Druk deur en raak aan Jesus

Jesus het ‘n vrou genees wat al twaalf jaar aan bloedvloeiing gely het. Let op hoe haar wonderwerk plaasgevind het. Sy het deur die skare gedruk ‘…en aan die rand van sy jas geraak’ (Matteus 9:20 NLV) en is onmiddellik genees. Gevolglik het mense daaroor begin praat en ‘n nuwe neiging het begin. Vier hoofstukke later lees ons dat mense begin het om ‘…al hulle siekes na Hom toe [te] bring. Die siekes het Hom gesmeek om aan Hom te mag raak, al was dit maar net aan die onderste rand van sy jas. En almal wat daaraan geraak het, het gesond geword’ (Matteus 14:35-36 NLV). As jy vandag teen siekte of verslawing stry, druk deur en raak aan Jesus. Hou aan bid en glo in sy Woord. Wees hardnekkig! Daar is ‘n verskil tussen die feite en die waarheid. Die feit mag wees dat jou prognose nie goed lyk nie. Die waarheid is egter: ‘En ‘n gelowige gebed sal die siek mens gesond laat word; die Here sal hom laat opstaan’ (Jakobus 5:15 NLV). Jy sê: ‘Ek ken mense wat vir genesing gebid het en dit nie ontvang het nie.’ Ja, en as hulle op Christus as hulle Redder vertrou het, het hulle die uiteindelike genesing ontvang: ‘…om te vertrek en persoonlik by Christus te wees, want dit is… verreweg die beste’ (Filippense 1:23 NLV). Wanneer dit ons tyd is om te gaan, sterf ons almal aan iets. Tot dan, sê God se Woord dat dieselfde rug wat die kruis gedra het om ons sonde weg te neem, die merke gedra het om ons siekte weg te vat. “…Hy het almal wat siek was, gesond gemaak. So het die uitspraak van Jesaja waar geword wat lui: ‘Hy het ons kwale sy eie gemaak, en ons siektes het Hy op Homself geneem'” (Matteus 8:16-17 NLV).

Sielskos: Deut 32:29-34:12; Luk 13:1-17; Ps 119:57-64; Spr 17:22