2019-09-19
Matteus 11:28 ABA
As die las wat jy dra te swaar vir jou is, het Jesus dit nie vir jou gegee nie. Ander mense het dalk, of jy het dit dalk op jouself geneem, maar Jesus het geen deel daaraan gehad nie. ‘…Daarom wil Ek julle uitnooi: Voel julle moeg vir hierdie lewe? Knak julle knieë onder al die probleme en verantwoordelikhede wat julle moet dra?.. Kom dan na My toe!.. Kom ontdek watter vreugde dit bring om te leef soos God wil hê jy moet leef. Dis nie moeilik om so te leef nie; om die waarheid te sê, as jy so begin leef, sal jy agterkom hoe lekker die lewe regtig kan wees’ (verse 28-30 DB). Die finale stresbestuur beginsel wat Jesus vir ons geleer het is: Gee jou stres vir Hom. Let op, Jesus het nie gesê: ‘Kom na My toe en ek sal vir jou meer skuld, meer laste, meer stres en meer bekommernisse gee’ nie, selfs al is dit wat baie godsdienstige mense ons probeer leer! Sommige kerke skep druk in plaas daarvan om dit te verlig. Jesus het egter gesê: ‘Ek wil jou rus gee en jou stres verlig. Wanneer jy in harmonie met My lewe, sal Ek vir jou innerlike krag gee.’ Net Jesus kan jou lewe transformeer. Die grootste bron van stres is wanneer ons ons lewens apart van die God wat ons geskep het, probeer lei, wanneer ons op ons eie manier probeer lewe en ons eie god probeer wees. Wat het jy dan nodig? As jy nog nooit jou lewe aan God oorgegee het nie, het jy ‘n transformasie nodig. Gee jou lewe met al jou stres aan Hom en sê: ‘Here, gee asseblief vir my ‘n nuwe lewe. Vervang die druk wat ek voel met die vrede wat U bied. Help my om u beginsels vir stresbestuur te volg.’
Sielskos: 1 Sam 4-7; Matt 26:30-46; Ps 52; Spr 21:17
2019-09-18
Markus 6:31 NLV
Neem tyd om die lewe te geniet. Jesus het dit gedoen. “Omdat daar voortdurend talle mense gekom en gegaan het sodat hulle selfs nie kans gekry het om te eet nie, het Jesus toe vir hulle gesê: ‘Kom julle nou self eenkant toe na ‘n stil plek en skep ‘n bietjie asem.'” Jesus het nie net tyd vir ontspanning gemaak nie, Hy het ook vir diegene wat hard gewerk het gesê: ‘Jy verdien ‘n ruskans vandag. Kom ons gaan rus en neem tyd vir onsself.’ Dus het hulle in ‘n boot geklim en na die ander kant van die meer geroei. Jesus kon stres hanteer, omdat Hy geweet het hoe om te ontspan. Rus en ontspanning in die lewe is nie opsioneel nie en ook nie ‘ongeestelik’ nie. Rus is so belangrik dat God dit by die Tien Gebooie ingesluit het. Die Sabbat is vir die mensdom geskep omdat God weet dat ons fisiese, emosionele en geestelike samestelling gereelde rustye vereis. Jesus het stres oorleef omdat Hy die lewe geniet het. J.B Philips parafraseer dit as volg: ‘Nou het Ek, die Seun van die mens, gekom en Ek vier graag fees…’ (Matteus 11:19 ABA). Paulus sê ook vir ons dat God ‘…aan ons ryklik alles skenk wat ons nodig het om die lewe te geniet’ (1 Timoteus 6:17 NLV). Balans is die sleutel tot stresbestuur. As jy vandag uitgebrand voel, moet jy na twee dinge kyk: 1) Put jy elke dag krag uit God se genade, of maak jy net op jouself staat? 2) Sit jy gereeld tyd vir rus en ontspanning eenkant? Die woord ontspanning beteken om te herstel, te verfris en nuut te skep.’ Kry jy die prentjie? As jy uitbrand, wat se nut sal jy dan vir God se koninkryk, jou familie of jouself wees?
