2018-11-28
Jesaja 41:10 NLV
Om sukses in die lewe te behaal, het jy twee dinge nodig: 1) Die regte mense. Soms is die eerste stap om uit moedeloosheid te kom, om iemand te vind wat jou daaruit kan lig. Moenie soos die ou wees wat op die punt was om by die brug af te spring toe ‘n polisieman hom genader het en gesê het, ‘Niks kan so erg wees nie. Vertel my daarvan.’ Toe die ou klaar gepraat het – het hulle altwee gespring! Jy mag dalk glimlag, maar die geselskap wat jy hou, kan jou of oplig of aftrek. Paulus het geskryf, ‘God, wat die vernederdes bystaan, het ons ook ondersteun deur die teenwoordigheid van Titus’ (2 Korintiërs 7:6 NLV). Jy het ‘n Titus in jou lewe nodig en jy moet ‘n Titus vir ander mense word. Die Bybel sê, ‘Help ander gelowiges wat swaarkry…’ (Galasiërs 6:2 NLV). 2) Die regte perspektief. Meer as die helfte van verkoopsmense misluk omdat hulle nie ‘n tweede of derde keer teruggaan nie. Omtrent 58 persent maak een oproep en stop dan. 25 persent maak twee oproepe en stop dan. Vyftien persent maak drie oproepe en stop dan. Die twaalf persent wat weer en weer teruggaan, maak 80 persent van alle verkope uit. Dis die groep waarin jy behoort. Moenie met mislukking tevrede wees nie; staan op en probeer weer! God sal saam met jou werk (sien Filippense 1:6). Weier om nederlae te aanvaar. Onthou, jy sal beloon word vir dit wat jy klaargemaak het, nie vir dit wat jy begin het nie. Soms is die laaste sleutel aan die ring die een wat die deur oopsluit, so vra dus vir God vir die krag om aan te hou totdat jy wen!
Sielskos: Gen 17-19; Joh 13:31-38; Ps 118:1-9; Spr 31:6-9
2018-11-27
Spreuke 18:24 NLV
Een dag het twee koeie oor ‘n heining gekyk en die volgende woorde op ‘n verbygaande melktrok gesien: ‘Gepasteuriseerd, Gehomogeniseerd, Vitamiene A bygevoeg.’ Een koei het vir die ander koei gesê, ‘Dit laat mens bietjie onvoldoende voel, nie waar nie?’ Is dit hoe jy vandag voel? Daar is soveel om te doen en nie genoeg van jou om dit te doen nie? Of jy dink dat jy nie die vermoë en hulpbronne het nie? Onthou die ou Beatles liedjie: ‘When I was younger, so much younger than today, I never needed anybody’s help in any way…Help me if you can, I’m feeling down, and I do appreciate you being round. Help me get my feet back on the ground; won’t you please, please help me?’ Selfs in ‘n perfekte wêreld kon Adam nie op sy eie regkom nie, dus het God gesê, ‘…Ek sal vir hom ‘n metgesel maak, sy gelyke wat hom kan help’ (Genesis 2:18 NLV). Soms vereis die oplossing meer as gebed of berading; dit verg ‘n vriend wat verstaan – veral een wat al dieselfde gevegte geveg en gewen het. In Handelinge hoofstuk drie het God vir Petrus en Johannes gebruik om ‘n verlamde man wat by die tempelpoort gesit het, te genees. Daar het egter ‘n ander wonderwerk vroeër gebeur. Petrus het vir Jesus verloën, plat op sy gesig geval en na sy ou vissermanswerk teruggekeer. Johannes het egter geweier om hom te laat gaan. Gevolglik is Petrus herstel, ‘n verlamde man is genees en drie duisend mense is vir Christus gewen. Jy het nie baie mense in jou lewe nodig nie; jy het net die regte mense nodig. Vra dus vir God vir ‘n ware vriend wat aan jou sy sal bly; en doen dan dieselfde vir iemand anders.
