2018-10-05
Prediker 3:11 NLV
Die lewe gaan dikwels nie volgens plan nie. ‘n Bevordering gebeur nie op die regte tyd nie en jou planne vir jou beroep moet verander, of ‘n verhouding sneuwel en jy spandeer elke sekonde van elke dag om te probeer uitwerk wat verkeerd gegaan het. Die geheim tot ware vrede is om te verstaan dat jy nie die volle omvang van God se werk kan verstaan nie en te aanvaar dat Hy dinge op sy eie tyd doen. Het jy al ooit die voordeur probeer oopsluit, met ‘n magdom pakkies in jou hande terwyl die foon binne lui? Dis die regte sleutel, maar dit wil nie werk nie omdat jy dit probeer forseer. Sodra jy ontspan, sluit die deur sonder enige probleme oop. ‘n Berader sê, ‘Hou op om so hard te probeer. Jy saboteer jouself. Sodra jy besluit dat ‘n situasie goed of sleg is, plaas jy jouself in ‘n posisie waar jy iets daaraan moet doen. Byvoorbeeld, as iemand ‘goed’ is, begin jy jouself met daardie persoon vergelyk: Is ek beter of slegter? Hoe kan ek verbeter? Ons is uitgeput nog voor ons begin het. Wanneer die pad opdraande is – loop die heuwel uit! Wanneer jy by ‘n struikelblok kom – loop om dit! Aanvaar die pad voor jou. Die Bybel sê ‘…elke ding het sy tyd en plek…’ (Prediker 8:6 NLV). Miskien moet iets eers gebeur. Of miskien is daar ‘n belangrike les wat God wil hê jy moet leer wat jy egter probeer vermy. Of miskien is die tyd net nie reg daarvoor nie. Hou op om so hard te probeer om dinge op jou tyd te laat geskied. Doen wat jy kan in vrede, gee die res aan God oor en sien hoe die ‘onmoontlike’ in plek val.
Sielskos: 1 Kor 15-16; Luk 24:36-44; Ps 60; Spr 25:21-22
2018-10-04
1 Korintiërs 6:20 NLV
‘n Pastoor skryf: ‘Ek het op elke Skrifgedeelte wat oor genesing handel, gestaan. Uiteindelik het ek so siek geword dat hulle met my hospitaal toe moes jaag. Daar het hulle agtergekom dat vyf van my are heeltemal geblokkeer was en het my vir ‘n hartomleiding geskeduleer. Toe ek na die operasie wakker word, het ek dit begin bevraagteken, ‘Hoe kon dit met my gebeur het? Ek is ‘n pastoor. Ek glo dat God genees. Ek het vir ander mense gebid en gesien hoe Hy hulle genees het.’ Toe het ek onthou! Ek is herhaaldelik gewaarsku dat my cholesterol- en suikervlakke te hoog is. Ek moes my dieet verander het, maar ek wou nie luister nie. Ek was verslaaf aan vetterige en gebraaide kos. Dit was so smaaklik dat ek dit nie kon opgee nie.’ Hou aan lees – jou lewe kan daarvan afhang! Jesus het gesê dat die kinders van hierdie wêreld wyser is as die kinders van die lig (sien Lukas 16:8). Die media en mediese wêreld waarsku ons daagliks dat ons moet dophou wat ons eet, en tog bly die kerk dikwels stil daaroor. Tabak, alkohol en dwelms kan jou doodmaak, maar so ook die verkeerde kos! Paulus skryf: ‘Of verstaan julle nie dat julle liggame ‘n tempel van die Heilige Gees is wat in julle woon en deur God aan julle gegee is nie? Julle behoort nie aan julleself nie, want julle is teen ‘n duur prys gekoop. Daarom moet julle God met julle liggame verheerlik’ (1 Korintiërs 6:19-20 NLV). Jy het ‘n opdrag van God ontvang en ‘n verantwoordelikheid om gesond te bly en daardie opdrag te vervul. Jou liggaam is die tempel waarin Hy woon en die instrument wat Hy gebruik. Strewe dus daarna om God elke dag met jou liggaam te verheerlik.
