2018-11-30
1 Petrus 1:7 NLV
Die toetse waar voor ons te staan kom, openbaar beide ons swakpunte en ons sterkpunte. Wanneer die Bybel van ‘n ‘…vuur wat metaal suiwer…’ (Maleagi 3:2 NLV) praat, is ons geneig om aan die negatiewe dinge wat God uit ons karakter wil verwyder, te dink. Ons het egter ook innerlike sterkpunte en gawes wat gesuiwer moet word waarvan ons nie bewus is nie, omdat daar nog nie ‘n vereiste op hulle geplaas is nie. In 1 Konings 17, toe die weduwee en haar seun Elia ontmoet het, was daar hongersnood in die land en hy het hulle gevra om hulle laaste maaltyd met hom te deel. Miskien dink jy, ‘Tipies prediker!’ Moenie te gou gevolgtrekkings maak nie! Een van die beste dae van hierdie vrou se lewe is toe God iets van haar geloof vereis het. Haar reaksie het haar toekoms verander en haar familie gered. Wanneer jy dus voor ‘n behoefte te staan kom, hoe reageer jy? Onttrek jy? Weerhou jy? Gee jy uit ‘n sin van verpligting? Of sien jy dit as ‘n geleentheid om God te gehoorsaam en jou toekoms te verander? Toe God vir Moses na Farao toe gestuur het, het Hy gesê, ‘Ek weet dat die koning van Egipte julle nie sal laat gaan nie. Hy sal eers gedwing moet word. Daarom sal Ek ingryp…’ (Eksodus 3:19-20 NLV). Vandag mag God dalk die vyand toelaat om jou te toets, om sodoende die volgende te openbaar: 1) hoe baie Hy vir jou omgee; 2) hoe jy sal optree wanneer jou rug teen die muur is; 3) wie jy sal glo wanneer God sê dat Hy sal ingryp en die Vyand sê dat hy jou nie sal laat gaan nie. Dis waaroor hierdie toets gaan.
Sielskos: Gen 24:1-25:18; Joh 14:15-25; Ps 118:19-29; Spr 31:14-17
2018-11-29
Hebreërs 12:2 DB
Betreffende Jesus, sê die Bybel: ‘… Hy het dit alles verdra omdat Hy geweet het dat daar soveel blydskap daarna vir Hom wag… Hou Hom gedurig in gedagte… As julle sy voorbeeld volg, sal julle nooit moedeloos word en tou opgooi nie’ (verse 2-3 DB). Dis jou visie wat jou passie voed. Het jy al ooit agtergekom hoe God dikwels die ergste sondaars in sy grootste dienaars transformeer? Dis omdat hulle passievol is en sodra daardie passie geharnas en herlei word, word hulle effektief in sy koninkryk. Nou verstaan jy hoekom die Vyand so hard probeer om jou te vernietig. Hy weet dat daar geen keer aan jou sal wees sodra jy jou passie met God se plan in lyn gebring het nie. Passie is geestelike energie. In plaas daarvan om te probeer om jou passie te onderdruk, laat God dit herlei. Jesus het vir die kerk in die eindtyd gesê, ‘…Ek weet dat jy nie koud of warm is nie. Ek sou wat wou gee as jy maar net koud of warm was’ (Openbaring 3:15 NLV). Met wie praat Hy? Belydende Christene wat lewe, trou, kinders kry, karre koop, beleggings maak en al die dinge van hulle moderne eweknieë doen, maar dit sonder passie doen. Hulle gaan net deur die bewegings. Die Bybel sê, ‘Beproef en sien…’ (Psalm 34:9 NLV). Met ander woorde, neem posisie in en swaai die kolf! Wat daarvan as jy mis? Jy sal verseker mis as jy nie die kolf swaai nie! Jou instink vir selfbehoud kan jou van die enigste kans wat jy dalk in die lewe kry, beroof. As jy dus vandag lê, staan weer op. As jy misluk, probeer weer. Vra God om die vure van passie weer binne jou aan die brand te blaas.
