2019-09-13
Johannes 5:30 NLV
Weet wie jy probeer tevrede stel. Jesus het nie probeer om almal tevrede te stel nie, is dit dus nie dwaas van jou om iets te probeer doen wat God nie eens doen nie? God het gesê: ‘…Hý is my geliefde Seun, ‘n Kind so na my hart’ (Matteus 3:17 NLV). Wanneer jy nie weet wie jy probeer tevrede stel nie, sal jy altyd voor drie dinge swig: Kritiek, omdat jy oorbewus is van wat ander mense van jou dink. Kompetisie, omdat jy bang is dat iemand anders eerste sal kom. Konflik, omdat jy deur enigiemand wat nie saam met jou stem nie, bedreig sal word. Jesus het gesê: ‘Nee, maak die koningsheerskappy van God en dit wat voor Hom reg is, julle heel eerste prioriteit; dan sal God vir julle al hierdie ander dinge [die dinge waaroor jy stres] as ‘n bonus byvoeg’ (Matteus 6:33 NLV). Deur op God se wil te fokus, sal jy jou lewe vereenvoudig! Jy sal altyd die regte ding doen, die ding wat Hom tevrede stel, ongeag wat enigiemand anders dink. Ons is lief daarvoor om stres op ander mense en ons verpligtingte te blameer: ‘Jy het my dit maak doen… Ek moet… Ek gaan…’ Daar is egter min dinge in die lewe, behalwe ons werk, wat ons moet doen. Wat jy dus inderwaarheid sê is: ‘Ek kies om [voltooi die sin], omdat ek nie die nagevolge wil hanteer nie.’ Dis baie selde wat enigiemand ons dwing om iets te doen, dus kan ons nie ander mense vir ons stres blameer nie. Wanneer ons onder druk voel, is dit omdat ons toelaat dat ander mense ons onder druk plaas. Die waarheid is dat ons nie slagoffers is nie, tensy ons toelaat dat ons deur eise van buite onder druk geplaas word.
Sielskos: 2 Kor 9:1-11:15; Matt 25:22-30; Ps 24; Spr 21:1-2
2019-09-12
Johannes 8:25 DB
Jesus was konstant onder druk. Daar is die heeltyd uitputtende eise aan Hom gestel. Hy het selde persoonlike privaatheid gehad en Hy is die heeltyd in die rede geval. Mense het Hom herhaaldelik misverstaan, gekritiseer en Hom gespot. Hy was onder enorme stres, maar tog het Hy vrede onder druk gehad. Hoe het Hy dit gedoen? Hy het sy lewe op agt gesonde beginsels vir stresbestuur gebaseer. Kom ons bestudeer hulle die volgende week en kyk wat ons daaruit kan leer. Weet wie jy is. “‘Wie ís jy presies?’ wou hulle toe weet. ‘Ai, moet Ek alles nou weer sê? Ek sê dit nog die hele tyd vir julle,’ antwoord Jesus hulle toe…” As jy nie weet wie jy is nie, sal ander mense jou probeer vertel wie hulle dink jy is en jou laat glo dat jy iemand is wat jy nie is nie. Om agter maskers weg te kruip, ‘n dubbele lewe te lei, oneg met ander mense te wees en iemand te probeer wees wat jy nie is nie, gaan met baie stres gepaard. Onsekerheid produseer altyd stres in ons lewens; wanneer ons onseker voel, voel ons onder dwang om aan te pas en om ‘n vertoning te lewer. Wat moet jy dus doen? Jy moet weet wie jy is en Wie s’n jy is! Jy is ‘n verloste kind van God, wat nie per ongeluk hier op aarde geplaas is nie, maar vir ‘n spesifieke doel. Jy is baie geliefd en ten volle deur God aanvaar. Hy het ‘n plan vir jou lewe; daarom maak jy saak. Om stres te oorkom moet jy weet wie jy is en totdat jy nie hierdie kwessie aangespreek het nie, sal dit jou aanhou pla.
