2018-11-10
Prediker 9:10 NLV
Wat jy op die oomblik doen mag dalk onbelangrik lyk, maar dit kan jou vir iets wat God deur jou in die toekoms wil doen, voorberei. Die Bybel sê, ‘Dit is mos God wat julle gewillig maak om te doen waarvan Hy hou, en Hy gee julle ook die vermoë om dit te kán doen!’ (Filippense 2:13 NLV). Toe Daniel Webster as prokureur begin praktiseer het, het hy ‘n saak teen ‘n fooi van slegs twintig dollar aanvaar. Die saak het egter baie ingewikkeld uitgedraai en in voorbereiding daarvan moes hy na Boston toe reis, wat hom meer as twintig dollar uit die sak gejaag het. Hy was egter vasbeslote om sy werk deeglik te doen en die saak te wen, wat hy toe ook reggekry het. Jare later het ‘n besigheid hom op kort kennisgewing genader en hom gevra om ‘n saak te aanvaar waarvoor hulle bereid was om hom die grootste fooi wat hy nog ooit ontvang het, te betaal. Toe hy die saak bestudeer, het hy agtergekom dat dit amper identies is aan die saak wat hy twintig jaar tevore nagevors en gewen het; en waarvoor hy net twintig dollar ontvang het. Hy het die saak aanvaar en net soos tevore was die uitspraak ten gunste van sy kliënt. Wanneer jy slegs dit waarvoor jy lus is of dit wat jy geniet, doen, kan jy verhoudings miskyk en ervarings onderwaardeer wat noodsaaklik vir jou toekoms is. Jou bestemming in die lewe bestaan uit oomblikke, ervarings en ontmoetings wat op die oog af betekenloos lyk. Jou vandag is verbind aan jou môre, put dus die meeste uit elke geleentheid en verhouding wat oor jou pad kom. ‘Doen met toewyding alles wat jou hand vind om te doen…’
Sielskos: Jes 63-66; Joh 9:13-23; Ps 115; Spr 29:7-10
2018-11-09
Psalm 89:35 NLV
Mediese kundiges sê dat elkeen van ons depressie in een of ander vorm gedurende ons leeftyd sal ervaar. ‘n Groot gedeelte van die bevolking word elke dag in ‘n wolk van somberheid wakker. Jy mag dalk een van hulle wees. Daar is ‘n gewilde kinderboek genaamd Alexander and the Terrible, Horrible, No Good, Very Bad Day. Alexander raak aan die slaap met kougom in sy mond en word wakker met die kougom in sy hare. Sy boks graanvlokkies het nie ‘n speelding in nie en hy kry dit nie reg om, ten spyte van sy beste pogings, sy onderwyser te beïndruk nie. Hy besluit etlike kere om na Australië toe te verhuis. Ongelukkig werk geografiese kure nie. Jy los nie die probleem op nie; jy verskuif dit net. Wat kan jy dan doen? Draai na die een bron van krag, hoop en bemoediging wat nooit faal nie – God se lewende Woord. God sê, ‘Ek sal my verbond nie verbreek nie, en wat Ek gesê het, nie verander nie.’ As jy vandag mismoedig voel, is hier ‘n paar Skrifgedeeltes waaraan jy kan vashou: ‘Met ‘n woord het Hy hulle genees, en hulle van die dood weggeruk’ (Psalm 107:20 NLV). ‘Tog is ek daarvan oortuig: Die Here se goedheid sal ek sien hier in die land van die lewendes’ (Psalm 27:13 NLV). ‘In tye van nood sal ek U aanroep, en U sal my antwoord’ (Psalm 86:7 NLV). ‘Die Here is nie te swak om julle te red nie. Hy is nie te doof om julle te hoor nie’ (Jesaja 59:1 NLV). ‘U sal my in eer herstel en weereens my vertrooster wees’ (Psalm 71:21 NLV).
