2018-11-22
Psalm 84:12 NLV
In ‘n sin, is dit onmoontlik om enigiets vir God ‘op te offer’. As jy meer terugkry as wat jy opoffer, het jy dan werklik enigiets opgeoffer? Die ewige beloning weeg altyd meer as die wêreldse opoffering. Op die Oordeelsdag sal ons enigste berou dit wees wat ons nie vir God teruggegee het nie. Dit mag dalk vreemd klink, maar die sleutel tot selfvervulling is selfontkenning. Die selfsugtige deel van ons het ‘n allergiese reaksie vir die woord ontkenning. Dis moeilik om dit te doen wanneer ons in luuksheid lewe. Ons verdra nie net vinnige bevrediging van behoeftes in ons kultuur nie, ons vier dit. Die fundamentele probleem met bevrediging is egter dat genoeg nooit genoeg is nie. Hoe meer ons onsself met kos of seks of die geriewe van rykdom bevredig, hoe minder sal ons dit geniet. Ons het in die verbruikersleuen ingekoop dat meer, meer is. Ons dink verkeerdelik dat hoe meer ons gee, hoe minder sal ons hê. Ons logika is egter verkeerd. Jy verloor uiteindelik dit wat jy wil behou en jy hou uiteindelik dit wat jy vir Christus se saak verloor. Mark Batterson skryf: ‘Hoe meer jy weggee, hoe meer sal jy dit wat jy het, geniet. As jy jou tiende aan God gee, sal jy die 90 persent wat jy behou, 10 persent meer geniet. Jy sal ook ontdek dat God meer met 90 persent kan doen as wat jy met 100 persent kan doen. Een van ons lewensdoelwitte as ‘n familie is om ons tiende verkeerdom te gee en van 10 persent te leef terwyl ons 90 persent weggee. Wanneer ons hierdie doel bereik, is ek seker dat ons die 10 persent, 90 persent meer sal geniet. Dis die glyskaal van vreugde.’
Sielskos: Gen 1-3; Joh 12:12-19; Ps 102:1-11; Spr 30:18-20
2018-11-21
Handelinge 16:14 NLV
Lidia was nie ‘n prediker nie, sy was ‘n suksesvolle besigheidsvrou wat onder Paulus se bediening vir Christus gewen is. Gevolglik het haar huis die eerste kerkgebou wat in die Skrif genoem word, geword. Raak ontslae van die idee dat net predikers oor God praat. Uit 168 ure elke week, kry predikers oor die algemeen net een uur om met mense te praat. Wie gaan oor God die ander 167 ure praat? Indië het meer as ‘n biljoen mense en daar is ‘n interessante storie oor hoe die evangelie die Telugu streek aanvanklik bereik het. Dit was nie deur ‘n prediker nie, maar deur ‘n siviele ingenieur genaamd John Clough, wat aangebied het om na ‘n nuwe sendingspos in die area te gaan om daar uit te help. Die sendingraad was bekommerd omdat hy nog nooit by ‘n kweekskool was nie, maar hulle het van sy ywer gehou en dus die sendingreis goedgekeur. Gedurende ‘n groot hongersnood, het Clough oor die uitgrawing van die Buckingham kanaal toesig gehou. Sy posisie het hom in staat gestel om duisende honger mense in diens te neem, wat beteken het dat hulle ‘n loon kon ontvang en kos kon koop. Iets belangrikers het egter ook gebeur. Gevolglik het God die harte van baie mense oopgemaak om sy Woord te ontvang; en vandag floreer die kerk in daardie gebied in Indië. God sê, ‘Ek maak die einde bekend vanaf die begin. Uit die verlede, dit wat nog moet gebeur. Wat Ek besluit, voer Ek uit. Wat Ek wil, doen Ek’ (Jesaja 46:10 NLV). God het reeds ‘n plan; Hy is op soek na werkers wat gewillig is om dit te help vervul. Jy kan een van hulle wees.
