2019-08-20
Johannes 16:33 NLV
Sesdens, moet jy jou probleme in perspektief probeer hou. Jy het seker al die gesegde gehoor: ‘Ek het gekla omdat ek nie skoene het nie, totdat ek ‘n man sonder voete ontmoet het.’ In ‘n Peanuts strokiesprent, sien Snoopy hoe die familie om die tafel sit en aandete eet terwyl hy buite sy hondekos moet eet. ‘Kyk nou net,’ dink hy. ‘Almal eet lekker hoender, maar omdat ek ‘n hond is kry ek net hondekos.’ Dan vind hy skielik weer perspektief. ‘Natuurlik kon dinge erger gewees het – ek kon ‘n hoender gewees het!’ Dis gewoonlik ons perspektief wat bepaal hoe groot of moeilik ons probleem lyk. Die meeste moeilikheid waarvoor ons te staan kom is redelike onbeduidend in die groter prentjie. Wanneer ‘n vriend kanker kry of ‘n geliefde verloor, word ons herinner hoe kleinlik ons kwessies eintlik is. Die skrywer James Agee onthou hoe hy een keer ‘n gesprek met ‘n arm bejaarde vrou in die hartjie van die Appalache tydens die Groot Depressie aangeknoop het. Sy het in ‘n piepklein krot met grondvloere, geen elektrisiteit en geen binnenshuise riool, gewoon. ‘Wat sou jy doen,’ het hy gevra, ‘as iemand vir jou geld sou gee om jou te help?’ Die vrou het vir ‘n oomblik daaroor nagedink en geantwoord: ‘Ek sou dit seker vir die armes gee.’ Deur te besef dat daar mense rondom jou is wat baie groter probleme as jy het, bring dankbaarheid en perspektief mee. Jesus het gesê: ‘Ek sê hierdie dinge vir julle sodat julle in My rus en vrede kan vind. In die wêreld sal julle swaarkry beleef, maar skep moed: Ek het die wêreld reeds oorwin.’
Sielskos: Klaag 1:1-3:39; Matt 19:15-30; Ps 119:121-128; Spr 18:13-20
2019-08-19
Spreuke 16:9 NLV
Vyfdens, moenie net die probleem sien nie, wees ook op die uitkyk vir ‘n geleentheid. Toe president John Kennedy gevra is hoe hy ‘n oorlogsheld geword het, het hy geglimlag en geskerts: ‘Dit was maklik. Iemand het my boot gesink!’ Terwyl dit waar is dat sekere individue ‘n visie het en dit nastreef, is dit dikwels teenspoed wat die pad na sukses teer. Dit was die geval vir ‘n man wie se klein besigheid besig was om te misluk: ‘Ek het die balju vyf dollars ‘n dag betaal om die vonnis op my klein fabriek uit te stel. Toe het die man van die gasmaatskappy opgedaag en omdat ek nie my rekening kon betaal nie, het hy my gastoevoer afgesny. Ek was in die middel van baie belangrike eksperimente en dit het my so kwaad gemaak dat ek begin oplees het oor gastegnieke en besluit het om te probeer uitvind of elektrisiteit nie gebruik kon word om gas te vervang nie.’ Daardie man was Thomas Edison, die stigter van General Electric. Probleme wakker kreatiwiteit aan. As jy besluit om wakker te word en op te staan, sal probleme jou aanpor om jou Godgegewe vermoëns te gebruik, jou hulpbronne bymekaar te skraap en vorentoe te beweeg. Die waarheid is dat ons sonder sekere probleme in die verkeerde plek, saam met die verkeerde mense, besig met die verkeerde dinge, sal opeindig. “‘n Mens beplan sy koers, maar die Here bepaal sy bestemming.” Uit pyn kom doelwitte en uit verwoesting kom rigting. Praat dus met God oor jou probleem; laat Hom toe om jou die potensiaal wat dit inhou en dit wat Hy vir jou in gedagte het, te wys.