Sielskos: Jes 58-62; Joh 9:1-12; Ps 15; Spr 29:4-6
2018-11-08
Efesiërs 2:10 NLV
Die Bybel sê dit is God ‘…wat ons nuut gemaak het omdat ons Christus Jesus s’n is. Hy het dit gedoen sodat ons reg en goed kan leef soos Hy lankal besluit het ons moet leef’ (vers 10 DB). Voor jy op ‘n beroep besluit of besluit waaraan jy jou lewe wil wy, vra God vir leiding. As jy dit nie doen nie, sal jy waarskynlik jou lewe op die verkeerde dinge spandeer. Selfs as jy goed betaal word, sal jy leegheid en ‘n gebrek aan vervulling ervaar. Die Oostenrykse psigiater, Victor Frankl, wat die Nazi doodskampe oorleef het, het gesê: ‘Elkeen het sy eie spesifieke roeping of missie in die lewe, ‘n konkrete taak wat vervulling vereis. Hy kan nie met iemand anders vervang word nie, elkeen se taak is so uniek soos sy spesifieke geleentheid.’ God het jou vir ‘n spesifieke doel geskep. Jou verantwoordelikheid (en jou vreugde), is om dit te identifiseer. Hier is vier vrae wat jy jouself kan afvra om jou lewensdoel te identifiseer: 1) Waarna is ek op soek? Almal van ons het ‘n sterk begeerte in ons hart; iets wat tot ons diepste gedagtes, verlange en gevoelens spreek; iets wat ons siel aan die brand steek. 2) Hoekom is ek geskep? Dink aan jou unieke mengsel vaardighede, die verhoudings en hulpbronne wat aan jou beskikbaar is, jou persoonlike geskiedenis en die geleenthede rondom jou. Dit is alles dinge wat jou in die regte rigting kan lei. 3) Glo ek in my potensiaal? Een leierskapskundige sê, ‘Niemand kan deurlopend op ‘n manier optree wat strydig is met die manier wat hy homself sien nie.’ 4) Wanneer moet ek begin? Die antwoord op daardie vraag is ‘Nou dadelik!’
Sielskos: Jes 53-57; Joh 8:42-59; Ps 123; Spr 29:1-3
2018-11-07
Galasiërs 5:1 NLV
Sommige van ons vind dit moeilik om vir onsself toestemming te gee om sekere dinge te dink, te sê of te geniet omdat ons bang is dat ander mense dit nie sal goedkeur nie. Ons lewe volgens hulle oortuigings, in plaas van ons eie. Daar is geen bande soos godsdienstige bande nie! ‘n Christen outeur skryf: “Die kerk waarin ek grootgeword het, het ons geleer dat ons nie fliek toe kon gaan of na ‘n rugbywedstryd kon gaan kyk (met die wêreld meng) nie en vrouens kon nie grimering dra nie. Ons standaard antwoord op die meeste van hierdie kwessies was, ‘Ons is anders geleer!'” Dis hoe ‘n gewete wat in die skool van tradisie grootgemaak is, redeneer. Paulus was hard op die Galasiërs wat ander mense se lewens probeer polisieer het en hulle forseer het om volgens Joodse tradisies in plaas van die Evangelie van genade te lewe. Hy het geskryf, ‘…Maak seker dat julle vry bly, en moet nie weer onder ‘n slawejuk vasgebind word nie’ (vers 1 NLV). Jy moet oefen om minder bekommerd te wees oor wat mense dink en meer bekommerd wees oor wat God dink. Wat sommige godsdienstige mense eintlik ontstel, is dat jy sekere dinge kan doen wat hulle nie kan doen nie – omdat hulle hulself nie toestemming gee om hulle vryheid in Christus te geniet nie (sien Galasiërs 2:4). Ons verskoon egter nie hiermee sonde of onskriftuurlike optredes nie. As jy egter nie beweeg wanneer die lig groen is nie, sal jy jou hele lewe vir ‘die regte oomblik,’ of “‘n tyd wanneer die meeste mense sal verstaan,’ wag voor jy vorentoe beweeg. Jy sal dan met spyt op jou lewe terugkyk. Moenie dat dit met jou gebeur nie. ‘Christus het ons bevry… Maak seker dat julle vry bly…”
