2018-11-04
Genesis 39:12 NLV
Die tweede kleed wat Josef gedra het was: Die kleed van versoeking. Die Bybel sê, ‘Eendag was hy besig om sy werk te doen… Sy kom toe en gryp hom aan sy klere en eis van hom: ‘Slaap by my!’ Josef het hom losgeskeur, maar in die proses die kledingstuk waaraan sy hom vasgehou het, agtergelaat en uit die huis gehardloop’ (verse 11-12 NLV). Josef was jonk, aantreklik, eensaam, ver van die huis af en het herhaalde versoekings aan die hand van sy baas se vrou beleef. Tog het hy haar toenadering geweier en gesê, ‘…Hoe kan ek ooit so ‘n slegte ding doen? Dit sal ‘n baie groot sonde voor God wees’ (vers 9 NLV). Sy eerste bekommernis was nie dat hy nie daarmee kon wegkom nie, maar dat hy nie met homself sou kon saamleef sou hy instem nie. Dis nie dieselfde geval met Dawid nie. Na sy affair met Batseba, het hy hierdie woorde in sy berouvolle gebed van Psalm 51 gebid: ‘Teen U, U alleen, het ek gesondig; ek het gedoen wat vir U verkeerd is…’ (vers 6 NLV). Teen wie sondig jy? God. Wie observeer wat jy doen? God: die een wat die omvang van sy liefde vir jou by Golgota gedemonstreer het. Het God vir Dawid vergewe? Ja, en Hy sal jou ook vergewe. Dawid se verhaal dien egter as bewys dat ons soms met die nagevolge van ons dade moet saamlewe en dat hulle nie net ons nie, maar ook die mense wat na ons vir leiding kyk, kan verwoes. Paulus, die grootste apostel, het hierdie waarheid erken: ‘Ek brei my liggaam en dissiplineer dit om werklik bruikbaar te wees. Ek wil tog nie, terwyl ek vir ander gepreek het, self deur God gediskwalifiseer word nie’ (1 Korintiërs 9:27 NLV).
Sielskos: Hand 9:1-19; 2 Kor 11:21-33; 2 Kor 12:7-10; Hand 16:16-40
2018-11-03
Genesis 37:3 NLV
Kom ons kyk na die drie verskillende kledingstukke wat Josef gedra het, soos dit jou lewe as Christen verteenwoordig. Eerstens, die kleed van verlossing. Let op, dit was ‘n ‘geskenk’ van sy pa; Josef het nooit ‘n sent daarvoor betaal, of ‘n enkele steek daarvan gestik; of ‘n sentimeter materiaal daarvoor verskaf nie. Dis die verhaal van ons verlossing, nie waar nie? Die Bybel sê, ‘Dit is mos dié onverdiende goedheid wat julle gered het toe julle tot geloof gekom het. En julle geloof kom nie uit julleself nie, maar is ‘n gawe van God. Dit is nie die gevolg van julle dade nie. Niemand kan daaroor grootpraat nie’ (Efesiërs 2:8-9 NV). Gemotiveer deur jaloesie en wrokkigheid, het Josef se broers hom in ‘n put gegooi en sy kleed in ‘n bok se bloed gedoop om hulle pa te oortuig dat hy deur ‘n wilde dier opgeëet is. Kry jy die prentjie? ‘…die bloed van Jesus, sy Seun, maak ons skoon van alle sonde’ (1 Johannes 1:7 NLV). In die Ou Testament se tyd, wanneer iemand gesondig het, het hulle ‘n offerlam na die altaar toe gebring waar die priester die lam se bloed as betaling van hulle sondes geoffer het. Die priester het egter nie die persoon ondersoek nie, hy het die lam ondersoek. As die lam ‘waardig’ was, is die persoon aanvaar en is daar vir hulle sondes boete gedoen. Die oomblik wat jy dus jou sonde bely en bid, ‘Vader, ek kom na U in die naam van Jesus, die Lam van God,’ is jy heeltemal vergewe en aanvaarbaar. ‘Kom ons gaan dan met volle vrymoedigheid na die troon van ons genadige God. Hy sal aan ons sy deernis en onverdiende goedheid bewys sodat ons op die regte tyd gehelp sal word’ (Hebreërs 4:16 NLV).
