2019-10-01
Eksodus 3:4 NLV
Moet nooit ‘n persoon se potensiaal op grond van hoe hulle tans voorkom, beoordeel nie. Moses, een van die grootste leiers in die geskiedenis, was besig om skape op te pas toe God hom geroep het. Geen korporatiewe maatskappy sou hom in diens geneem het nie. Moet hom egter nie beoordeel nie – hy was net tussen werke. God was op die punt om met hom te praat en sy lewe te verander. As jy moeg daarvoor is om na almal se opinies te luister, spandeer alleen tyd saam met God. Hy sal vir jou dinge wys wat jou toekoms kan verander (sien Jeremia 33:3). Op die ouderdom van vyf-en-sestig, nadat hy vir baie jare ‘n restaurant bestuur het, was kolonel Saunders bankrot. Al wat hy gehad het was ‘n maandelikse maatskaplike toelaag van 105 dollars, ‘n resep vir gebraaide hoender en ‘n visie wat hy geweier het om te laat vaar. Gevolglik het hy die Kentucky Fried Chicken kettingwinkelgroep gestig, ‘n multimiljoenêr en ‘n toegewyde Christelike filantroop geword. Die punt is: dis nie verby totdat God sê dis verby nie! Moses het amper uitgebrand toe hy dinge op sy manier probeer doen het. God het egter in ‘n vuur verskyn en inderwaarheid gesê: ‘Kyk na hierdie brandende bos; dit gaan jy wees. In my krag sal jy voor Farao staan. Die Rooi See sal voor die krag wat in jou aan die werk is, padgee. Ek sal vir jou manna in die woestyn gee. Ek sal jou krag gee en jou op jou pad na jou lotsbestemming onderhou.’ Wat jy ook al vandag doen, stop! Neem tyd om alleen by God te gaan sit en sê: ‘Ek sal nou eenkant toe kom en na U luister.’ Sodra jy gehoor het wat Hy vir jou wil sê, sal jou lewe nooit weer dieselfde wees nie.
Sielskos: Ef 1:1-4:16; Joh 1:1-13; Ps 92; Spr 22:24-25
2019-09-30
2 Korintiërs 6:8 DB
Kelli B. Trujillo skryf: “‘Ek is nie jou dienskneg nie!’ het ek my kind toegesnou toe ek op my hande en knieë gaan om die pasta wat hy op die vloer gegooi het, op te tel. Toe het ‘n gedagte my binnegeskiet: Ek hoop nie Jesus het my dit hoor sê nie! Ongelukkig strek hierdie houding teenoor diensbaarheid dikwels verder as die vloer se skoonmaak. Gewoonlik vryf dit my verkeerd op wanneer ek ander moet bedien. Wanneer dit ‘n betekenisvolle projek is waar jy omtrent die klankbaan van inspirerende musiek kan hoor, is dit nie so moeilik nie. Wat egter van die soort diens waarvan Jesus gepraat het – waar jy geen krediet kry nie en jy teen jou selfsugtige impulse moet baklei?” Om soos Jesus te dien, beteken dat jy sê: ‘Ek leef nie meer nie, maar Christus lewe in my…’ (Galasiërs 2:20 NLV). Paulus was in die tronk gegooi, gestenig, die boot waarop hy was het gesink en hy is beroof en tog het hy gesê: ‘Ons weet hoe dit voel om deur ander geëer én beledig te word. Ons naam is al dikwels deur die modder gesleep. Ander kere weer is ons geprys en oorlaai met eer… Ons ken hartseer, maar ons is altyd vol vreugde. En armoede – ja, natuurlik weet ons ook wat dit is. Maar ons het al baie mense se lewe skatryk gemaak met die goeie nuus… Ons werk immers vir God aan wie alles behoort en wat ons oorlaai met sy goedheid’ (2 Korintiërs 6:8-10 DB). Die Bybel sê Jesus ‘…het ter wille van die blydskap wat daar voor vir Hom gewag het, die kruis verduur… En nou sit Hy op die ereplek langs God op die troon!’ (Hebreërs 12:2 NLV). Dieselfde Gees stel jou in staat om ander te dien deur krag uit Hom te put.