Sielskos: Jes 49-52; Joh 8:31-41; Ps 30; Spr 28:25-28
2018-11-06
1 Petrus 2:20 NLV
Baie van die mense wat ons in die Skrif bewonder, is sleg behandel. En God het toegelaat dat dit gebeur. Dink aan Daniël wat vir die leeus gegooi is en Josef wat in die tronk beland het. Hulle het niks gedoen om dit te verdien nie. Die Bybel sê: ‘…Om egter die houe te vat wanneer julle goeddoen, dit is iets besonders voor God. Hierdie soort swaarkry maak juis deel uit van dit waartoe God julle geroep het. Christus, wat vir julle gely het, is julle voorbeeld. Trap in sý spore’ (verse 20-21 NLV). Let op dat jy ‘geroep’ is om moeilikheid te oorkom. Daar is ‘n doel in die pyn. Niks kan jou aanraak as dit nie eers deur jou liefdevolle hemelse Vader se hande gegaan het nie. Hy het dit alles vooruit geweet en alles wat jy nou deurmaak, berei jou voor om Hom meer effektief te dien. Paulus het gesê, ‘Toe ek die eerste keer in die hof my saak moes gaan verdedig, was daar niemand by my nie. Almal het weggehardloop en my net so gelos… Maar die Here het my nie alleen gelos nie. Hy was by my en het my krag gegee. Daarom kon ek die boodskap oor Jesus vir almal vertel…’ (2 Timoteus 4:16-17 DB). Paulus het dit nie as iets gesien wat hy eenvoudig moes verduur nie, hy het dit as vooruitgang gesien! Wees dus bemoedig; jy is besig om in genade en kennis van die Here te groei (sien 2 Petrus 3:18). Jy is in die voorbereidingsfase. Of God jou nou uit die situasie of deur die situasie neem, vertrou Hom. Hy werk ten goede van jou en tot sy glorie.
Sielskos: Jes 45-48; Joh 8:21-30; Ps 86; Spr 28:21-24
2018-11-05
Genesis 41:42 NLV
Die derde kleed wat Josef gedra het was: Die kleed van bestemming. Omdat Josef vir God in die moeilikste van omstandighede geëer het, het hy op die troon van Egipte geëindig, waar hy die kleed van heerskappy gedra het en sy lotsbestemming vervul het. Die Psalmdigter sê dat God ‘…’n man voor hulle uit gestuur [het]. Dit is Josef, wat as ‘n slaaf verkoop is. Hulle het Josef se voete met swaar boeie vasgemaak en hom agter ysterdeure toegesluit. Sy swaarkry het aangehou totdat God se plan waar geword het, totdat die Here besluit het hy is net die regte man vir die werk! Josef het die toets geslaag. Toe het die koning vir Josef uit die tronk laat haal. Die magtige heerser oor baie nasies het hom vrygelaat en hom aangestel as die hoof oor sy hele paleis. Josef het beheer gehad oor al sy besittings’ (Psalm 105:17-21 DB). Die toetse en versoekings wat jy voor te staan kom, gaan oor jou toekoms. Hulle berei jou voor vir jou lotsbestemming! Jou hele lewe lank oefen jy vir een seisoen, vir een opdrag. Hoe groter die opdrag is, hoe groter sal die aanval teen jou wees. Vyf keer in Genesis hoofstuk 39 sê die Bybel, ‘Die Here was met Josef.’ Dit het hom egter nie vrygeskeld van verraad deur sy familie; of herhaalde versoeking aan die hande van sy baas se vrou; of laster en valse gevangenisskap, of teleurstelling in die tronk, nie. Toe hy daarop terugkyk, het Josef egter besef dat hierdie ervarings hom voorberei het om op die troon te sit. Hou dus uit, hou aan om op God te vertrou en jy sal ‘n lied van oorwinning sing.
Sielskos: Jes 42-44; Joh 8:1-20; Ps 96; Spr 28:17-20
