2018-10-29
1 Tessalonisense 2:7 DB
Bevelvoerders: Bevelvoerders is geskape om mag en leierskap te verstaan, om te weet hoe dit werk en om natuurlik daartoe aangetrokke te wees. As dit jou beskryf, is ‘n beeld van krag vir jou belangrik. Jy het ‘n behoefte daaraan om te lei. Opposisie gee jou energie. Winston Churchill was ‘n bevelvoerder wat vinnig met ooreenstemming verveeld geraak het en wie se grootste oomblike deur opposisie geïnspireer is. Hy het ‘n deurlopende stryd met Dame Nancy Astor gehad, wat een keer vir hom gesê het, ‘Winston, as jy my man was, het ek gif in jou tee gegooi.’ Churchill se antwoord is beroemd, ‘Nancy, as ek jou man was, het ek daai tee gedrink!’ Toe Adolf Hitler in Duitsland tot maghebber verkies is, het Churchill die formidabele vyand waarvoor hy sy hele lewe lank gewag het, gekry. Hy het die uitdaging kop eerste aangedurf. Sonder goeie leierskap word niks bereik nie. Mag kan egter ‘n uitkoms self word en jy kan gefrustreerd word wanneer jy nie jou sin kry nie. Mense kan inderwaarheid geïntimideer voel om hulle opinie te lug wanneer hulle nie met jou saamstem nie. Wanneer dit gebeur mag jy dalk inskiklikheid hê, maar jy sal nie liefde, lojaliteit of respek hê nie. Verantwoordelikheid sonder aanspreeklikheid produseer onstabiliteit. Slegs wanneer jy jouself met mense wat 20/20 visie het, omring om vir jou blinde kolle te kompenseer, sal jy jou neiging om ander mense te gebruik en om vrees en intimidasie te gebruik om jou eie sin te kry, kan raaksien. Paulus, ‘n groot leier, het geskryf, ‘…Ek het julle vertroetel en mooi versorg…’ Wanneer dit by goeie leierskap kom, moet jy mense kan koester en goed behandel.
Sielskos: Jes 22-25; Joh 6:52-71; Ps 127; Spr 27:25-27
2018-10-28
Romeine 12:10 NLV
Entoesiaste: Entoesiaste is die lewe en siel van die partytjie. Hulle is geneig om storievertellers te wees en hulle hou daarvan om oor hulleself te praat. As jy met hulle oor jou probleme probeer praat, sal hulle dalk aan die begin luister, maar dit sal nie lank aanhou nie. Die skrywer John Ortberg vertel dat hy saam met ‘n vriend by ‘n restaurant was. Elke keer wanneer hulle iets bestel het, het die kelnerin ‘Wonderlik,’ of ‘Uitstekende keuse,’ of ‘Briljant,’ gesê. Toe Ortberg haar vra, ‘Sê jy ooit, ‘Dit was ‘n simpel keuse,’ of ‘Dit gaan aaklig proe’?’ het sy geantwoord, ‘Nee, in die kombuis het ons ‘n lys van bevestigings en elke keer wat iemand iets bestel, moet ons vir hulle een van hierdie bevestigings gee.’ Entoesiaste het nie ‘n lys bevestigings nodig nie, omdat hulle altyd besig is om dinge soos ‘wonderlik,’ ‘wow,’ of ‘fantasties’ te sê. Soms kan hulle vir jare gaan sonder om die pyn en donkerte in ander mense, of selfs binne hulself, te sien. Hulle kom ook in die versoeking om hulle lewe om die najaging van positiewe gevoelens – die begeerte van bevrediging – te laat wentel; en hulle kan ontevrede raak wanneer hulle nie genoeg aandag kry nie. Wat is dus die antwoord? a) Spreek jou behoefte om die middelpunt van aandag te wees, aan. ‘As broers en susters in God se huisgesin moet julle mekaar in liefde koester en voor in die ry staan om mekaar met respek te hanteer.’ b) Spreek jou ongewilligheid om pyn en ongemaklike situasies te hanteer, aan. Dit is ‘n eienskap wat tot isolasie en verslawing kan lei. ‘…Vind julle krag in julle verhouding met die Here, ja, in die krag van sý sterkte!’ (Efesiërs 6:10 NLV).
