2018-12-04
Romeine 8:26 NLV
Die twee pilare van ‘n gelowige se daaglikse lewe behoort gebed en Skriflesing te wees. Terwyl gebed eenvoudig mag wees, is dit nie altyd maklik nie. Ons het nie die motivering nie, ons aandag word maklik afgelei en ons is nie altyd seker waarvoor ons moet bid nie. God sien ons menslike ontoereikendheid raak en ‘help’ ons deur sy inwonende Heilige Gees: ‘…die Gees neem ons gebedsbehoeftes voor God op met versugting wat nie in menslike taal verwoord kan word nie. Dié God… weet wat die Gees in die oog het – dat Hy in harmonie met God se wil vir die gelowiges intree’ (verse 26-27 NLV). Dit beteken dat dit nie saak maak hoe jy voel wanneer jy bid nie, die Heilige Gees bid saam met jou en vir jou; en transformeer jou swakste gebed in ‘n kragtige beroep op die Vader. Wanneer dit by die tweede pilaar kom, naamlik die Woord van God, is die Heilige Gees se rol net so dinamies. Jesus het gesê, ‘Wanneer Hy ook al kom, die Gees van die waarheid, sal Hy julle begelei in die volle waarheid. Hy sal nie uit Homself praat nie, maar net sê wat Hy hoor. Hy sal die dinge wat gaan kom, aan julle meedeel’ (Johannes 16:13 NLV). Die Heilige Gees doen dus drie dinge: 1) Hy lei jou wanneer jy die Woord van God bestudeer en dit wil verstaan. 2) Hy neem dit wat Jesus wil hê jy moet weet en openbaar dit aan jou. 3) Hy maak jou begrip oor dinge wat nog gaan gebeur, oop. Goeie naslaanwerke, Skrif-gebaseerde hulpbronne en vaardige Bybelonderwysers kan verseker behulpsaam wees, maar hulle is nie ‘n plaasvervanger wanneer dit by die aanhoor van die Heilige Gees en die versigtige luister na wat Hy vir jou wil sê, kom nie.
Sielskos: Gen 30:25-31:55; Joh 15:18-27; Ps 65; Spr 31:25-27
2018-12-03
Johannes 14:16 NLV
Daar is baie voordele daaraan verbonde om die Heilige Gees te ontvang. In die Nuwe Testament het Jesus vir sy dissipels gesê, ‘En Ek sal die Vader vra en Hy sal vir julle ‘n ander Raadgewer stuur om vir altyd by julle te wees.’ Die Griekse oorspring van die woord ‘Raadgewer’ is Paracletos, wat iemand beteken wat langs jou kom om jou te versterk, aan te moedig en jou raad te gee. Dink daaroor. Wanneer jy moedeloos, verward en magteloos voel, het jy toegang tot ‘n wyse, deernisvolle, bevoegde helper wat jou sal ondersteun en jou van dit wat jy nodig het, sal voorsien. In plaas daarvan om te sukkel om dit alleen te probeer doen, leer om op Hom te steun, vertrou op sy krag en vra Hom om sy magtige werk in jou te doen. Hier is nog ‘n seëning van die Heilige Gees. Paulus sê vir ons, ‘Julle moet julle lewe deur die Heilige Gees laat beheer. Laat Hy aan die stuur staan van alles wat julle dink en doen en sê. Dan sal die sonde julle nooit onderkry nie’ (Galasiërs 5:16 DB). Die stryd tussen Gees en vlees is aanhoudend. Hoe goed ons dit ookal bedoel, ons vleeslike natuur kan nooit deur menslike denke onderdruk word nie; dit produseer net nederlae en ontmoediging. Nog ‘n voordeel van die inwonende Gees is dat jy vir ‘n Gees-gerigte lewenstyl kwalifiseer. Die Bybel sê, ‘Want almal wat hulle laat lei deur die Gees van God – hulle is God se kinders’ (Romeine 8:14 NLV). Om te bid en jou beste raaiskoot te neem is nie God se manier nie. Die Heilige Gees se leiding – nie jou raaiskote nie – moet jou lewe rig.
