2019-09-25
2 Korintiërs 11:28 NLV
Predikante berei preke voor, onderwysers berei lesse voor, boekhouers tel die syfers op en motorwerktuigkundiges maak enjins reg. Daar is egter nie ‘n skool wat jou ten volle vir die uitdagings van leierskap kan voorberei nie. Paulus maak ‘n lys van die druk van leierskap wat slae, steniging, verraad en ‘n sinkende skip, insluit. Dis hoekom meer as helfte van alle pastore die bediening in minder as tien jaar verlaat. Soos die skrywer Zig Ziglar gesê het: ‘Dis eensaam daar bo.’ As jy ‘n leier in enige area van die lewe is – en die meeste van ons is, of ons dit nou besef of nie – sal jy min hoor wanneer dinge goed gaan, maar wanneer dit nie doen nie, sal die skuld op jou hoof gepak word. Leiers trek kritiek aan, net soos ‘n piekniek miere aantrek. Jy moet altyd ‘n prys betaal wanneer jy ander mense wil beïnvloed. ‘n Leier sal die koste van tyd, denke en vertroue betaal. Die paaiemente lyk soos daaglikse risiko’s wat geneem word, visioenêre denke, ywerige werk en probleemoplossing. Die grootste koste kom egter voor wanneer jy met mense te doen kry; veral diegene wat lyk of hulle dieselfde uniform aanhet, maar nie in dieselfde span speel nie. Paulus beskryf dit so: ‘…in gevare… van my volksgenote…’ (vers 26 NLV). As dit is wat jy vandag ervaar, lees die volgende wat God vir Moses gesê het: ‘…Kom staan by hierdie rotse, hier by My. Wanneer Ek in my majesteit hier verbykom, sal Ek jou tussen die rotse laat staan en jou met my hand beskerm terwyl Ek verbygaan’ (Eksodus 33:21-22 NLV). Wat is die antwoord op die uitdagings van leierskap? ‘n Bewustheid van God se teenwoordigheid in jou lewe.
Sielskos: 1 Sam 18:1-20:29; Matt 27:45-56; Ps 68:19-35; Spr 22:6
2019-09-24
Filippense 3:8 DB
Voor jy jou Godgegewe doel in die lewe ontdek, sal jy dikwels teenspoed ervaar wat veroorsaak dat jy dit wat tydelik is laat gaan en dit wat ewig is, vasgryp. Vir Paulus het dit die verlies van alle aardse besittings beteken. Vir ander kan dit die hitte van die stryd in die skeihof beteken. Wanneer die persoon wat jy gedink het ‘alles’ is, wegloop, word jy skielik van alles wat jy tevore gehad het, gestroop. Kyk na Job; sy huis was verwoes, sy huwelik het soos ‘n grap gelyk en sy kinders was dood. Dis dan wat jy uitvind dat jy van die tydelike, maar nie die ewige nie, gestroop kan word; gestroop van jou rykdom, vriende en aansien, maar nie van jou karakter en jou geloof in God nie. Die Bybel sê: “…Daarna het hy op die grond voor God geval. Hy het gesê: ‘…Prys die Naam van die Here!'” (Job 1:20-21 NLV). Ware lofprysing vind plaas wanneer jy iets wat jy gedink het jy moet hê, op die altaar neerlê omdat jy besef dat dit al die tyd God s’n was. Kyk na Abraham se altaar. God wou nie Isak se liggaam gehad het nie, Hy wou net weet of daar enigiets was wat Abraham liewer as Hom gehad het. Jy moet by die punt kom waar jy kan bid: ‘Here, hier is al my wrokke en onvergifnis, my behoefte om te beïndruk, my tyd, talente en skatte, enigiets waarby ek betrokke is wat my daarvan weerhou om geheel en al U s’n te wees. U sal nooit hierdie dinge van my moet wegneem nie, omdat ek dit met graagte alles vir U gee sodat ek kan wees wat U wil hê ek moet wees.’ Kan jy hierdie gebed vandag bid? Dis nie maklik nie, maar dit sal jou lewe verander.
