2019-10-13
Markus 5:19 NLV
Die kragtigste getuienis is ‘n lewe wat sonder God, nie verduidelik kan word nie! Ses keer het Paulus voor vyandige gehore gestaan en elke keer het hy sy persoonlike getuienis gegee. Hy het nie gestry of gedebatteer nie – hy het net sy verhaal vertel. Dr David Yonggi Cho het die wêreld se grootste kerk in Suid-Korea gestig (een miljoen lede). Hy is deur ‘n dame wat hy net een keer ontmoet het, vir Christus gewen. Sy het haar getuienis gedeel, aanbeweeg en Cho, ‘n voormalige Boeddhis, het haar nooit weer opgespoor nie. Jou getuienis is ‘n wonderlike instrument, veral as dit deur ‘n beginselvaste lewe gerugsteun word. Mense wat nie na ander mense wil luister nie, sal na jou luister en reageer wanneer jy jou verhaal deel. Wanneer jy dit doen, moet jy hierdie vier beginsels in gedagte hou: 1) Wees interessant. Gee hulle die kort weergawe en vermy clichés. Jesus is opwindend; Hy het gekom om vir ons oorvloedige lewe te gee (sien Johannes 10:10). 2) Wees spesifiek. Praat oor: a) hoe dinge was; b) hoe jy Jesus ontmoet het; c) hoe die lewe nou is. 3) Wees eerlik. Moenie sê: ‘Al jou probleme sal verdwyn wanneer jy ‘n Christen word nie.’ Die Christelike lewe is ‘n oorlogsveld, nie ‘n speelveld nie. Laat mense weet dat jy steeds probleme het, maar dat iets belangriks verander het – jy is nie meer alleen nie: ‘…omdat die Gees wat in julle woon, magtiger is as die gees wat in die wêreld woon’ (1 Johannes 4:4 NLV). 4) Wees innemend. Moenie hulle in die koninkryk probeer inforseer nie. Wees genadig, saai die saad en gee die oes aan God oor. Gaan dus en ‘Vertel vir hulle wat die Here vir jou gedoen het.’
Sielskos: Eks 34:29-35; Mark 9:2-27; 2 Kor 3:7-18
2019-10-12
Josua 8:1 ABA
Wanneer jy geestelik aangeval word, moet jy jou met mense omring ‘wat kan oorlog maak.’ Hulle is ervare in geestelike oorlogvoering en weet hoe om korte mette met die Vyand te maak. Hulle het strategieë vir oorwinning en ‘n hardnekkige geloof wat opstaan en sê: ‘…As God aan ons kant is, wie kan ooit téén ons wees?’ (Romeine 8:31 NLV). Die waarheid is dat die mense wat oorlog kan maak, mense van die Woord is. Hulle weet hoe om die swaard van die gees, wat die Woord van God is, te neem en dit te gebruik om die Vyand te verslaan (sien Efesiërs 6:17). Hulle huiwer nie om na die Vyand se kamp op te mars en alles terug te neem wat hy van hulle gesteel het nie (sien 1 Samuel 30:8). Enigiemand kan jou in die goeie tye ondersteun, maar wanneer jy iemand kry wat jou in die slegte tye kan bystaan, moet jy hulle waardeer en ‘n verhouding met hulle bou. Die Bybel sê: ‘…Jou broer is gebore om jou te help wanneer daar probleme is’ (Spreuke 17:17 NLV). Let op – hulle is vir oorlog gebore! Hulle is nie net sterk in geloof nie, hulle is sterk in oorlogvoering. Hulle weet hoe om die troon van genade te benader en die beloftes van God op te eis (sien Hebreërs 4:16). Nadat Josua Jerigo ingeneem het, het God vir hom gesê: ‘Jy moenie bang en bekommerd wees nie, jy moet al die manne neem wat kan oorlog maak en jy moet dadelik na die stad Ai gaan. Ek sal jou laat wen teen die koning van Ai en sy manne, en teen sy stad en sy land.’ As jy dus vandag in ‘n stryd betrokke is, neem die mense wat kan oorlog maak, saam met jou.