Sielskos: 1 Sam 1-3; Matt 26:17-29; Ps 34; Spr 21:14-16
2019-09-17
Markus 1:35 NLV
Maak gebed jou daaglikse gewoonte. Gebed is ‘n wonderlike stres-verligter. Jesus het sy dag met gebed begin. Hy het dikwels deur die dag gestop om te bid en Hy het elke dag met gebed geëindig. As Jesus, so besig soos Hy was, tyd kon maak om te bid, dink net hoeveel te meer jy dit moet doen! Tyd alleen met God kan die druk van die lewe se stres verminder. Ons praat met God in gebed, vertel Hom wat op ons gemoed druk en laat Hom toe om met ons te praat terwyl ons die Bybel lees. Dan kyk ons na ons skedule, evalueer ons prioriteite en wag vir instruksies. As ons so sou lewe sal die farmaseutiese industrie ondergaan, omdat ons nie ‘n fraksie van die kalmeermiddels op die mark sou nodig kry nie! Baie van ons probleme ontstaan uit ons onvermoë om stil te sit. Ons weet eenvoudig nie hoe om stil te wees nie. God sê: ‘Wees stil en weet Ek is God!..’ (Psalm 46:11 NLV). Een rede hoekom ons God nie beter ken nie is omdat ons nie stil kan wees nie. Ons is te besig om eenvoudig stil te wees en net te dink. Iemand het gesê: ‘Dis ‘n ironiese gewoonte van die mens dat wanneer hy sy pad verloor, hy sy spoed verdubbel.’ Daar is ‘n verhaal oor ‘n vlieënier in die Tweede Wêreldoorlog wat oor die Stille Oseaan gevlieg het. Toe hy die toring radio en die kontroleur hom vir sy ligging vra, het hy geantwoord: ‘Ek weet nie – maar ek gaan ‘n rekordtyd opstel!’ Baie van ons is so – ons spoed deur die lewe sonder om te weet waarheen ons op pad is. Ons moet ons oggend, soos Jesus, met gebed begin en gedurende die dag weer bid en ons geestelike batterye herlaai.
Sielskos: Hoogl 5-8; Matt 26:1-16; Ps 39; Spr 21:9-13
2019-09-16
Markus 3:14 NLV
Moenie dit alles self probeer doen nie. Een van die redes hoekom ons gestres raak, is omdat ons dink dat alles van ons afhang. Nie Jesus nie. Hy het twaalf ander mense ingeroep, opgelei en bemagtig sodat hulle die las kon help dra. Hy het sy werk gedelegeer. Hy het ander mense betrek. Hoekom doen ons dit nie? Twee redes: 1) Perfeksionisme. Ons dink: ‘As ek die werk goed gedoen wil hê, moet ek dit self doen.’ Dis ‘n oulike idee, maar dit werk gewoonlik nie uit nie omdat daar net te veel dinge is wat gedoen moet word. Ons het eenvoudig nie die tyd of die talent om alles self te doen nie. Dis inderwaarheid ‘n egoïstiese houding wat sê: ‘Niemand, maar niemand kan dit soos ek doen nie!’ Dink jy Jesus kon ‘n beter werk as sy dissipels gedoen het? Natuurlik, maar selfs met daardie wete, het Hy hulle steeds die werk laat doen. Hoekom? Omdat ons ander mense moet toelaat om foute te maak om sodoende te leer, dieselfde manier wat die dissipels geleer het. Moenie ander mense se opvoeding steel nie. 2) Onsekerheid. ‘Wat as ek hierdie verantwoordelikheid vir iemand anders gee en hulle doen dit beter as ek?’ Hierdie moontlikheid is ‘n bedreiging vir baie van ons. Jy sal egter nie bedreig voel as jy weet wie jy is, wie jy probeer tevrede stel, wat jy wil bereik en die een ding waarop jy moet fokus, weet nie. Om effektief te wees moet jy ander mense betrek, want jy kan nie op meer as een ding op ‘n slag fokus en dit goed doen nie.