Sielskos: 2 Kor 5-8; Matt 25:14-21; Ps 78:65-72; Spr 20:26-30
2019-09-11
Jesaja 1:17 NLV
Die samelewing in die tyd van die Nuwe Testament het nie welsynsisteme gehad nie. Daarom het die apostel Jakobus geskryf: ‘Suiwer en onbevlekte godsdiens voor God ons Vader is dat ons weeskinders en weduwees in hulle swaarkry versorg…’ (Jakobus 1:27 NLV). Dit kan die tipe bediening wees waarna jy opsoek is! Die enigste kwalifikasie wat jy nodig het, is om te weet hoe dit voel om eenkant gestoot te word en die medelye het om iets daaraan te doen. Die volgende aangrypende brief, ‘Die verhaal van weduweeskap,’ is deur ‘n dame wie se man oorlede is, geskryf: ‘Eers gevoelloosheid, dan besig wees. ‘n Miljoen dinge om te hanteer. Eindelose doodsertifikate en dinge om te teken. Vriende is so bedagsaam; ondersteuning van familie wat omgee. Jy bly besig. Maar in die nag pols die leë kant van die bed in smart. Uiteindelik maak jy jou oë toe, gooi sy tandeborsel in die asblik en raak van sy ou werkskoene wat jy in ‘n plastieksak van die hospitaal af gebring het, ontslae. Jy maak die kas leeg en gee al sy dinge weg. Elke pak klere in sy kas herinner jou aan ‘n spesiale plek of tyd wat julle saam gedeel het. ‘n Jaar het verbygegaan; jy is nog in een stuk. Dan die terugslag! Jou vriende vier ‘n verjaarsdag – almal paartjies. Jy word nie daarby ingesluit nie want jy is die ‘vyfde wiel.’ Sommige vroue mag jou selfs as ‘n bedreiging sien. Onthou ons asseblief. Moenie ons soos ekstra bagasie behandel nie. Ons is ‘n slegte hand uitgedeel en ons het vriende nodig. Vriendelike groete, Vergetene.’ Dink aan die verskil wat jy vandag in iemand se lewe kan maak deur diegene wat die samelewing so dikwels ignoreer en vergeet, op te soek.
Sielskos: 2 Kor 1-4; Matt 25:1-13; Ps 78:56-64; Spr 20:25
2019-09-10
Rigters 11:1 NLV
Sosioloë vertel ons dat menslike gedrag grootliks deur twee dinge bepaal word: ons ouers en ons omgewing. Jefta sou dus volgens hulle ‘n verlore saak gewees het! Nie volgens God nie. Sy Woord sê: ‘Vergeet al die dinge wat in die verlede gebeur het… Ek gaan iets nuuts doen…’ (Jesaja 43:18-19 NLV). Wanneer Jesus die Here van jou lewe word, kan nie gene of omgewing jou daarvan weerhou om alles wat Hy vir jou in gedagte het, te word nie. Voor sy lewe verby was, het Jefta Israel se jongste heerser geword en is hy saam met die geloofshelde in Hebreërs hoofstuk 11 genoem. Miskien is jy in minder ideale omstandighede gebore en wonder jy of jy dit ooit kan oorkom. Die antwoord is ja! Die volgende keer wat iemand dus jou verlede gebruik om jou te probeer afbreek, herinner hulle aan Jefta. Ons God is wonderlik. Hy kan die benadeelde hoër as diegene wat elke moontlike voordeel gehad het, ophef. Sy krag word in ons swakheid geopenbaar en vrygestel (sien 2 Korintiërs 12:9). Hy spesialiseer daarin om mense te gebruik wat verwerp is. Hy het vir Josef, ‘n man wat deur sy broers in ‘n put gegooi en deur sy pa as dood afgeskryf is, gebruik. Hy het Dawid, ‘n veeoppasser wat van sy familie vervreem en deur hulle geïgnoreer is, gebruik. Hy het Jesus, ‘Die klip wat die bouers afgekeer het…’ (Psalm 118:22 NLV), gebruik om die ‘…hoekklip van die gebou…’ (Lukas 20:17 NLV) te word. Hy kan dieselfde vir jou doen. Wees dus bemoedig; God het ‘n plan vir jou lewe en soos jy tyd saam met Hom spandeer, sal Hy vir jou wys wat dit is.