Sielskos: Gen 13-16; Joh 13:18-30; Ps 114; Spr 31:1-5
2018-11-26
2 Konings 2:9 NLV
In die Ou Testament, ‘…sê Elia vir Elisa: ‘Wat kan ek vir jou doen voordat ek van jou weggeneem word?’ ‘Laat my asseblief ‘n dubbele erfgenaamsdeel van u gees ontvang,’ antwoord Elisa. ‘Jy vra my ‘n moeilike saak,’ antwoord Elia. ‘As jy sien hoe ek van jou af weggeneem word, sal jy dit ontvang’…’ (verse 9-10 NLV). Elisa het sy ‘dubbele erfgenaamsdeel’ ontvang en aangegaan om twee keer soveel wonderwerke as sy mentor, Elia, te doen. Die sleutelfrase hier is: ‘As jy sien hoe ek van jou weggeneem word, sal jy dit ontvang.’ Met ander woorde, ‘Bly naby aan my en dan kan jy dit kry.’ Let op die vier plekke waar Elisa vir Elia gevolg het: 1) Gilgal. Dis waar die Israeliete besny is (sien Josua 5). Jy moet deur God se Gees gelei word en vir jou vleeslike natuur nee sê – en dis ‘n moeilike ding om te doen. 2) Bet-El. Dis waar Jakob sy hemelse visioen gehad het (sien Genesis 28:19). Tensy jy ‘n visie het wat van God af kom, sal jy doelloos deur die lewe dryf. 3) Jerigo. Dis waar Josua van aangesig tot aangesig met God gekom het en gebid het, ‘…Wat wil Meneer vir sy dienaar sê?’ (Josua 5:14 NLV). Dis eers wanneer jy heeltemal aan God oorgee, wat jy oorwinning sal ervaar. 4) Jordaan. Omdat die Jordaanrivier in die Dooie See uitloop, verteenwoordig dit die dood. Wees dus voorbereid daarop om jou eie begrafnis by te woon – elke dag (sien 1 Korintiërs 15:31). Paulus het gesê, ‘Ek leef nie meer nie, maar Christus lewe in my… (Galasiërs 2:20 NLV). Wil jy ‘n dubbele erfgenaamsdeel van God se Gees ontvang? Jy kan dit kry, mits jy aan hierdie voorwaardes voldoen.
Sielskos: Gen 10-12; Joh 13:1-17; Ps 95; Spr 30:29-33
2018-11-25
Maleagi 3:10 NLV
God is ‘n noukeurige beplanner. Hy het byvoorbeeld ‘n banket genaamd ‘die bruilofsfees van die Lam’ tweeduisend jaar vooruit beplan (sien Openbaring 19:9). Hy het vir Noag opdrag gegee om die ark ‘…135 meter lank, 22.5 meter breed en 13.5 meter hoog…’ (Genesis 6:15 NLV), te bou. Hy het vir Moses die spesifieke kleure en materiaal wat Hy vir die tabernakel wou gehad het, gegee (sien Eksodus 26). Kyk ook hoe presies hy die seisoene beplan en die sterre posisioneer. Kan jy jouself indink dat so ‘n God nie ‘n plan vir jou finansies – die produk van jou werkslewe – sal hê nie? Verseker nie! In die Skrif sê Hy: ‘…Bring al die tiendes na die stoorkamers… Toets My hierin of Ek nie vir julle die vensters van die hemel sal oopmaak nie. Ek sal voorspoed op julle laat reën wat meer as genoeg vir julle sal wees!’ Let op: al die tiendes – dit beteken voor jou belasting en ander aftrekkings. Hoekom? Omdat Hy die eerste in jou lewe in alles wil wees – insluitend jou finansies. God het ook vir sy volk gesê, ‘…Julle het die tiendes en offerandes gesteel!’ (Maleagi 3:8 NLV). Stop en dink aan die woord ‘offerandes’ of anders gestel, ‘aanbod’. Wanneer jy jou huis verkoop, besluit jy om die ‘aanbod’ van die koper te aanvaar. In hierdie Skrifgedeelte sê God inderwaarheid, ‘Tot jy vir My dit gee waarop ek geregtig is (die tiende), hoekom moet Ek enige ander offerandes of aanbiedinge aanvaar?’ Om jou tiende te gee gaan nie net oor geld nie, dit gaan oor geloof en gehoorsaamheid. Wanneer jy jou tiende uit jou inkomste gee, kan jy verwag dat God sy seën op jou sal uitstort soos Hy beloof het. God sê, ‘…Toets My hierin…’ Toets God en kyk wat gebeur!