Sielskos: 2 Sam 22:31-24:25; Joh 4:13-26; Ps 32; Spr 23:29-35
2019-10-11
Filippense 4:6-7 NLV
God se vrede is wonderlik. Sommige mense rondom jou het dit vandag nodig. Jy ontvang dit wanneer jy jou lewe aan God toevertrou en volgens die beginsels wat in die Skrif weergegee word, lewe. Wanneer jy iets aan God ‘toevertrou,’ gee jy elke deel daarvan aan Hom (sien Psalm 37:5). Petrus skryf: ‘Gee al julle bekommernisse aan God oor, want Hy gee vir julle om’ (1 Petrus 5:7 NLV). Wat ‘n voorreg. Het jy onlangs daarvan gebruik gemaak? ‘Hoe gee ek al my bekommernisse aan Hom oor?’ vra jy. Deur gebed! Sodra jy bewus word dat jy jouself begin bekommer en jou sin vir vrede begin verloor, neem dit onmiddellik na God toe en los dit daar by Hom. Moenie die Duiwel kans gee om aan jou te begin werk nie. Hoe langer jy wag, hoe groter word sy houvas op jou. ‘Maar ek kan nie help om daaraan te dink nie,’ sê jy. ‘Wat kan ek doen?’ Hierdie twee dinge: 1) Gee dit oor aan God en begin op ander dinge fokus. Dis ‘n reaksie wat jy moet aanleer en een wat jy daagliks moet oefen. Paulus skryf: ‘…beplan alles wat waar, eerbaar, skoon, suiwer, lieflik en lofwaardig is… Dan sal die God wat vrede gee, by julle wees’ (Filippense 4:8-9 NLV). Met ander woorde, herlei jou gedagtes! 2) Vind uit wat God in sy Woord oor jou situasie sê. Bring dan jou gedagtes, woorde en aksies in lyn daarmee. As jy dit doen, sal jy God se vrede beleef.
Sielskos: 2 Sam 20:1-22:30; Joh 4:1-12; Ps 100; Spr 23:22-28
2019-10-10
Filippense 3:14 NLV
Die tydskrif Life het in 1972 ‘n storie oor die wonderbaarlike avonture van John Goddard gepubliseer. Toe hy vyftien jaar oud was, het Goddard se ouma gesê: ‘As ek dit maar net gedoen het toe ek jonk was.’ John was vasbeslote om nie dieselfde stelling aan die einde van sy lewe te maak nie en het toe 127 doelwitte vir sy lewe neergeskryf. Hy het tien riviere genoem wat hy wou verken en sewentien berge wat hy wou uitklim. Hy wou ‘n wêreldreisiger en ‘n vlieënier word. Ook op sy lys was om ‘n perd in die Rose Bowl parade te ry, in ‘n duikboot te duik, Marco Polo se spoor na te loop, die Bybel van voor tot agter deur te lees en die hele Encyclopedia Britannica te lees. Hy het ook beplan om die werke van Shakespeare, Plato, Dickens, Socrates, Aristotel en verskeie ander klassieke skrywers te lees. Hy wou graag die fluit en viool leer speel, trou, kinders kry (hy het vyf kinders gehad), ‘n dokter word en as sendeling vir sy kerk dien. Klink dit onmoontlik? Op die ouderdom van sewe-en-veertig het hy 103 van sy 127 doelwitte bereik! Jou lys van doelwitte mag dalk nie so uitgebrei soos syne wees nie, maar as jy nie ten minste ‘n paar doelwitte vir jou lewe het nie, sal jy min motivering hê om in die oggend op te staan en min bevrediging hê wanneer jy in die aand jou kop op jou kussing neerlê. Tensy jy iets probeer wat jy nog nie voorheen bemeester het nie, sal jy nie groei nie. Stel dus jou doelwitte in gebed saam en werk elke dag, met God se hulp, daarnatoe.
