2019-10-07
Nehemia 4:9 DB
God se soewereiniteit onthef ons nie van enige verantwoordelikheid nie. Die teenoorgestelde is waar. Dit bekragtig dit. Wanneer ons God vertrou, dink ons helder en reageer ons meer beslissend, soos Nehemia wat gesê het: ‘Maar ons het aanhoudend tot ons God gebid en dag en nag soldate op die mure laat wag staan.’ Nehemia het twee dinge gedoen. Hy het God vir sukses vertrou en op dit wat God vir hom gesê het om te doen, gereageer. Gebed nooi God uit om dinge te doen wat jy nie kan doen nie. Paulus het geskryf: ‘Moenie ophou bid nie’ (1 Tessalonisense 5:17 NLV). God kom die situasie deur uitnodiging binne. Totdat jy God se leiding soek, is jy aan die genade van jou eie en almal anders se gedagtes, uitgelewer. Hoekom sal jy met menslike kennis tevrede wees wanneer jy bonatuurlike insae kan hê? God het gesê: ‘Vra My, en Ek sal jou ‘n antwoord gee. Ek sal jou van ongelooflike dinge vertel. Dit is nou nog vir jou ‘n geheim, en jy weet niks daarvan nie’ (Jeremia 33:3 NLV). Wanneer God dan sy wil aan jou openbaar, moenie talm nie en moenie debatteer nie – doen dit! Voor God vir jou sy volgende stel instruksies gee, wil Hy weet dat jy sy vorige instruksies gehoorsaam het. Hoekom? Omdat Hy jou nie verder as jou laaste daad van ongehoorsaamheid kan seën nie. Stop dus en dink daaroor. As jy die verkeerde ding gedoen het, bely dit, verander jou koers en kom weer so gou as moontlik op die regte pad. “Wat Ek beveel het, was die volgende: ‘Wees aan My gehoorsaam en Ek sal julle God wees en julle sal my volk wees. As julle doen wat Ek sê, sal dit met julle goed gaan'” (Jeremia 7:23 NLV).
Sielskos: 2 Sam 12:1-14:20; Joh 2:12-25; Ps 89:1-14; Spr 23:10-14
2019-10-06
Filippense 2:3 NLV
As jy ‘n ‘ek eerste’ persoon is, kan hierdie Skrifgedeelte jou help om jou op jou tone – en op jou knieë – te hou. ‘Moet niks uit selfsug doen of om daarmee te spog nie. Wees eerder nederig deur van medegelowiges meer te dink as van jouself. Julle moenie net elkeen na sy eie belange omsien nie, maar ook na mekaar se belange. Julle gesindheid moet soos Jesus Christus s’n wees’ (Filippense 2:3-5 NLV). Dis hoe Jesus mense behandel het en jy is geroep om dieselfde te doen. Is dit maklik of gerieflik? Nee, dit druis teen alles in ons selfgesentreerde natuur in. Net omdat jy gister genadig was, beteken ook nie dat jy vandag mense dieselfde sal behandel nie. Genade is soos ‘n kleed; jy moet dit elke oggend aantrek en dit heeldag dra. ‘Hoe kan ek so lewe?’ vra jy. Deur daagliks krag uit God se genade te put en te besluit om ander mense eerste te stel. Deur op die uitkyk te wees vir geleenthede om hulle te ondersteun en te bemoedig. Almal wat jy ontmoet is besig om ‘n stryd te voer en jy mag dalk die een persoon wees wat oor hulle pad kom wat ‘n woord van bemoediging vir hulle kan gee (sien Spreuke 16:24). Moet hulle nie in die steek laat nie. Nederigheid is ‘n houding wat voor die tyd bepaal word: ‘Ek gee vir die mense rondom my om. Ek hoef nie altyd eerste te wees nie. Ek gaan vir ‘n verandering iemand anders help wen.’ Nederigheid bid: ‘Here, bekamp my mededingende natuur en verander daardie energie om ander mense op te lig en lief te hê. Wys my hoe U dit gedoen het en help my om dit ook te doen.’
