2026-07-17
Josua 6:2 NLV
Jerigo se mure was enorm. Hulle het veertig voet bo die grond die stad soos ‘n wapenuitrusting omhul. Hulle was ondeurdringbaar. Josua het nie Jerigo se mure afgebreek nie – God het. God sal dit vir jou ook doen. Jou Jerigo is jou vrees, woede, bitterheid of vooroordeel. Dit is ook jou onsekerheid oor die toekoms; jou skuldgevoelens oor die verlede en jou negatiwiteit, angs en geneigdheid om te kritiseer, oor te analiseer of te kompartementaliseer. Jou Jerigo is enige omstandigheid, houding of denkwyse wat jou van vreugde, vrede of rus weerhou.
Jerigo versper jou pad, dus moet sy mure val! ‘…oor drie dae trek julle deur die Jordaan en gaan julle die land in besit neem wat die Here julle God julle as besitting gee’ (Josua 1:11 AFR83). Die werkwoord wat as ‘in besit neem’ vertaal word, beteken ‘om vorige huurders uit te dryf en in hul plek te besit.’
Satan sal egter nie sonder ‘n geveg vertrek nie. Hy sal weerstand bied. Hy sal terugstoot. Hy sal egter nie wen nie. Hoekom nie? Omdat God reeds verklaar het dat jy die oorwinnaar is. “Die Here het vir Josua gesê: ‘Ek gee jou beheer oor Jerigo, sy koning en sy soldate.'” God het nie gesê: ‘Josua, neem die stad in,’ nie. God het gesê: ‘Josua, ontvang die stad wat Ek ingeneem het.’ Dieselfde kan van jou en jou uitdaging gesê word.
Jy vra: ‘Wat staan my dus te doen?’ 1) Ontvang jou oorwinning deur geloof, net soos jy jou verlossing ontvang het. 2) Spreek oorwinning uit. Maak seker dat jou woorde met God se woorde ooreenstem. 3) Wandel in jou oorwinning, een dag op ‘n slag.
Sielskos: Nah 1-3; Matt 27:1-10; Ps 133; Spr 18:17-20
2026-07-16
Psalm 119:103 NLV
In die antieke Joodse kultuur het formele onderwys op sesjarige ouderdom begin. Joodse seuns het by die plaaslike sinagogeskool genaamd bet sefer ingeskryf, wat ‘huis van die boek’ beteken. Teen die tyd dat hulle vier jaar later hul skoolloopbaan voltooi het, het hulle die hele Tora gememoriseer – elke punt en komma van Genesis, Eksodus, Levitikus, Numeri en Deuteronomium is deur memorisering en herhaling op hul serebrale korteks gegraveer. Daar gaan ons verskoning dat ons sukkel om dinge te onthou!
Volgens tradisie sou die rabbi die studente se leie waarop hulle skryf, die eerste dag van die klas met heuning bedek. Dan sou die rabbi sy klas opdrag gee om die heuning van hul leie af te lek terwyl hulle Psalm 119:103 (NLV) voordra: ‘Hoe aangenaam is u woorde vir my; dis soeter as heuning in my mond.’ Dit was die eerste en miskien belangrikste les in hul hele opvoeding. Die rabbi wou hê sy studente moes op die Woord van God verlief raak. Hy wou hê hulle moes proe en sien dat die Woord goed is (sien Psalm 34:9).
Jeremia het ook so gedink: ‘Ek het u woorde verslind toe hulle gekom het, hulle was vir my ‘n vreugde; ek was bly daaroor dat u Naam oor my uitgeroep is, Here, almagtige God’ (Jeremia 15:16 AFR83). Dawid het gesê: ‘Begrip van u woord bring lig; dit gee insig aan die eenvoudige’ (Psalm 119:130 NLV). Salomo het gesê: ‘Dit is tog die Here wat wysheid gee. Sy woorde gee kennis en insig’ (Spreuke 2:6 NLV).
Wanneer jy ‘n smaak vir God se Woord ontwikkel, sal die Heilige Gees, wat die outeur van die Woord is, twee dinge vir jou doen. Eerstens sal Hy dit aan jou openbaar. Tweedens sal Hy jou daaraan herinner.