Sielskos: Pred 9-12; Joh 12:1-11; Ps 76; Spr 30:15-17
2018-11-20
Eksodus 18:23 NLV
Hoekom dring ons daarop aan om alles self te doen? Drie redes: 1) Ons is bang dat ander mense nie die werk so goed soos ons sal doen nie – maar hoe anders sal hulle leer? 2) Ons is bang dat hulle ons sal oorskadu. 3) Ons dink dat God van ons verwag om alles persoonlik te doen. Moses se skoonpa het vir hom gesê ‘Luister nou na goeie raad… Jy moet nog steeds namens die volk met die Here gaan praat… Vir die beslissing oor hulle verskille moet jy mans uit die volk aanstel wat as regters kan optree. Stel een man aan vir elke 1 000 mense of selfs vir elke 100 of 50 of tien mense… Stel hulle as voltydse regters oor die volk aan. Hulle kan die groter sake dan na jou verwys. Die kleiner sake kan hulle sommer self verhoor. So kan julle saam die vrag dra… As dit volgens God se wil is, kan jy die sake van nou af so hanteer. Dit sal jou werk maklik maak. Die volk sal terselfdertyd dan ook meer tevrede gestel kan word’ (Eksodus 18:19-23 NLV). Evalueer dus wat slegs jy kan doen en delegeer wat ander kan doen. As die taak te groot is vir jou, sien dit as ‘n teken dat God vir jou sê, ‘Moenie dit alleen probeer aanpak nie!’ Dit beteken nie dat jy die werk aan sommer net enigiemand kan gee nie. As jy die verkeerde persoon in ‘n werk, wat glad nie vir hulle sin maak nie, aanstel, sal dit rampspoedig wees. Jy moet: 1) die regte mense vind; 2) die regte werk vir hulle gee; 3) hulle vertrou om die regte ding te doen. As jy hierdie drie dinge doen, sal jy lank genoeg lewe om die vrugte van jou sukses te smaak.
Sielskos: Pred 5-8; Joh 11:38-57; Ps 81; Spr 30:11-14
2018-11-19
1 Samuel 17:37 NLV
Dawid het geseëvier omdat hy die krag van suksesse in die verlede verstaan het. Hy het vir koning Saul gesê, ‘Die Here wat my uit die kloue van die leeu en die beer gered het, sal my ook red van hierdie Filistyn!..’ Let op: 1) Oorwinnaars van reuse bou op suksesse in die verlede. ‘n Reeks suksesse bou jou momentum en laat jou toe om die mengsel van vertroue in God en vertroue in jouself te ontdek, wat jou onstuitbaar maak. 2 Samuel 3:1 sê, ‘Die gevegte tussen Saul se koningshuis en die ondersteuners van Dawid het lank voortgeduur. Gaandeweg het Dawid al sterker geword, terwyl Saul se koningshuis verswak het’ (NLV). Onthou dus jou oorwinnings in die verlede en vertrou dat die God wat dit voorheen gedoen het, dit weer sal doen. 2) Oorwinnaars van reuse skep hulle eie styl. Dawid kon nie Saul se wapenrusting dra nie – en jy kan nie in iemand anders se gawes optree nie. Jy het jou eie wapen, jou eie wapenrusting en jou eie styl. Jy is uniek toegerus om jou reus te verslaan. Dawid het Goliat met ‘n slingervel verslaan. Moses het die Rooi See met ‘n herderstok geskei. Paulus het siekte en demoniese onderdrukking met ‘n sakdoek oorwin. Vir Simon Petrus, is krag oor siekte deur sy skaduwee vrygestel en baie kere het Jesus eenvoudig net die woord gespreek. Vermy die drang om Saul se wapenrusting aan te trek en klee jouself in die klere wat God jou gegee het. Bly in jou gawes. Bly in jou salwing. Bly in jou taak. Hierdie wen kombinasie van bou op jou suksesse in die verlede en die skepping van jou eie styl, sal daartoe lei dat jy selfvertroue en kreatiwiteit uitstraal, twee geheime wapens van ‘n oorwinnaar van reuse.