Sielskos: 1 Kor 12-14; Luk 24:25-35; Ps 68:19-35; Spr 25:17-20
2018-10-03
Jesaja 30:21 NLV
‘n Berader wat op ‘n stadium ‘n verslaafde was, skryf: ‘Ek was onder behandeling vir chemiese afhanklikheid en het ‘n werk nodig gehad. Ek het vir maande gesoek, maar niemand wou my in diens neem nie. Een dag terwyl ek vir die bus gewag het, het ‘n klein stemmetjie vir my gesê: ‘Kyk agter jou.’ Ek het langs ‘n prokureurskantoor gestaan. ‘Gaan praat met die hoof van die firma en sê vir hom dat jy ‘n werk nodig het,’ was die woorde wat ek gehoor het. ‘Dis mal,’ het ek gedink, maar steeds het daardie stem my aangemoedig. Toe ek met die prokureur praat en hom vertel wat in my lewe aan die gang was, het hy dit verstaan omdat iemand in sy familie ook op die herstelpad van verslawing was. Toe het hy na my gekyk en gesê, ‘Dis snaaks dat jy vandag ingekom het. Ek dink daaraan om ‘n posisie vir ‘n regssekretaresse te skep en het nog nie daarby uitgekom om die pos te adverteer nie.’ Twee weke later het ek die werk gekry en dit was beter as enige ander posisie waarvoor ek aansoek gedoen het. Die salaris was meer en het die beste moontlike gebruik van my vaardighede gemaak.’ Die probleem is nie dat God nie meer met ons praat nie, dis dat ons nie meer sy stem herken nie. Moenie so gou wees om die toevallige gedagtes te ignoreer nie. Oor die algemeen, sal God nie ‘n weerligstraal uit die hemel stuur om jou aandag te kry nie. Hy praat meer dikwels met jou deur jou gedagtes, ‘n familielid, ‘n vriend, ‘n verandering in jou omstandighede, of die stilte wanneer Hy jou hart met perfekte vrede vul. Luister dus vir God se stem.
Sielskos: 1 Kor 10-11; Luk 24:13-24; Ps 68:1-18; Spr 25:13-16
2018-10-02
Eksodus 3:2 NLV
Moses het vir vier dekades lank in die woestyn geleef: Dis meer as 21 miljoen minute! Sy lewe is deur eentonigheid gedefinieer totdat hy ‘n ondervinding gehad het. Op ‘n dag wat presies soos die 4,600 dae vantevore begin het, het Moses ‘n brandende bos uit die hoek van sy oog opgemerk. Toe het hy ‘n stem uit die bos gehoor wat sy naam roep. Soms sal God jou verras! ‘n Brandende bos is amper so absurd soos ‘n pratende donkie. O wag, God het dit ook gedoen! Een van die inherente gevare daarin om vir ‘n lang ruk die pad met God te stap, is dat jy naderhand kan dink dat jy Hom uitgepluis het. Ons probeer Hom in ‘n boks sit, maar daar is geen boks groot genoeg wat Hom kan inperk nie. Hy sê: “‘My gedagtes is anders as julle s’n, en julle paaie is nie my paaie nie,’ sê die Here. ‘Want soos die hemel hoër is as die aarde, so is wat Ek doen, hoër as wat julle doen, en my gedagtes hoër as julle gedagtes'” (Jesaja 55:8-9 NLV). In plaas daarvan om doelloos deur die lewe te gaan en jou dae ineen te laat loop, het jy nodig om elke dag op te staan en te bid: ‘Vader, dankie vir hierdie nuwe dag. Gee my asseblief nuwe insigte in u Woord wat nuwe aspekte van u karakter openbaar, sodat ek u wil mag doen en U kan verheerlik.’ Word meer oplettend en bewustelik; moenie dit wat God vir jou het, misloop nie. Doen wat Moses gedoen het: “‘Dit is snaaks,’ het Moses vir homself gesê. ‘Hoekom brand die bos dan nie uit nie? Laat ek gaan kyk wat aangaan'” (Eksodus 3:3 NLV). Probeer vandag ‘sien’ wat God in jou lewe doen!