Sielskos: Est 4:9-5:3; Heb 4:7-16
2019-10-05
1 Samuel 23:16 NLV
Die eerste swart man wat in die Amerikaanse bofbal liga gespeel het, se naam was Jackie Robinson. Hy het in elke stadion voor beledigings en mishandeling te staan gekom terwyl hy probeer het om deur bofbal se kleurgrens te breek. Een dag in sy tuisstadion in Brooklyn, het hy ‘n fout begaan. Terwyl die skare hom uitgejou het, het Robinson vernederd by die tweede bof gestaan. Sy spanmaat, Pee Wee Reese, het na hom gehardloop, sy arm om hom gesit en saam het hulle die skare aangekyk. Binne sekondes het die toeskouers stil geword. Jare later, toe Robinson vir sy loopbaan vereer is, het hy gesê: ‘Reese se arm om my skouer daardie dag, het my loopbaan gered.’ Jesus het geweet dat Petrus Hom sou verloën, daarom het Hy genade aan Petrus bewys nog voordat dit gebeur het. Hy het vir hom gesê: ‘…As jy weer tot inkeer gekom het, moet jy jou medegelowiges gaan ondersteun’ (Lukas 22:32 NLV). Wanneer God jou herstel, sal jy na ander met sy liefde wil uitreik. Jy sal volgens die Skrif lewe: ‘Versterk die moeë hande van dié wat moeg geword het. Bemoedig dié wie se knieë swak word en knik. Sê vir dié wat bang is: ‘Wees sterk en moenie bang wees nie. Want julle God kom… om julle te red!’ (Jesaja 35:3-4 NLV). Dawid se goeie vriend, Jonatan, ‘…het na hom toe gekom en hom bemoedig om op God te vertrou.’ Wanneer jy verlore voel, het jy ‘n Jonatan nodig. Dis wanneer die ou spreekwoord: ‘In voorspoed ken ons vriende ons, in teenspoed ken ons ons vriende,’ waar word. Hulle is die mense na wie ons in moeilike tye draai. As jy dus dink dat jy ooit so ‘n vriend nodig sal hê, wees een!
Sielskos: 2 Sam 7:18-11:27; Joh 2:1-11; Ps 110; Spr 23:6-9
2019-10-04
Jakobus 1:26 NLV
Wanneer iemand oor jou skinder, hou die volgende in gedagte: Mense is geneig om ander mense van dinge te beskuldig wat hulle in hulself verskoon. Daar is ‘n verhaal van ‘n man wat vermoed het dat sy vrou besig was om doof te word. Een aand het hy homself aan die ander kant van die kamer geposisioneer van waar sy met haar rug na hom toe gesit het. Saggies het hy gesê: ‘Kan jy my hoor?’ Toe sy nie antwoord nie, het hy ‘n bietjie nader gegaan en weer saggies gevra: ‘Kan jy my hoor?’ Steeds het hy geen antwoord gekry nie. Hy het nog nader beweeg. ‘Kan jy my hoor?’ Geen antwoord. Uiteindelik het hy tot agter haar stoel gestap en reg in haar oor gesê: ‘Kan jy my hoor?’ Sy het omgedraai en gesê: ‘Vir die vierde keer, ja!’ Sielkundiges noem hierdie verskynsel ‘projeksie.’ Ons is geneig om ons vrese, gevoelens en probleme op ander mense te projekteer. Jy moet egter nie toelaat dat ander mense dit aan jou doen nie. Dame Astor, ‘n lid van die Britse parlement, het Winston Churchill aanhoudend gekritiseer. Een dag het die twee aan die stry gegaan en sy het gesê: ‘Winston, ek hou nie van jou politiek nie en ek hou nie van jou snor nie.’ Hy het haar aangekyk en geantwoord: ‘Mevrou, ek sien geen rede op aarde hoekom jy ooit in kontak met een van die twee sal kom nie.’ Jesus se kritici het Hom daarvan beskuldig dat Hy deur demone besete was. Paulus se kritici het hom ‘n dwaas, ‘n mal man en ‘n praatjiesmaker genoem. Jy moet dus nie ander behandeling van dieselfde skare verwag nie. Die woord vir jou vandag is dus: Bly gefokus en moenie toelaat dat jou aandag afgetrek word nie.