Sielskos: Ef 4:17-6:24; Matt 26:57-75; Ps 123; Spr 18:13-16
2026-07-15
Josua 3:10 NLV
Dit was geen geringe taak om die Jordaanrivier, wat op plekke tot ‘n myl breed was, oor te steek nie. Veral nie met ‘n miljoen mense wat jou volg nie! God het gesê: ‘…jy [moet] gereedmaak om my volk deur die Jordaanrivier te lei…’ (Josua 1:2 NLV). Dink jy hulle was bang? Sou jy gewees het? ‘Die priesters wat die ark dra, het… hulle voete in die vlak water [ge]sit…’ (Josua 3:15 NLV). Dit was ‘n klein treetjie, maar God kan die kleinste treetjie van geloof in die magtigste wonderwerk omskep.
Toe die priesters se voete die water raak, het die water begin opdam asof iemand die kraan toegedraai het. Vervolgens lees ons: ‘…Almal van Israel het deur die droë bedding gegaan…’ (vers 17 NLV). Deur hierdie wonderwerk te verrig, wou God hê Israel moet weet: ‘…Vandag gaan julle weet dat die lewende God hier tussen julle is…’ Israel het hierdie werklikheid besef toe hulle op droë grond gestaan en na die Jordaan teruggekyk het.
Ons besef hierdie werklikheid wanneer ons op die voltooide werk van Christus staan en na die kruis terugkyk. Laat die kruis jou oortuig. Wees seker van God se getrouheid. Die Psalmdigter beskryf ‘n persoon van geloof as volg: ‘…hy is gerus, hy vertrou op die Here’ (Psalm 112:7).
Die lewe het baie onbeantwoorde vrae, maar jy hoef nie aan God se belofte om jou te verlos, te twyfel nie. ‘As God werklikwaar nie sy eie Seun gespaar het nie, maar Hom ter wille van ons almal aan die dood oorgegee het, is daar tog geen manier waarop Hy nie ook alle ander goeie dinge aan ons sal skenk nie’ (Romeine 8:32 NLV). Rus in jou verlossing. Die verlede is verby. Jou toekoms blink.
Sielskos: Ef 1:1-4:16; Matt 26:47-56; Ps 118:19-29; Spr 18:10-12
2026-07-14
Jesaja 41:10 NLV
Dr George Washington Carver het rassevooroordeel oorkom en ‘n opvoedkundige, wetenskaplike en uitvinder geword wat deur die Amerikaanse Kongres vereer is. Hy was ook ‘n volgeling van Christus. Hy het die volgende oor gebed gesê: ‘My gebede is meer van ‘n lewenswyse as enigiets anders. Ek vra die Groot Skepper stilweg, daagliks en dikwels, verskeie keer per dag vir toestemming om met Hom te praat. Ek vra Hom om vir my wysheid, begrip en liggaamlike krag te gee om sy wil te doen; ek vra en ontvang dus heeltyd.’
Carver het baie uitvindings in die wêreld uitgestuur en was veral bekend vir uitvindings wat met grondboontjies te doen gehad het. Hy het op die waarheid van die volgende Skrifgedeeltes gestaan: ‘Ek sal voor jou uitgaan en berge gelyk maak…’ (Jesaja 45:2 NLV). ‘Vra My, en Ek sal jou ‘n antwoord gee. Ek sal jou van ongelooflike dinge vertel…’ (Jeremia 33:3 NLV). ‘Moenie bang wees nie, want Ek is by jou. Moenie ontsteld word nie, want Ek is jou God. Ek maak jou sterk en wil jou help. Ek hou jou vas met my reddende regterhand’ (Jesaja 41:10 NLV).
Gee besondere aandag aan Carver se woorde: ‘Ek vra en ontvang dus heeltyd.’ Gebed was nie sy laaste uitweg nie, maar sy eerste keuse. Vir hom was dit meer as ‘n godsdienstige ritueel; dit was ‘n wyse om voortdurend met die God wat hy liefgehad het te kommunikeer, deur soms te praat en soms te luister, maar ten alle tye sensitief en bewus van die teenwoordigheid van God te wees. Daaglikse gebed behoort dieselfde vir jou te beteken.