Sielskos: Rut 1:8-18; Rut 2:5-12; Rut 3:1-6; Rut 4:9-13
2018-10-27
Jesaja 41:10 NLV
Lojaliste: Lojaliste is mal daaroor om deel van ‘n goeie span te wees. Wanneer dit nodig is, kan jy op hulle staatmaak. Hulle begeer ‘n saak waaraan hulle hulself kan oorgee en wil deel wees van ‘n groep waarin hulle kan glo. Op hulle beste, help lojaliste almal anders om beter te word. Hulle is gewoonlik heel slim en welsprekend, alhoewel hulle nie altyd sommer hulle gedagtes sal deel nie. Hulle kan sinies word wanneer hulle teleurgesteld word – wat soms onvermydelik is. Dis hoekom die Bybel so baie vir ons sê om genade en vergifnis aan ander te bewys. Elkeen van ons het ‘n persoonlike persepsie van God; die manier wat ons God verstaan. Lojaliste sien God dikwels as moeilik om tevrede te stel, dus is hulle kenmerk dat hulle sonde vrees. Jesus het vertel van drie slawe wat elkeen ‘n som geld gegee is om te belê. Die eerste twee slawe het goeie beleggings gemaak wat ‘n goeie opbrengs vir hulle eienaar gebring het en hom tevrede gestel het. Die derde slaaf was egter bang om te misluk en dat sy eienaar vir hom sou kwaad wees en het dus sy talent in die grond begrawe (sien Matteus 25:14-30). Die betekenis van Christus se vergelyking is dat God sy hardste oordeel nie vir diegene wat probeer en misluk hou nie, maar vir diegene wat nie eers probeer nie, omdat hulle tot hulle vrees ingee. Iemand het geskat dat daar 365 ‘moenie bang wees nie’ teksverse in die Skrif is; een vir elke dag van die jaar. As God ‘n leuse kon gehad het, sou dit dalk gelees het, ‘Moenie bang wees nie.’ Moet dus nie bang wees nie – Hy is by jou vandag!
Sielskos: Jes 17-21; Joh 6:35-51; Ps 98; Spr 27:23-24
2018-10-26
Psalm 119:59 NLV
Denkers: Denkers hou daarvan om alles te weet. Hulle is die ondersoekers, wetenskaplikes en uitvinders onder ons. Hulle hou daarvan om waarhede te ontdek wat niemand anders al ontdek het nie en om kennis, vaardighede en stokperdjies baas te raak. Aan die negatiewe kant, kan denkers introverte wees; hulle geniet hulle eie spasie. Wat is dus die sonde wat denkers kan laat struikel? a) Onsensitiwiteit teenoor ander. Soms is denkers liewer daarvoor om reg te wees as wat hulle vir die mense om hulle is. Hulle is nie altyd gemaklik daarmee om emosie of liefde te bewys nie. Hulle is geneig om hulle gevoelens indirek of deur gebare uit te druk, sodat dit kan voel asof hulle nemers en nie gewers is nie. Hulle hou nie daarvan om argumente te verloor nie of om onderbreek te word nie. Hulle geniet afsondering, vir ure en selfs dae aaneen. Dit beteken nie dat hulle meer geestelik as die res van ons is nie; dit beteken net dat hulle ‘n laer behoefte aan gemeenskap en konneksies het. Die probleem is dat ons nie geskape is om solo te vlieg nie. Jy kan net geestelik groei wanneer jy aan ander gee en bereid is om van hulle te ontvang. Jesus het gesê, ‘As julle liefde teenoor mekaar beoefen, sal almal daaraan sien dat julle my dissipels is’ (Johannes 13:35 NLV). b) Denkers sukkel dikwels met die konsep van ‘geloof.’ Dit maak hulle nie slegte mense nie; die meeste is eerlike twyfelaars. Geloof en rede staan nie noodwendig teenoor mekaar nie, maar wanneer rede jou nie verder kan neem nie, stel geloof in God jou in staat om vorentoe te kan beweeg. Die lewe sal jou situasies gee wat rede alleen nie kan oplos nie – dis dan wanneer jy geloof in God nodig het.