Sielskos: Luk 1:26-56; Luk 2; Luk 2:41-52; Luk 8:19-21
2018-11-24
Lukas 17:26 NLV
As jy ‘n dokter gehad het wie se diagnose soveel keer verkeerd was as die voorspellings van sommige profesie kundiges, sou jy die medikasie geneem het wat hy voorgeskryf het? Een ‘kundige’ het miljoene boeke verkoop waarin hy voorspel het dat die wegraping van die kerk teen 1988 sou plaasvind. Toe, sonder apologie of verduideliking, het hy ‘n tweede boek geskryf waarin hy voorspel het dat dit in 2007 sou plaasvind. ‘n Ander televisie prediker het ‘wegraping spertye’ aangebied wat in 1975 sou begin. Toe het hy die dag van wegraping in 1992 vasgemaak. Hy het later onverskrokke die datum in sy volgende boek na 2012 verander. (Interessant genoeg, verwys hy ook na Nostradamus, die 16de eeuse okkultiese siener, as ‘n ‘groot Bybelse skolier’). Die Bybel sê vir ons om ‘…dwase, onsinnige argumente…’ (2 Timoteus 2:23 NLV), te vermy. Hoekom? Omdat dit ons dwaas in die oë van die wêreld laat lyk! Wie gaan na ‘n kerk wat aanhoudend verkeerde datums voorspel, luister, wanneer Jesus ons self maan om glad nie datums te voorspel nie? ‘Net soos dit gebeur het gedurende dit tyd van Noag, só sal dit gaan gedurende die dae van die Seun van die Mens: Hulle het geëet, gedrink, getrou… tot op die dat dat Noag in die ark ingegegaan het. Die sondevloed het gekom en hulle almal vernietig’ (Lukas 17:26-27 NLV). God het nie vir Noag ‘n datum gegee nie, Hy het vir hom ‘n werk gegee. Die einde het nie aangebreek totdat die werk voltooi was nie. Jesus het gesê, ‘Tog ken niemand die presiese datum nie… Dit weet net die Vader’ (Matteus 24:36 NLV). Die hele wêreld moet nog deur die evangelie bereik word, so in plaas van om datums te voorspel, kom ons rol ons moue op en raak besig.
Sielskos: Gen 7-9; Joh 12:37-50; Ps 102:18-28; Spr 30:24-28
2018-11-23
Job 23:9 NLV
Soms sal jy God se teenwoordigheid nie aanvoel nie. Te midde van moeilike tye, het Job gesê, ‘Maar soek ek in die ooste, kry ek Hom nie. In die weste is Hy ook nie te vind nie. Ek sien Hom nie in die noorde nie, want Hy is onsigbaar. In die suide vind ek Hom nie’ (verse 8-9 NLV). Job het ver van God af gevoel. Ten spyte van sy onvermoë om God aan te voel, het hy egter besluit, ‘Maar Hy weet waarheen ek gaan! Wanneer Hy my toets soos goud in ‘n vuur, sal Hy my onskuldig verklaar’ (vers 10 NLV). Moeilike dae vereis besluite van geloof. Dawid het gesê, ‘Die dag wanneer ek bang word, sal ek net op U vertrou’ (Psalm 56:4 NLV). Wanneer jy nie die weë van God kan verstaan nie, vertrou op die onveranderlike en liefdevolle karakter van God. Gaan deur jou Bybel en maak ‘n lys van God se karaktereienskappe en hou die lys byderhand vir moeilike dae. ‘n Skrywer merk op: “My lys lees as volg: ‘Hy is steeds soewerein. Hy ken steeds my naam. Engele reageer steeds op sy roep. Die harte van regeerders gee steeds aan sy bevele toe. Die dood van Jesus red steeds siele. Die gees van God woon steeds in heiliges. Die hemel is steeds net ‘n hartklop weg. Die graf is steeds net ‘n tydelike tuiste. God is steeds getrou. Hy word nie onkant betrap nie. Hy gebruik alles tot sy eer en ten goede van my. Hy gebruik tragedie om sy wil te bereik; en sy wil is reg, heilig en perfek. Hartseer mag dalk saam met die nag kom, maar vreugde kom saam met die môre.'” In tye wat verander, staan met vertroue op die onveranderlike karakter van God.
Sielskos: Gen 4-6; Joh 12:20-36; Ps 102:12-17; Spr 30:21-23
