2018-04-15
Jesaja 6:3 NLV
Die onderskeid tussen heilig en wêrelds is ‘n valse verdeling. Alle dinge is deur God en vir God geskep – daar is geen uitsonderings nie. Elke noot musiek, elke kleur op die palet, elke smaak wat jy proe. Arnold Sommerfield, die Duitse fisikus en pianis, het opgemerk dat ‘n enkele waterstof-atoom wat eenhonderd frekwensies uitstraal, meer musikaal is as ‘n klavier wat net sewe-en-tagtig frekwensies uitgee. Elke enkele atoom is dus ‘n unieke uitdrukking van lofprysing. Volgens die komponis Leonard Bernstein is die beste vertaling van Genesis 1:3 nie ‘En God het gesê’ nie, hy glo dat die beter vertaling ‘En God het gesing’ moet wees. Die Almagtige het elke atoom in bestaan in gesing en elke atoom eggo daardie oorspronklike melodie, in drievoudige harmonie deur die Vader, die Seun en die Heilige Gees. Sensitiewe klankinstrumente het bevind dat erdwurms dowwe staccato geluide maak, terwyl walvisse duisende kilometers onder water gehoor kan word. Lewis Thomas het dit so gestel: ‘As ons beter kon hoor en die wysie van seevoëls kon onderskei, die ritmiese melodie van ‘n skool visse kon aanhoor of selfs die verre harmonie van vlieë wat in die son in die veld rondvlieg kon hoor, sou die gekombineerde klank ons van ons voete afgelig het.’ Een dag sal ons dit alles kan hoor. Oordromme wat verheerlik is, sal die volgende Skrifgedeelte wat vervul word hoor: “Die hele skepping – in die hemel, op die aarde en onder die aarde, op die see en alles wat in hulle bestaan, het ek hoor sê: ‘Aan Hom wat op die troon sit en aan die Lam, kom toe die lofprysing en die eerbetoning, die heerlikheid en die krag vir altyd en altyd'” (Openbaring 5:13 NLV). Maak dit vandag jou doel om God in alles wat jy doen te verheerlik.
Sielskos: Gal 5:22; Luk 2:8-20; Spr 3:13-18; Ps 119:161-168
2018-04-14
2 Tessalonisense 1:12 NLV
Bach het 256 kantates gekomponeer. Die bekendste hiervan is sekerlik Jesu, Joy of Man’s Desiring. Amper 4 eeue later is dit steeds een van die gewildste liedjies waarop bruide by die paadjie afstap. Die rede hiervoor is dat sy musiek jou siel aanraak, omdat hy dit uit sy siel geskryf het. Het jy egter geweet dat sy kantates oorspronklik gebede was voordat dit liedjies geword het? Voordat Bach begin het om ‘n liedjie te komponeer, het hy JJ – Jesu, Juya – aan die bokant van die bladmusiek geskryf. Dit beteken ‘Jesus, help my.’ Aan die onderkant van elke komposisie het hy die letters SDG geskryf, wat staan vir Soli Deo Gloria – ‘alleenlik tot die glorie van God.’ Sy lewe was ‘n unieke uitbeelding van ‘n enkele beweegrede – om God te verheerlik. Jou lewe moet ook so wees. Niemand kan God soos jy verheerlik nie, of dit vir jou doen nie, want jou lewe is ‘n oorspronklike komposisie. Soli Deo Gloria is om vir ‘n gehoor van een te lewe; dis om die regte ding vir die regte rede te doen. Dit is om vir die applous uit hande wat met spykers deurboor is, te lewe. Dis om te verklaar dat Jesus alles vir jou is. Net Jesus. Niks meer nie, niks minder nie, niks anders nie. Paulus stel dit so: ‘Met dit in gedagte bid ons altyd vir julle. Mag ons God julle waardig maak vir die lewe waartoe Hy julle geroep het. Mag Hy elke goeie voorneme en geloofsdaad met krag tot volkome uitvoering bring. So sal die Naam van ons Here Jesus verheerlik word deur wat julle doen. En júlle sal deur Hom verheerlik word op grond van die genade van ons God en die Here Jesus Christus’ (verse 11-12 NLV).