Sielskos: 1 Sam 16-17; Matt 27:32-44; Ps 68:1-18; Spr 22:1-5
2019-09-23
Job 8:21 NLV
Soms wanneer jou hart gebreek is, kom genesing eerste en die antwoorde later. Wanneer jy egter daaroor dink, sal jy nie eerder saam met God in die donkerte stap as wat jy alleen in die lig stap nie? Dis te betwyfel of Job ooit ten volle die verliese wat hy in die lewe ervaar en hoekom dit gebeur het, verstaan het. Daar het egter ‘n tyd gekom wat hy in staat was om terug te kyk en met vertroue te sê: ‘Hy sal jou weer met vrolikheid vul en jou laat uitroep van vreugde.’ Dis ook God se belofte aan jou! Die teoloog E. Stanley Jones het gesê: ‘Enigiets, behalwe God, sal jou in die steek laat.’ God het genoegsame genade om jou deur elke situasie waarvoor jy in die lewe te staan sal kom, te kan dra. Vir elke behoefte, het Hy ‘n voorraad. Vir elke probleem, het Hy ‘n antwoord. Vir elke seer, het Hy genesing. Nadat hy teruggedink het aan alles waardeur God hom gebring het, het Jeremia gesê: ‘…Niks is vir U te moeilik om te doen nie!’ (Jeremia 32:17 NLV). God kyk uit vir geleenthede waar Hy vir jou kan wys wat Hy kan doen wanneer jy jou vertroue in Hom plaas. Dawid het gesê: ‘…Here, dink eerder aan my met troue liefde, ter wille van u goedheid’ (Psalm 25:7 NLV). Is jy nie bly dat God se goedheid en genade op sy karakter en nie op joune gebaseer is nie? Corrie ten Boom het gesê: ‘As jy depressief wil word, kyk binnetoe. As jy verslae wil word, kyk agtertoe. As jy verward wil word, kyk rond. Maar as jy gered wil word, kyk op.’ Die woord vir jou vandag is dus: Met God se genade, sal jy hierdeur kom.
Sielskos: 1 Sam 14-15; Matt 27:11-31; Ps 91; Spr 21:28-31
2019-09-22
Lukas 17:17 NLV
Een dag het Jesus tien mans van melaatsheid, wat in daardie tyd ‘n doodsvonnis met geen kuur was nie, genees. Net een van hulle het egter onthou om terug te kom en Hom te bedank. Wat is die ander nege se storie? Was hulle te besig om dankbaar te wees? Hulle het sekerlik dankbaar gevoel, maar het tog nie die tyd geneem om dit uit te druk nie. Het hulle met ander dinge besig geraak en vergeet? Was hulle te versigtig om dankbaar te wees? Miskien het hulle gedink dat hulle gesondheid nie gaan hou nie, dus wou hulle seker maak voor hulle dit bekend maak. Of miskien was hulle bang dat Jesus iets van hulle sou wou hê wat hulle onwillig of nie in staat was om te gee nie. Was hulle te self-gesentreerd om dankbaar te wees? Op ‘n manier was die lewe van siekte ‘n eenvoudiger lewe. Nou moes hulle ‘n werk kry, verantwoordelikheid neem en ‘n rol in die samelewing speel. Was hulle te arrogant om dankbaar te wees? Miskien het hulle gedink dat hulle met tyd self gesond sou word. Plus, wanneer jy dankbaar is, erken jy dat jy behoeftig is. Wie wil swakheid ten toon stel wanneer jy ‘n openbare beeld het om te beskerm? As hierdie verhaal enige aanduiding is, het nege uit die tien van ons ‘n probleem met dankbaarheid – ten minste wanneer dit daarby kom om dit uit te druk. Moenie so wees nie. Wees een van die 10 persent! In drie opeenvolgende Psalms – 105, 106 en 107 – herhaal Dawid hierdie soortgelyke woorde: ‘Prys die Here! Dank die Here, want Hy is goed! Sy trou ken geen einde nie.’ Moenie dat ‘n dag verbygaan sonder om God se goedheid aan jou te onthou en Hom daarvoor te dank nie.