Sielskos: Gal 4-6; Matt 19:1-14; Ps 119:113-120; Spr 18:10-12
2019-08-18
Spreuke 14:15 NLV
Vierdens, evalueer die probleem versigtig en biddend. Koning Salomo sê dat ons tyd moet neem om al die feite te evalueer en nie impulsief moet optree nie: “‘n Dwaas glo alles wat hy hoor. ‘n Verstandige mens oorweeg elke tree wat hy gee.” ‘Iemand wat ‘n antwoord gee voor hy die vraag gehoor het, is dwaas. Skande wag vir hom’ (Spreuke 18:13 NLV). Wanneer pasiënte in pyn is, wil hulle vinnige verligting hê. Die dokter weet egter dat die pyn korrek gediagnoseer moet word om sodoende die regte medikasie voor te skryf en die pasiënt weer heel te maak. Vir jou beteken dit dat jy jouself moet afvra: ‘Wie of wat het hierdie probleem veroorsaak? Maak ek ‘n berg van ‘n molshoop? Het dit die potensiaal om ware skade te veroorsaak, of sal ek volgende week hierdie tyd daarvan vergeet het?’ As jy nie die probleem reg diagnoseer nie, sal jy moet teruggaan en oor begin en dan sal die oplossing dalk pynliker en duurder wees. Mike Leavitt, die voormalige Amerikaanse minister van Gesondheid en Menslike Dienste, het gesê: ‘Daar is ‘n tyd in die leeftyd van elke probleem, waar dit groot genoeg is om gesien te word, maar nog klein genoeg is om op te los.’ Die sleutel is om die regte tyd te vind en geduldig te wees wanneer jy die oplossing implementeer. Onervare mense verwag dat die probleem onmiddellik opgelos sal wees. Ervare mense is egter soos die meesterbeeldhouer wat die marmerblok met bestendige hale van die hamer takel. Anders as die amateur wat die blok met een haal in twee kap, weet hy dat hy met aanhoudende werk uiteindelik sukses sal behaal.
Sielskos: Gen 6:9-8:4; Matt 24:37-51
2019-08-17
Nehemia 6:11 NLV
Derdens, moet jy die probleem aanpak. Toe Nehemia deur sy vyande gedreig is, het sommige van sy vriende hom aangeraai om in die tempel te gaan wegkruip. Hy het egter geantwoord: ‘…Behoort iemand soos ek vir gevaar weg te vlug? Behoort iemand soos ek in die tempel te skuil om my lewe te red? Nee, ek sal nie ingaan nie!’ Gevolglik het Nehemia Jerusalem se mure in twee maande herbou – ‘n ongelooflike prestasie. Jare gelede het ‘n gewilde televisieadvertensie oor verslawing en mishandeling ‘n tipiese familie aan huis gewys. Die kinders was besig om te speel, die ma het gestofsuig en die pa was besig om die koerant te lees. Hulle het soos ‘n normale gesin gelyk, behalwe vir een probleem: daar was ‘n groot olifant saam met hulle in die kamer. Selfs al kon hulle sien dat dit hulle lewens bemoeilik het en dat hulle rondom die olifant moes werk, het hulle dit geïgnoreer en gemaak asof dit nie bestaan het nie. Dis van toepassing op probleme wat ons nie wil aanspreek nie, dus maak ons of alles reg is. Ons reageer tipies op vier maniere op ‘n probleem: 1) Ons vlug daarvan weg: Ons probeer daarvan ontsnap, maar die probleem volg ons altyd. 2) Ons probeer daarvan vergeet: Ons hoop dit sal weggaan as ons nie daaraan dink nie. Probleme raak egter gewoonlik erger as daar nie aandag aan hulle gegee word nie. 3) Ons probeer dit beveg: Dit wat ons probeer weerstaan, bly gewoonlik ‘n probleem. 4) Ons pak dit aan. Ons kyk realisties na die probleem en hanteer dit. As ons wys is, reik ons na God uit vir hulp en verklaar: ‘…Die Here is my hulp. Daarom sal ek nie bang wees nie…’ (Hebreërs 13:6 NLV).