Sielskos: Obad; Mal 1-4; Matt 26:36-46; Ps 118:10-18; Spr 18:7-9
2026-07-13
Prediker 4:12 NLV
Salomo het geskryf: ‘En as iemand die een aanval, sal die twee weerstand bied. ‘n Driedubbele tou breek nie maklik nie.’ Met ander woorde, wees ‘n spanspeler. In Deuteronomium 32:30 lees ons van een persoon wat 1 000 mense laat vlug het en twee persone wat 10 000 mense op die vlug laat slaan het. Dit beteken dat twee persone wat saamwerk, tien keer effektiewer is as een enkele persoon. Spanne skep sinergie. Die beste verduideliking van sinergie is dat ‘n hand effektiewer is as vyf vingers wat onafhanklik van mekaar werk.
Toe die pers vir Edmund Hillary vra wat sy sleutel tot sukses is nadat hy die eerste persoon was om die piek van Mount Everest te bereik, was sy reaksie inspirerend: ‘Ons grootste sterkpunt in 1953 op Everest was ons baie sterk spangees. Individueel, as bergklimmers, was ons nie besonder kundige mense nie. Ons was bekwame klimmers, maar ons het saamgewerk en ons was vasbeslote dat iemand bo moes uitkom. Ons almal wou natuurlik daardie persoon wees om dit te doen, maar dit was selfs belangriker dat iemand in die groep die kruin moet bereik. Deesdae is hierdie spangees nie meer so algemeen nie. Daar is baie meer prima donnas in die moderne klimgemeenskap, mense wat oor groot vaardighede en groot individualisme beskik, maar wat dalk nie so entoesiasties saamwerk soos ons nie.’
Die waarheid is dat geen individu so slim en sterk is soos wanneer ons almal as ‘n groep saamwerk nie. Dr John Maxwell stel dit as volg: ‘Teamwork makes the dream work.’ Wees dus bereid om jou persoonlike agenda vir die tipe sukses wat slegs deur ‘n span bereik kan word, op te offer.
Sielskos: 2 Sam 22:31-24:25; Matt 26:26-35; Ps 118:1-9; Spr 18:4-6
2026-07-12
Psalm 5:4 NLV
Hoe begin jy jou dag met God? As jy nie ‘n ‘oggendmens’ is nie, moenie druk op jouself plaas om heel eerste in die oggend ‘n lang tyd te bestee om die Skrif te lees en te bid nie. In plaas daarvan om jouself in die oggend te dwing om ‘n lang stiltetyd te hou, probeer – so vroeg moontlik nadat jy wakker geword het – om net ‘n paar minute alleen met God te bestee. Doen dan die volgende drie dinge:
Eerstens, erken jou afhanklikheid aan God.
Tweedens, vertel Hom van jou bekommernisse vir die dag.
Derdens, nooi God uit om die dag saam met jou deur te bring.
Die Psalmdigter het gesê: ‘Here, in die oggend sal U my stem hoor. Soggens bring ek my versoeke vol verwagting na U toe.’ Toe het hy bygevoeg: ‘Voor dagbreek roep ek om hulp, en plaas my hoop op u woord’ (Psalm 119:147 NLV).
Hoe kan jy dan jou dag met God begin? Moenie probeer om baie nuwe dinge uit te probeer en te doen nie. Doen net die dinge wat jy normaalweg doen – maar doen dit saam met God. Ons praat dikwels daaroor om die oomblik te omarm en die dag aan te gryp. Ons is egter nie veronderstel om oomblikke te omarm en dae aan te gryp nie, ons is veronderstel om God te omarm en aan te gryp. Oomblikke is nie altyd goed nie, maar God is nooit enigiets anders as goed nie. ‘Loof die Here, want Hy is goed!..’ (Psalm 118:1 NLV).
Herinner jouself daaraan dat God vandag by jou is en dat Hy goed teenoor jou en vir jou sal wees.
Sielskos: Matt 5:9; Rom 12:17-21; Jak 3:17-18