Sielskos: Jes 12-16; Joh 6:25-34; Ps 85; Spr 27:20-22
2018-10-25
1 Korintiërs 9:27 NLV
Kunstenaars: Kunstenaars is nie net lief vir skoonheid en sien dit op plekke waar ander mense dit nie sien nie, hulle het ook die unieke gawe om dit te skep. Hulle druk hulle individualiteit in helder manier wat ons almal verryk, uit. Hulle bring kleur en flair aan ‘n wêreld wat andersins maar vaal sou wees. Omdat niemand van ons egter in die ideale wêreld van ons verbeelding kan leef nie, is kunstenaars soms nie toegerus om in die regte lewe met sy probleme en druk te leef nie. Dieselfde sensitiwiteit wat hulle kreatief maak, maak hulle soms slawe van die emosionele op-en-af wat ander mense afskrik en op die ou einde die kunstenaar self vernietig. Van Ernest Hemingway tot Elvis Presley, vertel die geskiedenisboeke hierdie verhaal. Koning Dawid was kunstig. Hy was ‘n talentvolle digter, danser en het baie liedere gekomponeer. Sy onvermoë om egter sy drange te beheer, het op ‘n affair uitgeloop wat tot moord en die verwoesting van sy familie gelei het. Verstaan een ding: Elke sterkpunt wat God jou gee, het ‘n ooreenstemmende swakheid wat geïdentifiseer moet word en op die regte manier hanteer word. Hoe meer talentvol jy is, hoe meer gedissiplineerd moet jy wees. Paulus was wys genoeg om sy eie neigings te herken: ‘Ek brei my liggaam en dissiplineer dit om werklik bruikbaar te wees. Ek wil tog nie, terwyl ek vir ander gepreek het, self deur God gediskwalifiseer word nie.’ Die laaste paar dekades het bewys dat selfs mense vir wie God die gawe gegee het om groot kerke te bou en groot bedienings te lei, nie immuun teen versoeking is nie. Waar daar groot talent is – is daar groot versoeking. Waar vind skape hulle grootste veiligheid? Deur naby aan hulle herder te bly. Doen dit vandag!
Sielskos: Jes 8-11; Joh 6:1-24; Ps 126; Spr 27:17-19
2018-10-24
Filippense 2:5 NLV
Presteerders: Presteerders is lief daarvoor om struikelblokke te oorkom en voor ander mense op te tree. Ten beste is hulle gemotiveerd om te groei, te strek en te leer. Hulle inspireer mense om aksie te neem en geniet dit om voor skares op te tree. Om ‘n praatjie te gee, gee hulle energie. Sonder ‘n geleentheid om te ontwikkel en te skyn, verloor hulle hulle motivering. Presteerders wil ‘n impak maak, kan in die versoeking kom om vir die beeld wat hulle uitstraal te leef en op die ou einde hulle eie optrede te verafgod. Hulle is geneig om sukses in terme van applous en erkenning te meet. Toe Johannes die Doper van Jesus gesê het, ‘Hy moet in belangrikheid toeneem en ek moet afneem’ (Johannes 3:30 NLV), het hy die tipe oorgawe wat moeilik vir ‘n presteerder is, gedemonstreer. Simon Magus het gedink dat hy ‘n wonderbaarlike bediening soos Petrus s’n kon koop en het Petrus geld aangebied vir die vermoë om aan ander die Heilige Gees te kan gee (sien Handelinge 8:18-22 NLV). Net so kan ‘n ongeredde presteerder iets wat lyk of dit God dien, verander in iets wat homself dien. Vir baie van ons is ‘…die sonde wat so maklik ‘n houvas op ‘n mens kry…’ (Hebreërs 12:1 NLV), trots. Terwyl presteerders die vermoë het om groot dinge te doen en die lewens van ander te verryk, kan hulle ook op hulle eie beeld en sukses gefokus raak. Wat is die antwoord? Paulus sê: ‘Moet niks uit selfsug doen of om daarmee te spog nie. Wees eerder nederig deur van jou medegelowiges meer te dink as van jouself. Julle moenie net elkeen na sy eie belange omsien nie, maar ook na mekaar se belange. Julle gesindheid moet soos Jesus Christus s’n wees’ (Filippense 2:3-5 NLV).
Sielskos: Jes 4-7; Joh 5:31-47; Ps 5; Spr 27:13-16