Sielskos: Eseg 46-48; Matt 24:36-51; Ps 78:40-55; Spr 20:22-24
2019-09-09
Prediker 3:1-8 NLV
Wanneer laas het jy die tyd geneem om te lag, te dans en lief te hê? Kan jy onthou? In die woorde van ‘n onbekende digter: ‘This is the age of the half-read page; the quick hash and the mad dash. The bright knight with the nerves tight; the plane hop and the brief stop. The lamp-tan in a brief span; the big shot in a good spot. The brain strain and the heart pain; the catnaps until the spring snaps…and the fun’s done!’ Dit laat mens dink, nè? Moet dit egter so wees? Nee, as dit is hoe jou lewe vandag lyk, is die kans goed dat dit is omdat jy dit so gemaak het. Jy is die enigste een wat dit kan verander! Jy sê jy is besig? Ons is almal besig. Wie sê dat jy nie die lewe kan geniet wanneer die pas versnel nie? Vir seker nie God nie! Chuck Swindoll skryf: ‘Ek weier dat vrolikheid die agterste gestoeltes inneem wanneer verantwoordelikheid aan die stuur kom. As die pret weg is, is dit omdat ons dit nie daar wil hê nie, nie omdat dit nie inpas nie. Ek gee nie om of jou ‘doenlysie’ tot by die horison strek nie, jy moet weer in balans kom en die tyd neem om te lag, van vreugde te dans en lief te hê. Hoekom? Omdat die Bybel so sê! Jou familie en vriende sal jou ook meer geniet wanneer jy dit doen.’ Die Psalmdigter het gesê: ‘U wys vir my die lewenspad; in u teenwoordigheid is vreugde, en aan u regterhand is daar blydskap vir altyd’ (Psalm 16:11 NLV). Gaan dus voort en geniet jou lewe soos God dit bedoel het om te wees – voor jy jou oë uitvee, is dit verby.
Sielskos: Eseg 43-45; Matt 24:26-35; Ps 78:32-39; Spr 20:20-21
2019-09-08
Psalm 90:12 NLV
In ‘n koerantartikel in 1985, skryf Anne Wells: “My swaer het my suster se kas oopgemaak en ‘n pakkie wat in sneespapier toegedraai was, uitgehaal. Dit was ‘n pragtige handgemaakte rok; die prys met ‘n astronomiese syfer was steeds daaraan geheg. ‘Jou suster het dit gekoop die eerste keer wat ons New York toe gegaan het… agt of nege jaar terug,’ het hy gesê. ‘Sy het dit nooit gedra nie; sy het dit gehou om na ‘n spesiale geleentheid te dra. Ek dink hierdie is seker maar die regte geleentheid.’ Hy het die rok op die bed saam met die ander klere gesit – wat ons op pad was om na die begrafnisondernemer te neem. Toe het hy na my toe gedraai en gesê: ‘Moet nooit iets vir ‘n spesiale geleentheid bêre nie. Elke dag wat jy lewe is ‘n spesiale geleentheid!'” Daardie woorde het Anne Wells se lewe verander. Sy gaan voort: ‘Ek bêre niks meer nie. Nou gebruik ons die goeie breekware vir elke spesiale geleentheid – soos om ‘n kilogram te verloor, wanneer ons die verstopte drein oopkry of wanneer die eerste bloeisel te voorskyn kom. ‘Eendag’ of ‘een van die dae’ kom nie meer in my woordeskat voor nie. As dit die moeite werd is om te sien, te doen of te hoor, wil ek dit nou sien, doen of hoor. Elke oggend wanneer ek my oë oopmaak, sê ek vir myself dat dit ‘n spesiale geleentheid is.’ Dit laat mens dink, nè? Dit spoor jou aan om elke druppel vreugde uit die dag te tap en op te hou uitstel! Vergewe daardie oortreding, sê vir daardie persoon dat jy lief is vir hom of haar, onderneem daardie reis, gaan terug skool toe. Besluit vandag om die dinge te doen wat jy uitgestel het.
Sielskos: Gen 2:7-25; 1 Kor 15:39-55