Sielskos: Gen 20-23; Joh 14:1-14; Ps 118:10-18; Spr 31:10-13
2018-11-28
Jesaja 41:10 NLV
Om sukses in die lewe te behaal, het jy twee dinge nodig: 1) Die regte mense. Soms is die eerste stap om uit moedeloosheid te kom, om iemand te vind wat jou daaruit kan lig. Moenie soos die ou wees wat op die punt was om by die brug af te spring toe ‘n polisieman hom genader het en gesê het, ‘Niks kan so erg wees nie. Vertel my daarvan.’ Toe die ou klaar gepraat het – het hulle altwee gespring! Jy mag dalk glimlag, maar die geselskap wat jy hou, kan jou of oplig of aftrek. Paulus het geskryf, ‘God, wat die vernederdes bystaan, het ons ook ondersteun deur die teenwoordigheid van Titus’ (2 Korintiërs 7:6 NLV). Jy het ‘n Titus in jou lewe nodig en jy moet ‘n Titus vir ander mense word. Die Bybel sê, ‘Help ander gelowiges wat swaarkry…’ (Galasiërs 6:2 NLV). 2) Die regte perspektief. Meer as die helfte van verkoopsmense misluk omdat hulle nie ‘n tweede of derde keer teruggaan nie. Omtrent 58 persent maak een oproep en stop dan. 25 persent maak twee oproepe en stop dan. Vyftien persent maak drie oproepe en stop dan. Die twaalf persent wat weer en weer teruggaan, maak 80 persent van alle verkope uit. Dis die groep waarin jy behoort. Moenie met mislukking tevrede wees nie; staan op en probeer weer! God sal saam met jou werk (sien Filippense 1:6). Weier om nederlae te aanvaar. Onthou, jy sal beloon word vir dit wat jy klaargemaak het, nie vir dit wat jy begin het nie. Soms is die laaste sleutel aan die ring die een wat die deur oopsluit, so vra dus vir God vir die krag om aan te hou totdat jy wen!
Sielskos: Gen 17-19; Joh 13:31-38; Ps 118:1-9; Spr 31:6-9
2018-11-27
Spreuke 18:24 NLV
Een dag het twee koeie oor ‘n heining gekyk en die volgende woorde op ‘n verbygaande melktrok gesien: ‘Gepasteuriseerd, Gehomogeniseerd, Vitamiene A bygevoeg.’ Een koei het vir die ander koei gesê, ‘Dit laat mens bietjie onvoldoende voel, nie waar nie?’ Is dit hoe jy vandag voel? Daar is soveel om te doen en nie genoeg van jou om dit te doen nie? Of jy dink dat jy nie die vermoë en hulpbronne het nie? Onthou die ou Beatles liedjie: ‘When I was younger, so much younger than today, I never needed anybody’s help in any way…Help me if you can, I’m feeling down, and I do appreciate you being round. Help me get my feet back on the ground; won’t you please, please help me?’ Selfs in ‘n perfekte wêreld kon Adam nie op sy eie regkom nie, dus het God gesê, ‘…Ek sal vir hom ‘n metgesel maak, sy gelyke wat hom kan help’ (Genesis 2:18 NLV). Soms vereis die oplossing meer as gebed of berading; dit verg ‘n vriend wat verstaan – veral een wat al dieselfde gevegte geveg en gewen het. In Handelinge hoofstuk drie het God vir Petrus en Johannes gebruik om ‘n verlamde man wat by die tempelpoort gesit het, te genees. Daar het egter ‘n ander wonderwerk vroeër gebeur. Petrus het vir Jesus verloën, plat op sy gesig geval en na sy ou vissermanswerk teruggekeer. Johannes het egter geweier om hom te laat gaan. Gevolglik is Petrus herstel, ‘n verlamde man is genees en drie duisend mense is vir Christus gewen. Jy het nie baie mense in jou lewe nodig nie; jy het net die regte mense nodig. Vra dus vir God vir ‘n ware vriend wat aan jou sy sal bly; en doen dan dieselfde vir iemand anders.