Sielskos: Hoogl 1-4; Matt 25:41-46; Ps 3; Spr 21:4-8
2019-09-15
Lukas 4:43 NLV
Fokus op een ding op ‘n slag. Word jy in verskillende rigtings getrek? Mense het dit aanhoudend aan Jesus probeer doen en sy aandag van sy doel in die lewe probeer aflei. Die Bybel sê: ‘Vroeg die volgende môre het Jesus na ‘n verlate plek vertrek. Die skares het oral na Hom gesoek, en toe hulle Hom uiteindelik kry, het hulle Hom gesmeek om hulle nie te verlaat nie’ (vers 42 NLV). Jesus was op die punt om te vertrek en hulle het Hom probeer oorreed om te bly. Dis hoe Hy gereageer het: ‘…Ek moet die Goeie Nuus van die koningsheerskappy van God in ander plekke ook verkondig, want dit is waarvoor Ek gestuur is.’ Hy het geweier dat sy aandag deur minder belangrike sake afgelei word. Hy was ‘n meester daarin. Almal het probeer om Hom in die rede te val. Almal het ‘n Plan B vir sy lewe gehad. Hy het egter in wese gesê: ‘Nee, Ek moet vorentoe na my doelwit toe beweeg.’ Hy het aangehou om te doen wat God vir Hom gesê het om te doen. Hy was vasberade. Hy was volhardend. Hy was gefokus. Wanneer jy dus ‘n dosyn verskillende dinge het om te doen, kies die belangrikste een en hou daarmee vol totdat jy dit voltooi het. Kies dan die tweede belangrikste een en doen dieselfde, totdat jy die lys voltooi het. Wanneer ons ons inspanning versprei is ons oneffektief; wanneer ons ons inspanning konsentreer is ons suksesvoller. Verspreide lig produseer ‘n dowwe glans, terwyl lig wat gekonsentreerd is, vuur produseer. Jesus het nie toegelaat dat onderbrekings Hom daarvan weerhou om op sy doel te konsentreer nie. Hy het nie toegelaat dat ander mense Hom gestres, gespanne of geïrriteerd maak nie. Hy is jou voorbeeld!
Sielskos: Gen 24:1-51; 2 Kor 6:14-7:1
2019-09-14
Johannes 8:14 NLV
Weet wat jy wil bereik. Jesus het gesê: ‘…Ek weet waarvandaan Ek gekom het en waarheen Ek teruggaan…’ Kan jy dieselfde sê? Tensy jy jou lewe beplan en prioriteite bepaal, sal jy deur ander mense gedruk word om te doen wat hulle dink belangrik is. Jy lewe elke dag volgens prioriteite of volgens druk. Daar is nie ‘n ander opsie nie. Of jy besluit wat belangrik in jou lewe is, of jy laat toe dat ander mense dit vir jou besluit. Dis maklik om onder die tirannie van die dringende op te tree, om aan die einde van die dag te wonder: ‘Het ek enigiets bereik? Ek het baie energie verbruik en baie dinge gedoen, maar het ek iets belangriks bereik?’ Om besig te wees beteken nie dat jy produktief is nie. Jy mag dalk in sirkels tol maar nie enigiets van waarde bereik nie. Voorbereiding veroorsaak dat jy gerus is. Of om dit anders te stel, voorbereiding voorkom druk, terwyl dinge wat jy uitstel, druk produseer. Goeie organisasie en goeie voorbereiding verminder stres omdat jy weet wie jy is, wie jy probeer tevrede stel en wat jy wil bereik. Dit vereenvoudig jou lewe wanneer jy duidelik gedefinieerde doelwitte het. Spandeer dus ‘n paar minute aan die begin van elke dag deur met God in gebed te praat. Kyk dan na jou skedule vir die dag en besluit: ‘Is dit regtig die manier wat ek ‘n dag van my lewe wil spandeer? Is ek gewillig om die volgende vier-en-twintig waardevolle ure vir hierdie aktiwiteite in te ruil?’ Die regte antwoord op hierdie twee vrae sal jou stresvlakke verlaag deur jou te help om te prioritiseer.
Sielskos: 2 Kor 11:16-13:14; Matt 25:31-40; Ps 19; Spr 21:3