Sielskos: Jer 51-52; Mark 2:23-28; Ps 50:16-23; Spr 10:11-13
2018-04-13
Sagaria 8:23 NLV
Die profeet Sagaria skryf, “Mense van baie nasies, selfs groot nasies, sal Jerusalem toe kom om die Here die Almagtige te soek… en sê: ‘Ons wil saam met julle gaan, want ons het gehoor God is by julle'” (verse 22-23 NLV). Wanneer mense sien dat God in jou lewe aan die werk is, sal hulle aangetrokke tot jou wees. Dit het met ‘n sjef genaamd Nicholas Herman gebeur. Hy was nie tevrede met sy lewe nie en het aanhoudend gewonder of hy waarlik gered is. Een dag was hy besig om ‘n boom te sit en bestudeer, toe die waarheid in Psalm 1:3 hom tref: dat die geheim om geestelik te groei daarin lê om in God gegrond en gewortel te wees. Dus het hy besluit om sy lewe ‘n eksperiment te maak, wat hy ‘die gebruiklike, stille, geheime gesprekke van die siel met God’ genoem het. Vandag is hy beter bekend as Broer Lawrence. Alhoewel hy sy lewe in onbekendheid in ‘n kloosterkombuis deurgebring het, is sy verhouding met God iets waarna mense regoor die wêreld strewe. Sy vriende het gesê dat hy God orals gevind het, of hy nou skoene reggemaak het of saam met die gemeenskap gebid het. Na sy dood het hulle ‘n boek van sy briewe en gesprekke saamgestel, genaamd The Practice of the Presence of God. Dis een van die boeke wat die afgelope vier eeue die wydste gelees is. Jesus het gesê, ‘En wanneer Ek van die aarde af aan die kruis verhoog word, sal Ek almal na My toe trek’ (Johannes 12:32 NLV). Hoe meer jy die teenwoordigheid van God in jou lewe kultiveer, hoe meer sal ander mense na Hom aangetrek word. Laat dus ander mense toe om God in jou te sien!
Sielskos: Jer 49-50; Mark 2:18-22; Ps 50:1-15; Spr 10:8-10
2018-04-12
Matteus 25:32 NLV
Die Bybel sê: “Al die nasies sal voor Hom bymekaargebring word en Hy sal hulle van mekaar skei soos ‘n skaapwagter die skape van die bokke skei. Hy sal die skape aan sy regterkant opstel en die bokke aan sy linkerkant. Daarop sal die Koning vir dié aan sy regterkant sê: ‘Kom julle, want my Vader het julle geseën. Kom ontvang julle erfenis – die koninkryk wat my Vader reeds van voor die begin van die wêreld af vir julle gereed hou'” (verse 32-34 NLV). Vir diegene aan sy linkerhand, sê Hy egter: ‘…Gaan weg van My af, want God het julle vervloek!..’ (vers 41 NLV). Hoe bepaal Hy wie staan waar? Is een groep hoogs moreel terwyl die ander groep losbandig gelewe het? Is dit omdat een groep se doktrine korrek is terwyl die ander groep teologies gesproke die pad byster geraak het? Nee. Jesus sê dat die lot van almal teenwoordig op een aspek gebaseer word: om deernis aan diegene in nood te bewys. Jy sê, ‘Maar ons word alleenlik deur genade gered!’ Ja, maar soos Martin Luther uitgewys het, ‘Die geloof wat ons red is nooit alleen nie!’ Die Bybel sê dat geloof sonder dade dood is (sien Jakobus 2:26). Jesus sê dat ons volgens die volgende standaard geëvalueer en beloon sal word: ‘toe Ek niks gehad het om aan te trek nie, het julle vir My klere gegee; toe Ek siek was, het julle na My omgesien; toe Ek in die tronk was, het julle My opgesoek’ (Matteus 25:36 NLV). Dan verpersoonlik Hy dit met die volgende woorde: ‘…As julle iets hiervan vir een van my broers en susters gedoen het… het julle dit vir Mý gedoen’ (vers 40 NLV). Dit beteken dat jy jou hart moet oopmaak en op die lyding rondom jou moet reageer.