Sielskos: Gen 28:1-30:24; Joh 15:5-17; Ps 14; Spr 31:22-24
2018-12-02
Johannes 16:7 NLV
Selfs toe die dissipels se harte seer was oor Jesus se vertrek, het Hy hulle verseker dat dit tot hulle voordeel was, omdat dit ‘n nuwe era van mag en outoriteit aan hulle sou bekendmaak (sien Johannes 14:12). Dit was nie die einde nie, maar ‘n voortsetting van Christus se bediening, soos die Heilige Gees die aflosstokkie uit die Seun se hand geneem het en dit in hulle hande geplaas het. Die Seun sou weggaan, maar die Gees sou ‘…vir altyd by [hulle] wees…’ (Johannes 14:16 NLV). Dit was hulle ‘voordeel’. Die Gees sou hulle menslike liggame binnegaan en permanent in hulle woon! Dis God se Gees wat ons as sy permanente woonplek kies. Het jy al ooit nagedink oor die ‘voordeel’ wat dit vir jou beteken? Jy mag dalk byvoorbeeld môre wakker word en gestres, moeg en geïrriteerd voel en hierdie gevoelens kan maklik jou dag dikteer. Omdat die Gees egter in jou woon, hoef hierdie dinge jou nie te beheer nie. Paulus skryf, ‘Of verstaan julle nie dat julle liggame ‘n tempel van die Heilige Gees is wat in julle woon… nie?..’ (1 Korintiërs 6:19 NLV). Sodra jy daardie belofte deur geloof aanneem, word jy God se tempel. Jy kan by die werk wees, jou kinders skool toe vat, met die hond stap, wag vir die biopsie se resultate, of die begrafnis van jou beste vriend bywoon en God se Gees sal elke sekonde saam met jou wees. Kan jy nou sien hoekom Jesus vir sy dissipels gesê het dat dit goed is dat Hy weggaan en vir hulle die Heilige Gees stuur? Wat jy ookal doen, moenie dat hierdie lewensveranderende waarheid by jou verbygaan nie!
Sielskos: Luk 10:38-42; Joh 11:1-44; Joh 12:1-3
2018-12-01
Johannes 14:16 NLV
Onthou jy aandete sonder selfone? Jou familie wat mekaar se geselskap geniet, ononderbroke deur tegnologie? Ons is ‘n generasie wat besig is om die kuns van kommunikasie – en intimiteit – te verloor – en dit het ook ‘n impak op die tyd wat ons alleen saam met God spandeer. Alhoewel Jesus voor die tegnologiese era gelewe het, was Hy in konstante aanvraag; die skares het Hom alle ure van die dag en nag agtervolg. Nietemin, sê die Skrif vir ons, ‘Nog voor dagbreek die volgende oggend het Jesus opgestaan en alleen op ‘n stil plek gaan bid’ (Markus 1:35 NLV). Jesus het tyd gemaak om alleen met sy Vader te wees. Dit verg geestelike dissipline om stil te wees en te luister; om doelbewus die lewe se geraas te elimineer. As ons dit egter oefen, sal ons ‘n hartsbevredigende verhouding met die inwonende Heilige Gees ontdek. Belê ‘n paar minute daarin om Johannes hoofstukke 14-16 te lees en laat jou gees toe om Jesus se boodskap te absorbeer. Hy wil hê dat sy dissipels moet vrede hê en Hy troos hulle met die versekering dat hulle nooit alleen gelaat sal word nie. Hierdie is seëninge wat Hy ook met ons wil deel. Vraag: Hoe kan jy hierdie vrede en troos kry? Antwoord: ‘Dis ‘n interne belewenis,’ omdat die Heilige Gees in jou woon. Dit mag dalk die Christendom se bes-bewaarde geheim wees, dat die Heilige Gees beskikbaar is vir en in elke ware gelowige woon; en alles aan ons voorsien om die lewe se moeilikhede en geleenthede te hanteer. Die ‘Raadgewer’ is deur die Seun belowe, deur die Vader gestuur en vandag is Hy ons s’n deur geloof. Gryp Hom aan, vertrou op sy krag, ervaar sy vrede en volg sy leiding.