Sielskos: Gal 1-3; Matt 18:21-35; Ps 119:105-112; Spr 18:9
2019-08-15
Numeri 21:4 NLV
Om die Beloofde Land te bereik, moes die Israeliete ‘…met die pad na die Rietsee toe [reis] om by Edom verby te kom’ (vers 4 NLV). Dit het die reis baie langer gemaak en ‘…Langs die pad het hulle ongeduldig begin word.’ Daar is ‘n les hier uit te leer. Die beste manier om ‘n probleem te vermy is om dit op te los. Tussen jou en jou ‘beloofde land’ sal jy voor kwessies te staan kom wat opgelos moet word. Om struikelblokke te herken vir wat hulle is – tydelike toetse van jou voornemens, vermoë en geloof in God – sal jou niks baat as jy nie weet hoe om hulle te hanteer nie. Kom ons bespreek dus probleemoplossing. Eerstens, besef dat jy altyd probleme sal hê. Al Davis, die eienaar van die Oakland Raiders voetbalspan, het gesê: “‘n Goeie leier sien probleme nie as iets spesiaals nie. Hy sien hulle as normaal. As jy werk, moet jy probleme verwag. As jy ‘n familie het, moet jy probleme verwag. As jy jou by jou eie sake bepaal en net ontspan, moet jy probleme verwag. As alles volgens plan verloop, moet jy aangenaamd verras wees. As dinge nie volgens plan verloop nie en jy het daarvolgens beplan, sal jy nie so gefrustreerd word nie. ‘n Verwagte probleem is ‘n geleentheid.” Paulus het gesê: ‘Hy moet geprys word – Hy wat mag het om deur die krag wat in ons werk, oneindig meer te doen as wat ons vra of dink om te vra’ (Efesiërs 3:20 NLV). Die probleem wat jou vandag in die gesig staar, is net ‘n geleentheid vir God om dit wat jy nie self kan doen nie, vir jou of deur jou te doen.
Sielskos: Rig 16:1-19:15; Matt 18:1-9; Ps 119:89-96; Spr 18:1-5
2019-08-14
Kolossense 3:13 NLV
Wanneer ‘n skeisaak jou familie versplinter, hoe kan jy jou kinders help? Eerstens, hou op praat oor wie hulle nie aanvaar nie en omring hulle net mense wat doen. Jou liefde as ouer kan ‘n lang pad stap om te vergoed vir iemand anders se verwaarlosing. Verduidelik dat mense soms saam groei, maar ander kere verby mekaar groei. Herinner hulle dat ‘Ken’ en ‘Barbie’ net poppe is en berei hulle voor om in die regte wêreld te lewe. Moedig hulle aan om sterk, nie selfbejammerend nie, te wees. Soos hulle ouer word, leer hulle dat indien hulle hulself moet verander om by iemand te pas, dit nie die regte persoon vir hulle is nie. Wanneer liefde reg is, kan dit met sterk- en swakpunte onder dieselfde dak woon, want ‘…sulke liefde maak baie sondes toe’ (1 Petrus 4:8 NLV). Ware liefde bedek ‘n fout soos ‘n versekeringspolis ‘n bestuurder in ‘n ongeluk dek. Moenie jou kind as ‘n wapen gebruik om mekaar te na te kom nie. Maak seker dat hulle verstaan dat jy die een is wat skei, nie hulle nie. Verduidelik dat iemand dalk ongeskik as ‘n eggenoot is, maar steeds ‘n goeie ouer kan wees. Wanneer jy die blaam wegvat, neem jy die skande weg en kan almal vorentoe beweeg. Bitterheid is ‘n dief, maar jy hoef nie toe te laat dat dit jou vrede, jou kreatiwiteit, jou lied of jou hoop vir ‘n beter toekoms steel nie. Begin vandag ‘n nuwe lewe vir jou en jou kinders bou. God se belofte is: ‘Ek gaan iets nuuts doen…’ (Jesaja 43:19 NLV). Jy kan dus oor begin en begin herbou.
Sielskos: Rig 12-15; Matt 17:14-27; Ps 119:81-88; Spr 17:27-28