Sielskos: 1 Kor 7-9; Luk 24:1-12; Ps 91; Spr 25:9-12
2018-10-01
Johannes 8:31-32 NLV
Probeer jy ‘n slegte gewoonte afsweer? Jesus wil jou daarvan vrymaak. ‘…As julle in ‘n noue verbintenis aan my boodskap leef, is julle my egte navolgers; en julle sal begryp wat die waarheid beteken, en die waarheid sal julle vrymaak.’ Jy vra, ‘Wat is hierdie ‘waarheid’ wat my sal vrymaak?’ Jesus antwoord: ‘As [jy] in ‘n noue verbintenis aan my boodskap leef.’ Oorwinning word in jou gedagtes bewerkstellig en onderhou. Een dame het gegrap, ‘Dis maklik om op te hou rook; ek het dit al duisend keer gedoen.’ Op ‘n ernstiger noot, hoe kan jy ophou om na ou gewoontes terug te keer? Deur jou van hulle te bekeer, hulle te verwerp en die ou gedagtes wat jou na die gewoonte teruglei met nuwe gedagtes te vervang. Waar kom hierdie nuwe gedagtes vandaan? Jesus antwoord, ‘As jy in noue verbintenis aan my boodskap leef.’ Dit beteken dat jy moet wegbly van plekke wat verkeerde gedagtes kweek en wegbly van mense wat verkeerde gedagtes aanmoedig. Dit mag dalk beteken dat jy dit wat jy op televisie kyk moet verander. Jy sal agterkom dat voordat jy voor ‘n slegte gewoonte swig, jy die gedagtes dink wat daartoe lei. Die Bybel sê, ‘Moenie julle leefstyl aanpas by die gedragspatrone van hierdie wêreld nie, maar laat God julle omvorm deurdat Hy julle denkpatrone vernuwe…’ (Romeine 12:2 NLV). In die vroeë stadiums van herstel van enige verslawing is dit krities om jou gedagtes daagliks met die Skrif te versadig, te bid en gewillig te wees om uit te reik na ‘n vriend se ondersteuning (sien Prediker 4:9-10). Sal jy soms op die pad na sukses misluk? Ja. Oorwinning begin egter wanneer jy besluit om vry te wees en glo dat God jou sal vrymaak.
Sielskos: 1 Kor 4-6; Luk 23:44-56; Ps 13; Spr 25:4-8
2018-09-30
Jakobus 1:14 NLV
Jakobus skryf: ‘Wanneer iemand iets verkeerds wil doen, moet hy nie sê: ‘God verlei my’ nie. Ons weet mos God kan nie verlei word om verkeerd te doen nie, en Hý verlei ook niemand nie. Ons eie sondige begeertes beproef ons, sleep ons saam en verlei ons. As ons sondige begeertes eers bevrug geraak het… gee dit geboorte aan die dood. Moet dus nie mislei word nie, my geliefde broers en susters’ (verse 13-16 NLV). Wanneer jy aanhou sondig en jou waardes skend, kan jy ‘n plek bereik waar dit moeilik is om gemaklik in jou eie vel te wees. Enige aptyt wat te veel gevoed word, kan vinnig ‘n verslawing word. Jy vind dat dit wat jy gister wou gehad het, jy vandag nodig het. Voor jy jou oë uitvee, gee jy jouself oor aan die dinge wat jou lewe beheer omdat dit die enigste manier is wat jy tydelike ontvlugting kan kry. Stop en vra jouself af: 1) ‘Wat is my lewe se doel?’ Wat van die persoon wie God jou geroep het om te wees? Om die vreugde van ander mense te sien, is ‘n konstante herinnering aan die vreugde wat jy misloop. 2) ‘Wat gebeur as moeilikheid my lewe of my familie tref?’ In sulke oomblikke wonder jy, ‘Is ek die oorsaak hiervan?’ ‘n Duisend stemme kan vir jou sê dat dit nie jou skuld is nie, maar diep binne-in is jy nooit heeltemal seker nie. Die enigste manier om ware vrede te vind is om dinge met God reg te maak. Hier is sy aanbod: ‘Vra na die Here terwyl jy Hom nog kan vind. Roep Hom nou aan terwyl Hy nog naby is. Die goddelose mens moet sy verkeerde dinge los… Hy moet terugdraai na die Here en Hy sal hom genadig wees…’ (Jesaja 55:6-7 NLV).
Sielskos: Heb 11:7; Gen 6:9-22; Gen 8:18-22; Matt 24:36