Sielskos: Gen 13-16; Joh 13:18-30; Ps 114; Spr 31:1-5
2018-11-26
2 Konings 2:9 NLV
In die Ou Testament, ‘…sê Elia vir Elisa: ‘Wat kan ek vir jou doen voordat ek van jou weggeneem word?’ ‘Laat my asseblief ‘n dubbele erfgenaamsdeel van u gees ontvang,’ antwoord Elisa. ‘Jy vra my ‘n moeilike saak,’ antwoord Elia. ‘As jy sien hoe ek van jou af weggeneem word, sal jy dit ontvang’…’ (verse 9-10 NLV). Elisa het sy ‘dubbele erfgenaamsdeel’ ontvang en aangegaan om twee keer soveel wonderwerke as sy mentor, Elia, te doen. Die sleutelfrase hier is: ‘As jy sien hoe ek van jou weggeneem word, sal jy dit ontvang.’ Met ander woorde, ‘Bly naby aan my en dan kan jy dit kry.’ Let op die vier plekke waar Elisa vir Elia gevolg het: 1) Gilgal. Dis waar die Israeliete besny is (sien Josua 5). Jy moet deur God se Gees gelei word en vir jou vleeslike natuur nee sê – en dis ‘n moeilike ding om te doen. 2) Bet-El. Dis waar Jakob sy hemelse visioen gehad het (sien Genesis 28:19). Tensy jy ‘n visie het wat van God af kom, sal jy doelloos deur die lewe dryf. 3) Jerigo. Dis waar Josua van aangesig tot aangesig met God gekom het en gebid het, ‘…Wat wil Meneer vir sy dienaar sê?’ (Josua 5:14 NLV). Dis eers wanneer jy heeltemal aan God oorgee, wat jy oorwinning sal ervaar. 4) Jordaan. Omdat die Jordaanrivier in die Dooie See uitloop, verteenwoordig dit die dood. Wees dus voorbereid daarop om jou eie begrafnis by te woon – elke dag (sien 1 Korintiërs 15:31). Paulus het gesê, ‘Ek leef nie meer nie, maar Christus lewe in my… (Galasiërs 2:20 NLV). Wil jy ‘n dubbele erfgenaamsdeel van God se Gees ontvang? Jy kan dit kry, mits jy aan hierdie voorwaardes voldoen.
Sielskos: Gen 10-12; Joh 13:1-17; Ps 95; Spr 30:29-33
2018-11-25
Maleagi 3:10 NLV
God is ‘n noukeurige beplanner. Hy het byvoorbeeld ‘n banket genaamd ‘die bruilofsfees van die Lam’ tweeduisend jaar vooruit beplan (sien Openbaring 19:9). Hy het vir Noag opdrag gegee om die ark ‘…135 meter lank, 22.5 meter breed en 13.5 meter hoog…’ (Genesis 6:15 NLV), te bou. Hy het vir Moses die spesifieke kleure en materiaal wat Hy vir die tabernakel wou gehad het, gegee (sien Eksodus 26). Kyk ook hoe presies hy die seisoene beplan en die sterre posisioneer. Kan jy jouself indink dat so ‘n God nie ‘n plan vir jou finansies – die produk van jou werkslewe – sal hê nie? Verseker nie! In die Skrif sê Hy: ‘…Bring al die tiendes na die stoorkamers… Toets My hierin of Ek nie vir julle die vensters van die hemel sal oopmaak nie. Ek sal voorspoed op julle laat reën wat meer as genoeg vir julle sal wees!’ Let op: al die tiendes – dit beteken voor jou belasting en ander aftrekkings. Hoekom? Omdat Hy die eerste in jou lewe in alles wil wees – insluitend jou finansies. God het ook vir sy volk gesê, ‘…Julle het die tiendes en offerandes gesteel!’ (Maleagi 3:8 NLV). Stop en dink aan die woord ‘offerandes’ of anders gestel, ‘aanbod’. Wanneer jy jou huis verkoop, besluit jy om die ‘aanbod’ van die koper te aanvaar. In hierdie Skrifgedeelte sê God inderwaarheid, ‘Tot jy vir My dit gee waarop ek geregtig is (die tiende), hoekom moet Ek enige ander offerandes of aanbiedinge aanvaar?’ Om jou tiende te gee gaan nie net oor geld nie, dit gaan oor geloof en gehoorsaamheid. Wanneer jy jou tiende uit jou inkomste gee, kan jy verwag dat God sy seën op jou sal uitstort soos Hy beloof het. God sê, ‘…Toets My hierin…’ Toets God en kyk wat gebeur!
Sielskos: Luk 1:26-56; Luk 2; Luk 2:41-52; Luk 8:19-21