Sielskos: Jes 38-41; Joh 7:45-53; Ps 9; Spr 28:13-16
2018-11-02
Efesiërs 1:9 NLV
Wat ‘n vreugde is dit nie wanneer die wil van God nie meer ‘n geheim is nie, omdat Hy dit aan ons bekend gemaak het! Skielik is jou uitkyk anders, jou houding verander en vrees kan nie meer speletjies met jou gedagtes speel nie. Nou weet jy – kennis is mag! Die Bybel sê, ‘…Dié wat in hulle God glo, sal… sterk staan en doen wat reg is’ (Daniël 11:32 NLV). Daar is tye wat jy dinge in jou gees weet wat jy nie in jou kop kan uitpluis nie. Dit kan veroorsaak dat jy verkeerd verstaan word. Jy kan die kennis van ‘n deurbraak of ‘n seëning lank voor dit gebeur, in jou gees saamdra. Die Bybel sê, ‘maar ons ken hierdie geheim omdat God dit deur sy Gees aan ons bekend gemaak het…’ (1 Korintiërs 2:10 NLV). Wanneer God wysheid met jou deel, plaas dit jou in ‘n posisie om suksesvol te wees. Wat onderskei die president van die bank van die skoonmaker? Dit wat hy of sy weet! Hulle mag dalk gelykes in alle ander sin van die woord wees, maar een het ‘n prys betaal om dinge te leer wat hom of haar in ‘n ander posisie geplaas het, wat ander belonings meebring. God kan veroorsaak dat jy iets weet wat die koers van jou lewe verander. Hy kan jou iets in die nag wys wat jou gevoel in die oggend kan beïnvloed. In sy teenwoordigheid ontvang jy insigte wat jou ‘n doelwit, hoop, waardigheid, rigting en die krag om op te staan en te baklei vir dit wat Hy jou in sy Woord beloof het, gee. Kom dus vandag in sy teenwoordigheid – en bly daar totdat Hy sy wil in die saak aan jou geopenbaar het.
Sielskos: Jes 34-37; Joh 7:25-44; Ps 104:24-35; Spr 28:9-12
2018-11-01
Psalm 25:1 NLV
Wanneer jy hulp nodig het, blaai na Psalm 25 en let op wat Dawid gedoen het. 1) Hy het geweet waarheen om te gaan. ‘Ek rig my tot U, Here.’ Onlangs het ‘n leser ons gevra om te bid vir ‘n familielid wat pas met fase vier kanker gediagnoseer is. Hoe vinnig kan ons lewens nie verander nie! Waarheen kan ons in sulke oomblikke draai? Na God toe. Hy word deur baie name in die Skrif geken waarvan een Jehovah-Rapha is – die Here wat genees. Hoe wonderlik is dit nie! Sy Woord sê, ‘Hy…genees al jou siektes’ (Psalm 103:3 NLV). By God is geen siekte ongeneeslik nie, wat beteken dat jy vandag in vertroue na Hom toe kan gaan. 2) Hy het geweet Wie om te vertrou. ‘Ek vertrou op U, my God!..’ (Psalm 25:2 NLV). ‘n Man of vrou sonder God moet self die rol van God in sy of haar lewe vervul. Dit mag dalk doenbaar in die goeie tye wees, maar wat van kwaadaardige selle, foutiewe hartkloppe, afdankings by die werk of finansiële probleme? Na wie toe draai jy dan? ‘Ek rig my tot U, Here.’ 3) Hy het geweet hoe om te bid: ‘Wys my, leer my, lei my.’ ‘Here, wys my die weg… leer my u paaie. Lei my deur u waarheid… want U, o God is my redder…’ (verse 4-5 NLV). Die teoloog, Richard Foster, sê, ‘Om te bid is om te verander. Dit is die sentrale manier wat God gebruik om ons te transformeer. As ons nie gewillig is om te verander nie, sal ons gebed gou prysgee.’ Het jy daaroor gebid? Indien nie, gaan dadelik in God se teenwoordigheid in. Dis waar jy die hulp sal kry wat jy nodig het.
