doktrine leer nie, stel hulle aan jou geloof bloot. Vertel hulle Wie jou deur moeilike tye gedra het. Wanneer hulle dan self moeilike tye beleef, sal hulle met meer as ‘n stel godsdienstelike reëls bewapen wees, hulle sal dan self vertroue in God hê. Hou ook op om jouself oor foute in die verlede te stenig; ons almal het dinge wat ons wens ons anders gedoen het. Die waarheid is dat God die gevolge van jou verlede kan verander en tragedies in jou toekoms kan voorkom. Hy is die God van herstel, wat ‘…alle dinge nuut [maak]…’ (Openbaring 21:5 NLV). Hy kan reg uit die verkeerde en goed uit die slegte meebring; en jou in staat stel om sy wysheid en liefde oor jou kinders uit te giet. Dit is ‘n kans in ‘n leeftyd – gryp dit aan! Laat gister gaan en gryp môre vas. Jou kinders is jou toekoms; hulle word deur jou gevorm. Gee hulle ‘n smakie van die dinge van God wanneer hulle klein is en wanneer hulle groot word, sal die wêreld hulle nooit bevredig nie.
Sielskos: Eseg 27:25-30:26; Matt 23:1-12; Ps 112; Spr 20:1-4
2019-09-02
Handelinge 26:19 DB
Wanneer God jou ‘n visioen vir jou lewe gee, moet jy weet hoe om: 1) Dit te behou. Jou visioen vind binne ‘n sekere tydsraamwerk plaas: ‘…Stadig maar seker breek die tyd aan wanneer die visioen waar sal word…’ (Habakuk 2:3 NLV). Sommige van ons kan ‘n visioen kry, maar dit nie voltooi nie, omdat ons nie die ongemak en harde werk wat daarmee gepaard gaan, kan hanteer nie. Sommige van ons jaag voor God uit en ons visioen sterf ‘n stille dood. Jesus het gesê: ‘Wat uit ‘n menslike liggaam gebore is, is menslik, en wat uit die Gees gebore is, is gees’ (Johannes 3:6 NLV). Wanneer jou visioen uit die Gees gebore word, sal dit deur die Gees onderhou word. Wanneer dit egter uit die vlees gebore word, is jy op jou eie! 2) Dit weg te steek. Dis ‘n fout om jou visioen met mense wat dit nie kan waardeer nie, te deel. Josef het dit gedoen en in ‘n put beland. Nie almal sal jou sukses vier nie, veral nie as jou lig helderder as hulle s’n skyn nie. Vra dus vir God vir die vermoë om onderskeid te kan tref. 3) Dit water te gee. Lees hierdie twee Skrifgedeeltes versigtig en biddend: ‘…Maar Dawid het by die Here sy God krag ontvang’ (1 Samuel 30:6 NLV); ‘…julle… moet aanhou om julleself op te bou op die fondament van julle allerheiligste geloof…’ (Judas 20). Jy moet weet hoe om jouself geestelik aan te moedig en op te bou en hoe om jou visioen water te gee. God het vir Habakuk gesê: ‘…Skryf my antwoord, die visioen, in groot, duidelike letters…’ (Habakuk 2:2 NLV). Skryf jou visioen op ‘n kaartjie en dra dit saam met jou. Begin optree soos die persoon wat jy verwag om te wees wanneer dit ‘n realiteit word – en dit sal ‘n realiteit word!
Sielskos: Eseg 24:1-27:24; Matt 22:34-46; Ps 20; Spr 19:24-29