Sielskos: Gen 1:1-2:3; Joh 1:1-18
2019-09-21
1 Korintiërs 16:9 NLV
Een dag het die Kamer van Koophandel in ‘n klein dorpie ‘n suksesvolle besigheidsman uitgenooi om hulle te kom toespreek. Die plaaslike ekonomie was sleg en hulle was mismoedig, dus was dit sy werk om hulle te motiveer. Hy het ‘n groot stuk papier geneem en ‘n rooi kolletjie in die middel van die papier gemaak. ‘Wat sien jy?’ het hy vir die gehoor gevra. Een persoon het geantwoord: ‘Ek sien ‘n rooi kolletjie.’ Die spreker het gesê: ‘Goed, maar wat anders sien jy?’ Ander mense het ook begin antwoord: “‘n Rooi kolletjie.” Die spreker het gevra: ‘Sien julle niks anders behalwe die kolletjie nie?’ Die gehoor het soos een man geantwoord: ‘Nee!’ Die spreker sê toe: ‘Julle kyk die belangrikste ding mis; julle sien nie die groot stuk papier raak nie!’ Hy het voortgegaan om te verduidelik dat ons aandag dikwels in die lewe deur die klein kolletjie-mislukkings en -ervarings afgetrek word. Dit weerhou ons daarvan om ons seëninge en suksesse, wat belangriker as die teleurstellings wat ons aandag probeer monopoliseer en ons energie dreineer, te sien. Paulus het geskryf: ‘want hier staan nou ‘n wye deur oop en daar is baie mense wat reageer. Daar is egter ook baie teenstanders.’ Paulus het nie die realiteit van die teenstand waarvoor hy te staan gekom het ontken nie; hy het net besluit om eerder op die geleentheid wat dit meebring, te fokus. ‘n Digter het geskryf: ‘Two men looked through prison bars. One saw mud, the other stars.’ Waarna kyk jy? Is jy so besig met dit wat is dat jy dit wat kan wees uit die oog verloor het? Indien dit die geval is, tree terug en vra God om jou te help om die groter prentjie te sien.
Sielskos: 1 Sam 11-13; Matt 26:69-27:10; Ps 13; Spr 21:22-27
2019-09-20
Daniël 1:8 NLV
Wat was Daniël se probleem? Wat was fout daarmee om die beste kos in die land te eet? Die meeste mense het van ‘n karige dieet gelewe. Daniël het die geleentheid gehad om letterlik soos ‘n koning te kon eet. Hoekom het hy so ‘n vasberade houding daarteen ingeneem? Wanneer jy dieper in die kulturele realiteite van die situasie delf, kom jy agter dat daar meer op die spel was. ‘n Babeloniese fees is altyd ter ere van die gode gevier. Wanneer jy dus vir die maaltyd aangesit het, het jy nie net saamgeëet nie, jy was ook deel van ‘n daad van lofprysing. Hierdie kos is eers vir ‘n heidense god geoffer. Vir ‘n Joodse tiener wat sy geloof in God ernstig opgeneem het, sou deelname aan die ete beteken het dat hy dit waarvoor hy geroep was, in gevaar sou stel. Deur hulle kos te eet, sou hy hulle god prys. Dit was ‘n stappie te ver vir Daniël. Hy sou nie sy karakter so onder verdenking plaas nie. Jy ontdek nie wat jou oortuigings is wanneer jy onder druk verkeer nie, jy besluit vooraf wat jou oortuigings is. Dis gedurende die goeie tye wat jy bepaal wat jy sal of nie sal doen wanneer die moeilike tye aanbreek nie. Die Psalmdigter het gesê: ‘Hoe kan ‘n jongmens ‘n skoon lewe lei? Deur gehoorsaam te wees aan u woord. Met my hele hart soek ek U; moenie dat ek afdwaal van u gebooie nie. Ek het u woord in my hart gebêre sodat ek nie teen U sou sondig nie’ (Psalm 119:9-11 NLV). ‘n Oorwinnende Christelike lewe word met hierdie drie stellings opgesom: 1) ‘Deur gehoorsaam te wees aan u woord.’ 2) ‘Met my hele hart soek ek U.’ 3) Ek het u woord in my hart gebêre.’
Sielskos: 1 Sam 8-10; Matt 26:47-68; Ps 54; Spr 21:18-21