Sielskos: Pred 1-4; Joh 11:28-37; Ps 50; Spr 30:7-10
2018-11-18
1 Samuel 17:40 NLV
In Dawid se tyd het hulle deur middel van ‘verteenwoordiging’ geveg. Een man sou die nasie as ‘n geheel beveg en die land van die soldaat wat verloor, sou onderdanig aan die land van die wenner word. Dus was die geveg tussen Dawid en Goliat inderwaarheid ‘n geveg tussen Israel en die Filistyne. Ons is bekend met Dawid se oorwinning oor die reus met geloof, ‘n klippie en ‘n slingervel. Tog sê die Skrif vir ons dat hy nie net een klip opgetel het nie, maar ‘…vyf gladde klippies…’ Hoekom? Dit was nie ‘n gebrek aan geloof nie – hy het geweet dat Goliat vier broers het. Let op: 1) Oorwinnaars van reuse besef dat hulle reus groter kwessies verteenwoordig. ‘n Reus staan nooit alleen nie, agter hom lê sy redes. Verslawing, mishandeling en woede word almal deur ander kwessies voortgedryf en ondersteun. Iewers agter die ooglopende reus is sy ondersteunende broers – pyn, skuldgevoelens, verlies en skaamte. Dawid was voorbereid met vyf klippies – een vir Goliat en een vir elk van sy vier broers. Wat lê agter jou reus? Met God se hulp kan jy beide jou reus en sy ondersteuningspan oorwin. 2) Oorwinnaars van reuse word nie deur die uitdagings oorweldig nie. Moet nooit toelaat dat jou vrese jou geloof oorweldig nie. Die Bybel sê dat ‘…God het ons nie ‘n gees van skugterheid gegee nie, maar van krag, liefde en selfbeheersing’ (2 Timoteus 1:7 NLV). Vrees sal op die mislukkings in die verlede voed, maar jy kan nie toelaat dat gister se vrees vandag se geloof oorweldig nie. Neem dus vandag jou mislukkings; maak ‘n lys daarvan op ‘n stuk papier en skryf in groot letters bo-aan die bladsy: ‘Dinge wat ek nie weer hoef te probeer nie! Ek het die les geleer.’
Sielskos: Dan 1:3-21; Dan 3:7-30; Dan 5:10-12; Dan 9:1-19
2018-11-17
Lukas 16:10 NLV
Let op: 1) Oorwinnaars van reuse is nie oorwinnaars van die begin af nie! Dawid was ‘n sagmoedige musikant, ‘n nederige skaapwagter en is oor die hoof gesien. Getrouheid was sy voordeel – getrouheid in sy talent, getrouheid met sy vader se skape, getrouheid aan God. Deur ‘n meester oor die klein dinge te word, het hy ‘n meester oor die groot dinge geword. Getrouheid is ‘n algemene eienskap van ongewone geestelike presteerders. Matteus het as ‘n tollenaar begin; Petrus was ‘n visserman; Elisa was ‘n boer en Jesus was ‘n meubelmaker. Het jy al ooit daaraan gedink dat Jesus meer jare as ‘n meubelmaker as ‘n prediker spandeer het? Hy was in die klein dinge getrou. God het nog nooit ‘n onaktiewe of onproduktiewe persoon geroep nie. Elke kandidaat het met iets begin voor hulle as ‘n oorwinnaar van reuse geroep is. 2) Oorwinnaars van reuse weet dat die beloning altyd groter as die risiko is. Die lewe beloon risiko’s en aksie, maar Satan sal woorde van vrees en angs in jou oor fluister om die beloning te minimaliseer en die risiko te vergroot. Tog bly die waarheid staan dat God mense wat voortdurend soek, beloon (sien Hebreërs 11:6). Jy moet glo dat die belofte groter as die probleem is, dat die doel groter as die teenstand is en dat God groter as jou reus is. Die geloof dat God groter is, is die kern van ‘n geloof wat in die aangesig van vrees aanhou. Vrees is Satan se wapen om jou te verlam; geloof is God se wapen om jou te mobiliseer. Maak dus op God staat, daag die reus uit en word deel van God se geledere van oorwinnaars van reuse.
Sielskos: Rom 15-16; Joh 11:17-27; Ps 8; Spr 30:5-6