Sielskos: Num 29:1-6; Matt 24; Op 11:15-19; 1 Kor 15:50-58
2019-09-29
Job 14:7 DB
Dit verg God se wysheid om ‘n maat te vind wat inpas by waar jy is en waarheen jy op pad is. As jy beskadigde materiaal kies, sal jy teleurstellende resultate kry. Wanneer ‘n familie uitmekaar breek, kan die wonde ‘n leeftyd hou, selfs al is die oorlog verby. Luister asseblief mooi: Moet nooit jou kinders as ammunisie gebruik om mekaar seer te maak nie! Ammunisie vernietig nie net die teiken nie, dit word ook in die proses vernietig. Jou monoloog van bitterheid mag dalk die waarheid wees, maar dit kan jou kind se vermoë om gesonde verhoudings van hul eie te bou, vernietig. As hulle immers nie ‘n ouer kan vertrou nie, wie kan hulle dan vertrou? Selfs al kan jy nie die verhouding red nie, red hulle. Job sê: ‘As ‘n boom afgekap word, is die kans goed dat daar weer nuwe lote en takke uit die stomp sal groei.”.’ Hoe wonderlik – nuwe takke wat uit ‘n dooie boom gebore word! Dis ons boodskap – daar is lewe na die dood! Hy is die God van tweede kanse en nuwe begin. Net omdat jou drome nie waar geword het nie, beteken dit nie dat jou kinders se drome nie waar sal word nie. As daar net een ding – ‘n gesonde, goed-aangepaste kind – uit jou verhouding voortkom, is jy steeds ‘n wenner. Jou kinders is jou visie. Hulle is die toekoms, gee hulle dus ekstra liefde en stabiliteit. Leer hulle wat God oor die lewe sê. Werk daaraan om hulle onthalwe. As die ‘nuwe lote’ saam met die boom verlore gaan, beteken dit dat al daardie jare gemors is. Beskerm dus die ‘nuwe lote.’
Sielskos: Eseg 37:1-14; Matt 27:50-53; 1 Tess 4:13-18
2019-09-28
1 Petrus 5:5-7 NLV
Iemand het geskerts: ‘Die probleem met sukses is dat die formule daarvoor dieselfde formule is as vir ‘n senu-ineenstorting.’ Die Bybel gee ons die regte formule vir ‘n suksesvolle lewe. Dit sluit drie areas in: outoriteit, houding en versekering. ‘…erken die gesag van die ouderlinge… Word daarom klein onder die kragtige hand van God… Gee al julle bekommernisse aan God oor, want Hy gee vir julle om.’ Kom ons kyk na elk van hierdie drie areas: 1) Onderwerp jouself aan diegene wat wys is. Luister na hulle raad, word aanspreeklik, aanvaar teregwysing, aanvaar voorstelle, respekteer ervaring en volg ‘n waardige voorbeeld. Eers wanneer jy raad kan aanvaar, sal jy gekwalifiseerd wees om dit te kan gee. Eers wanneer jy leierskap respekteer en jouself daaraan onderwerp, sal jy gekwalifiseerd wees om ander te kan lei. 2) Word nederig. In die Skrif simboliseer die ‘hand’ van God twee dinge: sy dissipline en sy verlossing. Wanneer jy nederig voor Hom word, aanvaar jy dat sy dissipline goed is vir jou. Jy erken ook sy gewilligheid om op jou hulpkreet te antwoord en jou te red op enige manier wat Hy kies om dit te doen. 3) Werp jouself op God se genade en sorg. Moeilikheid en teleurstelling sal vir seker kom en wanneer dit gebeur, moet jy jouself in God se arms werp. Die situasie mag dalk vir jou te groot wees, maar dit is nooit te groot vir Hom nie. Beteken dit dat daar nie ‘n plek vir beplanning, doelwitte en harde werk is nie? Nee, dit beteken net dat jy gewillig is om dinge op God se manier te doen, wat altyd die beste is.