Sielskos: Jes 30-33; Joh 7:14-24; Ps 104:1-23; Spr 28:5-8
2018-10-31
Efesiërs 4:15 NLV
Of jy nou hervormer, ‘n dienaar, ‘n presteerder, ‘n kunstenaar, ‘n denker, ‘n lojalis, ‘n entoesias, ‘n bevelvoerder, of ‘n vredemaker is, ons almal sukkel met sonde. Om te weet dat elke kategorie sy eie versteekte versoekings het, behoort jou minder jaloers op ander te maak wanneer dit nie met jou goed gaan nie en minder geneig om hulle te oordeel wanneer dit wel met jou goed gaan. Wanneer jy jou eie sondepatroon herken, laat dit jou toe om te weet waaraan jy moet werk. As jy byvoorbeeld ‘n hervormer is, moet jy van jou geneigdheid tot self-regverdiging bewus wees. Dis egter ook belangrik om te weet dat God jou met ‘n passie vir regverdigheid geskep het – en dat dit ‘n goeie eienskap is. Jy sal inderdaad sy teenwoordigheid die meeste voel wanneer jy hierdie eienskap in vryheid en liefde kan uitdruk. Om ander mense se patrone te ken, help jou ook om met hulle te empatiseer en in harmonie met hulle saam te leef. Soos jy hulle patrone leer ken, word jy meer geduldig met diegene wie se sondes verskillend van joune is. Jy kan byvoorbeeld seker maak dat dienaars nie altyd besig is om te dien nie en vredemakers aanmoedig om eerlik te wees wanneer hulle kwaad is. Ons doel moet wees om ons godsdienstige maskers af te haal, mekaar in areas van swakheid te versterk en dit op ‘n genadige, onveroordelende manier te doen. Wanneer ons onsself en ander ken en aanvaar, kan ons saam in liefde stap. ‘Nee, terwyl ons mekaar liefhet, sal ons by die waarheid bly en so in alle opsigte groei om soos Christus te wees…’ Eers dan sal ons vry wees om die beste weergawes van onsself te word – die weergawe wat God jou geskep het om te wees.
Sielskos: Deut 18:9-18; Dan 2; Jes 47:5-15; Hand 16:16-34
2018-10-30
Efesiërs 4:25 NLV
Vredemakers: Vredemakers floreer wanneer die lewe kalm is. Hulle is lief vir hierdie vers: ‘Hoe goed, hoe mooi is dit as broers eengesind saamwoon!’ (Psalm 133:1 NLV). Hulle maak uitstekende beraders en bemiddelaars en kan gewoonlik versoening in families, gemeenskappe en werkplekke meebring. Soms is hulle egter geneig om vrede ten koste van enige prys te soek, hulle gebruik hul verhoudingsvaardighede om in die agtergrond te bly en hulle vermy dit om die inisiatief of risiko’s te neem omdat hulle te geheg aan gemak en sekuriteit is. Abraham is ‘n uitstekende voorbeeld van ‘n vredemaker. Toe hy en sy neef Lot begin vooruitgang maak het, het daar ‘n bakleiery tussen hulle veewagters uitgebreek omdat die land te klein was om al hulle vee te akkomodeer. Abraham het besef dat dit die familie in twee kon skeur en het aksie geneem, die probleem hanteer en die verhouding gered. Aan die ander kant, toe koning Abimelek Abraham se vrou, Sara, gesien het en haar deel van sy harem wou maak, het Abraham uit vrees vir sy lewe soos ‘n lafaard opgetree en ‘…vir die mense [vertel] dat sy vrou Sara sy suster is…’ (Genesis 20:2 NLV). Dis krities om jou sondepatroon te herken sodat jy dit effektief kan hanteer. Jesus het ons gewaarsku om nie die splinters in ander mense se oë raak te sien, as ons nie eers die balke in ons eie oë kan raaksien nie (sien Matteus 7:3). Jou sondepatroon is so aanloklik omdat dit jou grootste gevaar is; en dit is so naby aan jou dat jy dit moontlik nie sal raaksien nie. Dawid het gebid, ‘Wie kan sy eie oortredings herken? Spreek my vry oor verborge sondes, en bewaar my van opsetlike sondes! Laat hulle nie oor my heers nie…’ (Psalm 19:13-14 NLV).
Sielskos: Jes 26-29; Joh 7:1-13; Ps 114; Spr 28:1-4