Sielskos: Gen 25:19-27:46; Joh 14:26-15:4; Ps 146; Spr 31:18-21
2018-11-30
1 Petrus 1:7 NLV
Die toetse waar voor ons te staan kom, openbaar beide ons swakpunte en ons sterkpunte. Wanneer die Bybel van ‘n ‘…vuur wat metaal suiwer…’ (Maleagi 3:2 NLV) praat, is ons geneig om aan die negatiewe dinge wat God uit ons karakter wil verwyder, te dink. Ons het egter ook innerlike sterkpunte en gawes wat gesuiwer moet word waarvan ons nie bewus is nie, omdat daar nog nie ‘n vereiste op hulle geplaas is nie. In 1 Konings 17, toe die weduwee en haar seun Elia ontmoet het, was daar hongersnood in die land en hy het hulle gevra om hulle laaste maaltyd met hom te deel. Miskien dink jy, ‘Tipies prediker!’ Moenie te gou gevolgtrekkings maak nie! Een van die beste dae van hierdie vrou se lewe is toe God iets van haar geloof vereis het. Haar reaksie het haar toekoms verander en haar familie gered. Wanneer jy dus voor ‘n behoefte te staan kom, hoe reageer jy? Onttrek jy? Weerhou jy? Gee jy uit ‘n sin van verpligting? Of sien jy dit as ‘n geleentheid om God te gehoorsaam en jou toekoms te verander? Toe God vir Moses na Farao toe gestuur het, het Hy gesê, ‘Ek weet dat die koning van Egipte julle nie sal laat gaan nie. Hy sal eers gedwing moet word. Daarom sal Ek ingryp…’ (Eksodus 3:19-20 NLV). Vandag mag God dalk die vyand toelaat om jou te toets, om sodoende die volgende te openbaar: 1) hoe baie Hy vir jou omgee; 2) hoe jy sal optree wanneer jou rug teen die muur is; 3) wie jy sal glo wanneer God sê dat Hy sal ingryp en die Vyand sê dat hy jou nie sal laat gaan nie. Dis waaroor hierdie toets gaan.
Sielskos: Gen 24:1-25:18; Joh 14:15-25; Ps 118:19-29; Spr 31:14-17
2018-11-29
Hebreërs 12:2 DB
Betreffende Jesus, sê die Bybel: ‘… Hy het dit alles verdra omdat Hy geweet het dat daar soveel blydskap daarna vir Hom wag… Hou Hom gedurig in gedagte… As julle sy voorbeeld volg, sal julle nooit moedeloos word en tou opgooi nie’ (verse 2-3 DB). Dis jou visie wat jou passie voed. Het jy al ooit agtergekom hoe God dikwels die ergste sondaars in sy grootste dienaars transformeer? Dis omdat hulle passievol is en sodra daardie passie geharnas en herlei word, word hulle effektief in sy koninkryk. Nou verstaan jy hoekom die Vyand so hard probeer om jou te vernietig. Hy weet dat daar geen keer aan jou sal wees sodra jy jou passie met God se plan in lyn gebring het nie. Passie is geestelike energie. In plaas daarvan om te probeer om jou passie te onderdruk, laat God dit herlei. Jesus het vir die kerk in die eindtyd gesê, ‘…Ek weet dat jy nie koud of warm is nie. Ek sou wat wou gee as jy maar net koud of warm was’ (Openbaring 3:15 NLV). Met wie praat Hy? Belydende Christene wat lewe, trou, kinders kry, karre koop, beleggings maak en al die dinge van hulle moderne eweknieë doen, maar dit sonder passie doen. Hulle gaan net deur die bewegings. Die Bybel sê, ‘Beproef en sien…’ (Psalm 34:9 NLV). Met ander woorde, neem posisie in en swaai die kolf! Wat daarvan as jy mis? Jy sal verseker mis as jy nie die kolf swaai nie! Jou instink vir selfbehoud kan jou van die enigste kans wat jy dalk in die lewe kry, beroof. As jy dus vandag lê, staan weer op. As jy misluk, probeer weer. Vra God om die vure van passie weer binne jou aan die brand te blaas.
Sielskos: Gen 20-23; Joh 14:1-14; Ps 118:10-18; Spr 31:10-13
