2018-10-23
Efesiërs 6:7 NLV
Dienaars: Dienaars is mal daaroor om benodig te word. Hulle is natuurlike versorgers wat jou kussing sal oppof selfs wanneer dit nie nodig is nie! Hulle onthou verjaarsdae en huweliksherdenkings en is dikwels die eerste een om van die tafel af op te staan om die skottelgoed te was. Hulle is die meeste op hulle gemak wanneer hulle iets het om te doen. Alhoewel hulle aangetrokke daartoe is om ander mense te help, spruit dit egter dikwels uit hulle eie behoeftigheid uit. Net onder hulle diensbaarheid loer daar soms ‘n swak selfbeeld uit wat gevoed moet word. Omdat dit nooit ten volle bevredig kan word nie, dreineer hulle op die ou einde ander mense. Marta is ‘n goeie illustrasie hiervan. Terwyl sy besig was om te bedien, het haar suster Maria by Jesus se voete gesit (sien Lukas 10:38-42). Aan die positiewe kant, demonstreer dienaars liefde in aksie en laat ander mense versorg voel. Aan die negatiewe kant, gebruik hulle dikwels hulle bediening om ander mense te manipuleer. Die probleem kom in wanneer jy hulle las wil verlig en hulle jou nie wil toelaat nie. Hulle ingebore vrees om nie benodig te word nie maak dit vir hulle onmoontlik om gesonde grense daar te stel. Wat is dus die antwoord? a) Maak seker dat jou eerste prioriteit is om God, nie mense nie, te dien. ‘Doen julle werk entoesiasties, asof julle dit vir die Here doen en nie vir mense nie.’ b) Verstaan dat jou beloning van God kom, nie van ander mense nie. ‘Julle weet mos dat die Here elke mens wat sy werk goed doen, sal beloon…’ (Efesiërs 6:8 NLV). c) Moenie kla nie. ‘Doen alles sonder kla of teëpraat. Dan sal julle as onberispelike kinders van God bo verdenking staan…’ (Filippense 2:14-15 NLV).
Sielskos: Jes 1-3; Joh 5:16-30; Ps 15; Spr 27:10-12
2018-10-22
Efesiërs 4:32 NLV
As gevolg van die manier wat ons aanmekaar gesit is, vind ons onsself tot sekere sondes aangetrokke. Gevolglik is ons areas van swakheid dikwels konsekwent en voorspelbaar. Dis soos om ‘n ‘sondeprofiel’ te hê. In sy boek, Signature Sin: Taming Our Wayward Hearts, identifiseer dr Michael W. Mangis nege van hierdie patrone, deur ‘n antieke sisteem genaamd die Enneagram te gebruik. Dis ietwat kontroversieel omdat dit deur baie geestelike tradisies gebruik word. Daar word egter geglo dat dit uit die sewe dodelike sondes en die vrug van die Gees sy oorsprong het, dus kan dit ook binne ‘n Christelike raamwerk toegepas word. Kom ons kyk vir die volgende paar dae na hierdie nege sondepatrone en die mense wat heel waarskynlik daarmee sal sukkel, om jou sodoende te help om meer bewustelik te word en ‘n skans teen jou spesifieke area van weerloosheid op te bou. 1) Hervormers. Hervormers word deur perfeksie aangetrek. Hulle het ‘n hoë standaard van uitnemendheid en hulle grootste vrees is om swakplekke te hê. (Hulle maak goeie chirurge – en uitstekende gholfspelers). Op hulle beste is hulle kruisvaarders, waghonde en profete. Omdat hulle egter met perfeksionisme en self-regverdiging sukkel, is hulle geneig om ander wie se standaarde nie heeltemal so hoog is nie, te oordeel. Die profeet Amos is ‘n goeie voorbeeld hiervan. Hy praat van ‘n ‘skietlood’ wat wys hoe ver mense van God se standaarde te kort skiet (sien Amos 7:7-8). Paulus het die hervormers aangespreek deur te sê, ‘Wees eerder vriendelik met mekaar. Gee vir mekaar om. Vergewe mekaar soos God julle vergewe het op grond van wat Christus gedoen het.’ As ‘n hervormer, is jou grootste uitdaging om liefde, geduld en genade aan diegene met wie jy omgaan, te demonstreer. Met God se hulp kan jy dit doen.