Sielskos: 2 Sam 17:14-19:43; Joh 3:22-36; Ps 89:38-52; Spr 23:19-21
2019-10-09
Spreuke 24:16 NLV
In die nag van 9 Desember, 1914, is Edison Industries deur ‘n brand vernietig. Dit het skade van twee miljoen dollars aangerig en die meeste van Thomas Edison se werk is in die brand vernietig. Hy was net vir 238 dollars verseker, omdat die gebou van beton gebou was en Edison gedink het dat dit vuurbestand was. Op die ouderdom van sewe-en-sestig, het die groot uitvinder sy lewenswerk in vlamme sien opgaan. Die volgende oggend het die brandbestryders uiteindelik die vuur onder beheer gebring. Soos hy die toneel voor hom bekyk het, het Edison gesê: ‘Daar is groot waarde in rampspoed. Al ons foute het in vlamme opgegaan. Dank Vader ons kan weer opnuut begin.’ Drie weke na die brand, het Edison een van sy grootste uitvindings geproduseer: die eerste fonograaf. Dink net hoe sou die wêreld van musiek en vermaak sonder die fonograaf gelyk het! Die Bybel sê: ‘Selfs al val ‘n regverdige mens sewe keer, hy sal elke keer weer opstaan. Die goddelose mens sal bly lê na net een ramp.’ Met God aan jou kant kan jy weer begin, omdat die krag om dit te doen binne-in jou lê. Dis dieselfde krag wat Christus uit die dood opgewek het (sien Romeine 8:11). Paulus het vir die gelowiges in Efese gebid: ‘Mag Hy deur sy Gees uit die rykdom van sy Goddelike grootheid aan julle die krag gee om innerlik sterk te word’ (Efesiërs 3:16 NLV). Waar is jou krag geleë? In jou binneste wese. Paulus gaan voort: ‘Hy moet geprys word – Hy wat mag het om deur die krag wat in ons werk, oneindig meer te doen as wat ons vra of dink om te vra’ (Efesiërs 3:20 NLV). Die woord vir jou vandag is dus – jy kan weer begin.
Sielskos: Lev 16; Lev 23:26-32; Heb 9:1-14; Heb 13:11-16
2019-10-08
Psalm 134:1 NLV
Die laaste vers van die laaste Psalm in die Bybel sê: ‘Laat alles wat lewe, die Here loof! Loof die Here!’ (Psalm 150:6 NLV). Dit beteken dat jy, so lank as wat jy lewe, geroep is om God te aanbid. Sommige van ons is geroepe om lofprysers in die kerk te wees, terwyl ander van ons geroepe is om werkers te wees. Terwyl almal van ons geroepe is om God te aanbid, is sommige van ons meer geneig om dit deur lofprysing te doen, terwyl ander meer geneig is om dit deur dade te doen. God tel albei as dade van diens. Die Psalmdigter het gesê: ‘Prys die Here, alle dienaars van die Here. Julle wat snags diens doen in die huis van die Here, verhef julle hande in die heiligdom en prys die Here’ (Psalm 134:1-2 NLV). Let die woorde ‘dienaars van die Here’ op. Hoe was hulle besig om Hom te dien? Deur Hom te aanbid. Die Westminster Geloofsbelydenis sê: ‘The chief end of man is that he might glorify God.’ Daar is baie maniere om dit te doen: ‘Hy wat ‘n dankoffer bring, eer My…’ (Psalm 50:23 NLV). Aanbidding is soos ‘n termostaat; dit skep ‘n klimaat waarin God se teenwoordigheid ervaar en geniet kan word. Dawid het gesê: ‘Ek wil die lof van die Here verkondig. Met alles wat binne-in my is, wil ek sy heilige Naam verheerlik. Ek wil die Here prys en nie sy goeie dade vergeet nie’ (Psalm 103:1-2 NLV). Wat ‘n voordelige pakket! Vergifnis, genesing, redding en beskerming. Hoe ontvang ons hierdie voordele? Deur aanbidding. Wanneer ons die Here seën, seën Hy ons. Wanneer jy Hom dus aanbid, dien jy God.
Sielskos: 2 Sam 14:21-17:13; Joh 3:1-21; Ps 89:15-37; Spr 23:15-18