Sielskos: 2 Sam 3:22-7:17; Joh 1:43-51; Ps 23; Spr 23:4-5
2019-10-03
Nehemia 6:6 NLV
Die enigste manier om kritiek te vermy is om niks te sê, niks te doen en niks te wees nie. Wanneer jy enigiets van belang of waarde aanpak, gaan mense oor jou praat. Nehemia se vyande het probeer om hom te weerhou om die mure van Jerusalem te herbou, deur skinderstories en skimpe te gebruik: ‘…Gesem het my vertel dat die mense onder mekaar praat en sê dat jy en die Jode ‘n opstand beplan… Volgens die gerugte het jy planne om koning te word. Hy vertel ook dat jy profete aangestel het om in Jerusalem oor jou te profeteer. Hulle sê glo: ‘Daar is nou ‘n koning in Juda!’…’ (verse 6-7 NLV). Let op dat die bron van hierdie gerugte nie bekend gemaak is nie. Wees altyd voorbereid wanneer iemand na jou toe kom en iets soos: ‘Ek het gehoor…’ of ‘Iemand het my vertel…’ of ‘Die woord op straat is…’ sê. Moet nooit kritiek wat iemand namens iemand anders bring, iemand wie se naam hulle nie wil noem of wie dit nie self vir jou sal sê, aanvaar nie. Let op hoe Nehemia gereageer het: “Ek het toe die volgende antwoord vir hom gestuur: ‘Jy weet jy praat nie die waarheid nie. Daar is nie ‘n greintjie waarheid in jou storie nie. Dit is goed wat jy self uitgedink het'” (vers 8 NLV). Met ander woorde: ‘Ek gee nie om wat jy dink, of sê, of waarvan jy hou nie. Ek gaan aanhou om hierdie muur te bou totdat die werk klaar is.’ Dit moet ook jou houding wees. Die meeste van die tyd het jou vriende nie ‘n verduideliking nodig nie en jou vyande sal jou in elk geval nie glo nie. Bly dus gefokus en maak die werk klaar.
Sielskos: 2 Sam 1:1-3:21; Joh 1:29-42; Ps 131; Spr 23:1-3
2019-10-02
Matteus 6:7 NLV
Hier is wat Jesus ons oor gebed geleer het: ‘Wanneer julle dan bid, moenie met woorde mors soos die heidene nie. Hulle dink hulle stortvloed woorde sal maak dat hulle gebede beantwoord word.’ Dan gee Hy vir ons twee spesifieke instruksies. Eerstens: ‘…maak die deur agter jou toe sodat jy daar in jou alleenheid tot jou Vader kan bid…’ (vers 6 NLV). Tweedens: ‘…julle Vader weet presies wat julle behoeftes is, selfs nog voordat julle Hom vra!’ (vers 8 NLV). Hartsgebede is nie vir menslike ore bedoel nie. Die Heilige Gees bring met hartsgebede die dinge wat jy versigtig vir ander mense en selfs vir jouself wegsteek, na die oppervlak. Soos ‘n spieël, konfronteer Hy jou met die waarheid en eis dat jy ‘die geheime dinge wat ‘n mens skaam maak’ (2 Korintiërs 4:2 NLV), bely. Wanneer jy dit gedoen het, kan jy God se teenwoordigheid gereinig, gekorrigeer, vol selfvertroue en met duidelikheid oor sy wil, verlaat. Niks vuur hartsgebede so goed soos ware behoefte aan nie. Dit laat beide die prominente en obskure erken: ‘Here, sonder U kan ek niks doen nie. Niks wat ek sonder U bereik, sal enigiets beteken nie!’ Dit is die plek van naakte gebed. Hanna was daar toe sy by God vir ‘n kind van haar eie gepleit het. Sy was so passievol dat die priester Eli gedink het dat sy dronk was (sien 1 Samuel 1:13). God het egter haar geroep gehoor. Daardie dag is Samuel in haar hart verwek en kort daarna is hy in haar moederskoot verwek. Moet dus nie die plek van gebed verlaat totdat die embrio van God se doel vir jou lewe in jou verwek word, in jou begin vorm aanneem en jou visie gebore word nie.
Sielskos: Ef 4:17-6:24; Joh 1:14-28; Ps 29; Spr 22:26-29