Sielskos: Jer 45-48; Mark 2:13-17; Ps 25:16-22; Spr 10:4-7
2018-04-11
Psalm 5:13 NLV
Die Bybel sê dat God die vromes seën. Die woord ‘vroom’ beteken nie foutloos nie, anders sou niemand van ons vir God se seën gekwalifiseer het nie! Nee, dit beteken dat ons in die vroomheid van Christus geklee kan wees, om sodoende aanvaarbaar vir Hom te kan wees en vir sy seën en guns te kan kwalifiseer (2 Korintiërs 5:21). Dit is ‘n waarheid waaraan jy moet vashou, want wanneer jy God se seën en guns ervaar, begin ander mense ook gunstig teenoor jou optree – dikwels vir redes wat hulle self nie kan verduidelik nie! Die guns en seën van God het dit vir mense in die Bybel, wat andersins nie veel sou bereik het nie, moontlik gemaak om groot dinge te doen. God het ‘n tiener genaamd Ester geroep om die Joodse nasie te red. Sy het in geloof opgetree en die koning ongenooid genader, selfs al was dit teen die reëls. ‘Die koning was bly toe hy koningin Ester daar in die voorhof sien staan…’ (Ester 5:2 NLV). God het die weg vir haar gebaan om die werk te doen waarvoor Hy haar geroep het. Sonder die guns en seën van God, sou Rut, ‘n nie-Jood, nie aanvaarbaar vir die Jode gewees het nie. Maar omdat God ‘n plan vir haar lewe gehad het en haar hart oop was vir Hom, het sy met Boas getrou, ‘…’n welgestelde, invloedryke man…’ (Rut 2:1 NLV). Uit hulle huwelik het koning Dawid afgestam en uiteindelik ook ons Here Jesus. Die Bybel sê, ‘Die Here hou van ‘n mens wat goeddoen…’ (Spreuke 12:2 NLV). ‘n Enkele oomblik van God se seën en guns kan meer vir jou doen as ‘n leeftyd se wedywering. Bid dus vandag vir God se seën en guns – en wees op die uitkyk daarvoor!
Sielskos: Jer 41-44; Mark 2:1-12; Ps 25:8-15; Spr 10:1-3
2018-04-10
Spreuke 12:15 NLV
Dit maak al die verskil in die wêreld wanneer jy jouself posisioneer om te ontvang! As jy byvoorbeeld jouself posisioneer soos jy hierdie lees om te ontvang deur vir die Here te sê, ‘Ek sal aksie neem op dit wat U vir my wys,’ sal jy meer voordeel daaruit trek as wanneer jy dit net lees om gemotiveerd of geïnspireer te word. Om weerstand te bied of om te ontvang – dis ‘n keuse wat jy elke dag maak. Niks sterf vinniger as ‘n nuwe idee in ‘n geslote brein nie. Dis onmoontlik om te leer wanneer jy dink dat jy reeds alles weet. Een van die redes hoekom Jesus so sterk op die Fariseërs gereageer het, is omdat hulle geweier het om dit wat Hy te sê gehad het, te ontvang. Denke wat verkeerd geposisioneer is, is soos ‘n mikroskoop wat klein onbenullige dinge kan vergroot, maar nie die groter prentjie kan sien nie. Elke situasie is ‘n geleentheid as dit op die regte manier beskou word. Geleenthede kan egter net ‘in jou skoot val’ wanneer jy jou skoot reg posisioneer. Ons gedagtes is te dikwels op net een plek gefokus. Ons is opsoek na rooi, dus sien ons blou nie raak nie; ons dink ‘môre,’ terwyl God ‘nou’ sê. Ons soek orals, terwyl die antwoord reg onder ons neus is. Wanneer ‘n persoon reg geposisioneer is, is hy of sy gereed om alles wat God vir hulle in gedagte het, te ontvang. God sal deur ander mense met jou praat, maar tensy jy luister, sal jy nie hoor wat Hy vir jou wil sê nie. Posisioneer jouself dus vandag om te ontvang.
Sielskos: Jer 36:27-40:16; Mark 1:40-45; Ps 25:1-7; Spr 9:17-18