Sielskos: Eks 39-40; Joh 5:1-15; Ps 41; Spr 27:7-9
2018-10-21
Hebreërs 12:1 NLV
In sy boek, The Me I Want to Be, skryf John Ortberg dat ‘n ‘sondepatroon’ die sondes is wat jy gewoonlik aangetrokke tot voel. Dit beteken nie dat niemand anders hierdie sonde pleeg nie. Dit beteken net dat jy weerloos in daardie spesifieke area is. Gewoonlik is die patroon van jou sonde gelyk aan die patroon van jou gawes. Jou gawes en passies kan jou areas van weerloosheid aandui. Ekstroverte, byvoorbeeld, wat die vermoë het om ander te inspireer en te bemoedig, is soms geneig om te skinder. Mense wat daarvan hou om te leer mag dalk in die versoeking kom om te dink dat hulle beter is as ander en na ander mense afpraat. Mense wat spontaan is en ‘n groot aptyt vir die lewe het, sukkel dikwels met impulsbeheer. Goeie luisteraars kan passiewe goedkeuring gee. Optimiste is dikwels vatbaar vir ontkenning. Die Griekse mitologie praat van die nemesis (‘n vyand wat onoorwinbaar lyk). Sherlock Holmes se nemesis was byvoorbeeld professor Moriarty, ook ‘n briljante man. Hy was hoe Holmes sou wees as sy donker kant oorwin het. Omdat daar ‘n verhouding tussen die beste en die slegste weergawes van jou is, is jy in baie areas van jou lewe jou eie nemesis. Hoekom is dit goed om dit te weet? Omdat bewustheid en sensitiwiteit vir jou eie neigings die eerste stap is om ‘n verdediging daarteen te bou. Ons het ‘n verbysterende kapasiteit vir self-misleiding en self-regverdiging. Jesus het sorglose, koue gelowiges in die eindtyd se kerk aangespreek en vir hulle gesê om ‘…oogsalf [die Heilige Gees]… aan jou oë te smeer sodat jy kan sien’ (Openbaring 3:18 NLV).
Sielskos: Hand 13:21-22; 1 Sam 16; 1 Sam 17:32-51; 1 Sam 24:1-17
2018-10-20
Eksodus 4:2 NLV
Die Bybel sê, “Moses het egter nog verder teëgestribbel: ‘Hulle sal my nooit glo nie! Hulle sal nie doen wat ek vir hulle sê nie. Hulle sal sommer sê: ‘Jy het nie regtig die Here ontmoet nie.'” Toe vra die Here vir hom: ‘Wat het jy daar in jou hand?’ “‘n Herderstok,’ antwoord Moses. ‘Gooi dit op die grond neer,’ het die Here vir hom gesê. Hy gooi dit toe op die grond en dit het ‘n slang geword…” (verse 1-3 NLV). Om jou herderstok, die ding waarop jy leun, neer te gooi, is vreesaanjaend en teen al jou beginsels wanneer jy ‘n beheervraat is. Solank as wat jy egter daaraan vasklou en dit probeer beheer, kan God dit nie gebruik nie. Moses se herderstok het sy identiteit en sekuriteit verteenwoordig. Dis hoe hy ‘n lewe as ‘n herder gemaak het en homself en sy kudde beskerm het. Toe God dus vir hom sê om dit neer te gooi, het Hy vir Moses gevra om dit wie hy was en dit wat hy gehad het, te laat gaan. Wat is jy nie gewillig om van af te sien nie? Jy beheer nie dit waaraan jy vashou nie, dit beheer jou. As jy dit nie neergooi nie, sal jou herderstok altyd net ‘n herderstok bly. As jy egter die moed het om dit aan God oor te gee, kan dit die geleier van sy wonderbaarlike mag word. Wat is vandag in jou hand? Jy kan daaraan vasklou en kyk wat jy daarmee kan doen, of jy kan dit oorhandig en sien wat God daarmee kan doen. Laat God dit wat jy reeds het, vandag gebruik.
