Hoe om jou visie te ontdek (5)

Robert Woodruff was van 1923 tot 1955 die president van die Coca-Cola maatskappy. Hy wou die koeldrank vir elke Amerikaanse dienspligtige regoor die wêreld vir slegs vyf sent beskikbaar maak, maak nie saak hoeveel dit die maatskappy sou kos nie. Dit was ‘n gewaagde doelwit! Dit was egter beskeie in vergelyking met die groot prentjie wat hy in sy gedagtes gesien het. Woodruff wou gehad het dat almal in die wêreld tydens sy leeftyd, Coca-Cola moet proe.

Let drie dinge op: 1) ‘n Visie begin binne jou. Wanneer jy inwaarts kyk, wat sien jy? Jy kan nie ‘n visie koop, bedel of leen nie; jy moet in jouself kyk en krag uit jou innerlike gawes en begeertes put. Waaroor voel jy passievol? Waaraan dink jy aanhoudend? Waaroor bid jy? Waarvoor sal jy bereid wees om alles op te offer? Jou hardnekkigste begeerte sal jou in die rigting van jou visie stuur.

2) ‘n Visie maak gebruik van jou geskiedenis. ‘n Visie is nie een of ander mistieke eienskap wat uit ‘n vakuum realiseer nie; dit is met jou verlede en die geskiedenis van die mense rondom jou, verweef. As jou visie uit God gebore word, sal dit nie net tot jou eie voordeel wees nie, maar ook tot die voordeel van ander mense wees.

3) ‘n Visie trek hulpbronne aan. Een van die unieke eienskappe van ‘n visie is dat dit soos ‘n magneet is – dit trek mense aan, daag hulle uit en verenig hulle. Dit maak finansies en ander hulpbronne bymekaar. Hoe meer uitdagend die visie is, hoe harder sal die deelnemers baklei om dit ‘n realiteit te maak.

Vra dus vandag vir God om jou ‘n visie vir jou lewe te gee, en kyk hoe dit alles bymekaar kom.

Sielskos: Kol 3-4; Filemon; Joh 17:13-26; Ps 148:1-6; Spr 29:11-15