Sielskos: 1 Sam 27-31; Matt 28:11-20; Ps 63; Spr 22:17-23
2019-09-27
2 Korintiërs 10:4 NLV
Die verhaal van Josef die gevangene wat Josef die eerste minister geword het, leer ons dat ons bo ons omstandighede kan uitstyg, die uitdagings kan oorkom en in die volheid van ons Godgegewe potensiaal kan lewe. Sy reis was lank en joune mag dalk ook lank wees. As jy egter nie die eerste tree neem nie, sal jy vassit waar jy tans is. Soms word jou ‘vesting’ vroeg in jou lewe gevestig. Familiepyn is die diepste pyn, omdat dit so vroeg toegedien word en omdat mense wat betroubaar moes gewees het, daarby betrokke is. Jy was te jonk om die mishandeling te verwerk. Jy het nie geweet hoe om jouself te verdedig nie. Jou pa, ma, oom, ouer broer – hulle het bo jou uitgetroon, gewoonlik in grootte, altyd in rangorde. Wanneer hulle jou valslik geoordeel het, het jy hulle geglo. Al hierdie tyd was jy besig om volgens foutiewe data op te tree: ‘Jy is dom…stadig…dwaas soos jou pa…vet soos jou ma…’ Dekades later eggo daardie stemme van vernedering steeds in jou onderbewussyn. Dit hoef egter nie so te wees nie! ‘Die wapens van ons stryd is nie mensgemaak nie, maar die kragtige gevegstoerusting van God wat vestings kan vernietig…’ Gebruik die ‘verwerp en herhaal’ strategie en jy sal oorwinning oor jou denke behaal. Wanneer negatiewe, vreesagtige, skuldige, minderwaardige, veroordelende gedagtes by jou opkom, verwerp hulle en begin herhaal wat God in sy Woord oor jou sê. Soos God se Woord binne-in jou lewendig word, sal jou ou gedagtes begin doodgaan en hulle beheer oor jou verloor. Vernietig dus vandag daardie vesting en laat jou genesing begin.
Sielskos: 1 Sam 24-26; Matt 28:1-10; Ps 51; Spr 22:12-16
2019-09-26
Markus 6:31 NLV
Daar is ‘n antieke legende wat sê dat die apostel Johannes ‘n patrysvoël gehad het waarna hy omgesien het. Een dag het ‘n jagter hom besoek en was verbaas om hom met die voël te sien speel. ‘Ek is verras om te sien dat jy jou met sulke beuselagtighede besig hou wanneer daar belangrike sake rakende die evangelie is waarmee jy kon besig wees.’ Johannes het geantwoord: ‘Is jou boog altyd styf gespan?’ Die jagter het gesê: ‘Nee, dit sal die boog onbruikbaar maak. Ek maak die snaar los, tensy ek besig is om te jag.’ Die apostel het geknik en gesê: ‘Ek ook; ek maak my gedagtes vir dieselfde rede los.’ Raai wie het gesê: ‘Kom julle nou self eenkant toe na ‘n stil plek en skep ‘n bietjie asem.’ Jesus, die Persoon wat die meeste ooit in aanvraag was. Jesus is mos ons voorbeeld. Een dag het ‘n pastoor aangekondig dat hy nie op vakansie sou gaan nie, omdat die Duiwel nooit ‘n vakansie neem nie. Sommige gemeentelede het gelag; ander het gedink dat hy baie ‘geestelik’ is. Een man het egter huis toe gegaan en ondersoek ingestel of Jesus dieselfde houding gehad het. Hy het gevind dat Jesus in sy drie jaar van aktiewe bediening, tien periodes gehad het wat Hy weg van die skare gegaan het, tesame met sy nagtelike rus en die rus op die Sabbat. Die volgende Sondag het hy vir die pastoor gevra: ‘Volg jy die Duiwel se voorbeeld, of Jesus se voorbeeld?’ Ontspanning is presies dit: ‘n tyd om ontslae te raak van jou spanning, jou energie te vernuwe en jou kosbaarste verhoudings te voed. Neem dus die tyd om te rus.
Sielskos: 1 Sam 20:30-23:29; Matt 27:57-66; Ps 60; Spr 22:7-11
