Wat om op jou lewensreis te verwag (1)

Die Bybel sê vir ons: ‘Omdat hy geglo het, het Abraham, toe God hom geroep het, gehoorsaam weggetrek na die land wat God vir hom as ‘n erfdeel sou gee. Hy het weggetrek sonder om te weet waar hy sou beland.’ Kom ons kyk vir die volgende paar dae na sommige van die dinge wat jy op jou lewensreis kan verwag.

1) Geleenthede en teenstand. Paulus het geskryf: ‘want hier staan nou ‘n wye deur vir my oop en daar is baie mense wat reageer. Daar is egter ook baie teenstanders’ (1 Korintiërs 16:9 NLV). As jy nie struikelblokke en teenstand teëkom nie, moet jy vir God vra of jy op die regte pad is. Die grootte van jou Godgegewe opdrag bepaal gewoonlik die omvang van die aanval teen jou. Daar is egter goeie nuus: Aanvalle is ‘n teken van respek. Dit beteken dat die Vyand jou as ‘n bedreiging vir sy planne sien.

2) Terugslae wat bedoel is om jou te ontspoor. ‘Selfs al val ‘n regverdige mens sewe keer, hy sal elke keer weer opstaan…’ (Spreuke 24:16 NLV). Mislukkings maak nie van jou ‘n mislukking nie, maar wanneer jy tou opgooi, doen dit! Jy word ‘n mislukking wanneer jy nie daaruit leer nie, weier om jou metodes te verander, weier om raad te aanvaar en weier om weer te probeer! As sonde veroorsaak dat jy struikel, moet jy dit bely en dit afsweer; en dan weer op die regte pad voortgaan. Indien jy geval het omdat jy iets nuuts en onbekend gepoog het, moenie te hard op jouself wees nie. Put eerder krag uit God se genade, besluit om beter te doen en hou aan vorentoe beweeg. Om dr John Maxwell aan te haal: ‘Misluk vroeg, misluk dikwels – en misluk altyd vorentoe!’

Sielskos: 1 Sam 11-13; Luk 24:25-35; Ps 60; Spr 22:7-11