Sielskos: Eks 36-38; Joh 4:39-54; Ps 87; Spr 27:4-6
2018-10-19
Genesis 19:17 NLV
Een keer was daar vyf skepe, waarvan een Brits was, in die Wes-Indies in ‘n hawe geanker toe ‘n groot storm losgebars het. Die Britse kaptein het onmiddellik die anker opgetrek en uitgevaar om die storm te gaan ontmoet. Twee dae later, stukkend maar darem steeds in een stuk, het hy na die hawe toe teruggekeer en ontdek dat die skepe wat uit vrees vir die storm nie uitgevaar het nie, almal tot op die strand gedryf en vernietig is. Oor die algemeen, is die beste pad as leier vorentoe om die uitdagings kop eerste aan te durf en nie om te kyk nie. Die skrywer Jon Gordon wys ses belangrike dinge uit: 1) Wie jy is maak ‘n verskil. Mense volg die leier eerstens en sy visie tweedens. 2) Dit gaan alles oor verhoudings. Pastoor Andy Stanley het gesê, ‘Reëls sonder ‘n verhouding lei tot rebellie.’ Jy kan al die reëls in die wêreld implementeer, maar as jy nie ‘n verhouding met die mense wie jy lei ontwikkel nie, sal hulle rebelleer. 3) Dis gaan nie oor wat jy doen nie, maar wat jy ander kan inspireer, aanmoedig en bemagtig om te doen. Jy bring die beste in ander uit wanneer jy die beste in jouself met hulle deel. 4) Lei met optimisme, entoesiasme en positiewe energie. Vermy negatiwiteit en leer mense om op oplossings, nie klagtes nie, te fokus. 5) Erken dat jy nie al die antwoorde het nie en bou ‘n span mense wat of die antwoorde het, of die antwoorde sal vind. 6) Aanvaar dat sukses ‘n proses, nie ‘n bestemming nie, is. John Wooden, die legendariese basketbalafrigter, het besef dat oorwinning die gevolg van goeie leierskap, spanwerk, fokus, toewyding en die implementering van die basiese elemente, is.
Sielskos: Eks 33-35; Joh 4:27-38; Ps 32; Spr 27:1-3
2018-10-18
Matteus 25:21 ABA
Nicole Unice, die direkteur van die vrouebediening by Hope Church, sê: ‘Daar is idees wat ek weet voordelig sal wees en tog huiwer ek om te veel te deel of te groot te droom. Wat as dit nie werk nie? Of mense nie daarvan hou nie? Wat as die mense bo my wonder of hulle die regte besluit geneem het om my aan te stel? Een dag het ek op my kantoormuur geskryf: Wat daarvan as dit misluk? Wat begeer jy om te probeer, maar het dit nog nie gedoen nie omdat jy bang is dat jy sal misluk? Watter tegnologie vermy jy? Watter nuwe kennis ignoreer jy omdat jy oud en geroes voel? As jy nie iets op die horison het waarin jy dalk kan misluk nie, is jy besig om as leier te misluk. Tensy jy op innovasie en kreatiwiteit aandring, sal jy aanhou om dieselfde soort mense aan te trek. Wanneer jy met God se werk begin, sal jy grense moet verskuif en dinge moet probeer wat dalk sal misluk.’ John Mason skryf: ‘Moenie bang wees om te misluk nie. As jy nie misluk nie, groei jy nie. Wanneer suksesvolle mense ophou groei en leer, is dit omdat hulle nie meer bereid is om die gevaar van mislukking te loop nie. Ons almal maak foute – veral diegene van ons wat dinge doen. Soos Paulus sê, ‘Aan God kom ons dank toe – Hy wat aan ons die oorwinning… gee deur Jesus Christus ons Here!’ (1 Korintiërs 15:57 NLV). Mislukking is dikwels die eerste stap na sukses. Tensy jy bereid is om ‘n risiko te neem, sal jy nie die kans kry om sukses te behaal nie.’ Vertrou vandag op God en neem ‘n tree in geloof!
Sielskos: Eks 30-32; Joh 4:13-26; Ps 100; Spr 26:27-28
